07. Agar koi shakhs yeh sawaal karay keh tum Sifaat-e-Baari Ta’alaa mein taaweelein karnay waalon ko kafir Kiun kaho gay ya faasiq?
Aik intehaai aham sawaal aur us ka jawaab:
Agar koi shakhs yeh sawaal karay keh tum Sifaat-e-Baari Ta’alaa mein taaweelein karnay waalon ko kafir Kiun kaho gay ya faasiq?
Ham jawaaban a’rz karein gay: Kisi ko kafir ya faasiq qaraar denay ka faislah hamaari zimmahdaari nahin hai, Balkeh yeh ma’aamlah Allah Ta’alaa aur Us kay Rasool (صلی اللہ علیہ وسلم) kay supurd hai. Takfeer ya Tafsayeq, Ahkam-e-Sharee’ah mein say hai jis ka Marj’a Kitaab-o-Sunnat hai, Lehaaza is mein intehaai darjah ka tadabbur zarori hai. Kisi shakhs ko us waqt tak kafir ya faasiq nah kaha jay, Jab tak us kay kufr ya fisq par Qur’an aur hadith ki daleel nah ho.
Har woh musalmaan jo Zaahir-ul-A’daalah ho us kay ta’alluq say Asal-e-Shara’ai yahi hai keh us ka musalmaan aur A’aadil hona Qaaim-o-Barqaraar hai lehaaza jab tak kisi shara’ai daleel say un mein say kisi cheez kas zaail hona ma’aloom nah jo jay us waqt tak hargiz hargiz us ki takfeer ya tafsayeq nah ki jay Takfeer-o-Tafsayeq mein tasaahul baratnay waala do intehaai khatarnaak wa’eedoon ka mustahiq ban jaata hai:
Aik yeh keh woh shakhs Allah kay nazdeek musalmaan ho, Aap us par kufar ka fatwaa saadir kar kay Allah Ta’alaa par jhoot baandhnay kay murtakib ho jaayein, Is kay saath saath aap ka fatwaa Shakhs-e-Mahkoom a’alaih par bhi Buhtaan-o-Iftera qaraar paay ga (jo kabaair mein say hai.)
Dusri khatarnaak wa’eed yeh hai keh kufr ya fisq jo hukum aap nay apnay bhai par lagaya hai agar woh bari aur mahfooz hai to woh fatwaa aap par lout aaye ga.
عن عبداللّٰه بن عمر(رضی اللّٰه عنهما) ان النبى (صلی اللہ علیہ وسلم) قال: اذا كفر الرجل أخاه فقد باء بها احدهما،وفى رواية : ان كان كما قال والا رجعت إليه
“A’bdullah bin U’mar say marwi hai, Nabi (صلی اللہ علیہ وسلم) nay farmaaya: Agar kisi shakhs nay apnay kisi bhaai ko kafir kaha to donon mein say aik zaroor kafir ho jaaye ga. Aik riwaayat mein yun bhi waarid hai: Agar to woh us kay kehnay kay mutaabiq kafir hai, To durust warnah kufr ka hukum us (kehnay waalay) par lout aay ga”
(Muslim Ma’a Nawawi: 2/49)
“عن ابی ذر (رضی اللّٰه عنه) عن النبی (صلی اللہ علیہ وسلم) ومن دعا رجلا بالکفر أو قال: عدو اللّٰه ولیس کذلك الا حار عليه”
“Abu Zar Ghaffari (رضی اللّٰه عنه) say marwi hai, Rasoolullah (صلی اللہ علیہ وسلم) nay irshaad farmaaya: Jis nay kisi shakhs ko kafir ya Allah ka dushman kaha aur woh aisaa nahin hai to phir kehnay waala kafir aur Allah ka dushman qaraar paay ga” (Sahih Muslim)
❁ Lehaaza kisi bhi musalmaan par kufr ya fisq ka fatwaa laganay say qabal do cheezoon ko dekhnaa zarori hai:
➤ Aik yeh keh Qur’an ya hadith ki nas mujood ho keh us shakhs ka koi qaul ya fa’il kufr ko Mojib-o-Mustalzim hai.
➤ Dusri cheez yeh keh jis Shakhs-e-Mu’ayyan ko us kay kisi qaul ya fa’il ki bunyad par kafir ya faasiq kaha jaa raha hai, Us par takfeer ya tafsayeq ki tamaam shuroot waaqia’atan muntabiq ho rahin hain, Neez yeh keh takfeer ya tafsayeq kay jo mawaane’ ya jo rukawatein hain, Woh un sab ko uboor kar chuka hai.
Sab say aham shart yeh hai keh jis mukhaalifat ki binaa par usay kafir ya faasiq kaha jaa raha hai, Usay i’lm ho keh yeh mukhaalifat, Kufr ya fisq ko mojib hai.
❁ Allah Ta’alaa nay farmaaya:
“وَمَنۡ يُّشَاقِقِ الرَّسُوۡلَ مِنۡۢ بَعۡدِ مَا تَبَيَّنَ لَـهُ الۡهُدٰى وَ يَـتَّبِعۡ غَيۡرَ سَبِيۡلِ الۡمُؤۡمِنِيۡنَ نُوَلِّهٖ مَا تَوَلّٰى وَنُصۡلِهٖ جَهَـنَّمَ ؕ وَسَآءَتۡ مَصِيۡرًا ﴿۱۱۵﴾”
“Jo shakhs baawajood Raah-e-Hidaayat kay waazeh ho jaanay kay ba’ad bhi Rasoolullah (صلی اللہ علیہ وسلم) ka khilaaf karay aur tamaam mominon ki raah chod kar chalay, Ham usay udhar hi mutawajjah kar dein gay jidhar woh khud mutawajjah ho aur dozakh mein daal dein gay, Woh pohunchnay ki bohot buri jagah hai” (Al Nisaa: 115)
❁ Neez farmaaya:
وَمَا كَانَ اللّٰهُ لِيُـضِلَّ قَوۡمًۢا بَعۡدَ اِذۡ هَدٰٮهُمۡ حَتّٰى يُبَيِّنَ لَهُمۡ مَّا يَتَّقُوۡنَؕ اِنَّ اللّٰهَ بِكُلِّ شَىۡءٍ عَلِيۡمٌ ﴿۱۱۵﴾ اِنَّ اللّٰهَ لَهٗ مُلۡكُ السَّمٰوٰتِ وَالۡاَرۡضِؕ يُحۡىٖ وَيُمِيۡتُؕ وَمَا لَـكُمۡ مِّنۡ دُوۡنِ اللّٰهِ مِنۡ وَّلِىٍّ وَّلَا نَصِيۡرٍ ﴿۱۱۶﴾
“Aur Allah aisaa nahin karta keh kisi qoum ko hidaayat kar kay ba’ad mein gumraah kar day jab tak keh un cheezoon ko saaf saaf nah batlaa day jin say woh bachein beshak Allah har cheez ko khoob jaanta hai. Bilaashubah Allah hi ki saltanat hai aasmaanon aur zameen mein, Wahi zindah karta aur maarta hai aur tumhaara Allah kay siwaa nah koi dost hai aur nah koi madadgar hai.” (Al Taubah: 115-116)
Is liye Ahl-e-I’lm ka kehnaa hai keh faraaiz ka inkar karnay waala agar naya naya islaam mein daakhil huwa hai to usay us waqt tak kafir nahin kaha jaa sakta jab tak usay un faraaiz say aagah kar kay us par hujjat qaaim nah kar di jay.
