پردے کے متعلق اسلامی احکامات

یہ اسلام کی وہ تعلیمات تھیں جو اس نے آج سے چودہ سو سال پہلے اُس مسلمان اور مومن معاشرہ کو دی، جو اس کائنات کا، ایمان، تقوی، اخلاص، للّٰہیت، شرم وحیا، عفّت عصمت کی حفاظت کے لحاظ سے بہترین زمانہ تھا، اس سے بہتر دور نہ چشمِ فلک نے کبھی دیکھا تھا اور نہ کبھی دیکھے گا، لیکن اس نے انسانیت کو ایسی تعلیمات سے نوازا کہ جس پر عمل کرکے قیامت تک آنے والی ساری فحاشیوں کا سدّ باب کیا جا سکتا ہے، حالانکہ اس وقت انسان کی جنسی ہوس نے وہ خطرناک روپ نہیں دھارا تھا جو آج ہے، عریانیت وفحاشت کا وہ بازار گرم نہیں ہوا تھا جو آج ہے، اس کے باوجود آپ صلی اللہ علیہ وسلم نے مسلم خواتین کو پردے کی پابندی کی تلقین فرمائی عفّت وعصمت کی حفاظت کی وہ تعلیمات عنایت فرمائیں کہ جس سے عمدہ انتظام اور تعلیم کسی بھی مذہب میں ملنی نا ممکن ہے۔ اس سلسلے میں چند احادیث ملاحظہ ہوں :

1۔عن أم سلمۃ رضی اللّٰہ عنہا قَالَتْ : کُنْتُ عِنْدَ رَسُوْلِ اللّٰہِ صلی اللّٰہ علیہ وسلم وَعِنْدَہُ مَیْمُوْنَۃُ، فَأَقْبَلَ إبْنُ أُمِّ مَکْتُوْمٍ وَذٰلِکَ بَعْدَ أَنْ أُمِرْنَا بِالْحِجَابِ فَقَالَ النَّبِیُّ صلی اللّٰہ علیہ وسلم : إحْتَجِبَا مِنْہُ، فَقُلْنَا : یَا رَسُوْلَ اللّٰہِ ! أَلَیْسَ ہُوَ أَعْمَی لَا یُبْصِرُنَا وَلَا یَعْرِفُنَا ؟ فَقَالَ النَّبِیُّ صلی اللّٰہ علیہ وسلم : أَفَعَمْیَاوَانِ أَنْتُمَا، أَلَسْتُمَا تُبْصِرَانِہِ ؟ ( أبوداؤد : 4112ترمذی1779: )

ام المؤمنین أم سلمہ رضی اللہ عنہا فرماتی ہیں :”میں اور میمونہ رضی اللہ عنہا، رسول اﷲ صلی اللہ علیہ وسلم کی خدمت میں تھیں،اتنے میں عبد اﷲ بن ام مکتوم رضی اللہ عنہ آئے، اور یہ پردے کا حکم نازل ہونے کے بعد کا واقعہ ہے، آپ صلی اللہ علیہ وسلم نے ہمیں حکم دیا کہ : ’’ تم دونوں پردے میں چلی جاؤ، ہم نے کہا : اے اﷲ کے رسول ! کیا وہ اندھے نہیں ہیں ؟ نہ تو ہمیں دیکھ سکتے ہیں اور نہ ہی پہچان سکتے ہیں ؟ آپ صلی اللہ علیہ وسلم نے فرمایا : لیکن تم دونوں تو اندھی نہیں ہو، تم تو اسے دیکھ رہی ہو”۔

سبحان اﷲ ! رسول اکرم صلی اللہ علیہ وسلم کی بیویاں امت کی مائیں ہیں ﴿ وَاَزْوَاجُہُ اُمَّہَاتُہُمْ﴾اور آنے والے صحابی اندھے اور روحانی بیٹے کے حکم میں ہیں، لیکن آپ علیہ السلام نے ان سے بھی اپنی ازواج مطہّرات کا پردہ کرواکر امت کو قیامت تک کے لئے عملی اسوہ پیش کیا۔لیکن افسوس ہمارے معاشرے میں خواتین مردوں کی نظروں سے بچنے کے لئے برقعہ کا استعمال کرتی ہیں، لیکن کسی مرد کودیکھنا مقصود ہو تو پردے کی اوٹ سے نظر بازی کرتی ہوئی نظر آتی ہیں۔ اسی پر کسی دل جلے نے کہا تھا :

پلٹ کر مظہری نے ایک نگاہ ڈالا تو مجرم ہے

تمہیں حق ہے کہ تم جھانکا کرو شاعر کو چلمن سے ؟

آفت کی تانک جھانک قیامت کی شوخیاں

پھر چاہتے ہو،ہم سے کوئی، بدگماں نہ ہو ؟

عورت کو کسی غیر محرم کے ساتھ پل بھر کیلئے بھی تنہائی میں رہنے کو ناجائز قرار دیا۔

2۔عن ابن عباس رضی اللّٰہ عنہما أن رسول اللّٰہ صلی اللّٰہ علیہ وسلم قال : “ لَا یَخْلُوَنَّ أَحَدُکُمْ بِامْرَأَۃٍ إِلاَّ مَعْ ذِیْ مَحْرَمٍ”( بخاری :1862مسلم :1341)

ترجمہ : رسول اﷲصلی اللہ علیہ وسلم نے ارشاد فرمایا : ” تم میں سے کوئی شخص کسی عورت کے ساتھ تنہائی میں نہ رہے، سوائے اس کے کہ اس کے ساتھ اس کا کوئی محرم ہو”۔

حکم دیا کہ عورت شوہر کے قریب ترین مرد رشتہ داروں سے اپنے آپکو بچائے رکھے:

3۔ أن رسول اللّٰہ صلی اللّٰہ علیہ وسلم قال: ” إِیَّاکُمْ وَالدُّخُوْلَ عَلَی النِّسَائِ فَقَالَ رَجُلٌ یَارَسُوْلَ اللّٰہِ : أَفَرَأَیْتَ الْحَمْوَ ؟ قَالَ : اَلْحَمْوُ اَلْمَوْتُ”

ترجمہ :رسول اﷲ صلی اللہ علیہ وسلم کا ارشادِ گرامی ہے :” عورتوں کے پاس ( انکی تنہائی میں ) داخل ہونے سے بچو، ایک شخص نے کہا : یارسول اﷲ ! دیور کے بارے میں آپکا کیا خیال ہے ؟ آپ صلی اللہ علیہ وسلم نے فرمایا : ( عورت کے حق میں ) دیور تو موت ہے”۔( بخاری:5232 مسلم:2172 ).

4۔دل، دماغ، آنکھ، اور کان کے غلط استعمال سے روکا گیا۔ فرمانِ الٰہی ہے :

﴿ اِنَّ السَّمْعَ وَالْبَصَرَ وَالْفُؤَادَ کُلُّ اُوْلٰٓئِکَ کَانَ عَنْہُ مَسْئُوْلاً ﴾

بیشک کان، آنکھ اور دل ان تمام کے متعلق روز قیامت پرسش ہوگی.(الإسراء :36)

5۔اچانک پڑنے والی نظر کے متعلق حکم دیا :عن جریررضی اللّٰہ عنہ قال”: سَأَلْتُ رَسُولَ اللّٰہِ صلی اللّٰہ علیہ وسلم عَنْ نَظْرَۃِ الْفُجَائَ ۃِ فَقَالَ : اصْرِفْ بَصْرَکَ “۔

جریر رضی اللہ عنہ کہتے ہیں :”میں نے رسول اﷲ صلی اللہ علیہ وسلم سے اچانک پڑنے والی نظر کے متعلق دریافت کیا، تو آپ صلی اللہ علیہ وسلم نے فرمایا: تم اپنی نظر پھیرلو” (أبوداؤد:2150)

یہ وہ واضح اور روشن تعلیمات ہیں جن پر دنیا کا کوئی بھی معاشرہ اور کوئی بھی طبقہ، چاہے وہ بوڑھوں کاہو یا جوانوں کا، مردوں کا ہو یا عورتوں کا، حاکموں کا طبقہ ہو یا محکوموں کا، ان ابدی تعلیمات پر کما حقہ عمل کرے گا، تو وہ ہر اس برائی سے محفوظ رہے گا جو اسکی شرافت کو نقصان پہنچائے اور اسکے اخلاق کو بے پردگی،اختلاط، فحاشت اورحرام نظر بازی سے محفوظ کرکے شرافت و پاکیزگی، امن واستقرار اور شرف وسعادت کے بامِ اوج پر پہنچائے، ایسا کیوں نہ ہو جب کہ وہ اس طریقہ پر گامزن ہے جسے بنانے والا عرشِ عظیم کارب ہے۔

اس دور میں جب کہ عریانیت ایک فیشن بن چکی ہے، ٹی وی، ڈش انٹینا، انٹرنیٹ، کیمرہ،فون کیمرہ، وال پوسٹرس اور عریاں اشتہارات کا ایک سیلاب آچکا ہے، چھوٹے چھوٹے بچے اور بچیاں تک جنسی رموز ونکات سے نہ صرف آشنا بلکہ کسی حد تک ماسٹرس بن چکے ہیں، توبالخصوص ان فرامینِ الٰہیہ پر سختی سے عمل کیاجائے۔

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی