683. ‘Eid ke din ke mustahab af’aal

‘Eid ke din ke mustahab af’aal

[Sawaal]

‘Eid ul Fitar ke din hamare liye kon se am’aal-o-af’aal mustahab hain?

[Jawab]

‘Eid ke din musalmaan Farhat-o-Mussarat ka izhaar karte hain ke unhon ne sayaam-o-qayaam ki takmeel ki aur deegar ‘ibaadaat ko sar-e-anjaam diya ke yeh Allah Ta’ala ki woh ‘Azeem n’ematein hain, Jin ki us ne apne bandon ko toufeeq ‘ataa farmaai. Lehaaza sab se pehle to woh ‘Eid ki raat aur din mein Namaz-e-‘Eid se pehle takbeerein shur’u kar dete hain, Phir din ke ibtidaa’i hissa mein us makhsoos ‘ibaadat Yaane Namaz-e-‘Eid ke adaa karne ke liye ek makhsoos andaaz mein apne gharon se baahir khule maidaan mein jaate hain aur us mein mard bhi shareek hote hain aur ‘Aurtein bhi hatta ke pardah nasheen doshizgaan bhi us ‘ibaadat mein shareek hoti hain taake woh bhi khair-o-bhalaai aur musalmaanon ki dua’a ke is Muqqadas mouq’a par haazir hon jaisa ke Hadees mein is ka zikr hai.

Namaz-e-‘Eid adaa karne ke ba’d musalmaan us n’emat par khushi-o-musarrat ka izhaar karte hue ‘Eidgaah se wapas laut’te hain, Ek doosre ko salaam aur mubarak baad kehte hain, Ek doosre ki mulaaqaat ke liye aate jaate hain aur ‘ibaadat-e-roza ke ikhtitaam pazeer hone ki ‘alaamat ke taur par us din unwa’a-o-iqsaam ki cheezein khaate peete hain.

__Shaikh Ibn-e-Jibreen__