بُری حرکتوں سے باز رکھنا

تربیتِ اولاد میں ضروری ہے کہ بچوں سے محبت اور شفقت رکھتے ہوئے انہیں غلط کاموں اور حرکتوں اور باتوں سے روکیں، اس لئے کہ بچوں کی بعض عادتیں اگر چہ کہ ان کے بچپن میں بری نہیں لگتیں، بلکہ اس پر تو بعض ماں باپ عش عش کر اٹھتے ہیں، اور انہیں اس بد تمیزی پر اپنے بے جا پیار سے نوازتے ہیں، جس کا نتیجہ یہ ہوتا ہے کہ بچے کے دل میں یہ بات بیٹھ جاتی ہے کہ یہ واقعی کوئی اچھا کام ہے جس پر مجھے شاباشی مل رہی ہے، آگے چل کر وہ لڑکا اسی بگاڑ کے راستے پر چل پڑتا ہے، پھر اپنے ماں باپ اور معاشرے کے لئے ایک ناسور بن جاتا ہے، اسی کی طرف اشارہ کرتے ہوئے رسول اﷲ صلی اللہ علیہ وسلم نے ارشاد فرمایا :

“مَا مِنْ مَوْلُوْدٍ اِلاَّ یُوْلَدُ عَلَی الْفِطْرَۃِ فَاَبَوَاہُ یُہَوِّدَانِہِ اَوْ یُنَصِّرَانِہِ أَوْ یُمَجِّسَانِہِ کَمَا تُنْتَجُ الْبَھِیْمَۃُ بَھِیْمَۃً جَمْعَائَ فَھَلْ تُحِسُّوْنَ فِیْھَا مِنْ جَدْعَائَ ؟‘‘ ثُمَّ یَقُوْلُ ابو ھریرۃ رضی اللّٰہ عنہ، فِطْرَۃَ اللّٰہِ الَّتِیْ فَطَرَ النَّاسَ عَلَیْھَا الآیۃ۔[1]

ترجمہ : ہر پیدا ہونے والا فطرت ( فطرت سے مراد تمام سلف صالحین اور اہلِ علم کے نزدیک اسلام ہے) پر پیدا ہوتا ہے لیکن اسکے ماں باپ اُسے یہودی یا عیسائی یا مجوسی بنا دیتے ہیں، جیسے کہ جانور اپنی ماں کے پیٹ سے صحیح سالم پیدا ہوتا ہے کیا تم اس میں کسی کو کان یا ناک کٹا پاتے ہو ؟ پھر ابوہریرہ رضی اللہ عنہ نے فِطْرَۃَ اللّٰہ ِاللَّتِیْ فَطَرَ النَّاسَ عَلَیْھَا(یہ اﷲ کی فطرت ہے جس پر اس نے لوگوں کو پیدا کیا )تلاوت فرمائی۔

اس حدیث سے معلوم ہوا کہ بچوں کو ان کی فطری سادگی سے ہٹانے میں والدین کا زبردست کردار رہتا ہے۔لیکن آپ صلی اللہ علیہ وسلم نے اپنے قول وعمل سے اہلِ دنیا کو بچوں

[1] بخاری: کتاب الجنائز1358-۔4775۔مسلم : کتاب القدر22؍23۔

کے تربیت کے اسلوب سکھادئے :

عن عمرو بن أبی سلمۃ رضی اللّٰہ عنہما قال :” کُنْتُ غُلَامًا فِیْ حِجْرِ رَسُوْلِ اللّٰہِ صلی اللّٰہ علیہ وسلم وَکَانَتْ یَدِیْ تَطِیْشُ فِی الصَحْفَۃِ، فَقَالَ لِیْ رَسُوْلُ اللّٰہِ صلی اللّٰہ علیہ وسلم یَا غُلَامُ ! سَمِّ اللّٰہَ، وَکُلْ بِیَمِیْنِکَ وَکُلْ مِمَّا یَلِیْکَ ” فَمَازَالَتْ تِلْکَ طِعْمَتِیْ بَعْدُ۔ ( بخاری :5376مسلم:2022 )

عمرو بن ابی سلمۃ رضی اﷲ عنہما( آپ امّ المؤمنین امّ سلمہ رضی اللہ عنہا کے فرزند ہیں، رسول اللہ صلی اللہ علیہ وسلم سے اپنی والدہ کے نکاح کے بعد آپ صلی اللہ علیہ وسلم کی ہی زیرِ نگرانی پرورش پائی ) کہتے ہیں : میں رسول اﷲ صلی اللہ علیہ وسلم کی پرورش میں تھا، کھاتے ہوئے میرا ہاتھ سارے برتن میں گھومتا تھا، آپ صلی اللہ علیہ وسلم نے مجھ سے فرمایا :

” اے لڑکے ! اﷲ کا نام لو ( بسم اﷲ کہو ) اپنے داہنے ہاتھ سے کھاؤ اور اپنے قریب سے کھاؤ ” اسکے بعد سے میرے کھانے کا وہی طریقہ ہوگیا۔( جو نبی صلی اللہ علیہ وسلم نے بتلایا )

عن أبی ہریرۃ رضی اللّٰہ عنہ أنّہ قال : أَخَذَ الْحَسَنُ بْنُ عَلِیٍّ رضی اللّٰہ عنہما تَمْرَۃً مِنْ تَمْرِ الصَّدَقَۃِ، فَجَعَلَہَا فِیْ فِیْہِ، فَقَالَ رَسُوْلُ اللّٰہِ صلی اللّٰہ علیہ وسلم ” کَخٍْ، کَخٍْ، إِرْمِ بِہَا، أَمَا عَلِمْتَ إِنَّا لَا نَأْکُلُ الصَّدَقَۃَ “۔ (بخاری:1491 مسلم :1069)

تر جمہ : ابو ہریرہ رضی اللہ عنہ فرماتے ہیں : حسن بن علی رضی اﷲ عنہما نے زکاۃ کے کھجوروں میں سے ایک کھجور لی اور اپنے منہ میں ڈال لی، آپ صلی اللہ علیہ وسلم نے انہیں( ڈانٹتے ہوئے ) فرمایا : ” تھوک دو تھوک دو،اسے پھینک دو، کیا تمہیں نہیں معلوم کہ ہم زکاۃ کا مال نہیں کھاتے”۔

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی