164. Communism ki taraf intisaab ka hukm

Communism ki taraf intisaab ka hukm

الْحَمْدُ للهِ وَحْدَهُ وَالصَّلُوةُ وَالسَّلَامُ عَلَى مَنْ لَا نَبِيَّ بَعْدَهُ – وَبَعْدُ

Fiqhi council ne jin ahem umoor ka mutaall’a kiya un mein se communism aur socialism ka mauz’u bhi hai aur fikri yaurish ki wajah se woh mushkilaat bhi jin se is waqt ‘aalam-e-Islam do chaar hai, Hukoomaton ki sataah par bhi aur afraad ki sataah par bhi aur phir us khatarnaak fikri yaurash ke khatraat se nawaaqifiyat ki wajah se hukoomaton aur qaumon ko jin mushkilaat ka saamna hai, Council ne unhein bhi pesh-e-nazar rakha hai.

Fiqhi council ki yeh raae hai ke is waqt ‘aalim-e-Islam ke aksar mumaalik ifkaar-o-‘aqaaid ke khala ka shikaar hain aur doosri taraf un daaraamad shudah ifkaar-o-‘aqaaid ko is tarah tayyaar kiya gaya hai ke yeh Islami ma’ashron mein phel sakein, Musalmaanon ke ‘aqaaid mein khalal paida kar sakein, Ikhlaaq-o-kirdaar mein giraawat paida kar sakein, Insaani aqdaar ko malyaamet kar saken aur ma’ashre mein khair-o-bhalaai ki tamaam bunyaadon ko beekh-o-ban se ukhaad phenken. Ab yeh baat bilkul roz-e-roshan ki tarah waazeh hai ke duniya ke tamaam bade mumaalik apne nizaam aur ifkaar ke ikhtilaaf ke bawajood is nuqta par sab muttafiq hain ke har us mulk ka nizaam darham barham kar diya jaae jis ki Islam ki taraf nisbat hai. Islam dushmani Us ki asha’at ke khauf aur musalmaanon ki bedaari ke dar ne un sab ko ikhtilaaf ke bawajood ek nuqta par muttafiq-o-muttahid kar diya hai aur woh yeh ke musalmaanon ke aqa’eed-o-ikhlaaq ko kharaab kar diya jaae!

‘Aqaaid ke maidaan mein yeh mumaalik har us shakhs ki hosla-afzaai karte hain, Jo communism ko ikhtiyaar kar le aur phir communism ki tableegh-o-asha’at ke liye un ke radio , Television , Akhbaaraat , Khushnuma propaganda aur ujrati musaannifeen shab-o-roz masroof hain aur phir bade khushnuma label laga kar yeh is ilhaad ki ishaa’at mein masroof hain. Kabhi us se azaadi ka naam dete hain aur kabhi taraqi ka’ Kabhi us se jamhooriyat kehte hain aur kabhi kuch aur Us ke khilaaf tamaam islaahaat , Ikhlaaq-o-kirdaar ki hifaazat ki koshish aur buland paya Islami ta’leemat aur adaab-o-ikhlaaq ko yeh rujiy’at, Pasmaandagi aur daqiyaanusiyat waghaira ke naam se yaad karte hain, Isi tarah ikhlaaq ke maidaan mein yeh abaahiyat aur mard-o-zan ke be muhaaba ikhtilaat ke daa’i hain aur us se bhi yeh taraqi aur azaadi ke naam se mausoom karte hain kyunke unhein is baat ka achi tarah ‘ilm hai ke unhein fikri, Maadi aur siyaasi taur par sirf Isi soorat mein ghalba haasil ho sakta hai ke yeh Deen aur ikhlaaq ka janaza nikaal dein. Jab yeh Deen aur ikhlaaq ka janaza nikaal dein ge to phir un ke liye khair-o-bhalaai ke tamaam sarchashmon ko band kar dena asaani se mumkin ho ga aur phir yeh jis tarah chaahen tasarruf kar saken ge Yaane us fikri , ‘Aqaa’idi aur siyaasi kashmakash mein yeh apne doston ki maal , Aslaah aur propaganda ke zariy’e khoob madad karte hain taakeh unhein ma’ashre mein na sirf asar-o-rasookh haasil ho balkeh woh iqtidaar par bhi qabza kar lein aur iqtidaar par qabza karne ke ba’d yeh log jo qatal-o-ghaarat ka bizaar garam karte, Mukhalifeen ko jala watan karte, Azaadiyon ko salab karte aur har us shakhs ko jis mein Deen aur ikhlaaq ki adna si bhi ramaq ho, us se jis tarah jail ki kaali kothdiyon mein phenk dete hain, Us ke baare mein mat poochiye ! Jin Islami mumaalik ne apni Deeni-o-ikhlaaqi qadron se apne tahafuz ka ehtimaam na kiya, Communism ki us yalghaar ne unhein asaani se apne jaal mein phansa liya. apne ‘ilmi-o-Deeni ikhtisaas ki wajah se Fiqhi council ka chun ke yeh farz hai ke woh us fikri , ‘aqaaidi aur siyaasi yaurish ke khatraat se musalmaanon ko aagah kare, Jo iblaagh aur fouj ke asbaab-o-wasail ke zariy’a phelaae jaa rahe hain, Is liye Islami Fiqhi council ke Makkah Mukarrama mein mun’aqqid hone waale ijtim’a mein yeh faisla kiya gaya ke:

Council-e-‘Aalim-e-Islam ke tamaam mumaalik aur aqwaam ki is Jaanib tawajjuh mabzool karwaae ke communism Islam ke manaafi hai.

Communism ko ikhtiyaar karna us Deen ka inkaar karna hai, Jis ko Allah Ta’ala ne apne bandon ke liye pasand farmaaya hai, Yeh insaani-o-ikhlaaqi qadron ko malyaamet karna hai, Insaani ma’ashron ko kho khula karna hai, aur is ke bar’aks Islami-o-Muhammadi shariy’at hi aakhri aasmaani Deen hai, Jis se Allah Hakeem-o-Hameed ne logon ko andheron se nikaal kar Noor ki taraf laane ke liye naazil farmaaya hai. Yeh Deen siyaasi , Mu’asharti , Saqaafati aur mu’aashi har e’itbaar se ek mukammal nizaam-e-hayaat hai. In tamaam kharaabiyon se nijaat ke liye Jinhon ne musalmaanon ke shirazah ko muntashir kar diya hai, Un ki wahdat ko paarah paarah kar rakha hai aur un ke ittefaaq-o-ittehaad ko intashar-o-khalafshaar se badal diya hai, Yeh Deen hi mufeed-o-mu’sasar aur kaar aamad saabit ho sakta hai, khusoosan woh mu’aashre jinhnon ne Islam ko pehchaanna lekin phir us se pas pisht daal diya, Un mein tamaam tar kharaabi ki jad yehi communism hai. Communism aur socialism ki us sakht mu’aanidaana aur khatarnaak yalghaar ka sab se bada hadaf-e-Islam Us ke mubadi-o-ta’leemaat Us ke ikhlaaq-o-aadaab aur us ke daaman se waabasta mamaalik the, Is liye council Islami mulkon aur mu’aashron ko yeh naseehat karti hai ke woh mukhtalif asbaab-o-wasaail ko baroye kaar laa kar us zabardast khatre ka muqaabla karen, Jis ki chand hasb-e-zail sooratein bhi mumkin hain:

(1) Intehaai sar’at ke saath us nisaab-e-ta’leem aur tarz-e-ta’leem par nazar-e-saani ki jaae jis se haal hi mein Islami mulkon mein raaij kiya gaya hai kyunke yeh baat paaya saboot ko pohanch chuki hai ke nisaab-e-ta’leem mein ilhaadi socialist aur zeher-e-aalood ifkaar shaamil kiye jaa chuke hain jo Islami mulkon ke liye ek tarah se e’laan-e-jang hain aur yeh nisaab-e-communism ke maahir usaatiza-o-musaannifeen se tayyaar karwaaya gaya hai.

(2) Islami mulkon ko chaahiye ke woh had darja koshish kar ke auleen-e-fursat mein apne tamaam idaaron ke nizaam ka jaaiza lein khusoosan zaraae iblaagh , Ma’ashiyat’ Daakhili-o-khaarji tijaarat aur maqaami idaaron ke nizaam ka az sar-e-nau jaaiza lein taakeh un ki tehzeeb-o-tazmeer ki jaa sake aur unhein Islam ki sahih buniyaadon par az sar-e-nau ustawaar kiya jaa sake kyunke yeh Islami buniyaadein hi musalmaan mulkon aur qaumon ko tahaffuz faraaham kar ke unhein hasad-o-baghaz ka shikaar hone se mehfooz rakh sakti hain aur musalmaanon mein az sar-e-nau ukhuwwat, Baahimi ta’awun aur ikhlaas ki rooh phoonk sakti hain.

(3) Islami mulkon aur qaumon se appeal ki jaati hai ke woh takhasus ke aise madaaris-o-makaatib qaaim karein Jin se aise mukhlis aur purjosh daa’i tayyaar hon jo is yalghaar ki tamaam soorton ka muqaabila karne ki ist’edaad rakhte hon aur jo shakhs ajnabi yoorish ki haqeeqat aur us ke khatarnaak aghraaz-o-maqaasid ko ma’loom karna chaahe Yeh daa’i apne gehre mutaall’a aur thaus ma’loomat ki badoulat us se mutmae’n kar saken aur doosri taraf unhein Islam aur us ke qeemti khazaanon ke baare mein bhi bharpoor ma’loomaat haasil hon, aise madaaris aur is tarah ke dua’at-o-muballigheen jis mulk mein jis qadar ziyaada hon ge, usi qadar yeh umeed bhi ziyaada ho gi ke woh un Maghribi aur mulhidaana ifkaar-o-nazariyaat ka asaani se khaatima kar saken ge aur umeed hai ke is tarah ‘ilm-o-‘amal ke hathiyaron se musallah Waqiy’e taur par munazzim ek aisi jama’at un tamaam tehreekon ke muqaabila ke liye uth khadi ho gi Jo musalmaanon ke dilon mein ikhlaaq-o-kirdaar ki us baaqi maandah doulat ko bachaane ki koshish kare gi jis ka yeh mulhidaana tehreekein khatima kar dena chaahti hain.

Council tamaam ‘Ulama-e-Islam se khuwaah un ka ta’lluq kisi bhi jagah ya kisi bhi tanzeem se ho, Ya appeal karti hai ke woh un khatarnaak aur mulhidaana ifkaar-o-nazariyaat ke muqaabila ke liye uth khade hon, Jo musalmaanon ke Deen-o-shariy’at aur ‘aqaaid-o-ikhlaaq ko bhi nuqsaan pohanchaana chaahte hain aur un ke mulkon ko bhi. lehaaza ‘Ulama-e-Islam par farz hai ke woh logon ke saamne ishtirakiyat aur communism ki haqeeqat ko waazeh karen aur bataaein ke yeh dono Islam ke khilaaf jang hain.