510. Sunan-e-Rawaatib ka hukm

Sunan-e-Rawaatib ka hukm

[Sawaal]

Namaz ke ba’d adaa ki jaane waali do Sunnaton ke baare mein Kia hukm hai?

[Jawab]

Allah Ta’ala ne har musalmaan par din raat mein paanch Namaazein Farz ki hain aur Nabi Kareem (ﷺ) ne Ummat ko hukm diya hai ke woh Farzon se pehle aur ba’d aur Auqaat-e-mamnu’aa ke siwa deegar tamaam auqaat mein Namaz adaa kare, Isi Nafil Namaz mein se Sunan-e-Rawaatib bhi hain Yaane Zuhr se pehle do raka’at aur Zuhr ke ba’d do raka’at’ Fajr se pehle do raka’at , Maghrib ke ba’d do raka’at , ‘Isha ke ba’d do raka’at. Yeh tamaam raka’aat waajib nahi balkeh Sunnat hain, Unhein adaa karne waale ko sawaab aur na adaa karne waale ko gunaah na ho ga. In ka faaida yeh hai ke is se nafs ‘ibaadat ka ‘aadi banta aur Namaz ki mohabbat paida hoti hai, Un se faraaiz mein reh jaane waali kami ki bhi talaafi ho gi lehaaza jo shakhs kabhi kabhi unhein chod deta hai, us se gunaah nahi hota lekin hamesha chod dena ‘ibaadat ke ‘adam-e-ehtimaam ki daleel hai aur is se us shakhs ki ‘adaalat bhi majrooh hoti hai ke woh tark-e-sunan aur f’el-e-khair ke istakhfaaf mein rughbat rakhta hai.

(1) Daarqatni 1 383 ‘ 384. Bahiqui 2283. Ibn-e-Khuzaima 1116. Iss se Ibn-e-Habban aur Zehbi ne sahih kaha hai.

__Shaikh Ibn-e-Jibreen__