06. Hajj Ki Teen Aqsaam
Hajj Ki Teen Aqsaam
Jo shakhs Hajj ka iraada karay us par waajib hai ke teen qismon mein se kisi aik ko ikhtiyaar karay:
- Hajj-e-Tamattu’:
Umrah, Hajj aur Qurbaani.
Hajj ke mahine Ya’ani Shawwal, Zil-Qa’dah aur Zil-Hijjah ke ibtidaai das dinon mein Umrah ka Ihraam baandhay aur
لَبَّيْكَ عُمْرَةً مُتَمَتِّعًا بِهَا إِلَى الْحَجِّ
kahay. Tawaaf aur Sa’ee karay, aur baal nikaal kar Umrah se faarigh ho jaaye. Is ke baad uske liye tamaam cheezein halaal ho jaati hain. Phir (8th) aatheen Zil-Hijjah ko apni qiyaamgah se Hajj ka Ihraam baandh kar Mina jaaye aur Hajj poora kar lay. Tamattu’ karne wala aik bakri qurbaani karay ya oont ya gaaye ke saatwain hissay mein shareek ho jaaye. Agar yeh na ho sakay to ayyam-e-Hajj mein teen roze aur apne ghar lautne ke baad saat roze rakh lay.
-
Hajj-e-Qiraan:
Umrah, Hajj aur Qurbaani.
Hajj aur Umrah ki niyyat aik saath karay aur
لَبَّيْكَ عُمْرَةً وَحَجًّا
kahay. Jab Makkah pohnchay to Tawaaf-e-Qudoom karay, Hajj aur Umrah ki Sa’ee karay aur Ihraam ki haalat hi mein rahay, halaal na ho. (8th) aatheen tareekh ko Mina jaaye, phir Umrah aur Hajj ke baqiya arkaan poora karay. Albattah Sa’ee na karay kiyunkeh woh Tawaaf-e-Qudoom ke saath Sa’ee kar chuka hai. Qiraan karne wala aik bakri qurbaani karay ya oont ya gaaye ke saatwain hissay mein shareek ho jaaye. Agar yeh na ho sakay to ayyam-e-Hajj mein teen roze aur apne ghar lautne ke baad saat roze rakh lay.
-
Hajj-e-Ifraad:
Sirf Hajj.
Is par qurbaani nahi hai.
Sirf Hajj ki niyyat karay aur
لَبَّيْكَ حَجًّا
kahay. Jab Makkah pohnchay to Tawaaf-e-Qudoom aur Hajj ki Sa’ee kar lay aur halat-e-Ihraam mein rahay yahan tak ke tamaam arkaan mukammal kar lay. Ifraad karne wale par qurbaani nahi hai kiyunkeh usne sirf Hajj kiya hai, Umrah nahi kiya.
Jo qurbaani ka jaanwar apne saath na laaye uske haq mein Tamattu’ afzal hai aur Nabi Kareem ﷺ ne apne Sahabah ko isi Hajj ka hukum diya tha.
Yaum-ut-Tarwiyah (Aathveen Zil-Hijjah) se pehlay:
Ifraad karnay wala
Qiraan karnay wala
Tamattu’ karnay wala
Sab kay sab Meeqaat say Ihraam baandhein.
1- Tawaaf-e-Qudoom karay
Tawaaf-e-Qudoom karay
Tawaaf-e-Qudoom karay
2- Hajj ki Sa’ee karay
Hajj aur Umrah ki Sa’ee karay
Umrah ki Sa’ee karay
↓ ↓ ↓
Apnay sar kay baal mundwaaye ya kam karay.
Ihraam say halal ho jaaye aur us kay liay har cheez halal ho jaati hai hatta kay aurat bhi.
Aur Yaum-ut-Tarwiyaah ko Hajj ka Ihraam baandh lay.
Yaum-un-Nahar tak Ihraam ki haalat mein rahay aur mahzooraat-e-Ihraam say bachta rahay.
Yaum-un-Nahar tak Ihraam ki haalat mein rahay aur mahzooraat-e-Ihraam say bachta rahay.
- Mufrid kay liay Tawaaf-e-Qudoom sunnat hai agar us ko chhod day toh koi baat nahi.
- Tawaaf-e-Qudoom karnay kay baad fauran Mina chalay jaaye toh Hajj ki Sa’ee tawaaf-e-Ifaadah kay baad kar lay.
Jo bachcha sann-e-tameez ko na pohancha ho us ka wali (sarparast) us ki jaanib say niyat karay aur bachchay kay silay huway kapday nikaal day aur us ki taraf say Talbiyaah kahay, is tarah bachcha bhi Muhrim ho jaaye ga, woh bhi unhi cheezon say bachta rahay jin say bara Muhrim bachta hai. Isi tarah woh bachchi jo sann-e-tameez ko na pohanchi ho, us ka wali (sarparast) us ki jaanib say niyat karay aur us ki taraf say Talbiyaah kahay, is tarah bachchi bhi Muhrim ho jaaye gi, woh bhi unhi cheezon say bachay gi jin say aik badi Muhrim aurat bachti hai. Tawaaf ki haalat mein un donon bachcha bachchi kay kapday aur badan paak-o-saaf rehna chaahiye, is liay kay Tawaaf namaz ki tarah hai, jis mein tahaarat shart hai. Aur agar bachcha aur bachchi sann-e-tameez ko pohnchay hon toh apnay waali ki ijaazat say Ihraam baandhein gay. Aur Ihraam baandhnay kay waqt baray log jo kuch kartay hain yeh bhi wohi karein gay masalan ghusal karna, khushboo lagaana, waghera.
قال العمرة إلى العمرة كفارة لما بينهما . والحج المبرور ليس له جزاء إلا الجنة
متفق عليه
Umrah Ka Tawaaf :
Umrah karnay waala jab Makkah Mukarramah pohnchay:
To foran ghusal kar lay phir Masjid Haram jaaye jo Allah ka purana ghar hai, taakeh Umrah kay arkaan ada karay aur baghair ghusal kay bhi Masjid-e-Haram ja sakta hai, aur masjid main daakhil hotay waqt apna daahina paaon aagay karay aur yeh dua padhay:
بسمِ اللهِ وَالصَّلَاةُ وَالسَّلَامُ عَلَى رَسُولِ اللهِ ، أَعُوذُ بِاللَّهِ الْعَظِيمِ وَوَجْهِهِ الْكَرِيمِ وَ سُلْطَانِهِ الْقَدِيمِ مِنَ الشَّيْطَانِ الرَّحِيمِ ، اللَّهُمَّ افْتَحُ لِي أَبْوَابَ رَحْمَتِكَ –
Bismillah wa’s-salatu wa’s-salam ‘ala Rasulillaah. Allahumma ighfir li dhunubi waftah li abwab rahmatika. A‘udhu Billah il-‘azim wa bi wajhihi’l-karim wa bi sultanihi’l-qadim min al-shaytan il-rajim
Meaning:
Daakhil hota hoon mein Allah kay naam say durood aur salaam ho Allah kay Rasool par, main panaah talab karta hoon azmat waalay Allah ki aur uss kay kareem chehray ki aur uss ki qadeem saltanat ki shaitaan mardood say. Ay Allah tu meray liye apni rehmat kay darwaazay khol day.
Issi tarah tamaam masajid main daakhil hotay waqt yeh dua padhna mashroo’ hai.
Phir tawaaf kay liay Ka’bah Shareef ki taraf jaaye.
Mard aadmi kay liay sunnat yeh hai kah Umrah aur Tawaaf-e-Qudoom main Iztiba’ karay, aur iss ka tareeqa yeh hai kah apna daahina kandha khula rakhay aur kapday kay kinaaron ko daahinay kandhay kay baghal say nikaal kar baayen kandhay par daal lain.
Tawaaf ka aaghaz Hajar-e-Aswad say karay.
Agar Hajar-e-Aswad tak pohanch sakta hai to pohanch kar bosa day. Muzaahamat-o-Mudaafa’at, gaali galoch aur maar dhaadh say logon ko takleef nah day Kiyunkeh yeh tareeqa ghalat hai aur iss main eiza aur rasaani hai. Balkeh Allahu Akbar kehtay huway door hi say Hajar-e-Aswad ki taraf ishaarah karna kaafi hai, aur guzartay waqt Hajar-e-Aswad kay saamnay nah thehray.
Doosron ko dhakka dena ya unhain takleef pohnchana jaaiz nahin hai.
Umrah Ka Tawaf :
Iss tarah apna tawaaf jaari rakhay. Saaton chakkar main ziyaada say ziyaada Allah ka zikar, istighfaar, dua ya Quran ki tilaawat kartay rahay. Makhsoos duaaon kay saath aawaz buland nah karain iss liye keh iss say tawaaf karnay walon ko khalal hota hai.
Rukn-e-Yamaani par pohnchnay kay baad agar muyassar ho to apnay haath say iss ka istilaam karay (yaani chhu’way), iss ko bosa nah day aur nah iss ka masah karay, jaisa kah ba’az log bakhilaaf-e-sunnat kartay hain. Agar Rukn-e-Yamaani ka istilaam nah kar sakay to uss ko chaahiye keh baghair ishaarah aur baghair takbeer (Allahu Akbar) kahay apnay tawaaf ko jaari rakhay. Sunnat yeh hai kah Rukn-e-Yamaani aur Hajar-e-Aswad kay darmiyaan yeh dua padhay:
رَبَّنَآ ءَاتِنَا فِى ٱلدُّنْيَا حَسَنَةًۭ وَفِى ٱلْـَٔاخِرَةِ حَسَنَةًۭ وَقِنَا عَذَابَ النَّارِ.
Surah Al-Baqarah
Iss tarah saat chakkar laga kar apnay tawaaf ko mukammal karay.
Har chakkar Hajar-e-Aswad say shuru karay aur Hajar-e-Aswad par khatam karay. Ibtidaai teen chakkaron main ramal karay yaani sirf Tawaaf-e-Qudoom kay pehlay teen chakkar main kam faaslay kay saath qadam utha kar taiz chalay.
Har Chakkar Hajar-e-Aswad Say Shuru Hota Hai Aur Hajar-e-Aswad Par Khatam Hota Hai.
Tawaaf Kay Doraan chand (Na-pasandeedah) Mulahizaat :
- Doraan-e-Tawaaf Hijar kay andar say guzarna, aur yeh aitqaad rakhna kah woh tawaaf main daakhil hai.
Haqeeqat yeh hai kah Hijar kay andar say tawaaf karnay say tawaaf baatil ho jaata hai.
Iss liye keh Hijar Ka’bah main daakhil hai.
- Ka’bah kay tamaam kinaaron, deewaron, ghilaaf, darwaazay aur Maqam-e-Ibrahim ko
chhoona… Yeh naa-jaaiz hai, balkah bid’at hai jiss ki shari’at main koi bunyaad nahin hai, aur nah hi Nabi Kareem ﷺ nay aisa kiya hai.
- Doraan-e-Tawaaf aurton ko mardon ki bheed say bachna waajib hai, khaas kar Hajar-e-Aswad aur Maqam-e-Ibrahim kay paas.
Aur jab tawaf say faarigh ho jaaye to darj-e-zail kaam karay:
- Daahinay kandhay ko dhhaanp lay.
- Agar muyassar ho to Maqaam-e-Ibrahim kay peechay do raka’at namaz ada karay warna masjid main kisi bhi jagah do raka’at padh lay. Yeh namaz sunnat-e-mu’akkadah hai. Pehli raka’at main Surah Al-Fatiha kay baad:
Surah Al-Kaafiroon
padhay aur doosri raka’at main Surah Al-Fatiha kay baad:
Surah Al-Ikhlaas
padhay.
Agar inn kay ilaawah koi doosri sooratain parrhay to iss main koi harj nahin hai.
Umrah Ki Sa’ee :
Tawaaf khatam ho jaanay kay ba’ad :
Umrah karnay waala Sa’ee kay saat chakkar ada karnay kay liye Safa ki taraf jaaye. Jab Safa say qareeb ho jaaye to iss tarah kahay:
أَبْدَا بِمَا بَدَا اللَّهُ بِهِ
إِنَّ الصَّفَا وَالْمَرْوَةَ مِن شَعَائرِ اللَّهِ
Phir Safa par chadhay
Aur Ka’bah ki taraf rukh kar kay khada ho jaaye aur teen baar Allahu Akbar kahay aur haath utha kar yeh dua padhay:
لَا إِلَهَ إِلَّا اللهُ وَحْدَهُ لَا شَرِيكَ لَهُ ، لَهُ الْمُلْكُ وَ لَهُ الْحَمْدُ وَهُوَ عَلَى كُلِّ شَيْءٍ قَدِيرٌ –
لَا إِلَهَ إِلَّا اللهُ وَحْدَهُ أَنْجَزَ وَعُدَهُ وَ نَصَرَ عَبْدَهُ وَ هَزَمَ الْأَحْزَابَ وَحْدَهُ –
La ilaha ill-Allaah wahdahu la sharika lah, lahu’l-mulk wa lahu’l-hamd wa huwa ‘ala kulli shay’in qadir; La ilaha ill-Allah wahdahu anjaza wa‘dah wa nasara ‘abdah wa hazama al-ahzaba wahdah
Yeh dua teen baar padhay.
Aur har aik kay darmiyaan jo chaahay ziyaada say ziyaada duaa’yen karay, aur agar issi dua par iktifaa kar lay to bhi koi harj nahin hai. Apnay donon haathon ko sirf dua kay waqt uthaaye, Allahu Akbar kehtay waqt ishaarah nah karay.
Donon haathon say ishaarah karna Hajj aur Umrah karnay walon ki aam ghaltiyon main say hai.
Phir Safa say utar kar
Marwah ki taraf chaltay huway jo muyassar ho apnay aur apnay ahl-o-ayaal aur aam musalmanon kay liye dua kartay rahain. Jab hari light par pohnchain to taiz dodain (yeh sirf mardon kay liye hai, aurton kay liye nahin).
Aur jab doosri hari light par pohnchain to aam chaal chalain yahan tak keh Marwah pohnch jaayen.
Marwah:
Jab Marwah pohnchay tou Ka’bah ki taraf rukh kar kay wohi duaa’ain padhay jo Safa par padh chuka hai.
- Lekin aayat nahin padhay aur jo chahay duaa’yen karay. Phir Marwah say utray aur aam chaal chalay. Jab hari light par pohnchay tou doosri hari light tak taiz doday, phir aam chaal chal kar Safa par chadhay. Iss tarah apni Sa’ee kay saat chakkar pooray karay. Safa say Marwah tak aik chakkar aur Marwah say Safa tak doosra chakkar ho ga.
- Agar Sa’ee chaltay huway shuru karay phir thakaan mehsoos karay ya Allah na karay koi bimaari laahaq ho jaaye aur apni Sa’ee ko wheelchair (kursi) par mukammal kar lay tou koi harj nahin hai.
Haiz aur nifaas waali aurat kay liye jaaiz hai ke…
- Tawaf kay siwa Sa’ee ada karay, iss liye ke Sa’ee ki jagah Masjid-e-Haram main daakhil nahin hai.
Sa’ee kay doran hari light kay darmiyaan aurton ka daurna aam ghaltiyon main se hai…
- Sa’ee mukammal karnay kay baad Umrah karnay wala apnay sar kay baal mundwaye ya cutting karaye, mundwana afzal hai. Cutting pooray baalon ki honi chahiye.
- Aur aurat apni choti say ungli kay aik por kay baraabar kam kar lay.
Iss tarah Umrah kay kaam khatam ho jaatay hain.
Aur ab Umrah karnay waalon kay liye woh tamaam cheezen halaal ho jaati hain jo Ihram ki wajah se haraam theen.
Sa’ee Safa say shuru hoti hai aur Marwah par khatam hoti hai.
Zil-hajj Ki Aathveen Tareekh:
Youm-e-Tarwiyah
Hajj kay arkaan aathveen Zil-hajj say shuru hotay hain.
Iss din ko Youm-e-Tarwiyah kaha jaata hai.
Zuhar Say Pehlay
Tamattu’ karnay wala iss din chasht kay waqt Ihram baandhay. Ihram baandhnay se qabal woh tamaam kaam karay jo Umrah ka Ihram baandhnay se pehlay kiye hain, masalan ghusal karna, khushboo lagana, aur namaz padhna. Phir apni qiyam gaah say Ihram baandhay.
Albattah Qiraan aur Ifraad karnay waalay Haaji apnay Ihram main baaqi rahain gay.
Tamattu’, Qiraan aur Ifraad karnay walay tamaam Haaji zuhur say pehlay Mina ki taraf niklain.
Zuhar, Asar, Maghrib Aur Isha Ki Namazein
Zuhar, Asar, Maghrib aur Isha ki namazein jama’ kiye baghair unn kay auqaat main chaar raka’at waali namazon ko qasr kay saath padhain. Nauween Zil-hajj ki raat Mina hi main guzaarain, aur fajr ki namaz bhi wahin padhain. Youm-e-Tarwiyah say pehlay Mina pohnchnay wala Mina hi main Tarwiyah kay din chasht kay waqt Hajj ka Ihram baandh lay.
Sunnat yeh hai ke Haaji Tarwiyah ka din Mina main guzaaray.
Mina Main Raat Guzarna
Nauween Zil-hajj ko Fajar padhnay kay baad sooraj tuloo’ honay ka intezaar karay. Phir sukoon-o-waqaar kay saath talbiyah kehtay huway, zikar kartay huway, dua kartay huway, Quran padhtay huway, “Laa ilaaha illallaah” aur “Allahu Akbar” kehtay huway, Allah Rabbul-’Aalameen ki hamd aur uss ka shukar ada kartay huway chaltay rahain…
Nauween Zil-Hijjah :
Arafah ka Din :
↓
Suraj tuloo honay se le kar
↓
Suraj ghuroob honay tak
Wuqoof-e-Arafah Hajj ka aik rukun hai, iss ke baghair Hajj saheeh nahin ho sakta.
Rasool Allah ﷺ ne farmaya:
“Hajj Arafah mein theharna hai…”
(Abu Dawood, Tirmizi)
Arafah ka Din :
“Sab se behtareen din hai.”
Iss din haajiyon ke wufood Maidan-e-Arafat mein jama’ hotay hain, jahan suraj ghuroob hone tak thehertay hain. Iss din Allah Ta’ala ba taur-e-fakhar unka zikar apne farishton se karta hai.
Sahih Muslim mein Ayeshah Razi-Allahu Anhaa se riwayat hai ke Nabi Kareem ﷺ ne farmaya:
“Allah Ta’ala ’Arafah ke din se ziyadah kisi aur din mein apne bandon ko Jahannam se azaad nahin karta, phir qareeb ho kar ba taur-e-tafakkur tumhara zikar farishton se karta hai.
Chunanchah Allah Ta’ala farmata hai:
‘Inn logon ki khwahish kya hai?’”
Hum Allah se uska fazl-o-ehsaan talab karte hain…
Nauween Zilhaj :
‘Arafah ka Din
↓
Sunnat yeh hai ke haaji agar muyassar ho to Maqam-e-Namirah mein utray warna seedha ’Arafah ke hudood mein daakhil ho jaye. Wahan bohat si nishaniyan aur alamatain hain jo ’Arafah ke hudood ki nishandahi karti hain. ’Arafah ka saara maidan thehrnay ki jagah hai. Haaji ko chahiye ke iss azeem din mein waqt se faaida uthaanay ki fikar kare. Talbiyyah, zikr, aur ba-kasrat istighfar kare.
“Laa ilaaha illallaah” padhe. Allah ki hamd-o-sanaa bayan kare. Khushoo’-o-khuzoo’ ke saath gidgidatay huway Allah ki taraf mutawajjah ho jaye. Apne liye, apne ghar walon ke liye, apni aulaad aur doosray Musalman bhaaiyon ke liye duaayen kare.
⸻
Maidan-e-’Arafah
↓
Zuhar Aur Asar: Qasar aur Jama’ kar ke padhna.
⸻
Jab Zuhar ka waqt ho jaye to Imam Sahib wa’az-o-naseehat par mushtamil khutbah detay hain. Phir Zuhar aur Asar ki namaz jama’ aur qasar karte huway aik azaan aur do iqamat ke saath padhate hain. Rasool Allah ﷺ ne bhi aisa hi kiya tha. In donon namazon se pehle ya darmiyan mein ya in donon ke baad koi (Sunnat ya Nafal) namaz na padhay.
Haajiyon ko chahiye ke iss mubarak din mein aisi ghaltiyon se bachain jo iss azeem din, aur iss baa-izzat jagah mein unke ajr-o-sawab ko zaya kar deti hain.
⸻
Ghuroob-e-Shams
↓
Muzdalifah ki taraf
Youm-e-’Arafah Ki Ba’az Aam Ghaltiyan :
- Hudood-e-’Arafah ke baahar utarna aur suraj ghuroob hone tak wahin rah jaana phir Muzdalifah laut jaana.
Jis ne aisa kiya uska Hajj nahin ho ga.
- Suraj ghuroob hone se pehlay hi ’Arafah se nikal jaana, yeh jaaiz nahin hai is liye ke yeh Nabi Kareem ﷺ ke amal ke khilaf hai.
- Jis ne aisa kiya uske liye zaroori hai ke woh suraj ghuroob hone se pehlay ’Arafah laut jaye. Agar nahin lautay to usko aik dum (qurbani) dena zaroori ho jata hai.
- Jabal-e-’Arafah par chadhne ke liye bheed lagana, dhakkay dena, uski choti par pohanchna, usko chhoona aur wahan namaz parhna, yeh sab bida’at hain jinki deen mein koi bunyaad nahin hai.
- Mazeed yeh ke uss par chadhne se sehat aur badan par bhi mukhtalif nuqsanaat murattab hotay hain.
- Dua ke waqt Jabal-e-’Arafah ki taraf rukh karna.
- Sunnat to yeh hai ke dua ke waqt qiblah ki taraf rukh karain.
⸻
Muzdalifah :
Nauween Zil-Hijjah ko suraj ghuroob hone ke waqt hujjaaj ke qaaflay -Allah ki barkat se- Mash’ar-e-Haram (Muzdalifah) ki taraf chal padtay hain. Talbiyyah kehtay huway, Allah ka zikr kartay huway, uske ehsaan aur fazl-o-karam ka shukar ada kartay huway keh Allah ne unhain Maidan-e-’Arafaat mein haaziri ki taufeeq bakhshi hai. Yahan pohanchne ke fauri baad Maghrib aur Isha jama’ aur qasar, aik azaan aur do iqamat ke saath ada kartay hain aur raat guzarate hain.
↓
Ghuroob ke Waqt
↓
Muzdalifah ki taraf
- Muzdalifah pohanchte hi baaz hujjaaj ghaltiyon ka irtekaab karte hain jin se mutanabbeh hona chahiye, Masalan:
- Maghrib aur Isha ki namazen padhne se pehlay kankriyan chun’na.
- Ya aitqaad rakhna ke kankriyan Muzdalifah se uthana zaroori hai.
Jaisa ke hum zikar kar chukay hain keh sunnat yeh hai keh hujjaaj yeh raat Muzdalifah mein guzarain, yahan tak keh Namaz-e-Fajar padh lain.
Albattah khawateen, kamzor log, bachay aur un sab ke zimmedar hazraat aadhi raat ke ba’ad Mina ja sakte hain.
⸻
Maghrib aur Isha ki namazein jama’ aur qasar ke saath padhna.
Muzdalifah mein raat guzaarna
Namaz-e-Fajr padhna
Zikr-o-Dua
Kankriyan chun’na
⸻
Haaji jab Namaz-e-Fajar se faarigh ho jaye to uske liye mustahab hai ke Mash’ar-e-Haram jo ke Muzdalifah mein aik pahaad ka naam hai, uske paas thehre, ya Muzdalifah mein kisi bhi jagah thehar jaye. Kasrat se Allah ka zikr kare, takbeer kahe, aur jitna ho sake duayein kare. Phir suraj nikalne se pehlay Muzdalifah se chal paday.
⸻
Mina Ki Taraf
Mina jaate huway raaste mein Jamrah-e-Aqabah ko maarne ke liye saat kankariyan chun lay, jo chanay ke daanay se zara badi hon, aur baqiya dinon ke liye Mina hi se chun lay. Yahan se -Allah ki barkat mein- Talbiyyah kehte huway, khushoo’ ke saath ziyadah se ziyadah Allah ka zikr karte huway Mina ki janib chalta rahe.
⸻
لَبَّيْكَ اللَّهُمَّ لَبَّيْكَ، لَبَّيْكَ لَا شَرِيكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ، لَا شَرِيكَ لَكَ
Labbayka Allahumma labbayk, labbayka laa sharika laka labbayk. Inna al-hamda wa’n-ni‘mata laka wa’l-mulk, laa sharika lak
Mina Aur Jamrah Aqabah Ka Amal
Aur Jab Haaji Mina Pahunchay
Aur Jab Haaji Mina pohnchay to:
- Jamrah-e-Aqabah (jo keh Makkah ke qareeb hai,) uski taraf jaldi rawana ho.
- Jamrah-e-Aqabah pohnchtay hi Talbiyah band kar de, phir mandarja zail kaam karay:
- (1) Jamrah-e-Aqabah ko saat (7) kankariyan yakkay ba’ad deegaray maaray, har kankiri ke saath “Allahu Akbar” kahay.
(2) Qurbani:
- Agar up par qurbani farz hai, to qurbani kare.
- Apni qurbani khud bhi khaye aur fuqaraa ko bhi khilaye.
(3) Halaq ya Qasr:
- Apnay Sar ke baal mundwaye ya kam karwaye, yeh sunnat hai (mundwana afzal hai).
- Aurat apne baalon mein se ungli ke por ke barabar baal kam kar sakti hai.
Yeh tarteeb Afzal hai, lekin
- Agar kisi kaam ko kisi se pehle karana ho to koi haraj nahi.
⸻
Zil-Hijjah Ki 10th Tareekh (Yaum-un-Nahar / Eid-ul-Adha)
- Yeh qurbani ka din hai, jis din Eid-ul-Adha bhi manaya jata hai.
Musalman dunya kay Mashriq-o-Maghrib mein aik khaas andaz mein Eid-ul-Ad’ha ka istiqbaal karte hain, is haal mein keh woh Allah ki ne’amaton se khush-o-khuram hotay hain, Aur Allah kay taqarrub ki khaatir apnay jaanwaron ki Qurbaniyan karte hain.
- Mina se Jamrah-e-Aqabah ki taraf jate waqt Talbiyah ke saath Allah ka zikar aur shukr ada karte rahiye.
- Jamrah ko kankriyan marne ke baad Takbeer-e-Eid (Allahu Akbar, Allahu Akbar, Laa ilaaha illallaah.. Allahu Akbar, Allahu Akbar, Wa lillah-il-hamdu) kehte rehna sunnat hai.
⸻
Jamraat ko Kankriyan Martay Waqt ba’az Haajiyon se bohot si Ghaltiyan hoti Hain, masalan :
- Kuch log samajhte hain ke woh shayateen ko maar rahe hain chunancheh wo ghusse mein gaaliyan dete huway kankariyan maarte hain, jabkeh kankariyan maarne ka maqsad sirf Allah kay zikar ko qaaim karna hai.
- Badi badi kankriyan ya jooton, ya lakdi ke tukdon se jamraat koaarna Deen mein ghuluwwu hai, jis se Nabi ﷺ ne mana’ farmaya hai.
- Rami kay liye Jamraat par bheed lagana, dhakka dena aur jhagda karna bohat badi ghalti hai.
- Haaji ko chahiye keh apnay bhaaiyon ke saath narmi aur tameez se kaam le, aur Hauz ke andar Sahi jagah par Rami karnay ki koshish kare, khawah kankari sutoon ko lagay ya na lagay.
- Saat kankriyan aik saath marna nahi chahiye, yeh aik hi kankari shumaar hogi. balke yakkay ba’ad deegaray maaray, aur har kankri par “Allahu Akbar” kehna zaroori hai.
⸻
Tahallul-e-Awwal (Pehla Istehlaal)
- Jamrah Aqabah par kankriyan maarne ke baad halq (sar ka mundwana) ya qasr (baal katwana) karna tahallul-e-awwal kehlata hai.
- Iske baad aap Ihram ke mamnu’ cheezein chhod sakte hain aur silay huwe kapday pehen sakte hain.
- Aurat ke siwa baaqi tamam mamnu’ cheezen halaal ho jati hain.
Jamaraat Ko Kankriyaan Maarna:
Eid ke din subah Muzdalifah se Mina pohanch kar mandarja zaail kaam karain:
Jamrah Aqabah ko kankriyaan maarne mein jaldi karay, saat kankriyaan maaray aur har kankri ke saath Allahu Akbar kahay.
Ayyam-e-Tashreeq ke teenon dinon mein
- Jamrah Sughra
- Jamrah Wusta
- Jamrah Aqabah
Ko kankariyan maarte.
Tawaaf-e-Ifazah:
Tawaaf-e-Ifazah Hajj ka aik rukn hai, iss ke baghair Hajj poora nahin hota…
Haaji Eid ki subah Jamrah Aqabah ko kankriyaan maarne ke baad Makkah jaaye aur Tawaaf-e-Ifazah kar le. Tamattu’ karne wala Sa’ee bhi karay, aur Hajj-e-Qiraan ya Hajj-e-Ifraad karne walay agar Tawaf-e-Qudoom ke saath Sa’ee na kiye hon, (to woh bhi Sa’ee kar lein). Tawaaf-e-Ifazah ko Ayyam-e-Mina ke baad tak mu’akhkhar karna jaaiz hai.
Jab Haaji qurbani ke din Tawaf-e-Ifazah se faariq ho jaaye to us ke liye ihraam ki tamaam mamnoo’ cheezein hatta ke aurat bhi halaal ho jaati hai.
Ayyaam-e-Tashreeq:
Giyarahween Zil-Hijjah ki raat hi se Ayyaam-e-Tashreeq shuru ho jaate hain.
↓
Giyarihween raat
¦
Baarihween raat
¦
Terihween raat
- Qurbani ke din Haaji Tawaaf-e-Ifazah ke baad Mina laut jaaye aur Ayyam-e-Tashreeq ki teenon raatain wahin guzaare.
Ya jiss ko jaldi jaane ka iraada ho woh do raatain guzaare. Jaisa ke Allah Taala ka irshaad hai:
(وَٱذۡكُرُواْ ٱللَّهَ فِيٓ أَيَّامࣲ مَّعۡدُودَٰتࣲۚ فَمَن تَعَجَّلَ فِي يَوۡمَيۡنِ فَلَآ إِثۡمَ عَلَيۡهِ وَمَن تَأَخَّرَ فَلَآ إِثۡمَ عَلَيۡهِۖ لِمَنِ ٱتَّقَىٰۗ وَٱتَّقُواْ ٱللَّهَ وَٱعۡلَمُوٓاْ أَنَّكُمۡ إِلَيۡهِ تُحۡشَرُون) [203]
Aur Allah Taala ki yaad unn ginti ke chand dinon (Ayyam-e-Tashreeq) mein karo, do din ki jaldi karne walay par bhi koi gunaah nahin, aur jo peechay reh jaaye us par bhi koi gunaah nahin, yeh parhaizgaar ke liye hai aur Allah Taala se dartay raho aur yaad rakho ke tum sab us ki taraf jama kiye jaao ge.
Haji par wajib hai ke…
- Mina mein jitne din guzaare unn mein zawaal ke ba’ad teenon jamaraat ko kankriyaan maaray.
- Har kankri ke saath Allahu Akbar kahay.
- Kasrat se zikar aur dua karay.
- Itminaan aur sukoon ka iltizaam karay.
- Bheed lagaane aur jhagda karne se parhez karay.
Jamaraat Ko Kankriyaan Maaray:
- Sunnat yeh hai ke Haaji Jamrah Sughra aur Jamrah Wusta ko kankiri maarne ke baad qibla rukh ho kar donon haath utha kar jo chahe dua karay, kisi ko dhakka maaray aur takleef diye baghair.
Albattah Jamrah Kubra ke paas na thehray aur na hi dua karay.
- Aur jo do dinon ke baad jaana chahe us par wajib hai ke baarah(12) tareekh ko teenon jamarat ko kankriyaan maaray phir sooraj ghuroob hone se pehle hi Mina se nikal jaaye. Haan agar sooraj ghuroob ho gaya aur woh abhi Mina mein hai to us par zaroori hai ke tehrah (13) tareekh ki raat bhi Mina mein rahay aur doosre din zawaal ke baad Rami karay…
Ab agar woh jaldi nikalne ki tayyari nahin ki aur din nikal jaaye to us par Mina mein raat guzaarna laazim nahin hai.
REFERENCE:
Book: Rahnuma-e-Hajj aur Umrah.
Compiled/Murattab: Talaal Bin Ahmed Al-Aqeel.