وضو اور غسل کا طریقہ

وضو کا مسنون طریقہ صحیح احادیث کی روشنی میں پیشِ خدمت ہے، والدین سے گذارش ہے کہ اپنی اولاد کو مندرجہ ذیل طریقہ پر وضو اور غسل کی تعلیم دیں۔

1۔  مسواک کرنا : وضو سے پہلے مسواک کرنا مستحب ہے،یہ نبی صلی اللہ علیہ وسلم کی محبوب سنت ہے۔

ابو ہریرہ رضی اللہ عنہ سے روایت ہے کہ رسول اﷲ صلی اللہ علیہ وسلم نے فرمایا :

“اگر میری امت کو تکلیف نہ ہوتی تو میں انہیں ہر نماز سے پہلے مسواک کرنے کا حکم دیتا”۔ (بخا ری:887)

2 . نیّت کرنا : وضو سے پہلے دل میں وضو کی نیت کرنی چاہیئے ‘کیونکہ حضرت عمررضی اللہ عنہ سے مروی ہے کہ رسول اﷲ صلی اللہ علیہ وسلم نے فرمایا :” اعمال کا دار ومدار نیتوں پر ہے” (بخاری ومسلم )

3. ۔تسمیہ : وضو سے پہلے بسم اﷲ پڑھنا ضروری ہے۔ رسول اﷲ صلی اللہ علیہ وسلم نے فرمایا :”جو (جان بوجھ کر)بسم اﷲ نہیں پڑھتا اسکا وضو نہیں ہے” (ترمذی، عن ابی ہریرۃ رضی اللّٰہ عنہ )

نوٹ =اگر ابتداء میں بسم اﷲ پڑھنا بھول جائے تو جب یاد آئے اسی وقت پڑھ لینے سے وضو صحیح ہوگا،اگر وضو کی جگہ باتھ روم کے اندر ہو تو داخل ہونے سے پہلے وضو کی نیت سے بسم اﷲپڑھ لینا کافی ہوگا۔

4۔  دونوں ہاتھ کلائی کے جوڑ تک تین مرتبہ دھوئیں۔

5. ۔دائیں ہاتھ میں پانی لیکر تین مرتبہ کُلّی کریں اور تین مرتبہ ہی ناک میں اچھی طرح پانی چڑھائیں اور بائیں ہاتھ سے ناک صاف کریں۔

6۔ تین مرتبہ چہرے کوپیشانی کے بالوں کی جڑوں سے لیکر ٹھڈی کے نیچے تک اور دائیں کان سے بائیں کان تک دھوئیں اورداڑھی کا خلال کریں۔

7 ۔دایاں ہاتھ کہنی سمیت تین مرتبہ دھوئیں اور پھر بایاں ہاتھ کہنی سمیت تین مرتبہ دھوئیں

8 ۔پھر ہاتھوں کو پانی سے تر کرکے سر کا مسح کریں ( دونوں ہاتھ سر کے اگلے حصہ سے شروع کرکے پیچھے گُدی تک لے جائیں اور پھر پیچھے سے آگے اسی جگہ لے آئیں جہاں سے مسح شروع کیا تھا )

9۔ پھر کانوں کا مسح اس طرح کریں کہ شھادت کی انگلیاں دونوں کانوں کے سوراخوں میں داخل کریں اور ان سے کانوں کے اندر والے حصے کا مسح کریں اور

انگوٹھوں کے ساتھ کانوں کی پشت (یعنی باہر والے حصہ)کا مسح کریں۔

نوٹ=1۔سر اور کانوں کا مسح ایک ہی بار کیا جائے گا۔2۔کانوں کے مسح کے لئے نیا پانی لینا ضروری نہیں ہے کیونکہ کان سر ہی کا حصہ ہیں۔3۔ گر دن کا مسح کرنا کسی صحیح حدیث سے ثابت نہیں ہے اس بارے میں جو روایت مشہور ہے اس کے متعلق امام نووی ؒفرماتے ہیں کہ یہ بالاتفاق ضعیف ہے۔

10۔پھر دایاں پاؤں ٹخنوں سمیت تین بار اورپھر بایاں پاؤں ٹخنوں سمیت تین مرتبہ دھوئیںاور انگلیوں کا خلال کریں۔(بخاری ومسلم)

وضو کے بعد کی دعائیں:رسول اﷲ صلی اللہ علیہ وسلم نے فرمایا :”جب کوئی اچھی طرح وضو کرے پھر یہ دعا پڑھے: اَشْھَدُ اَنْ لاَّ إِلٰہَ إِلاَّ اللّٰہُ وَحْدَہُ لاَشَرِیْکَ لَہُ وَاَشْھَدُ اَنَّ مُحَمَّدًا عَبْدُہُ وَرَسُوْلُہُ،اَللّٰھُمَّ اجْعَلْنِی مِنَ التَّوَّابِیْنَ وَاجْعَلْنِیْ مِنَ الْمُتَطَھِّرِیْنَ (ترمذی55: ) میں اس بات کی گواہی دیتا ہوں کہ سوائے اﷲ کے کوئی معبود برحق نہیں، وہ اکیلا ہے، اس کا کوئی شریک نہیں۔ اورمیں اس بات کی گواہی دیتا ہوں کہ محمدصلی اللہ علیہ وسلم اسکے بندے اور اس کے رسول ہیں اے اﷲ !مجھے توبہ کرنے اور پاک صاف رہنے والوں میں کر۔ تو اس کیلئے جنت کے آٹھوں دروازے کھول دئے جاتے ہیں کہ وہ جس دروازے سے چاہے جنت میں داخل ہو جائے”۔

غُسلِ جنابت کا طریقہ:

1۔ دل میں غسل کی نیت کریں اور حمّام سے باہر بسم اﷲپڑھ لیں۔

2۔اپنے ہاتھوں کو تین مرتبہ دھوئیں۔

3۔ استنجاء کریں۔

4۔ وضو کریں لیکن پاؤںنہ دھوئیں۔ رضی اللہ عنہ۔

5.  دونوں ہاتھوں کی انگلیاں پانی سے تر کرکے بالوں کی جڑوں کو تر کریں ‘یعنی سر اور داڑھی کے بال۔

6۔سر کی دائیں طرف سے شروع

کرتے ہوئے پانی کے تین چُلّو بھر کر سر پر ڈالیں۔

7۔ پور ے بدن پر پانی بہائیں اور حتی الامکان تمام اعضاء کو مل مل کر دھوئیں اور انگلیوں کا خلال کریں۔

8۔پھر اپنی جگہ سے ہٹ کر تین تین مرتبہ دونوں پاؤں کو دھوئیں، اس کے بعد نماز کے لئے وضو کرنے کی حاجت نہیں بلکہ غسل ہی کافی ہوگا۔(بخاری ومسلم)

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی