553. Fajr aur ‘Ishaa ki Namaazon mein Namaaziyon ki padtaal

Fajr aur ‘Ishaa ki Namaazon mein Namaaziyon ki padtaal

[Sawaal]

Hum Fajr aur ‘Ishaa ki Namaazon mein Namaaziyon ko bulaate aur jama’at se peeche reh jaane waalon ki jaanch padtaal karte hain. Kia aisa karna Nabi Kareem (ﷺ) se saabit hai? Umeed hai daleel ke saath is masla ki wazaahat farmaaein ge.

[Jawab]

Musalmaanon ke liye yeh waajib hai ke aapas mein ek doosre se hamdardi-o-khairkhuwaahi karen aur neiki, Taqwa , Amar bilma’roof aur nahi ‘an Al-Munkar mein ek doosre se ta’awun karen aur is ke liye kabhi kabhi is baat ki bhi zaroorat hoti hai ke apne bhai ke baare mein ma’loom kiya jaae aur yeh jasoosi ke liye nahi balkeh is liye ke agar woh bemaar hai to us ki bemaar pursi ki jaae, us se mufeed mashware diye jaaein , Koi pareshaani hai to us se door kiya jaae, husool-e-manfa’at ya dif’a zarar-o-mushaqqat ke silsila mein us se ta’awun kiya jaae ya us se neiki ka hukm diya jaae aur buraai se mana’ kiya jaae, Chunaanche is maqsad ki Khaatir Masjid ke Namaaziyon ki bhi jaanch padtaal ki jaa sakti hai. Hadees mein hai ke Nabi Kareem (ﷺ) ne bhi Namaz-e-Fajr mein Namaaziyon ki padtaal ki aur farmaaya:

«أَشَاهِدٌ فُلَانٌ، أَشَاهِدٌ فُلان

“Kia falaan shakhs haazir hai? Kia falaan shakhs haazir hai?”

(Sunan Abi Dawood, Kitaab Al-Salaat, Baab fi Fazal Salaat Al-jama’at, H: 554,-O-Sunan Nasai, Kitaab Al-Imaamat Baab Al-jama’at Izaa Kaanuwa Asnen, H: 844 -O-Masnad Ahmad, 5 140)

__Fatwa-e-committee__