Imam Mundhiri (رحمة الله)

Imam Mundhiri (رحمة الله) Ka Ta’aruf:

Is haqeeqat se inkar mumkin nahi ke kisi kitab ki maqbooliyat aur pazeerai uss ke muallif aur musannif ke ilmi qad o qaamat ki mauhoon hoti hai. Agar muallif ya musannif ilmi halqon main jana pehchana, maqbool aur achhi shohrat ka malik hai to uss ki har kachi pakki kitab pasand ki jati hai. Agar musannif koocha e Qalam o Qirtaas main nowaarid hone ki wajah se buland qad o qamat se mehroom aur naamwar shakhsiyat ka malik nahi balke ghair maroof hai to uss ki bari ilmi, johri aur mufeed tareen kawish bhi ek taweel arse tak logon ki tawajjo ka markaz nahin banti.

Is liye na munasib na hoga ke pehle iss ilmi shahkar ke muallif girami qadar ka mukhtasar t’aruf qar’eein ki khidmat mein pesh kar dia jaye taa ke kitab ki ehmiyat aur afadiyat par dhundli si roshni par sake.

Naam:

Al Sheikh ul Haifiz ul Imam Abdul Azeem Bin Abdul Qavi ul Mundhiri Al Shami Thum ul Misri.

Wiladat:

Aap gharah shabaan 581 hijri main tawild hue.

Asatizah:

Apne daur ke namwar shuyookh aur bade bade aima hadees aur fuqha ‘asar se ilm hadees o fiqh hasil kia. Jin main Al Sheikh Abu Abdullah Al Rayani, Al Sheikh Abdul Mujeeb Bin Zaheer, Al Sheikh Muhammad Bin Saeed Al Mamooni aur Al Hafiz ul Kabeer Ali Bin Fazal Al Muqaddisi R.A. jesi ilmi shakhsiyat se ilm hadees main tajurba hasil kia.

Imam Abu Al Qasim Abdul Rehman Bin Muhammad R.A. se ilm fiqh main rusookh hasil kia aur yun apne waqt ke bade muhaddis aur faqia qaraar paye.

Talamizah:

Al Hafiz Abu Muhammad Al Damyati, Imam al Matakhireen Taqi uddin Bin Daqiq Ul Eid, Shareef Izzudin R.A. aur Ulma e waqt ki ek maaqool taadad aap ki khosha cheen aur faiz yafta hai.

Ilmi Muqaam o Martaba:

Aap na sirf Hafiz ul Hadees the balke hadees rasool S.A.W.W. ke mu’awun uloom ke shaandar, alal hadees ke Ghawaass, Sahih wa saqeem hadees ke hazaaq aur mushkil al hadees ki tawdheeh wa tabeen main maharat tamaa hasil thi. Hadees se istambaat, ehkaam aur ma’ani ki ta’ayyun main yad toola rakhte the.

Saqahat wa adaalat main apni misal aap the. Sabt aur mutqin the. Riwayat wa darait ke musallim imam the. Saaib ul rai aur matussbat fil hadees the. Garz ye ke aap saqaahat wa adaalat ke lihaaz se hadees aur is ke mutalliqa uloom main yakta rozgaar aur bala tafaaq waqt ke bohat bade mohaddis the aur mufti aise ke aap ke fatawaa khuss o aam main bade maqbool aur sanad maane jate the.

Seerat:

Zohd o wara’a ke paikar, taqwa wa tahaarat ke khoogar, ifat wa khuddaari ke muraqqa khush khussaal, Khush muqaal, paak nihaad aur neik iftaad shakhsiyat ke maalik the. Shab zindadaar taqi wa naqi aur bade khuddaar aur mustajaab ul dawaat mohaddis aur buzurg the.

Aap ne huqooq ul ‘Ibaad ki adaayegi main badi mohtat zindagi basar farmaai. Aap zindagi ke is shobe main kis qadar mohtaat the is ka andaza darja zel waqiya se bakhubi lagaya ja sakta hai. Aap ke naamwar shagird aur mohaddis Abu Muhammad al Damyati R.A. kehte hain Aap ek roz Hamam se bahir nikle to garmi ki taab na la kr ek band dukan ke samne bazar main lait gaye. Maine arz ki ke hazrat! Dukan ka bench Khali pada hai. Yun bazaar mein laitne se to behtar hai ke aap bench par lait jayein. To mere jawab main farmaya bhai dukan band aur dukandar gayib hai lihaza dukandar ki ijazat ke baghair uss ke bench par laitna mustahsin amar nahi. Ise kehte hain wara’a aur taqwaa.

Goya saari umar isi ehtiyat main guzri

Kisi shaakh pe mera aashiyan baar na ho

Subhan Allah Allahu Akbar Wafi Zalika Falyatanafasil Matanafisoon.

Ahem Tasneefaat:

Agarche Imam Mundhiri R.A. ne apni umar ki mata’a azeez ko kitaab o sunnat ki taleem wa ta’alum aur in ki Asha’at wa tarweej main waqf kiye rakha. Taaham mohaddiseen Shukar Allah Mussaeiham ul Jameelata aur Ulma e rubaneen ki yeh aadat rahi hai ke dawat o tableegh ke nuqta nazar se aur tas-heel ki khatir apne andokhta ilmi ko matan’o andaaz main hawala qirtaas bhi farmaya karte the. Chunancha isi aadat ke mutabiq Imam Mundhiri ke Ash-hab qalam se kayi ba barkat maroof tareen tasneefat mansa e shuhood par jalwa gar hain.

Maslan mukhtasir Sahih Muslim, Mukhtasir Sunan Abi Dawood ma’al hawaashi. Kafayatul tabad wa tohfatul tazhad aur al targheeb wa tarheeb min ul hadees al shareef sharah tanbiya aap ki baaqiyaat ul Saalihat main se hain.

Imam Mundhiri R.A. ki Al targheeb wat tarheeb pehle isi naam pr teen kitabein manzare aam par aa chuki thin. Is mauzoo ki ehmiyat ke pesh e nazar Hazrat Mundhiri R.A. ne mazeed zarurat samajh kar yeh kitaab qalamband farmaai. Allah ki taraf se Imam Mundhiri R.A. ki kitab ko jo sharf qubool hasil hua woh is mauzoo par pehli kitabon ko hasil nahi.

Wafaat:

Umar bhar kitab o sunnat aur manhaj Salaf al Saliheen ki tarweej main mashghool rehne ke baad pichhattar baras ki umar main 656 main apne khaliq e haqiqi se ja mile.

Innal lillahi wa inna ilaihi rajioon. Allahumm’agh firlahu warhamhu wa aalihi wa adkhilhu jannatal firdous.

REFERENCE:

Book: “Sahih At Targhib Wat Tahzeeb” (Urdu)

Tarjamah: Hafiz Mohammad Sajid Hakim”