اﷲ کی مراقبت کا احساس

تربیتِ اولاد میں ضروری ہے کہ بچوں کو اس بات کا احساس دلایا جائے کہ وہ جس معبودِ حقیقی کی عبادت کرتے ہیں، وہ ہمیشہ ان کے ساتھ ہے، ان کی ہر حرکت کو دیکھ رہا ہے اور اس کو قیامت کے دن کے لئے محفوظ کررہا ہے، کوئی نیکی اس سے مخفی نہیں اور نہ ہی کوئی بُرائی، چاہے وہ کتنے ہی پردوں کے اندر چھپ کر کی جائے، اسلئے تم ہمیشہ اسی سے ڈرو اور اسی سے امید رکھو، جو کچھ مانگنا ہو اسی سے مانگو، اسکے علاوہ اور کوئی داتا نہیں، جیسا کہ رسول اﷲ 1 نصیحت کرتے ہوئے فرمایا :

عن عبد اللّٰہ بن عباس رضی اللّٰہ عنہ قَالَ:”کُنْتُ خَلْفَ النَّبِیِّ صلی اللّٰہ علیہ وسلم یَوْمًا، فَقَالَ : یَا غُلَامُ ! إِنِّیْ أُعَلِّمُکَ کَلِمَاتٍ :” إِحْفَظِ اللّٰہَ یَحْفَظْکَ إِحْفَظِ اللّٰہَ تَجِدْہُ تُجَاہَکَ وَإِذَا سَأَلْتَ فَاسْئَلِ اللّٰہَ وَإِذَا اسْتَعَنْتَ فَاسْتَعِنْ بِاللّٰہِ وَاعْلَمْ لَوْ أَنَّ الْأُمَّۃَ إِجْتَمَعَتْ عَلٰی أَنْ یَنْفَعُوْکَ بِشَیْئٍ لَمْ یَنْفَعُوْکَ إِلاَّ بِشَیْئٍ قَدْ کَتَبَہُ اللّٰہُ لَکَ،وَإِجْتَمَعُوْا عَلٰی أَنْ یَضُرُّوْکَ بِشَیْئٍ لَمْ یَضُرُّوْکَ إِلاَّ بِشَیْئٍ قَدْ کَتَبَہُ اللّٰہُ عَلَیْکَ،رُفِعَتِ الْأَقْلَامُ وَجَفَّتِ الصُّحُفُ” (تر مذی: 2156 صحیح الجامع للألبانی :7957 )وفی روایۃ:”إِحْفَظِ اللّٰہَ تَجِدْہُ تُجَاہَکَ، تَعَرَّفْ إِلَی اللّٰہِ فِی الرَّخَائِ یَعْرِفْکَ فِی الشِّدَّۃَ، وَاعْلَمْ أَنَّ مَا أَصَا بَکَ لَمْ یَکُنْ لِیُخْطِئَکَ وَ مَاأَخْطَأَکَ لَمْ یَکُنْ لِیُصِیْبَکَ، وَاعْلَمْ أَنَّ النَّصْرَ مَعَ الصَّبْرِوَأَنَّ الْفَرْجَ مَعَ الْکَرْبِ وَأَنَّ مَعَ الْعُسْرِ یُسْرًا” (مسند عبد بن حمید )

تر جمہ : عبد اﷲ بن عباس رضی اﷲ عنہما کہتے ہیں :”میں ایک دن رسول اﷲ صلی اللہ علیہ وسلم کے پیچھے تھا، آپ صلی اللہ علیہ وسلم نے فرمایا :اے لڑکے ! میں تمہیں کچھ باتیں سکھاتا ہوں : تم اﷲ تعالیٰ کو یاد رکھو( اسکے حقوق اور احکامات پر عمل کرکے اور اس کی منع کی ہوئی چیزوں سے بچ کر ) تو وہ تمہیں یاد رکھے گا، تم اﷲ کو یاد رکھو تو اسے اپنے سامنے پاٖ ؤگے۔ جب بھی کچھ مانگو تو اﷲ تعالیٰ سے ہی مانگو، جب بھی مدد طلب کرو تو اﷲ ہی سے مدد طلب کرو۔ یہ بات اچھی طرح جان لو کہ اگر ساری قوم مل کربھی تمہیں کسی چیز کا فائدہ کرنا چاہے تو تمہارا اتنا ہی فائدہ کرسکتی ہے جتنا اﷲ نے تمہارے لئے لکھ رکھا ہے۔ اگر ساری قوم مل کر تمہیں نقصان بھی پہنچانا چاہے تو اتنا ہی پہنچا سکتی ہے جتنا کہ اﷲنے تمہاری قسمت میں لکھ رکھا ہے، تقدیر لکھنے والے قلم اٹھالے گئے اور صحیفے خشک ہوگئے۔(جو ہونا تھا وہ لکھ دیا گیا اب اس میں تبدیلی نہیں ہوسکتا ) دوسری روایت میں یوں ہے : تم اﷲ کو یاد رکھو تو اسے اپنے سامنے پاؤگے۔ آرام اور راحت کے زمانے میں اﷲ سے جان پہچان رکھو تووہ تمہیں مصیبت کے زمانے میں پہچانے گا۔ یاد رکھو ! تم سے جو چُوک گیا وہ کبھی تمہیں ملنے والا نہ تھا جو تمہیں ملا ہے وہ کبھی چوکنے والا نہ تھا۔ یاد رکھو ! اﷲ کی مدد صبر کے ساتھ ہے، اور وسعت، مصیبت کے ساتھ ہی لگی ہوئی ہے اور یہ بھی یقین جان لو کہ مشکل کے ساتھ آسانی ہے۔

اگر بچوں میں والدین اﷲ تعالیٰ کے مراقبے کا احساس پیدا کریں تو بچے نہ صرف آئندہ زندگی میں برے کاموں سے دور رہیں گے بلکہ دوسروں کو بھی روکنے والے بن جائیں گے، جیسا کہ گذشتہ اوراق میں گذر چکا ہے کہ ایک ماں نے جب اپنی بیٹی کو دودھ میں پانی ملانے کے لئے کہا تو اس نے یہ کرارا جواب دیتے ہوئے اس کام کو کرنے سے انکار کردیا کہ :” اگرچہ عمر بن خطاب نہیں دیکھ رہا ہے لیکن عمر کا رب تو ضرور دیکھ رہا ہے، اس لئے میں یہ کام نہیں کرسکتی”۔

اسی طرح کا ایک اور واقعہ عمر رضی اللہ عنہ سے متعلق ہے۔ عبد اﷲ بن دینار کہتے ہیں :

” میں عمررضی اللہ عنہ کے ہمراہ مکہ کیلئے روانہ ہوا، راستے میں ایک چرواہا پہاڑ ی کی ڈھلوان سے اترتا ہوا نظر آیا، عمر رضی اللہ عنہ نے اسے آزمانے کیلئے کہا : “یَا رَاعِیْ ! بِعْنِیْ شَاۃً مِنْ ھٰذِہِ الْغَنَمِ “ اے چرواہے ! ان بکریوں میں سے ایک مجھے فروخت کردے ” اس نے کہا : “میں مالک نہیں غلام ہوں “عمر رضی اللہ عنہ نے فرمایا : “کوئی بات نہیں، مجھے فروخت کرکے اپنے مالک سے کہہ دے کہ اس بکری کو بھیڑئے نے کھا لیا ” اس پر چرواہے نے کہا :” فَأَیْنَ اللّٰہُ “ حضرت ! تو پھر اﷲ کہاں ہے ؟ عمر رضی اللہ عنہ روپڑے، اور اسکے ساتھ چل کر اسکے مالک سے بات کی اور اسے خرید کر آزاد کردیا اور فرمایا :“أَعْتَقَتْکَ فِی الدُّنْیَا ہٰذِہِ الْکَلِمَۃُ، وَأَرْجُوْ أَنْ تُعْتِقَکَ فِی الْآخِرَۃِ مِنْ عَذَابِ النَّار” اس ایک لفظ نے تجھے دنیا میں غلامی سے نجات دلایا ہے اور مجھے امید ہے کہ یہی لفظ آخرت میں بھی تجھے آتش دوزخ سے نجات دلائے گا “۔

