20. NASEEHAT
NASEEHAT
Muhatram Hazraat! Hamne pehle khutba jumu’ah mein Roz-e-Qayamat ki jin houlnaakiyon ka tazkirah kiya hai ham unki tasveer karkay sonchay aur amal swaleh ki taraf barhain taake ham Allah Ta’aala kay fazal-o-karam se in houlnaakiyon se bach saken.
Allah Ta’aala farmaata hai:
﴿ وَاتَّقُوْا یَوْمًا تُرْجَعُوْنَ فِیْہِ إِلَی اللّٰہِ ثُمَّ تُوَفّٰی کُلُّ نَفْسٍ مَّا کَسَبَتْ وَہُمْ لاَ یُظْلَمُوْنَ ﴾
“Aur us din se daro jisme tum Sab Allah Ta’aala ki taraf loutae jaougay aur har shakhs uskay aamaal ka poora poora badla diya jaega aur unpar zulm nahi kiya jaega.”
[Surah Baqkharah:02: 281]
Aur Farmaaya:
ا:﴿وَاتَّقُوْا یَوْمًا لاَّ تَجْزِیْ نَفْسٌ عَنْ نَفْسٍ شَیْئًا وَّلاَ یُقْبَلُ مِنْہَا شَفَاعَۃٌ وَّلاَ یُؤْخَذُ مِنْہَا عَدْلٌ وَّلاَہُمْ یُنْصَرُوْنَ﴾
“Aur us din se darte raho jab koi kisi ko nafa na de sakhega- na koi shafa’at qubool ki jaegi aur na koi badla aur fidya liya jaega- aur na hi unki madad ki jaegi.”
[Surah Baqarah:02: 48]
Mere bhayyon! Salaf swaliheen(رحمہم اللہ ) aur hamare darmiyaan farq imaan mein kami beshi ka hai chunacha salaf jab qayamat kay baare mein baat karte ya suntay the tou unhay yu lagta tha ke goya wo qayamat ko apni ankhon se dekh rahe hain- phir wo Waajibat-e-Deen (Maslan: Namaz, Roza, Hajj, zakat aur bandon kay lazmi huqooq wagherah) ki adaegi kay sath sath nawafil mein bhi aik dusre se sabqat lejaane ki koshish karte the- Yu unkay imaan o yaqeen mein aur izafa hojata- lekin ham jab qayamat kay muta’lliq guftugu karte ya suntay hain tou goya aik aam sa mouzoo samjhkar kuch bhi muta’assir nahi hote aur nawafil mein aik dusre se sabqat lejaana tou kujaa hum tou Faraiz e illahi aur wajibat-e-deen ki adaegi mein bhi ghaflat barattay hain! Tou us soorat mein hamare imaan o yaqeen mein izafa kaise hosakta hai?
Hamari is ghaflat ka ilaj yeh hai ke ham maut ko ziyada se ziyada yaad karen, Qur’an-e- Majeed ki tilawat ma’ani quran mein tadabbur kay sath karen, Namaz mein Qur’an ki qiraat tarteel aur tawajjo kay sath karen, Har namaz mein aik do surton ko bar bar parhne ki bajaey mukhtalif surton ko poori tawajjo kay sath parhen, Allah Ta’aala ki azmat-o-kibraaee ko yaad karen aur uski nishaaniyon mein ghaur o fikar karen, masnoon tareeqay kay mutabiq bar bar qabristaan mein jaen aur apni aaqibat ki fikar karen.
Hamne Roz-e-Qayamat kay ba’az houlnaakiyon kay baare mein chand guzarishat pichlay khutbe mein aur chand guzarishat aj kay khutbe mein paish kiye- Main Allah Ta’aala se dua goh hon ke wo hamain in imaan walon mein shamil karday jinkay muta’lliq uska farmaan hai:
((نَّمَا الْمُؤْمِنُوْنَ الَّذِیْنَ إِذَا ذُکِرَ اللّٰہُ وَجِلَتْ قُلُوْبُہُمْ وَإِذَا تُلِیَتْ عَلَیْہِمْ آیَاتُہُ زَادَتْہُمْ إِیْمَانًا وَّعَلٰی رَبِّہِمْ یَتَوَکَّلُوْنَ. الَّذِیْنَ یُقِیْمُوْنَ الصَّلاَۃَ وَمِمَّا رَزَقْنَاہُمْ یُنْفِقُوْنَ. أُوْلٰئِکَ ہُمُ الْمُؤْمِنُوْنَ حَقًّا لَّہُمْ دَرَجَاتٌ عِنْدَ رَبِّہِمْ وَمَغْفِرَۃٌ وَّرِزْقٌ کَرِیْمٌ))
“Bas imaan walay tou aise hotay hain ke Jab Allah Ta’aala ka zikar aata hai tou unkay dil dar jaatay hain aur jab Allah Ta’aala ki aayaatein unko padhkar sunae jaati hain tou wo ayaten unkay imaan ko aur ziyada kardeti hain- Aur wo log apnay Rab par hi tawaakkul karte hain jo ke namaz ki paabandi kartay hain aur hamne unko jo kuch diya hai wo usme se kharch karte hain- Sachay imaan walay tou yehi log hain- Unke liys unkay Rabb kay paas baray darjay hain aur maghfirat aur izzat ki rozi hai.”
[Surah Anfaal:08: 2-4]
Bradar-e-Islam! Alamat-e-Qayamat ka zuhoor, Barzakhi zindagi, Qabr ki sakhtiyaan, Qayamat kay din ki houlnaakiyaan, Aamaal ka wazan, pul siraat wagherah…Ye saare umoor agar ham par asar andaz nahi hotay aur hamari zindagi mein koi tabdeeli ronuma nahi hoti tou bateye phir kaunsi cheez asar andaaz hosakti hai? Yaqeenan ye aise umoor hain jinme nasihat hasil karne kay liye bohat kuch moujood hai bashartay kay koi nasihat hasil karnay ki koshish kare!
Lihaza hamain apni zindagi ko maut se pehle ghanimat tasawwur karna chaheye, sehat o tandrusti ko marz se pehle, jawaani ko burhaapay se pehle aur faraghat ko mashghuliyat se pehle ghanimat samjhtay huay naik aamaal karlena chaheye- kahin aisa na ho ke hamari zindagi ghaflat mein guzar jaey aur maut achaanak hamare darwazay par dastak de day- Tab sivae afsoos-o-nadamat aur pachtaway kay aur koi chaarae kaar na hoga- Wallahu musta’aan.
REFERENCE:
BOOK: “ZAAD UL KHATEEB” JILD: 02
BY: DR. MUHAMMAD ISHAQ ZAHID
دوسرا خطبہ
محترم حضرات ! ہم نے پہلے خطبۂ جمعہ میں روزِ قیامت کی جن ہولناکیوں کا تذکرہ کیا ہے ہم ان کا تصور کرکے سوچیں اور عمل ِ صالح کی طرف بڑھیں تاکہ ہم اللہ تعالیٰ کے فضل وکرم سے ان ہولناکیوں سے بچ سکیں ۔
اللہ تعالیٰ فرماتے ہیں:
﴿ وَاتَّقُوْا یَوْمًا تُرْجَعُوْنَ فِیْہِ إِلَی اللّٰہِ ثُمَّ تُوَفّٰی کُلُّ نَفْسٍ مَّا کَسَبَتْ وَہُمْ لاَ یُظْلَمُوْنَ ﴾
’’اور اس دن سے ڈرو جس میں تم سب اللہ تعالیٰ کی طرف لوٹائے جاؤ گے اور ہر شخص کو اس کے اعمال کا پورا پورا بدلہ دیا جائے گا اور ان پر ظلم نہیں کیا جائے گا ۔ ‘‘
لبقرۃ2:281
اور فرمایا:﴿وَاتَّقُوْا یَوْمًا لاَّ تَجْزِیْ نَفْسٌ عَنْ نَفْسٍ شَیْئًا وَّلاَ یُقْبَلُ مِنْہَا شَفَاعَۃٌ وَّلاَ یُؤْخَذُ مِنْہَا عَدْلٌ وَّلاَہُمْ یُنْصَرُوْنَ﴾
’’ اور اس دن سے ڈرتے رہو جب کوئی کسی کو نفع نہ دے سکے گا ۔ نہ کوئی شفاعت قبول کی جائے گی اور نہ کوئی بدلہ اور فدیہ لیا جائے گا ۔ اور نہ ہی ان کی مدد کی جائے گی ۔ ‘‘
البقرۃ2:48
میرے بھائیو ! سلفِ صالحین رحمہم اللہ اور ہمارے درمیان فرق ایمان میں کمی بیشی کا ہے۔چنانچہ سلف جب قیامت کے بارے میں بات کرتے یا سنتے تھے تو انھیں یوں لگتا تھا کہ گویا وہ قیامت کو اپنی آنکھوں سے دیکھ رہے ہیں ۔ پھر وہ واجباتِ دین ( مثلا نماز ، روزہ ، حج ، زکاۃ اور بندوں کے لازمی حقوق وغیرہ) کی ادائیگی کے ساتھ ساتھ نوافل میں بھی ایک دوسرے سے سبقت لے جانے کی کوشش کرتے تھے ۔یوں ان کے ایمان ویقین میں اور اضافہ ہوجاتا۔ لیکن ہم جب قیامت کے متعلق گفتگو کرتے یا سنتے ہیں تو گویا ایک عام سا موضوع سمجھ کر کچھ بھی متاثر نہیں ہوتے اور نوافل میں ایک دوسرے سے سبقت لے جانا تو کجا ہم تو فرائض الٰہیہ اور واجباتِ دین کی ادائیگی میں بھی غفلت برتتے ہیں ! تو اس صورت میں ہمارے ایمان ویقین میں اضافہ کیسے ہو سکتا ہے ؟
ہماری اس غفلت کا علاج یہ ہے کہ ہم موت کو زیادہ سے زیادہ یاد کریں ، قرآن مجید کی تلاوت معانی ٔ قرآن میں تدبر کے ساتھ کریں ، نماز میں قرآن کی قرا ء ت ترتیل اور توجہ کے ساتھ کریں ، ہر نماز میں ایک دو سورتوں کو بار بار پڑھنے کی بجائے مختلف سورتوں کو پوری توجہ کے ساتھ پڑھیں ، اللہ تعالیٰ کی عظمت و کبریائی کو یاد کریں اور اس کی نشانیوں میں غور وفکر کریں ، مسنون طریقے کے مطابق بار بار قبرستان میں جائیں اور اپنی عاقبت کی فکر کریں ۔
ہم نے روزِ قیامت کی بعض ہولناکیوں کے بارے میں چند گذارشات پچھلے خطبہ میں اور چند گذارشات آج کے خطبہ میں پیش کیں ۔میں اللہ تعالیٰ سے دعا گوہوں کہ وہ ہمیں ان ایمان والوں میں شامل کردے جن کے متعلق اس کا فرمان ہے :
﴿إِنَّمَا الْمُؤْمِنُوْنَ الَّذِیْنَ إِذَا ذُکِرَ اللّٰہُ وَجِلَتْ قُلُوْبُہُمْ وَإِذَا تُلِیَتْ عَلَیْہِمْ آیَاتُہُ زَادَتْہُمْ إِیْمَانًا وَّعَلٰی رَبِّہِمْ یَتَوَکَّلُوْنَ. الَّذِیْنَ یُقِیْمُوْنَ الصَّلاَۃَ وَمِمَّا رَزَقْنَاہُمْ یُنْفِقُوْنَ. أُوْلٰئِکَ ہُمُ الْمُؤْمِنُوْنَ حَقًّا لَّہُمْ دَرَجَاتٌ عِنْدَ رَبِّہِمْ وَمَغْفِرَۃٌ وَّرِزْقٌ کَرِیْمٌ﴾
’’ بس ایمان والے تو ایسے ہوتے ہیں کہ جب اللہ تعالیٰ کا ذکر آتا ہے تو ان کے دل ڈر جاتے ہیں اور جب اللہ کی آیتیں ان کو پڑھ کر سنائی جاتی ہیں تو وہ آیتیں ان کے ایمان کو اور زیادہ کردیتی ہیں ۔ اور وہ لوگ اپنے رب پر ہی توکل کرتے ہیں جو کہ نماز کی پابندی کرتے ہیں اور ہم نے ان کو جو کچھ دیا ہے وہ اس میں سے خرچ کرتے ہیں ۔ سچے ایمان والے تو یہی لوگ ہیں ۔ ان کیلئے ان کے رب کے پاس بڑے درجے ہیں اور مغفرت اور عزت کی روزی ہے ۔ ‘‘
الأنفال8:4-2
برادران اسلام ! علاماتِ قیامت کا ظہور ، برزخی زندگی ، قبر کی سختیاں ، قیامت کے دن کی ہولناکیاں ، اعمال کا وزن ، پل صراط وغیرہ …یہ سارے امور اگر ہم پر اثر انداز نہیں ہوتے اور ہماری زندگی میں کوئی تبدیلی رونما نہیں ہوتی تو بتائیے پھر کونسی چیز اثر انداز ہو سکتی ہے ؟ یقینا یہ ایسے امور ہیں جن میں نصیحت حاصل کرنے کیلئے بہت کچھ موجود ہے بشرطیکہ کوئی نصیحت حاصل کرنے کی کوشش کرے !
لہٰذا ہمیں اپنی زندگی کوموت سے پہلے غنیمت تصور کرنا چاہئے ، صحت وتندرستی کو مرض سے پہلے ،خوشحالی کو تنگ حالی سے پہلے ، جوانی کو بڑھاپے سے پہلے اور فراغت کو مشغولیت سے پہلے غنیمت سمجھتے ہوئے نیک اعمال کما لینے چاہییں۔ کہیں ایسا نہ ہو کہ ہماری زندگی غفلت میں گذر جائے اور موت اچانک ہمارے دروازے پر دستک دے دے ۔ تب سوائے افسوس وندامت اور پچھتاوے کے اور کوئی چارہ کار نہ ہو گا ۔ واللّٰه المستعان.
ریفرنس：
کتاب：”زادالخطیب” جلد：دوم
ڈاکٹر محمد اسحاق زاہد