جھوٹ سے نفرت دلانا

والدین کے لئے ضروری ہے کہ وہ اپنی اولاد کو جھوٹ سے نفرت دلائیں اور انہیں یہ تعلیم دیں کہ جھوٹ ایک کبیرہ گناہ ہے، اور خود بھی بچوں سے جھوٹ نہ بولیں اور نہ ان سے جھوٹ کہلوائیں، کیونکہ اس کی برائی کے لئے یہی کافی ہے کہ اسلام نے اسے منافقین کی عادتوں میں سے ایک قرار دیا :

عن عبد اللّٰہ بن عمرو بن العاص رضی اللّٰہ عنہما قال قال رسول اللّٰہ صلی اللّٰہ علیہ وسلم :

” أَرْبَعٌ مَنْ کُنَّ فِیْہِ کَانَ مُنَافِقًا خَالِصًا، وَمَنْ کَانَتْ فِیْہِ خَصْلَۃٌ مِنْہُنَّ کَانَتْ فِیْہِ خَصْلَۃٌ مِنَ النِّفَاقِ حَتَّی یَدَعَہَا : إِذَا اؤْتُمِنَ خَانَ، وَإِذَا حَدَّثَ کَذَبَ،وَإِذَاعَاہَدَغَدَرَ،وَإِذَاخَاصَمَ فَجَرَ”

۔(بخاری:34۔2459۔3178 مسلم :58)

عبد اﷲ بن عمرو بن العاص رضی اﷲ عنہما کہتے ہیں کہ رسول اﷲصلی اللہ علیہ وسلم نے ارشاد فرمایا : ” جس میں تین خصلتیں ہیں وہ پکّا منافق ہے، اور جس میں ان میں سے ایک خصلت ہے اس میں نفاق کی ایک خصلت ہے جب تک کہ وہ اسے نہ چھوڑ دے، 1) جب امانت رکھی جائے تو خیانت کرے،2) بات کرے تو جھوٹ بولے،3) جب عہد کرے تو بے وفائی کرے،4) جب جھگڑا کرے تو گالی بکے۔”

بچوں کے ذہنوں میں یہ بات بٹھائی جائے کہ جھوٹ بولنے سے آدمی کا شمار اﷲ تعالی کے پاس بھی جھوٹے لوگوں میں ہوجاتا ہے :

عن عبد اللّٰہ بن مسعود رضی اللّٰہ عنہ قال : قال رسول اللّٰہ صلی اللّٰہ علیہ وسلم :

” وَإِیَّاکُمْ وَالْکَذِبَ، فَإِنَّ الْکَذِبَ یَھْدِیْ إِلَی الْفُجُوْرِ، وَإِنَّ الْفُجُوْرَ یَھْدِیْ إِلَی النَّارِ، وَلَا یَزَالَ الرَّجُلُ یَکْذِبُ وَیَتَحَرَّی الْکَذِبَ حَتَّی یُکْتَبَ عِنْدَاللّٰہِ کَذَّابًا “ (بخاری:6094 مسلم :6805)

تر جمہ : عبد اﷲ بن مسعود رضی اللہ عنہ کہتے ہیں : رسول اﷲصلی اللہ علیہ وسلم نے فرمایا : ’’ تم جھوٹ سے بچو، کیونکہ جھوٹ برائیوں کی طرف رہنمائی کرتا ہے، اور برائیاں دوزخ کی راہ دکھلاتی ہیں، آدمی ہمیشہ جھوٹ کہتا اور جھوٹ کی تلاش میں رہتا ہوا اﷲ تعالی کے پاس کذّاب ( بہت بڑا جھوٹا ) لکھا جاتا ہے۔

عموماً یہ دیکھا جاتا ہے کہ چند باپ خود اپنے طرزِ عمل سے بچوں کو جھوٹ کی تعلیم دیتے ہیں اگر کسی شخص سے اسے ملنا نہ ہو اور وہ گھر پر آجائے تو بچوں سے کہلواتے ہیں کہ:”ابّا جان گھر پر نہیں ” یہ معصوم سمجھتے ہیں کہ ایسا کہنا بھی کوئی اچھا فن ہے پھر وہ اسی فن کا مظاہرہ اپنے والدین اور دیگر لوگوں سے کرتے ہیں۔ مائیں عمومًا اپنے بچوں کو ترغیب دینے کے لئے کئی طرح سے جھوٹ بولتی ہیں، لیکن قربان جائیئے انسانیت کے مربیء اول اور مرشدِ کامل 1 کی ذاتِ گرامی پر کہ آپ نے بچوں سے ترغیبًا جھوٹ کہنے کو بھی اﷲ تعالیٰ کے پاس حقیقی جھوٹ کے برابر قرار دیا :

وعن عبد اللّٰہ بن عامر رضی اللّٰہ عنہ قال : دَعَتْنِیْ أُمِّیْ یَوْمًا، وَرَسُوْلُ اللّٰہِ صلی اللّٰہ علیہ وسلم قَاعِدٌ فِیْ بَیْتِنَا، فَقَالَتْ : ھَا تَعَالْ اُعْطِکَ، فَقَالَ لَہَا رسول اللّٰہ صلی اللّٰہ علیہ وسلم : مَا أَرَدْتِ أَنْ تُعْطِہُ ؟ قَالَتْ : أَرَدْتُ أَنْ أُعْطِیَہُ تَمْرَۃً، فَقَالَ لَہَا رَسُوْلُ اللّٰہِ صلی اللّٰہ علیہ وسلم : أَمَا إِنَّکِ لَوْ لَمْ تُعْطِیْہِ شَیْئًا کُتِبَتْ عَلَیْکِ کِذْبَۃٌ “ (أبوداؤد 4993:)

تر جمہ : عبد اﷲ بن عامر رضی اللہ عنہ کہتے ہیں کہ :”ایک دن میری ماں نے مجھے بلاتے ہوئے کہا : تم آؤ تو میں تمہیں ایک چیز دیتی ہوں ” اس وقت رسول اﷲ صلی اللہ علیہ وسلم ہمارے گھر میں تشریف رکھتے تھے، آپ صلی اللہ علیہ وسلم نے میری ماں سے کہا : اگر وہ آجائے تو تم اسے کیا دینا چاہتی تھیں ؟ انہوں نے کہا :”میں اسے ایک کھجور دینا چاہتی تھی ” تب رسول اﷲصلی اللہ علیہ وسلم نے ارشاد فرمایا : اگر تم اسے بلا کر کچھ نہ دیتیں تو تمہارے نامۂ اعمال میں ایک جھوٹ لکھا جاتا۔

والدین کے لئے ضروری ہے کہ وہ اپنی اولاد کواسلاف کی سچائی کے واقعات سناتے رہیں تاکہ ان میں بھی اس عادت کو اپنانے کا جذبہ پیدا ہوجائے ۔

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی