عبادات کا حکم

 

 

بچوں کو رب العالمین کی عبادت کا حکم دینا چاہئے، ان کی عمر اور فہم کے مطابق انہیںنماز اور روزے کی تاکید کرتے رہنا چاہیئے، اﷲ تعالیٰ کا ارشاد ہے :

 

﴿ وَاْمُرْ اَہْلَکَ بِالصَّلَاۃِ وَاصْطَبِرْ عَلَیْہَا ﴾(طہ :132)

 

ترجمہ : اپنے اہل وعیال کو نماز کا حکم دو اور خود بھی اس کے پابند رہو۔

 

حضرت اسماعیل ذبیح اﷲ علیہ السلام کی خصوصیت سے اﷲ تعالی نے اسلئے تعریف فرمائی ہے کہ وہ اپنے اہل وعیال کو نماز اور زکاۃ کی تاکید کرتے تھے۔ فرمانِ باری ہے:

 

﴿ وَاذْکُرْ فِی الْکِتَابِ اِسْمٰعِیْلَ ز اِنَّہٗ کَانَ صَادِقَ الْوَعْدِ وَکَانَ رَسُوْلًا نَّبِیًّا ٭ وَکَانَ یَاْمُرُ اَہْلَہٗ بِالصَلَاۃِ وَالزَّکَاۃِ وَکَانَ عِنْدَ رَبِّہٖ مَرْضِیًّا ﴾ (مریم :55۔54)

 

ترجمہ :اس کتاب میں اسماعیل کو یاد کرو، بلا شبہ وہ وعدے کے سچے اور رسول نبی تھے، وہ اپنے گھر والوں کو نماز اور زکوۃ کا حکم دیتے تھے اور اپنے رب کے پسندیدہ بندے تھے۔

 

نیز فرمان ہے:﴿یَآ اَیُّہَا الَّذِیْنَ آمَنُوْا قُوْآ اَنْفُسَکُمْ وَاَھْلِیْکُمْ نَارًا﴾(تحریم :6)

ترجمہ :اے ایمان والو! اپنے آپکو اور اپنے اہل وعیال کو جہنم کی آگ سے بچاؤ۔

 

حضرت لقمان حکیم رحمہ اﷲ نے اپنے لڑکے کو نصیحت کرتے ہوئے فرمایا :

 

﴿ وَاِذْ قَالَ لُقْمَانُ لِاِبْنِہٖ وَہُوَ یَعِظُہٗ یٰبُنَیَّ لَا تُشْرِکْ بِاللّٰہِ اِنَّ الشِّرْکَ لَظُلْمٌ عَظِیْمٌ ﴾( لقمان : 13)

ترجمہ : ( اس وقت کو یاد کرو) جب لقمان نے اپنے بیٹے کو نصیحت کرتے ہوئے کہا تھا : بیٹے ! اﷲ کے ساتھ کسی کو شریک نہ کرنا، کیونکہ بلا شبہ شرک بہت بڑا ظلم ہے۔

 

﴿ اَقِمِ الصَّلٰوۃَ وَاْمُرْ بِالْمَعْرُوْفِ وَانْہَ عَنِ الْمُنْکَرِ وَاصْبِرْ عَلٰی مَآ اَصَابَکَ ط اِنَّ ذٰلِکَ مِنْ عَزْمِ الْاُمُوْرِ ٭ وَلَا تُصَعِّرْ خَدَّکَ للِنَّاسِ وَلَا تَمْشِ فِی الْاَرْضِ مَرْحًا ط اِنَّ اللّٰہَ لَا یُحِبُّ کُلَّ مُخْتَالٍ فَخُوْرٍ﴾ ( لقمان : 17۔18)

ترجمہ :بیٹا ! نماز قائم کرنا، نیکی کا حکم کرنا اور برائی سے روکنا اور جو بھی مصیبت تجھ پر آن پڑے صبر کرنا، کیونکہ یہ بڑے حوصلے کے کاموں میں سے ہے۔اور لوگوں کیلئے اپنے گال کو نہ پُھلا ( بطورِ تکبّر ) اور زمین پر اِترا کر نہ چل، ( اس لئے کہ ) یقینًا اﷲ تکبر کرنے والے اور شیخی بگھارنے والے کو پسند نہیں کرتا۔

 

حضرت یعقوب علیہ السلام نے اپنی وفات کے وقت اپنی اولاد کو جمع کرکے انہیں یہ وصیّت فرمائی :

 

﴿ اَمْ کُنْتُمْ شُہَدَآئَ اِذْ حَضَرَ یَعْقُوْبَ الْمَوْتُ لا اِذْ قَالَ لِبَنِیْہِ مَا تَعْبُُدُوْنَ مِنْ م بَعْدِیْ ط قَالُوْا نَعْبُدُ اِلٰہَکَ وَاِلٰہَ اٰبَآئِکَ اِبْرَاہِیْمَ وَ اِسْمٰعِیْلَ وَ اِسْحٰقَ اِلٰہًا وَّاحِدًا ج وَنَحْنُ لَہٗ مُسْلِمُوْنَ ﴾

ترجمہ :کیا تم اس وقت موجود تھے جب یعقوب دنیا سے رخت سفر باندھ رہا تھا ؟ جب اس نے اپنے بچوں سے پوچھا، میرے بچو ! میرے بعد تم کس کی عبادت کروگے ؟ تمام بچوں نے کہا : ہم اسی ایک معبودِ برحق کی عبادت کریں گے جس کی پرستش آپ اور آپکے آباء واجداد ابراہیم اور اسماعیل اور اسحاق (علیہم السلام )کیا کرتے تھے اور ہم اسی کے فرمانبردار ہیں۔ ( البقرہ : 133)

 

---

بچوں کے متعلق رسول اکرم صلی اللہ علیہ وسلم کی وصیت:

---

 

عن عبد اللّٰہ بن عمرو بن العاص عن رسول اللّٰہ صلی اللّٰہ علیہ وسلم أنہ قال :

 

“مُرُوْا أَوْلَادَکُمْ بِالصَّلَاۃِ وَہُمْ أَبْنَائُ سَبْعَ سِنِیْنَ وَ اضْرِبُوْہُمْ عَلَیْہَا وَہُمْ أَبْنَائُ عَشْرَ، وَفَرِّقُوْا فِی الْمَضَاجِعِ”۔(ابوداؤد495:بسندحسن)

 

عبد اﷲ بن عمرو بن العاص رضی اللہ عنہ سے مروی کہ رسول اﷲ صلی اللہ علیہ وسلم نے ارشاد فرمایا :”اپنے بچوں کوجب وہ دس سال کے ہوجائیں تو نماز کا حکم دو، دس سال عمر کو پہنچ جائیں تو انہیں نماز نہ پڑھنے پر مارو اور ان کے بستر الگ کردو”۔

 

---

سیدناعلی بن ابی طالب رضی اللہ عنہ کی اپنے بچوں کیلئے وصیت

---

 

علی بن ابی طالب رضی اللہ عنہ نے اپنی وفات کے وقت اپنے بیٹوں کو جمع کرکے فرمایا:

 

