✦ SHAIKH MAQBOOL AHMED SALAFI (حفظه اللّٰه) KA TAARUF 

 

✦ Naam-o-waldiyat : 

 

Maqbool Ahmed Salafi Bin Abdul-khalq Faizi Bin Abdul-Baari .

 

✦ Tareekh-o-jaaye paidaiesh : 

 

Sarkari Rocord ke mutabiq 7 / July baroz Jumeraat (1984) Hindustan ke State Bahhar ke Zila Madhubani Dist Andhra Thaari mein paidaiesh hui .

 

✦ Ibtidayi T’aleem :

 

Maktab ki t’aleem Gaon ke Madrasay mein hui, yeh Madrassa to aik bahana tha asal t’aleem waalid sahib jo is Madrasay ke Naib Sadr-ul-Modarreseen aur ‘ilaqay ke M’aroof Khateeb-o-‘Aalime Deen thay ya’ani Abdul-Khaliq Faizi ( رحمه الله ) ke paas hui, ghar pay maar maar ke padhatay thay, Madrassa mein bhi kisi Jama’at mein shareek nahi tha, saari kitaaben Abbu Mohtaram apne paas hi padhatay, jab bahar jane ka khayaal aaya to aik saal ke liye Maktab ki aakhri Jama’at mein shaamil kardiya. 

 

✦ A’ala T’aleem :

 

Mere bade bhai Manzoor-ul-rab Islami ( Motakhrrij Madrasa Islamia Ragho nagar Bhauwara Madhubani, Bihar) Jamia’ Salafia Banaras mein padhnay ke bade shauqeen thay magar yahan un ka dakhla na ho saka to unhon ne apne dil mein mujhe padhanay ki thaan li aur (Sun 1996) mein mujhe leker Banaras pohanche aur Allah ke Fazl-o-karam se doosri Jama’at mein dakhla hogaya. 

 

✦ Meri asal t’aleem Jamia’ Salfiah Banaras se hi hai. 

 

Yahan par Mutawassitah sania se fazeelat awwal tak t’aleem haasil ki. Phir kuch dinon Tadrees ka silsila raha us ke ba’ad jab Ahya-al-Turas Al-Islami Kuwait se bator Dae’e bahaali hogayi to baqa’ida Markazi jam’iat Ahal-e-Hadees Kathmandu Nepal ki Zere nigrani D’awat-o-Tableegh ka fareeza anjam dene laga. Chunke Jamia’ Millia Islamia mein bhi padhnay ka shauq tha aur dakhla ke liye Test imtihan mein paas bhi hogaya magar maali majboori ki wajah se dakhla ki karwai mukammal na kar saka is bina par BA (Hons) Urdu mein correspondence course  kiya aur awwal darja se kamyaab hua. Bihar Board se bhi wastania ta Fazil ki Degree haasil hai. Is ke ‘ilawa  UP board se Farsi mein Munshi-o-Kaamil aur Moulvi paas hon .

 

✦ Jamia’ Salafia aur Asaataza Kiram :

 

Chunke Jamia’ Salafia hi meri t’aleem ka asal markaz hai is liye Waalid giraami ke ba’ad Jamia’ Salafia ke ba’az mere Asaataza Kiram  yeh hain :  

( 1 ) Dr. Raza Ullah Muhammad Idrees Mubarak Poori 

( 2 ) Dr. Muqtada Hassan Azhari 

( 3 ) Dr. Ibrahim Madni 

( 4 ) Sheikh Muhammad Raees Nadvi 

( 5 ) Sheikh Abdusalam Madni 

( 6 ) Sheikh Aziz-ul-Rahman Salafi 

( 7 ) Sheikh Mustaqeem Salafi 

( 8 ) Sheikh As’ad A’azmi 

( 9 ) Sheikh Abu-ul-Qasim Farooqi Salafi 

( 10 ) Sheikh Abdul-Matiin Madni 

( 11 ) Sheikh ‘Ubaidullah Tayyab Makki

( 12 ) Sheikh Muhammad Na’eem Madni 

( 13 ) Sheikh Muhammad Younis Madni 

( 14 ) Sheikh Ahsan Jameel Madni 

( 15 ) Sheikh Saeed Maisoori Madni 

( 16 ) Sheikh Muhammad Hanif Madni 

( 17 ) Sheikh Ali Hussain Salafi 

( 18 ) Sheikh Asghar Ali Imam Mehdi Salafi

 ( 19 ) Sheikh Ahmed Mujtaba Madni 

( 20 ) Sheikh Ehsan Ullah Salafi 

( 21 ) Sheikh Muhammad Yahya Faizi 

( 22 ) Sheikh Abdul-Wahaab Hijazi 

( 23 ) Sheikh Amrullah Rahmani.

 

‘✦ Ilmi Wa D’awati khidmaat :

 

➤ Daurane Taalib ‘Ilmi khitabat wa sahaafat mein achi dilchaspi thi aur Sanvia mein bachon ke Haytia ka Naib Mudeer aur fazeelat saal awwal mein salana Magazine Al manaar ka Editor raha. 

➤ Faraghat ke ba’ad Janakpur Nepal ke aik Idaray ne Tarjumaan ka ijra ke liye mujhe apne Madrasa mein bulaayaa us waqt main Dehli mein Graduation ke Iraday  se tha. Dehli ke qiyam ke douraan aik Madrasay mein t’aleem dainay ke sath pandrah roza Akhbar “Aayinaye Haque” ki Edarat bhi sambhale hua tha magar kuch maali aur gharelu mushkilaat ke sabab mein Janakpur aa gaya, Risala to na nikla magar Tadrees ki shuru’waat kar di. 

➤ Tafseer, Miskatul-Masabeeh Hidaya Al-Nuhoo Insha ki t’aleem di.

➤  Sath hi urdu seekhnay waalon ke liye aik Course urdu ka rakha tha. 

➤ Chand mah ba’ad Madrassa chod ke ghar aa gaya .

➤ Abhi ghar hi tha keh kathamandu se Markazi jam’iat Ahal-e-Hadees Nepal ke Naazim a’ala Sheikh ‘Ata Urrahman Madni ( Sirha Nepal ) ka phone aaya. Unhon ne kaha keh mujhe jam’iat Ahal-e-Hadees Magazine nikalna hai is liye aap mere yahan aayiyae.

➤ Main un ke bulaway pay Markazi jam’iat Ahal-e-Hadees Kathmandu Nepal gaya aur Jamiat Ahya Al-Turas Al Islami kuwait ke Lajna Al-Qarah Al-Hindia se Ta’aqud bhi hogaya. Risala to na nikal saka magar

➤ D’awati kaam achha khasa kiya. Aik Madrasay ka qiyam ‘amal mein laya, bachon ki t’aleem shuru’ ki,

➤  Jummah ki Namaz ka bhi ihtimaam kiya aur ja baja D’awati  Programme rakhay.

➤  Un kaamon mein haath batanay ke liye ✯ Haaji Abdul-Mubeen Sahib ( Saakin kathamandu, Hathi Bin ) aur deegar ahbaab qaabil shukar hain. 

➤ Us waqt Kathmandu se koi Urdu Akhbar ya Jareeda nahi nikalta tha. Main ne himmat karkay tane tanha pandrah Roza Urdu Akhbar “Lauho Qalam”  jaari kiya jo keh Musalmanon ke masail pay tajzia ki shakal mein hua karta tha .

➤ Aap hi likhta, aap hi type karta, aap hi Design karte, aap hi Press se Chhapta, aap hi Bazaar mein farokht karta. 

➤ Mehnat se jaari kiya to kuch log sath hogaye, kisi ne maali ta’awun kiya to kisi ne hausala afzai ki. Ittafaq se un hi dinon Saudi ‘Arab se Jaliyat ( اسلامی دعوہ سنٹر وسط بریدہ القصیم ) ka Viza dastyaab hogaya. Yun kathamandu mein paanch saal D’awati fareeza anjaam dainay ke ba’ad Saudi ‘Arab Bureda Al-Qasem ke Dawah Center aagaya. Yahan teen saal tak khalis Nepali zabaan mein D’awati kaam kiya aur Sekdon Nepali ko Islam mein daakhil karne ka sabab bana. 

Allhamdulillah, Allah Ta’ala hamaaray is kaam ko qubool farmaaye aur aakhirat mein nijaat ka zariy’a banaaye. Ameeen

➤ Teen saal ba’ad Buraidah Al-Qasim se Taif ke Dawah Center se jud gaye, yahan par taqreeban Nou saalon tak D’awati fareeza anjaam diya.

➤ Zameeni satah par D’awat ke sath Social Media par jis qader meri Tahreerein nazar aati hain, is ki ibtida Taif se hi hoti hain. Mustaqil tor par sawaalon ka jawab dainay ke sath sekodon ‘Ilmi wa tahqeeqee Maqalaat likhnay ka mauqa’ mila .

 

✦ Tasnifi khidmaat :

 

Mazaameen to Daur-e-Taalib ‘Ilmi se hi likhta raha hoon, asha’at ka silsila faraghat ke ba’ad shuru’ hua, Hindustan ke ‘ilawa Pakistan-o-Nepal ke Mutaddid Akhbar-o-Jarayd mein mazaameen shaya’ hotay rahay aur aaj bhi ba’az Risalon mein mustaqil tor par mere mazaameen shaya’ hotay hain .

 

✦ Tarjuma-o-Taleef ki m’aloomaat darj zail hain .

 

( 1 ) Islam ka Mu’aashi nizaam aur Jadeed iqtisaadi nazriaat ( ‘Aalmiat ka Maqalah )

( 2 ) Islam aur ‘Aalmgiriat 

( 3 ) Tableeghi Jama’at : t’aaruf-o-tajzia

( 4 ) Ma’ani لا الہ الا اللہ ( Urdu Tarjuma)

( 5 ) Al-aman Al-sani ( Matboo’ Nepali Tarjuma )

( 6 ) Surdawam Al-N’am ( Matboo’ Nepali  Tarjuma )

( 7 ) Fazal Al-Islam ( Nepali Tarjuma )

( 8 ) Ramadaan-ul-Mubarak ke fazail-o-masaail  ( Do martaba asha’at Dehli Maharashtra )

( 9 ) Janaza ke Ahkam-o-masaail

( 10 ) Janaza se muta’aliq sawaal-o-jawaab

( 11 ) Sawaal-o-jawaab ka mukhtasir majmuaa’

( 12 ) Bint-e-Hawa ke masaail ( zair-e-taba’ Mumbai )

( 13 ) Maqalate Maqbool

( 14 ) Umra ka masnoon tareeqa aur us ke ehkaam-o-masaail

( 15 ) Islam mein Zauzain ke haqooq

( 16 ) Tohfaye  Ramazan ( Ba shakal sawaal-o-jawaab )

 

✦ Maujooda khidmaat :

 

Un dinon Taif se muntaqil hokar Jeddah aa gaya hoon aur yahan par Dedh saal se Jeddah  Dawah Center ( Al-Salaamah ) se wabasta hokar D’awati fareeza anjaam day raha hoon. D’awati fareeza ke sath Social Media mere liye aik mustaqil Plate Form hai jahan par rozana logon ke masail ka jawaab deta hoon. Mazaameen-o-Maqalaat likhta hoon is liye D’awat-o-Tableegh ke sath likhnay padhnay ka ‘umdah silsila tahnooz jaari hai. 

 

Allah Ta’ala is mein Barkat nazil farmaaye aur ‘Ilmi kamon ko mere haq mein, walidain ke haq mein, Asatazah aur jumla Moaawineen ke haq mein sadqa-e-Jaria banaaye. Ameeen

 

✯✯✯✯✯✯✯✯✯✯✯✯✯✯