Kisi par kufr ya fisq ka hukum laganay say maane’ ya rukawat yeh hai keh kufr ya fisq (ka qaul ya fa’il) us say bilaa Qasd-o-Iraadah zaahir huwa ho, Jis ki bohot si sortein hain:
➤ Aik yeh keh usay kufr ya fisq (kay qaul ya fa’il) par majboor kar diya jay, Chunaachah woh Barazaa-o-Raghbat aur Itmenaan-e-Qalb kay saath nahin balkeh majboori kay a’alam mein us ka muratkib ho raha hai to aisi surat mein usay kafir ya faasiq nahin kaha jaa sakta. Allah Ta’alaa nay farmaaya:
“مَنۡ كَفَرَ بِاللّٰهِ مِنۡۢ بَعۡدِ اِيۡمَانِهٖۤ اِلَّا مَنۡ اُكۡرِهَ وَقَلۡبُهٗ مُطۡمَئِنٌّۢ بِالۡاِيۡمَانِ وَلٰـكِنۡ مَّنۡ شَرَحَ بِالۡكُفۡرِ صَدۡرًا فَعَلَيۡهِمۡ غَضَبٌ مِّنَ اللّٰهِۚ وَلَهُمۡ عَذَابٌ عَظِيۡمٌ ﴿۱۰۶﴾”
“Jo shakhs apnay Imaan kay ba’ad Allah say kufr karay bajuz iskay jis par jabr kiya jay aur us ka dil Imaan par bar qaraar ho, Magar jo koi khulay dil say kufr karay to un par Allah ka ghazab hai aur inhi kay liye bohot badaa a’azaab hai” (Al Nahal: 106)
➤ Dusri surat yeh hai keh us par aisi akhlaaq ki haalat taari ho jay keh usay apni baat ka Ahsaas-o-Idraak nahin ho raha, Bandah is kaifiyat say us waqt do chaar hota hai jab woh Shiddat-e-Farah ya Shiddat-e-Gham ya Shiddat-e-Khouf ki kaifiyat say do chaar ho. Is ki daleel Sahih Muslim mein Anas Bin Maalik (رضی اللّٰه عنه) say marwi hadith hai, Rasoolullah (صلی اللہ علیہ وسلم) nay farmaaya:
للّٰه أشد فرحا بتوبة عبده حين يتوب إليه من احدكم كان على راحلته بارض فلاة فانفلتت منه و عليها طعامه فأيس منها فاتى شجرة فاضطجع فى ظلها قد أيس من راحلته فبينما هو كذلك اذهو قائمة عنده فأخذ بخطامها ثم قال من شدة الفرح: اللهم انت عبدى وأنا ربك، اخطأ من شدت الفرح
“Allah Ta’alaa ko Apnay banday kay taubah karnay ki khushi us banday say bhi zayadah hoti hai jo apni ountni par sawaar bay Aab-o-Giyah meedaan mein Mahuw-e-Safar ho keh achaanak us ki ountni kho jay, Ab us ountni par us ka khaanaa aur paani hai, Ab woh Talaash-e-Bisyaar kay ba’ad maayoos ho kar kisi darakht kay saay talay leet jaata hai, Woh apni sawaari say pori tarah maayoos ho chuka hai, Phir achaanak nazar utha kar dekhta hai to usay apni ountni saamnay khadi dikhaai deti hai, Woh dod kar us ki lagam tham letaa hai aur Shiddat-e-Farah say apni zubaan say yeh jumlah bol jaata hai: Aey Allah Tu Mera bandah aur mein Teraa Rabb hun. Chunaachah woh Shiddat-e-Farah ki binaa par yeh ghalat jumlah bol jaata hai.”
❁ Sheikh-ul-Islaam Ibn-e-Taimiyah (رحمه اللّٰه) Majmoo’-ul-Fataawaa Li Ibn-ul-Qaasim (12/180) mein farmaatay hain:
“Jahaan tak kisi ki takfeer ka ma’aamlah hai to is baaray mein durust baat yeh hai keh Ummat-e-Muhammadiyah (صلی اللہ علیہ وسلم) ka koi fard agar haq ki talaash ki koshish mein ghalti kar jay to usay kafir nahin kaha jaa sakta, Balkeh us ki ghalti to Qaabil-e-Ma’aafi hai, Lekin jis shakhs par Rasoolullah (صلی اللہ علیہ وسلم) ka farmaan waazeh ho, Woh hidaayat paa lenay kay baawajood Rasoolullah (صلی اللہ علیہ وسلم) ki mukhaalifat ka murtakib hota hai aur Sabeel-ul-Momineen ko chod kar kisi aur raastah ka peerokar ban jaata hai to woh yaqeenan kafir hai. Albattah jo shakhs apni khuwaahishaat ka peerokar ho aur Talab-e-Haq mein kotaahi kar jay aur bilaa i’lm koi baat keh jay to woh naa farmaan aur gunahgar qaraar paay ga, Yeh shakhs ba’az auqaat faasiq kehlaata hai aur ba’az auqaat gunahgar to hota hai lekin us ki neekiyaan gunaahon par raajeh aur ghaalib hoti hain”
❁ Sheikh-ul-Islaam (رحمه اللّٰه) Majmoo’-ul-Fataawaa (2/229) mein mazeed farmaatay hain:
“Mein aur meray saath majlis karnay waalay aksar saathi bakhoobi jaantay hain keh mein is baat ka sab say badaa munkir aur mukhaalif hon keh kisi mu’ayyan shakhs ko kafir, Faasiq ya a’aasi ya’ani na farmaan kaha jay. Illaa yeh keh yaqeeni i’lm ho jay keh is mua’ayyan shakhs par Kitaab-o-Sunnat ki daleel ki hujjat qaaim ho chuki hai, Aisi daleel jis ka mukhaalif kabhi to kafir hota hai, Kabhi faasiq aur kabhi a’aasi. Aur mein yeh baat bhi zikar karta rehtaa hon keh Allah Ta’alaa nay is ummat ki khataa ko ma’af farmaa diya hai, Khuwaah woh khataa Masaail-e-Khabriyah qauliyah say muta’alliq ho ya Masaail-e-‘Amliyah kay. (Masaail-e-Khabriyah ki misaal Sifaat-e-Baari Ta’alaa say aur Masaail-e-‘Amliyah ki misaal Salaat-o-Siyam wagheirah say di jaa sakti hai) is qism kay bohot say masaail mein Salaf Saaliheen ka aapas mein Nizaa’a-o-Khilaaf mujood aur qaaim hai, Lekin kisi nay kisi ko kabhi kafir, Faasiq ya a’aasi nahin kaha.”
❁ Sheikh-ul-Islaam nay is ki kuch misaalein bhi zikr farmaayein, Phir farmaaya:
“Mein yeh bhi bayan karta rehtaa hon keh Salaf-e-Saaliheen aur Aimmah-e-Kiraam kay kalaam say ba’az mukhaalif a’aqeedah rakhnay waalon ki takfeer bhi manqol hai, Woh bhi haq hai, Lekin zarori hai keh Takfeer-e-Mutlaq aur Takfeer-e-Mua’ayyan kay farq ko samjha jay”
(Mazeed farmaatay hain): “Takfeer ka a’amal aik badi wa’eed shamaar hota hai (lehaaza badi ahtiyat ki zarorat hai) ba’az auqaat aik shakhs ka qaul bazaahir Rasoolullah (صلی اللہ علیہ وسلم) ki takzeeb par muntaj hota hai, Lekin mumkin hai woh shakhs naya naya islaam mein daakhil ho ya mumkin hai keh woh kisi dur daraaz dehaat ka rehnay waala ho (keh us tak woh i’lm pohncha hi nah ho) ab yeh shakhs inkar kay baawajod us waqt tak kafir qaraar nahin diya jaaye ga jab tak us par woh i’lm pohnchaa kar hujjat qaaim nah kar li jay. Phir yeh bhi ho sakta hai keh aik shakhs nay woh nusoos sunay hi nah hon, Ya sunay hon lekin woh us kay nazdeeik saabit nah hon ya kisi dusray mua’aariz ki wajah say us nay koi taaweel kar rakhi ho, Khuwaah woh taaweel ghalat hi Kiun nah ho. Mein hameeshah Rasoolullah (صلی اللہ علیہ وسلم) ki is hadith ka zikar karta rehta hon jo Sahih Bukhari-o-Muslim mein marwi hai, Jis mein us Shakhs ka qissah mazkoor hai, Jis nay apnay beton ko apni moat say qabal laash ko jalaa denay aur us ki raakh ko hawaaon mein bikhernay aur samandar ki lehron kay supard kar denay ki wasiyat ki thi, Us shakhs nay yeh alfaaz bhi kahay thay “Agar Allah mujh ko pakadnay par qadir ho gaya to mijhay aisaa a’azaab day ga jo tamaam jahaanoon mein say kisi ko nahin diya ho ga” Beton nay wasiyat naafiz kar di, Allah Ta’alaa nay usay dobaarah zindah kar kay pochaa: Tum nay jo kuch kiya us cheez par tumhein kis nay ubhaaraa? Us nay kaha Teri khashiyat nay. To Allah nay usay ma’aaf farmaa diya.
Us shakhs nay Allah Ta’alaa ki qudrat par shak kiya tha, Woh yeh samjhay huway tha keh jab mein jalaa kar, Raakh bana kar udaa diya jaaon ga to dobaarah zindah nahin kiya jaa sakta. Yeh A’qeedah-e-Kufr hai, Jis kay kufr honay par musalmaanon ka ijmaa’a hai lekin yeh shakhs jaahil tha, Aur is maslah ka i’lm nahin rakhta tha, Is kay saath saath momin tha aur Allah Ta’alaa kay a’zaab kay khouf mein mubtalaa tha, Lehaaza Allah Ta’alaa nay usay ma’aaf farmaa diya.
To phir woh shakhs jo kisi maslah mein mutaawwil hai (khuwaah woh taaweel ghalat hi Kiun nah ho) deen mein neek niyati say ijtihaad karta hai, Rasoolullah (صلی اللہ علیہ وسلم) ki mutaaba’at par harees bhi hai, Woh is jalaay jaanay waalay insaan ki bah nisbat zayadah Ma’aafi-o-Maghfirat ka mustahiq hai.
Is taqreer say qaul aur qaail aur fa’il aur faa’il kay maa bain farq waazeh ho gaya, Chunaachah har qaul ya fa’il, Kufr ya fisq nahin hota keh jis kay qaail ya faa’il par kufr ka fatwaa laga diya jay.
Sheikh-ul-Islaam Ibn-e-Taimiyah nay Majmoo’-ul-Fataawaa (35/165) mein farmaaya hai: “Asal maslah yeh hai keh woh maqaalah jis ka Kitaab-o-Sunnat aur Ijmaa’a-e-Ummat say kufr hona saabit ho jay, Us maqaalah kay baaray mein kaha jay ga keh yeh Dalaail-e-Share’ayah ki roshni mein Kalmah-e-Kufr hai (nah keh is kay qaail ko kafir kaha jay ga) Kiunkeh kisi bhi shakhs ka Imaan aik aisi haqeeqat hai jis ka suboot Allah Ta’alaa aur us kay Rasool (صلی اللہ علیہ وسلم) kay faraameen say hota hai, To phir dusray logon ko kya haq hai keh woh shakhs apnay zunoon ya Khuwaahishaat-o-Meelaanat ki roshni mein us shakhs kay kufr ka hukum lagatay phirein….. Lehaaza yeh baat zarori nahin keh us Maqaalah-e-Kufr kay kehnay waalay har shakhs ki takfeer kar di jay, Jab tak us kay haq mein Shuroot-e-Takfeer saabit nah ho jaayein aur Mawaane’-e-Takfeer muntafi ya zaail nah ho jaayein. Jesay aik shakhs sharaab ya sood ko halaal kehtaa hai aur us ka haal yeh hai keh ya to woh naya naya musalmaan huwa hai ya kisi dur daraaz dehaat mein rehnay ki wajah say woh is maslay say naa waaqif aur naa aashnaa hai, Ya maslah to us tak pohnchaa lekin us ka Qur’an-o-hadith say saabit hona usay ma’alom nah huwa ho to aisay shakhs ko us waqt tak kafir qaraar nahin diya jaa sakta jab tak us par hujjat bil risaalah qaaim nah ho jay, jis ka Aayat-e-Kareemah mein zikar hai:
“لِئَلَّا يَكُوۡنَ لِلنَّاسِ عَلَى اللّٰهِ حُجَّةٌ ۢ بَعۡدَ الرُّسُلِ ؕ”
“Taakeh logon ko koi hujjat aur ilzaam Rasoolon ko bhejnay kay ba’ad Allah Ta’alaa par nah reh jay.” (Al Nisaa: 165)
Jab keh yeh baat bhi ma’alom hai keh Allah Ta’alaa nay is ummat kay Khataa-o-Nisyan ko ma’aaf farmaa diya hai.
