521. Khasoof-o-Kasoof se muta’lliq masaail

Khasoof-o-Kasoof se muta’lliq masaail

[Sawaal]

Samaahat-ul-Shaikh! Hum ne akhbaarat mein ek khabar padhi hai jis ka khulaasa yeh hai ke ‘anqareeb ghuroob-e-Aftaab ke thodi der ba’d chaand ko mukammal taur par girhan lage ga aur is se teen din pehle sooraj ko bhi girhan lage ga. Is maqala mein mazmoon nigaar ne asbaab-e-khasoof aur is ki ibtidaa-o-inteha ke baare mein nihaayat sharah-o-basat se likha hai jis se darj haqaaiq ke ba’d zehn mein kayi sawaalat paida hote hain:

(1) Sooraj aur chaand ko girhan lagna ek tabee’i baat hai kyunke falaki rasad gaahon ke maahireen is ke waq’oo pazeer hone se bhi kayi din pehle bata dete hain aur yeh bhi bata dete hain ke kis waqt girhan shur’u ho kar kis waqt tak rahe ga aur nihaayat tehqeeq-o-tadeeq ke saath yeh bhi bata dete hain ke sooraj ya chaand ka kitna hissa girhan ki zad mein aae ga?

(2) Rasoolullah (ﷺ) ne hamein yeh hukm diya hai jaisa ke Sahih Muslim mein Hazrat Ayesha رضی الله عنها se riwaayat hai ke hum haalat-e-khasoof mein Namaz padhen aur farmaaya ke us haalat mein Namaz padho hatta ke Allah Ta’ala girhan ko saaf kar de.

(3) Sahih Bukhari mein Hazrat Asma bint-e-Abi Bakr رضی الله عنها se riwaayat hai ke khasoof ke waqt hamein ghulaamon ko azaad karne ka hukm diya jaata tha.

(4) “Fatah-ul-Baari” mein Hadees hai ke:

“Sooraj aur chaand Allah Ta’ala ki nishaaniyon mein se do nishaaniyaan hain, Jin ke saath Allah Ta’ala apne bandon ko darata hai.” To sawaal yeh hai ke sooraj aur chaand girhan se log kio daren kyunke yeh to ek tabee’i cheez hai, Jo runuma hone se bhi pehle ma’loom ki jaa sakti hai?

[Jawab]

Pehli baat to yeh hai ke Nabi Kareem (ﷺ) se saabit hai ke sooraj aur chaand ko girhan is liye lagta hai ke us se Allah Ta’ala apne bandon ko daraana chaahte hain aur yeh targheeb dena chaahte hain ke us ke bande in nishaaniyon ko dekh kar us se daren aur us ke zikr-o-taa’at ki taraf lapkein’ Nabi(ﷺ)ne hamein yeh bhi khabar di hai ke sooraj aur chaand ko girhan kisi insaan ki mout-o-hayaat ki wajah se nahi lagta balkeh yeh to Allah Ta’ala ki nishaaniyon mein se do nishaniyaan hain un ke saath Allah Ta’ala apne bandon ko daraata hai. Aap ne farmaaya :

إِذَا رَأَيْتُمُ الْخُسُوْفَ فَافْزَعُوا إِلَى ذِكْرِ اللهِ وَدُعَائِهِ

(Sahih Bukhari, Kitaab Al-kasoof, Baab Al-zikr fi Al-kasoof, H: 1059, 1060, -o-Sahih Muslim, Kitaab Al-kasoof, Baab zikr Al-Nidaa bi Salaat Al-kasoof, H: 911, 912, 915, -o-Sunan Abi Dawood Kitaab Salaat Al-kasoof Baab Al-Sadqa fiha, 1191, -o-Sunan Nisaai, Kitaab Al-kasoof, Baab Al-Amar bi Al-Astaghfaar fi Al-Kasaif, 1503, 1504)

“Jab tum girhan dekho to Allah Ta’ala ke zikr aur dua’a ki taraf lapko.”

Aap ne yeh bhi farmaaya hai:

إِذَا رَأَيْتُمْ ذَلِكَ فَصَلُّوا وَادْعُوا حَتَّى يُكْشَفَ مَا

“Jab tum yeh dekho to Namaz padho aur dua’a karo hatta ke girhan saaf ho jaae.”

(Sahih Bukhari, Kitaab Al-kasoof, Baab Al-zikr fi Al-kasoof, H: 1059, 1020,-o-Sahih Muslim, Kitaab Al-kasoof, Baab zikr Al-Nidaa bi Salaat Al-kasoof, H: 911, 913, 915, -o-Sunan Abi Dawood Kitaab Salaat Al-kasoof Baab Al-Sadqa fiha, 1191, -o-Sunan Nisaai, Kitaab Al-kasoof, Baab Al-Amar bi Al-Astaghfaar fi Al-kasoof, 1503, 1504)

Is mouq’a par aap ne Allah Ta’ala ki kibryaai bayaan karne , Ghulaamon ko azaad karne aur sadqa karne ka bhi hukm diya hai. Shariy’at ka hukm hai ke is mouq’a par Namaz, zikr, Astaghfaar, Sadqa, Ghulaamon ko azaad karna, Khauf-e-Ilaahi aur us ke ‘azaab se darna ikhtiyaar kiya jaae. Girhan ka hisaab se ma’loom ho jaana is amar se maan’e nahi hai ke yeh Allah Ta’ala ki ek aisi nishaani hai jis se Allah Ta’ala apne bandon ko daraane ke liye dikhaata hai kyunke us ne un nishaaniyon ko paida kiya aur usi ne un ke liye asbaab ko tarteeb diya hai jaisa ke sooraj , Chaand aur sitaare makhsoos auqaat mein tul’u aur ghuroob hote hain aur yeh sab Allah Ta’ala ki nishaaniyon mein se bhi hain aur un ke liye Allah Ta’ala ne asbaab bhi muqarrar farmaaya hai, Jin ke pesh-e-nazar mahireen-e-falkiyaat girhan ko ma’loom kar lete hain to un ka in asbaab se girhan ko ma’loom kar lena is amar se maan’a nahi ke yeh Allah Ta’ala ki aisi nishaaniyaan hain jinhein Allah Ta’ala apne bandon ko daraane ke liye dikhaata hai, Jis tarah sooraj , Chaand , Sitaare , Garmi aur sardi yeh sab bhi Allah Ta’ala ki nishaaniyaan hain. Un mein bhi takhweef-o-tahzeer ka pehlu hai. Un se bhi Allah Ta’ala ki nafarmaani se daraaya gaya hai. Un nishaaniyon ko bhi is liye paida kiya gaya hai ke bande apne Allah se daren’ apne dil mein us ka khauf paida karen, Us ke hukm ke mutaabiq zindagi basar karen aur jin cheezon ko Allah Ta’ala ne Haraam qaraar diya hai, Un ko chod dein.

Aasmaan mein khasoof aur kasoof waghaira ki jo nishaaniyaan hain, Maahireen-e-falkiyat aur hisaab-e-daanon ka unhein ma’loom kar lena aur aksar-o-beshtar woh un ke asbaab hi se unhein ma’loom karte hain, Is amar se maan’a nahi hai ke yeh Allah Ta’ala ki nishaaniyaan hain. Hisaab to ghalat bhi ho sakta hai, Maahir-e-falkiyaat ko bhi ghalti lag sakti hai, Kabhi us ka hisaab durust bhi ho sakta hai, Lekin agar us se hisaab-o-falkiyaat mein mahaarat haasil ho to aksar-o-beshtar sooraton mein us ka andaaza durust hota hai, To us se ‘ilm-e-ghaib nahi kaha jaae ga kyunke khasoof aur kasaif ke asbaab ma’loom hain, Jinhein maahireen-e-falkiyaat sooraj aur chaand ki harkat aur un ki manaazil se ma’loom kar lete hain aur us manzil ko bhi ma’loom kar lete hain, Jis mein khasoof-o-kasoof runuma hona ho, To yeh is baat se maan’a nahi hai jo Allah Ta’ala ne apne Rasool (ﷺ) ki zabaani hukm diya hai ke us se dekh kar Allah Ta’ala se dara jaae, Sadqa-o-khairaat kiya jaae ya is tarah ke deegar umoor bajaa laae jaaein ke in sab umoor mein bandgaan-e-Ilaahi ki maslihat hai ke woh us se daren Us ke khauf ko apne dilon mein jagah dein aur Siraat-e-Mustaqeem par gaamzan rahen aur hisaab se us ka ma’loom ho jaana un umoor se maan’a nahi hai.

[Sawaal]

Kia is tarah ki khabron ko nashar karna girhan ki ahmiyat ko kam nahi karta?

[Jawab]

Agar un khabron ki asha’at ko tark kar diya jaae, To yeh ahsan-o-afzal hai taake log jab achanak girhan ko dekhen to un par khauf aur ghabraahat ki kefiyat taari ho aur woh yeh dekh kar Allah Subhaan-o-Ta’ala ki ita’at-o-bandagi ke liye khoob koshish karen lekin ba’az maahireen ki yeh raae hai ke logon ko pehle se mutaall’a kar dene se yeh faaida hai ke is tarah ghaflat mein mubtala ho jaane ki bajaae’ Woh ita’at aur ‘ibaadat-e-Ilaahi ke liye baqaaida tayyaari kar lete hain. kyunke basaa auqaat log girhan ke baare mein jab ghaafil hote hain, To unhein sha’oor aur aagahi haasil nahi hoti aur woh ita’at aur ‘ibaadat ke liye tayyaar nahi hote lehaaza agar akhbaarat mein pehle se khabar shay’a kar di jaae, To woh khabardaar ho kar us ke liye munaasib tayyaari kar lete hain aur un khabron ke shay’a karne se aksar-o-beshtar yehi maqsood hona chaahiye.

[Sawaal]

Kia chaand aur sooraj ke girhan ke baare mein pehle se paishgoi kar dena adla-e-shari’ya se tasaadum to nahi hai? Allah Ta’ala aap ki hifaazat-o-nigahdaasht farmaae!

[Jawab]

Nahi! Is mein koi ta’arruz nahi hai kyunke Ahl-e-ilm farmaate hain ke un baaton ka ta’lluq ghaibi umoor se nahi hai balkeh unhein hisaab se ma’loom kiya jaa sakta hai, Jis tarah pehle logon mein se Shaikh-ul-Islam Ibn-e-Taymiyyah رحمة الله hai aur Ibn-e-qaaim رحمة الله ne likha hai. Maahireen-e-falkiyaat-o-hisaab, Chaand aur sooraj ki manzilon se is ka hisaab laga lete hain aur in tareeqon se us se ma’loom kar lete hain, Jinhein unhon ne ‘ilm-e-falkiyaat mein padha aur ma’loom kiya hota hai. ‘Ilm-e-ghaib se is ka koi ta’lluq nahi hai.

__Shaikh Ibn-e-Baaz__