” میرے بچو ! کوئی بھی شر جسکے بعد جنت ملے، وہ شر نہیں۔ اور کوئی بھی خیر جسکے بعد دوزخ ہو، وہ خیر نہیں۔ تمام نعمتیں جنت کے مقابلے میں حقیر ہیں اور ہر مصیبت دوزخ کے مقابلے میں عافیت ہے۔میرے بچو ! جو شخص اپنے عیوب پر نظر رکھتا ہے وہ دوسرے کے عیبوں سے بے نیاز ہوجاتا ہے۔ اور جو اﷲ کی تقسیم پر راضی رہتا ہے، وہ نہ ملنے والی چیزوں پر رنجیدہ نہیں ہوتا۔ اور جو بغاوت کی تلوار بلند کرتا ہے، وہ اسی سے مارا جاتا ہے۔ اور جو اپنے بھائی کیلئے کنواں کھودتا ہے، تو وہ اسی میں گرتا ہے۔جو اپنے بھائی کی پردہ دری کرتا ہے، تو اسکی اولاد کی بھی پردہ دری ہوگی۔اور جو اپنی غلطیاں بھول جاتا ہے اسے دوسروں کی غلطیاں بڑی لگتی ہیں۔ جو خود پسندی میں مبتلا ہوگا، وہ گمراہ ہوجائے گا۔اور جو اپنی عقل کو کافی سمجھے گا، وہ ٹھوکر کھائے گا۔اور جو لوگوں پر تکبر کرے گا، وہ ذلیل ہوگا۔اور جو ذلیل لوگوں کی صحبت میں رہے گا،وہ حقارت پائے گا۔اور جو بری جگہوں میں جائے گا، اس پر تہمتیں لگیں گی۔ جو علماء کی صحبت اختیار کرے گا،اسکی عزت کی جائے گی۔ اور جو مذاق کرے گا، اسکی وجہ سے وہ ہلکا ہوگا۔اور جو شخص جو کام زیادہ کرے گا، اسی سے وہ مشہور ہوگا۔اور جو زیادہ بات کرے گا تو اس سے زیادہ خطا ئیں سرزد ہونگی، اور اس میں حیاء کم ہوگی اور جس میں حیاء کم ہوگی، اس کا تقویٰ کم ہوگا اور جس کا تقویٰ کم ہوگا، اس کا دل مردہ ہوجائے گا، اور جس کا دل مردہ ہوجائے گا تو وہ دوزخ میں داخل ہوگا۔میرے بچو ! حسن ادب ایک ایسی ترازو ہے جس پر لوگوں کو تولا جاتا ہے، اور اچھے اخلاق بہترین ساتھی ہیں۔ میرے بچو ! عافیت کے دس حصے ہیں، جس میں سے نو خاموشی میں رکھے گئے ہیں، سوائے اﷲ کی یاد کے۔ اور ان میں سے ایک نادان لوگوں کی مجلسوں کو چھوڑدینے میں ہے۔میرے بچو ! اسلام سے بھی بلند کوئی شرف نہیںاور تقویٰ سے بڑھ کر کوئی عزت نہیں۔ اور توبہ سے زیادہ کامیاب کوئی سفارشی نہیں۔ اور عافیت سے زیادہ خوب صورت کوئی لباس نہیں۔ میرے بچو !حرص، تھکاوٹ کی کنجی اور پریشانیوںکی سواری ہے”۔ (المستطرف فی کل فن مستظرف)

 

---

حضرت ابراہیم بن ادھم رحمہ اﷲکی وصیت

---

 

مشہور زاہد تابعی ابراہیم بن ادھم رحمہ اﷲسے کہا گیا:

 

“آپ ہمیں ایسی باتوں کی وصیت فرمائیں جو ہمیں فائدہ دے”۔ آپ نے فرمایا : بسم اللّٰہ الرحمٰن الرحیم

۱۔ جب تم لوگوں کو دنیا داری میں مشغول دیکھو تو تم آخرت میں مشغول ہوجاؤ۔

۲۔ جب تم لوگوں کو دیکھو کہ وہ ظاہر کو مزین کرنے میں مشغول ہیں تو تم اپنے باطن کی تزئین میں مشغول ہوجاؤ۔

۳۔ جب تم لوگوں کو باغوں اور محلوں کو آباد کرنے میں مشغول دیکھو تو تم قبروں کو آباد

کرنے میں مشغول ہوجاؤ۔

۴۔ جب تم انہیں دیکھو کہ وہ مخلوق کی خدمت میں مشغول ہیں تو تم رب العالمین کی عبادت میں مشغول ہوجاؤ۔

۵۔ لوگوں کو عیب جوئی میں مشغول پاؤ توتم اپنے عیوب کی تلاش میں مشغول ہوجاؤ۔

۶۔اور دنیا سے اتنا توشہ تیار کرو جو تمہیں آخرت تک پہنچادے،اسلئے کہ دنیا آخرت کی کھیتی ہے۔

(اسے شیخ ابراہیم بن عبد اﷲ الحازمی نے اپنی کتاب“الوصایا” میں اسے ذکر کیا ہے)

 

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی