084. Ahl-e-Fitrat

Ahl-e-Fitrat

(Do Nabiyon ke darmiyaan ke zamaana ke log) :

[Sawaal]

Qur’an-e-Majeed se pehle ki aasmaani kitaabon mein tehreef ho chuki hai lekin ba’d mein jo naslein aaen jinhein yeh ‘ilm na tha ke un mein tehreef ho chuki hai, Unhon ne un ke mutaabiq ‘amal kiya to roz-e-Qayaamat Allah Ta’ala ke haan un naslon se kese ma’amla ho ga?

[Jawab]

Kuch log to woh the jinhon ne apne qasad-o-iraadah se tehreef ki, Ba’az sazaaon ko kaal’adam qaraar de diya aur ba’az mein tabdeeli kar di to aise logon ko to do guna gunaah ho ga ek gunaah tehreef ki wajah se aur doosra apne ba’d mein aane waalon ko gumraah karne ki wajah se. Kuch logon ne yeh jaante hue bhi ke un kitaabon mein tehreef ho chuki hai, Un ke mutaabiq ‘amal kiya aur sahih jaanne ke bawajood tehreef ko barqaraar rakha to unhein tehreef shudah ahkaam ke mutaabiq ‘amal karne ki wajah se gunaah ho ga. Kuch log jaahil aur nakhawaandah (Anpadh) the jinhon ne sahih ki tehqeeq-o-talaash ke baghair hi un tehreef shudaah shar’i ahkaam ke mutaabiq ‘amal kiya to aise logon ko bhi kuch gunaah ho ga . . . . . . . aur agar un ke saamne haqq ko pehchaanne ka koi zariy’a nahi aur na koi aisa shakhs hi hai jis se woh pooch saken to un logon ke ahkaam Ahl-e-fitrat ke se hon ge, Jin ka aakhirat mein imtihaan ho ga jis se momin musaddiq waazeh ho jaaen ge. Wallahu Aa’lam.

__Shaikh Ibn-e-Jibreen__