Saabit huwaa keh ba’az auqaat aik qaul ya a’amal kufr ya fisq hota hai, Lekin yeh zarori nahin keh us ka kehnay ya karnay waala kafir ya faasiq ho. Ya to is liye keh us ki takfeer ya tafsayeq ki shart mujood nahin, Ya koi aisaa shara’ai u’zar mujood hai jo us kay kafir ya faasiq honay ko maane’ hai.
Lekin jis shakhs par haq waazeh ho jay, Lekin woh apnay mazhab ki peerwi ya apnay leader ya imaam ki taqleed ya dunya ki kisi aur Wajah-e-Tarjeeh ki binaa par us ki Mukhaalifat-o-Inkar par munhasir hai. To yeh shakhs us hukum ka mustahiqq ban jaata hai, Jis ka woh qaul ya fa’il mutaqaazi hai, Khuwaah woh kufr ho ya fisq.
Lehaaza aik momin par yeh baat farz aur mua’ayyan hai keh woh apnay har A’qeedah-o-A’mal ki asaas Kitaabullah aur Sunnat-e-Rasoolullah (صلی اللہ علیہ وسلم) ko qaraar day. Kitaab-o-Sunnat ko apna aisaa Imaam-o-Muqtada tasleem kar lay keh unhi kay noor say hameeshah roshni haasil karay aur unhi kay Tareeqah-o-Manhaj par pori zindagi chaltaa rahay. Yahi woh Siraat-e-Mustaqeem hai jisay ikhteyar karnay ka Allah Ta’alaa nay hukum diya:
“وَاَنَّ هٰذَا صِرَاطِىۡ مُسۡتَقِيۡمًا فَاتَّبِعُوۡهُ ۚ وَلَا تَتَّبِعُوۡا السُّبُلَ فَتَفَرَّقَ بِكُمۡ عَنۡ سَبِيۡلِهٖ ؕ ذٰ لِكُمۡ وَصّٰٮكُمۡ بِهٖ لَعَلَّكُمۡ تَتَّقُوۡنَ ﴿۱۵۳﴾”
“Aur yeh keh yeh deen Mera raastah hai jo mustaqeem hai so is raah par chaloo aur dusri raahon par mat chalo keh woh raahein tum ko Allah ki raah say judaa kar dein gi, Is ka tum ko Allah nay takeedi hukum diya hai taakeh tum parhezgari ikhteyar karo.” (Al Ana’aam: 153)
Is kay saath saath un logon kay maslak say darta aur bachta rahay jo kisi Mazhab-e-Mua’ayyan ko apnay har A’qeedah-o-A’mal ki asaas qaraar detay hain, Aur jab Kitaab-o-Sunnat kay nusoos ko apnay mazhab kay khilaaf paatay hain to koshish kartay hain keh in nusoos ko man maani taaweelein kar kay mazhab banaa lein. Aur is silsilah mein zulm, I’naad aur ta’asaub par mabni aisi taaweelein kar jaatay hain keh Qur’an-o-Hadith goya taabe’ hain nah keh matboo’ aur Aqwaal-e-Mazhab, Imaam-o-Muqtada hain nah keh taabe’ (ولا حول ولا قوۃ الا باللہ)
Yeh tareeq aur manhaj un logon ka hai jo zaati khuwaahishaat kay ghulaam hain, Nah keh un ka jo ikhlaas kay saath hidaayat kay peerokar hain. Allah Ta’alaa nay is manhaj ki shadeed muzammat farmaai:
وَلَوِ اتَّبَعَ الۡحَـقُّ اَهۡوَآءَهُمۡ لَفَسَدَتِ السَّمٰوٰتُ وَالۡاَرۡضُ وَمَنۡ فِيۡهِنَّؕ بَلۡ اَتَيۡنٰهُمۡ بِذِكۡرِهِمۡ فَهُمۡ عَنۡ ذِكۡرِهِمۡ مُّعۡرِضُوۡنَؕ ﴿۷۱﴾
“Agar haqq hi un ki khuwaahishoon ka peeroo ho jaay to Zameen-o-Aasmaan or un kay darmiyaan ki har cheez darham barham ho jaay. Haqq to yeh hai keh ham nay unhein un ki nasayehat pohnchaa di hai lekin woh apni nasayehat say munh modnay waalay hain” (Al Moominoon: 71)
Man maani khuwaahishaat kay peerokar, In logon kay Mazaahib-o-Masaalik dekhnay waalay shakhs par in kay baday A’jeeb-o-Ghareeb haqaaiq munkashif hotay hain, Phir woh badi Shiddat-o-Ilhaah say apnay Parwardigaar ki taraf rujo’o ikhtiyaar kar kay gid gidaa kar apni hidaayat aur us par saabit qadmi ki dua’a kartaa hai neez har gumraahi aur Ilhaad-o-Inheraaf say Allah Ta’alaa ki panaah ka sawaal karta rehtaa hai……Aur jo shakhs Sidq-o-Ikhlaas kay saath yeh soch kar dua’ein karay keh mera Parwardigaar to Bay Parwaah-o-Bay Niyaaz hai, main hi us kay dar ka muhtaaj, Muftaqir aur bhikari hon to Allah Ta’alaa us ki dua’a zaroor qubool farmaa letaa hai.
❁ Allah Ta’alaa ka farmaan hai:
وَاِذَا سَاَلَـكَ عِبَادِىۡ عَنِّىۡ فَاِنِّىۡ قَرِيۡبٌؕ اُجِيۡبُ دَعۡوَةَ الدَّاعِ اِذَا دَعَانِ فَلۡيَسۡتَجِيۡبُوۡا لِىۡ وَلۡيُؤۡمِنُوۡا بِىۡ لَعَلَّهُمۡ يَرۡشُدُوۡنَ ﴿۱۸۶﴾
“Jab Meray banday Meray baaray mein Aap say sawaal karein to Aap keh dein keh Main bohot hi qareeb hoon, har pukarnay waalay ki pukar ko jab kabhi woh Mujhay pukaray, qubool karta hon is liye logon ko bhi chaahiye keh Meri baat maan liya karein aur Mujh par imaan rakhein, Yahi un ki bhalaai ka baa’is hai” (Al Baqarah: 186)
➤ Ham Allah Ta’alaa say dua’a kartay hain keh Allah Ta’alaa hamein us zumray mein shaamil farmaa lay jo haqq ka haqq hona jaantay hain aur poray ikhlaas say us ki pairwi kartay hain aur baatil ka baatil hona jaantay hain aur pori Shadd-o-Madd say us say ijtenaab kartay hain. Aur yeh keh Allah Ta’alaa hamein hidaayat yaaftah or hidaayat denay waalaa bana day, Aur yeh keh Allah Ta’alaa hamein Apni or phir dusroon ki islaah ki taufeeq a’ataa farmaa day, Aur yeh keh Allah Ta’alaa hamaaray dilon ko hidaayat kay ba’ad kajroo ayr teedhaa nah kar day. Aur hamein Apni bhar poor rahmat a’ataa farmaa day keh Wahi a’ataa farmaanay waalaa hai.
➤ Tamaam ta’areefein Allah Rabb-ul-A’aalameen kay liyey hain jis ki Taufeeq-o-Ahsaan say neek aur achchi cheezein Paayah-e-Takmeel ko pohunchti hain aur Allah Ta’alaa Apnay Nabi (صلی اللہ علیہ وسلم) par Durood-o-Salaam ki moslaa dhaar baarish barsa day keh jo saraasar rahmat hain aur ummat ko Allah Ta’alaa kay izn say Siraat-e-Mustaqeem ka raastah dikhaanay waalay hain, Neez Allah Ta’alaa Aap ki Aal-o-Ashaab aur qayaamat tak un kay behtreen peerokaron par bhi rahmatein aur salaamtiyaan naazil farmaay. (Aameen) (Shawwaal ki 15 taareekh 1404 hijri mein yeh kitaab mukammal hui)
REFERENCE:
BOOK: “Qawaid ul Muthla” / Tawheed-e-Asma-o-Sifaat
Taleef: Fazilatus Shaikh Uthaymeen Rahimahullah.
Mutarjim/ Taqdeem : Allamah Abdullah Nasir Rahmani Hafizahullah.