امام غزالی رحمہ اﷲ“إحیاء العلوم “ میں لکھتے ہیں :”إمام یونس بن عبید رحمہ اﷲ [1] کپڑوں کا کاروبار کرتے تھے، آپ کی دوکان میں مختلف قسم کے لباس، چادریں اور جوڑے تھے، ان میں سے کچھ کی قیمت چار سودرہم اور کچھ کی دوسو درہم تھی، آپ نماز پڑھنے کیلئے مسجد جاتے ہوئے دوکان میں اپنے بھتیجے کو چھوڑا اور اسے تمام کی قیمتیں بھی سمجھادیں، اس دوران ایک بدو شخص آیا، اس نے چار سو درہم کا ایک جوڑا مانگا، لڑکا چالاک تھا اس نے اسے دوسودرہم والا جوڑا دکھایا،اس نے اسے پسند کرلیا اور خوشی خوشی چار سو درہم ادا کرکے چلا گیا، راستے میں اسے یونس بن عبید رحمہ اللہ مل گئے، انہوں نے اس کپڑے کو پہچان لیا جو ان کی دوکان سے خریدا گیا تھا، آپ نے اس بدو سے پوچھا :” تم نے اسے کتنے میں خریدا ” کہا :” چار سو درہم میں” آپ نے فرمایا :” یہ دوسو درہم سے زیادہ کا نہیں ہے، اس لئے تم اسے واپس کر آؤ” اس نے کہا : “حضرت ! یہ ہمارے ہاں پانچ سو درہم کا ملتا ہے اور میں نے اسے اپنی خوشی سے خریدا ہے ” آپ نے فرمایا :”میرے ساتھ واپس چلو، اس لئے کہ دین میں خیر خواہی کا مقام دنیا اور اس میں جوکچھ ہے اس سے بہتر ہے “پھر آپ اپنی دوکان پر آئے اور اسے دو سو درہم واپس کیا، اپنے بھتیجے کو خوب ڈانٹا اور فرمایا:“أَمَا اسْتَحْیَیْتَ ؟ أَمَا اتَّقَیْتَ اللّٰہَ ؟ تَرْبَحُ مِثْلَ الثَّمَنِ وَتَتْرُکَ النُّصْحَ لِلْمُسْلِمِیْنَ “کیا تمہیں ذرا بھی شرم نہیں آئی ؟ کیا تم میں کچھ بھی اﷲ کا خوف نہیں ؟ اصل قیمت کے برابر فائدہ کھاتے ہو اور مسلمانوں کے ساتھ خیر خواہی نہیں کرتے ؟

[1] یونس بن عبیدالعبدی البصری ، مشہور محدث ، امام ، قدوہ، ثقہ اور حجت ہیں، 139ھ؁ میں انتقال ہوا

افسوس ایمانداری کی یہ تابناک مثالیں آج کل صرف کتابوںمیں ہی باقی رہ گئی ہیں، رہا مسلم معاشرہ، وہ بقول :”مسلمانی در کتاب ومسلمانان درگور ” (یعنی اسلام کتابوں میں ہے اور مسلمان قبروںمیں) کی زندہ مثال بن کر ساری دنیا میں زوال وذلت کی انتہا کو پہنچ چکا ہے۔ إنّا اللّٰہ وإنّا إلیہ راجعون۔

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی