Sayyidah Hamna Bint-e-Sufyan رضى الله عنها

 

Saad bin Abi Waqas ki walida:

 

Nam Hamna, Walid ka nam Sufyan Bin Umayya tha, Abu Sufyan Bin Harab un kay chacha kay betay thay. Zamana-e-Jahiliyat mein Hamna ki shadi Uhaib Bin Malik kay sath hui jo Abu Waqas ki kuniyat say Mash’hoor-o-Maroof tha. Is ki aulad mein say aik Saad Bin Waqas thay jo un khush-qismat Sahaba Karaam رضى الله عنهم mein say hain jinhein Jannat ki basharat di gai aur yeh un logon mein say thay jinhein Islam qabool karnay mein sabqat lay janay ka aezaz hasil tha.

Saad nay khawab mein dekha keh woh intihai andheray mein tair raha hai, Achanak us kay samnay chand roshan huwa, Us nay apnay samnay ghor say dekha to usay teen ash’khas dikhai diye, Jo us say sabqat lay gaye hain. Jab ghor say un ko dekha to unhein pehchan liya. Un mein say aik Abu Bakar Siddiq, Dusray Ali Bin Abi Talib aur teesray Zaid Bin Harisa thay.

Hamna nay dekha keh us ka beta neend say bedaar huwa hai aur kuch pareshan dikhai day raha hai. Us nay betay say poocha! Kya huwa, Khair to hai? Us nay kaha: Kuch nahin! Hamna nay betay say poocha: Kya tum nay rozana kay mamool kay mutabiq maboodon ka nazrana pesh kar diya hai, Us nay bujhay bujhay andaz aur bujhay bujhay alfaaz kay sath kaha: Nahin! Saad ghabra gaya, Woh Ghor-o-Fikar karnay karnay laga keh aakhir us kay khawab ki tabeer kya ho sakti hai. Yeh teen shakhas mujh say sabqat kiun lay gaye? Saad Bin Abi Waqas apnay kam par chala gaya. Woh teer banaya karta tha. Thodi deer kay bad Quraish kay teen nojawan, Jo shikar kay shoqeen thay, Us kay pas aaye. Unhein teeron ki zaroorat thi. Saad Bin Abi Waqas nay un ki zaroorat ko poora kar diya, Lekin guzishta rat jo khawab dekha tha woh abhi tak us par Ghor-o-Fikar kar raha tha.

Quraish kay nojawan jab chalay gaye to us kay pas Sayyiduna Abu Bakar Siddiq رضى الله عنه tashreef laaye aur unhon nay Saad Bin Abi Waqas ko yeh moqa hi na diya keh woh apna khawab bata kar Sayyiduna Abu Bakar Siddiq رضى الله عنه say is ki tabeer poochay. Sayyiduna Abu Bakar Siddiq رضى الله عنه nay jaldi say kaha: Aye Saad! Meri bat ghor say suno! Mein aap kay pas aik anokha pegham lay kar aaya hoon.

Saad Bin Abi Waqas nay kaha: Batao woh kya pegham hai? Sayyiduna Abu Bakar Siddiq رضى الله عنه nay kaha: Aap Sayyiduna Muhammad Mustafa رضى الله عنه kay mamoon hain. Aap un ki Amanat-o-Sadaqat ko logon say behtar jantay hain. Saad Bin Abi Waqas nay kaha: Han theek hai keh Muhammad (صلى الله عليه وسلم) meray nazdeek bhot hi achay hain. Un mein koi kami hai na hi un par koi ilzam hai, Woh meray nazdeek har tarah say pak saf hain. Sayyiduna Abu Bakar Siddiq رضى الله عنه nay kaha: Un par Wahi nazil hui hai aur unhein Allah T’aala ki janib say aagah kiya gaya hai keh woh is ummat kay Nabi صلى الله عليه وسلم hain aur woh logon ko aik Allah ki ibadat karnay ki dawat detay hain. Saad nay kaha: Phir in maboodon ka kya banay ga? Sayyiduna Abu Bakar Siddiq رضى الله عنه nay kaha: Yeh but na dekhtay hain, Na suntay hain, Na kisi ko nuqsan pohancha saktay hain aur na kisi ko faaida day saktay hain.

Saad Bin Abi Waqas nay poocha: Kya kisi nay Muhammad صلى الله عليه وسلم ki perwi bhi ikhtiyar ki hai? Sayyiduna Abu Bakar Siddiq رضى الله عنه nay farmaya: Mein, Ali Bin Abi Talib aur Zaid Harisa nay un ki perwi ikhtiyar kar li hai, Ham nay unhein Nabi-e-Bar’haq tasleem kar liya hai.

Saad Bin Abi Waqas ko guzishta rat aanay wala khawab yad aa gaya. Woh kehnay lagay: Han, Mujhay meray khawab ki tabeer mil gai. Yahan teen ashkhaas thay jin ko mein nay khawab mein dekha keh woh mujh say sabqat hasil kar gaye hain. Yeh to aik haqiqat hai, Khawab nahin. Saad Bin Abi Waqas nay Sayyiduna Abu Bakar Siddiq رضى الله عنه say mutalaba kiya keh woh usay abhi isi waqat Rasoolullah صلى الله عليه وسلم kay pas lay chalay. Donon Rasoolullah صلى الله عليه وسلم ki khidmat mein hazir huaye, Donon nay salam araz kiya, Aur Saad Bin Abi Waqas رضى الله عنه nay Kalma-e-Shahadat keh kar Daaira-e-Islam mein dakhil honay ki s’aadat hasil kar li. Is say un kay dil mein sakoon ki lehar dod gai, Is say pehlay kabhi zindagi mein sukh chain naseeb nahin huwa tha. Is tarah Saad Bin Abi Waqas رضى الله عنه Shahrah-e-Islam par gaamzan huaye.

Saad Bin Abi Waqas apni walida kay baday farman-bardar thay, Woh apni walida ko apnay hath say khana khilaya kartay thay. Woh apni walida kay sath is qadar mahabbat say pesh aaye kartay thay keh woh nahin chahtay thay keh un ki walida kabhi us say naraz ho. Un ko mamooli si taklif ka pohanchana bhi us ko gawara nahin tha. Idhar Saad Bin Abi Waqas رضى الله عنه Rasoolullah صلى الله عليه وسلم ka qurab hasil karnay aur Aap صلى الله عليه وسلم kay sar-chashmay say seerab honay kay liye un ki majlis mein ba’qaaidigi kay sath hazir honay lagay. Un ki dili khawahish thi keh Rasoolullah صلى الله عليه وسلم ka shireen kalam sun’nay ki s’aadat hasil karein aur Aap صلى الله عليه وسلم ki pak saf Hikmat-o-Danish say bhari taleemaat say khoosha-cheeni karein.

 

(Tareekh-e-Damishaq Libn-e-Asaakir (20/299-300).)

 

Aik din Saad Bin Abi Waqas رضى الله عنه Allah T’aala ki ibadat karnay kay liye hath bandh kar khaday ho gaye, Namaz padhnay lagay aur Allah T’aala say duaein karnay lagay. Woh namaz padhnay mein mashghool thay keh un ki walida Hamna kamray mein dakhil hui. Woh apnay aap say poochnay lagi: Yeh mera beta khada apnay hont hila raha hai, Yeh apnay Rukoo-o-Sujood mein kya keh raha hai?

Yeh kis ko sajda kar raha hai? Is kay samnay koi but to rakha huwa nahin, Phir us ki yeh aadat ban gai, Jab bhi kamray mein dakhil hoti to us ki dili khawahish hoti keh mera beta mujh say batein karay lekin woh khamoshi ikhtiyar kiye rehtay. Phir woh fikar-mand ho jati keh haaye meray betay ko kya ho gaya hai, Ab yeh meray sath sarad-mehri say paish aata hai, Is ko to meray sath badi gehri Mahabbat-o-Aqeedat thi. Yeh to apni maan ki balayein leta thakta nahin tha, Ab isay meray aanay ki parwah tak nahin hoti. Woh us kay qareeb hoti, Us say batein karti lekin us ki taraf say koi jawab na milta, Woh apnay sawal ko dohratay huaye kehti: Meray betay Saad! Tu bolta kiun nahin, Tu meri baton ka jawab kiun nahin deta? Meray betay bata to sahi meray sath bat karnay say kya cheez maane hai? Jab Hamna bhot zayada ghazabnak hoti to Saad deen bayen jhanktay huaye yani salam phertay huaye apni namaz say farigh hotay to kehtay: Amma jan! Naraz na hon, Mein namaz padh raha tha, Meray liye namaz todna munasib na tha. Hamna nay tajjub say poocha: Tum namaz padh rahay thay, Pooja pat kar rahay thay, Lekin kis ki? Koi but to teray samnay nahin tha, Mein nay dekha keh tum nay sajda kiya lekin mujhay teray samnay koi but to mujhay dikhai nahin diya keh jis ko tu sajda kar raha tha. Yeh kaisi anokhi ibadat hai!!?

Saad Bin Waqas رضى الله عنه nay bataya: Amman jan! Mein Rabb-ul-Aalameen ki ibadat kar raha tha. Us nay poocha Rabb-ul-Aalameen kon hai? Saad Bin Waqas رضى الله عنه nay bataya keh “Rabb-ul-Aalameen” Woh hai Jis nay aasmanon aur zameen ko peda kiya, Jis nay hamein peda kiya, Jis nay kaainat ki har cheez ko peda kiya. Maan nay tajjub say poocha: Saad betay! Tu Laat-o-Manaat kay ilawa kisi aur ko sajda karta hai!!?

Sayyiduna Saad Bin Abi Waqas رضى الله عنه nay jawab diya: Amman jan! Ghor say sunein, Yeh but pathar kay hain, Yeh nuqsan detay hain na nafa. Us nay kaha: Saad meray ladlay betay! Tujhay kya ho gaya hai? Kya tum apnay Aaba-o-Ajdaad kay khudaon ko chod do gay? Kya tum un kay khayalaat ko khak mein mila do gay? Kya tum Rushad-o-Hidayat say tahi daman ho jao gay?

Ammi jan! Aap ki bat sachi nahin, Tera beta Saad to us din apni Rushad-o-Hidayat say tahi daman ho gaya tha jis din woh pathar kay samnay khada ho kar us say iltijayein karna shuru huwa tha. Us say munajaat karna shuru huwa tha, Halankeh woh but mujhay koi nuqsan pohancha sakta tha aur na nafa. Lekin aaj tera beta Rushad-o-Hidayat say aarasta hai, kiunkeh woh us Zaat kay samnay khada ho kar iltijayein karta hai Jo sunta bhi hai aur dekhta bhi hai, Jo nafa bhi pohancha sakta hai aur muqsan bhi, Woh deta bhi hai aur kabhi nahin bhi deta. Woh Teh-o-Bala karta hai, Milata aur todta hai, Woh Khaliq aur Raziq hai, Us jesi koi Zaat nahin. Woh be-misal hai, Sun’nay aur dekhnay wala hai, Wahi mera M’abood-e-Haqiqi hai, Mein Usi ki ibadat karta hoon.

 

Maan ka apnay betay ko shirak ki dawat denay mein israr:

 

Hamna nay apnay betay ko is naye deen ko tarak karnay par majboor kiya aur apnay baap dada kay deen par karband rehnay ki talqeen ki, Taa’keh woh apnay baap dada kay Fazal-o-Sharaf ka inkari na ho. Lekin Sayidiana Saad رضى الله عنه ka iman pahadon say bhi zayada thos aur pukhta tha. Yeh to ho sakta tha keh pahad apni jagah say hil jayein lekin Sayyiduna Saad رضى الله عنه kay iman kay gehray samundar say aik qatra bhi kam nahin kiya ja sakta tha.

Jab Hamna nay apnay betay say bar bar israr kiya keh woh Deen-e-Islam ko tarak kar day aur woh usay majboor karnay lagein, To us nay socha keh roz roz kay muamlay ko aaj hi khatam kiya jaye. Unhon nay apni walida say kaha: Ammi jan! Aap achi tarah janti hain keh mein aap say kitni ulfat aur mahabbat rakhta hoon aur aap ki Khair-o-Bhalai ki kitni aarzoo rakhta hoon, Is liye mein aap ko yeh dawat deta hoon keh aap Deen-e-Islam ko qabool kar lein. Mein aap ko us aag say bachana chahta hoon jo un logon kay liye tayar ki gai hai jo Deen-e-Islam ka inkar kartay hain aur apnay kufar par datay rehtay hain. Hamna nay apnay betay ki batein sun kar kaha: Aye Saad! Meri baat kan khol kar sun lo, Agar tum apni zid par aday rahay to mein kuch khaoon gi aur na hi kuch piyoon gi, Mein isi tarah (Bhook-o-Peyaas ki haalat mein) jan day doon gi, Log tujhay tana diya karein gay keh yeh apni maan ki moat ka sabab bana hai.

Sayyiduna Saad Bin Abi Waqas رضى الله عنه nay kaha: Ammi jan! Aap aisa na karein! Agar aap nay khana pina chod diya to aap khud hi apnay aap ko nuqsan pohanchaein gi. Yeh tareeqa apnanay say aap woh kuch hasil na kar sakein gi jo aap chahti hain, Kiunkeh mein apnay deen ko kisi soorat nahin chodoon ga. Ammi jan! Meri bat ko ghor say suno…..! Agar teray jisam mein so jan hon aur sari ki sari yakay bad deegaray jisam say alag ho jayein to phir mein bhi is Deen-e-Islam ko nahin chodoon ga. Mein iman lanay kay bad ab kufar ki taraf qat’an nahin lotoon ga. Yeh bhala kaisay ho sakta hai keh Allah سبحانه وتعالى nay jis kufar say nijat ata ki aur Apnay Fazal-o-Karam say Rushad-o-Hidayat ki naimat say sarfaraz kiya, Mein dobara us ki taraf loat jaoon.

Abu Bakar Bin Shaiba nay Musab Bin Saad kay hawalay say bayan kiya, Woh kehtay hain keh us kay baap kay baray mein Quraani aayaat nazil hui thein. Woh kehtay hain keh Saad Bin Abi Waqas رضى الله عنه ki walida nay halaf utha liya tha keh woh apnay betay kay sath us waqat tak baat nahin karay gi jab tak woh apnay naye deen say inkar na kar day. Woh kuch khaye gi na piye gi. Us nay apnay betay say kaha keh Allah T’aala nay tujhay waldain kay sath Husan-e-Salook kay sath pesh aanay ka hukum diya hai, Mein teri maan hoon tujhay Deen-e-Islam chodnay ka hukum deti hoon, Aur tum ho keh meri baat mantay hi nahin. Us nay teen din takh kuch khaya na kuch piya aur woh behosh ho gai. Us kay aik betay Ammara nay usay pani pilaya. Woh apnay betay ko bad-dua day rahi thi keh Allah T’aala nay Quraan Majeed ki yeh aayaat nazil kar dein.

 

Pehla hukum yeh nazil huwa:

 

“وَوَصَّيۡنَا الۡاِنۡسَانَ بِوَالِدَيۡهِ حُسۡنًا‌ ؕ”

 

“Aur Ham nay insan ko waldain kay sath naik salook karnay ki wasiyat ki.”

 

(Al-Ankaboot: 29/8)

 

Doosra hukum yeh nazil huwa:

 

“وَاِنۡ جَاهَدٰكَ عَلٰٓى اَنۡ تُشۡرِكَ بِىۡ”

 

“Aur agar donon tujh par zor dalein keh tu Meray sath kisi ko shareek karay.”

 

(Luqman: 31/15).

 

Aur teesra hukum yeh nazil huwa:

 

“وَصَاحِبۡهُمَا فِى الدُّنۡيَا مَعۡرُوۡفًا‌ۖ”

 

“Aur duniya mein maroof tareeqay say un kay sath acha salook kar.”

 

(Luqman: 31/15)

 

Soorat-e-Haal yeh thi keh jab Hamna par ghashi tari ho jati to ghar walay lakdi ki madad say uska munh khol kar kuch khilatay.

 

(Sahih Muslim, Kitab Fazaail-ul-Sahabah, باب: فى فضل سعد بن ابى وقاص رضى الله عنه: 43/1748)

 

Sayyiduna Saad bin Abi Waqas رضى الله عنه kay haq mein Dua-e-Rasool صلى الله علىه وسلم:

 

Sayyiduna Saad Bin Abi Waqas رضى الله عنه Rasoolullah صلى الله عليه وسلم kay pichay namaz padhanay mein baqaidagi kartay aur kabhi nagha na kartay. Isi tarah woh Rasoolullah صلى الله عليه وسلم ki ilmi majalis aur Aap صلى الله عليه وسلم kay sath jihad mein hissa letay. Jang-e-Uhad mein Sayyiduna Saad Bin Abi Waqas رضى الله عنه un Sahaba Karaam رضى الله عنهم mein say aik thay jo Rasoolullah صلى الله عليه وسلم kay sath medan mein datay rahay aur Rasoolullah صلى الله عليه وسلىم say apnay haq mein dua karanay mein kamyab huaye. Sunan Tirmizi mein hai Sayyiduna Saad Bin Abi Waqas رضى الله عنه Rasoolullah صلى الله عليه وسلم nay irshad farmaya:

 

“اللهم استجب لسعد اذا دعاك”

 

(Tirmizi: Kitab-ul-Manaqib, باب: مناقب سعد بن ابى وقاص رضى الله عنه: 3751)

 

“Ilahi! Jab Saad Tujh say dua karay Tu us ki dua ko qabool karna.”

 

Sayyiduna Ali Bin Talib رضى الله عنه farmatay hain keh mein nay Nabi Kareem صلى الله عليه وسلم ki zuban mubarak say suna woh yeh farma rahay thay:

 

“ارم سعد فداك أبى وٱمى”

 

“Aye Saad! Teer chalao! Meray maan baap tujh par qurban hon.”

 

Yeh aezaz siraf Sayyiduna Saad Bin Abi Waqas رضى الله عنه ko hasil hai keh Rasoolullah صلى الله عليه وسلم nay un ko mukhatib kartay huaye kaha: “فداك ابى و ٱمى”

(Sahih Bukhari, Kitab-ul-Maghazi, باب: اذھمت طائفتان منکم: 4059, Sahih Musli, Kitab Fazaail-ul-Sahabah, باب: فى فضل سعد بن ابى وقاص رضى الله عنه: 2411, Sunan Tirmizi, (3755).)

 

“Tujh par meray maan baap qurban hon.”

 

Hamna ka islam qabool karna:

 

Fatah-e-Makkah kay din Sayyiduna Saad Bin Abi Waqas رضى الله عنه Rasoolullah صلى الله عليه وسلم ki khidmat mein hazir huaye. Wahan khawateen ki aik jama’at bhi Rasoolullah صلى الله عليه وسلم ki bait karnay ki gharaz say aai, Un mein Sayyiduna Saad Bin Waqas رضى الله عنه ki walida Hamna bhi thi. Jab Sayyiduna Saad Bin Abi Waqas رضى الله عنه nay apni walida Hamna Bint-e-Sufyan ko dekha to un ki aankhein thandi ho gaien aur un ki khushi ki koi intiha na rahi, Un ka dil bagh bagh ho gaya keh us ki walida bait karnay wali khwateen kay sath hai. Aur us nay Islam qabool kar kay Jannat mein janay ka istehqaq peda kar liya aur Jahannam say galu khulasi kara li hai. Sayyidah Hamna Bint-e-Sufyan nay Islam qabool karnay kay bad wafat paai. Allah T’aala un par Apni rahmat ki barkha barsaaye. Aameen Ya Rabb-ul-Aalameen!

 

Reference:

 Book: Hayat-e-Sahaabiyaat kay Darakhshah pahelo.

Taleef: Mahmood T’ama Halbi

Mutarjim: Abu Ziya Mehmood Ahmad Ghaznofar Hafizahullah.