کیا قرآن، بائبل کی نقل ہے؟

 

 

’’کیا یہ درست نہیں کہ محمد صلی اللہ علیہ وسلم نے قرآن ،بائبل سے نقل کیا ہے؟‘‘

 

بہت سے ناقدین یہ الزام لگاتے ہیں کہ محمد صلی اللہ علیہ وسلم نے یہ قرآن خود تصنیف نہیں کیا بلکہ انھوں نے اسے دوسرے انسانی ذرائع یا سابقہ الہامی کتب سے اخذ کیا ہے۔ ان کے اعتراضات اس نوع کے ہیں:

رومی لوہار کی حقیقت

 

بعض مشرکین نے نبیٔ کریم صلی اللہ علیہ وسلم پر یہ الزام لگایا کہ انھوں نے قرآن مکہ کے نواح میں مقیم ایک رومی لوہار سے سیکھا جو مذہباً عیسائی تھا۔ نبی ٔ کریم صلی اللہ علیہ وسلم اکثر اسے کام کرتے ہوئے دیکھنے جایا کرتے تھے۔ایک وحیٔ قرآن ہی اس الزام کو مسترد کردینے کے لیے کافی تھی۔ سورہ نحل میں فرمایا گیا:

 

﴿وَلَقَدْ نَعْلَمُ أَنَّهُمْ يَقُولُونَ إِنَّمَا يُعَلِّمُهُ بَشَرٌ ۗ لِّسَانُ الَّذِي يُلْحِدُونَ إِلَيْهِ أَعْجَمِيٌّ وَهَـٰذَا لِسَانٌ عَرَبِيٌّ مُّبِينٌ ﴾

 

’’اور ہمیں بخوبی علم ہے کہ وہ کہتے ہیں (یقینا) اس نبی کو ایک آدمی سکھاتا ہے۔اس شخص کی زبان جس کی طرف یہ غلط نسبت کرتے ہیں، عجمی ہے جبکہ یہ (قرآن) تو فصیح عربی زبان ہے۔‘‘

النحل:16/103

 

ایک ایسا شخص جس کی مادری زبان غیر ملکی تھی اور جوعربی کے ٹوٹے پھوٹے الفاظ میں بمشکل عربی میں بات کرسکتا تھا، قرآن مجید کا ماخذ کیسے بن سکتا تھا جو خالص ، فصیح و بلیغ اور شستہ عربی زبان میں ہے؟ یہ سمجھنا کہ کسی لوہار نے(نعوذ باللہ) نبیٔ اکرم صلی اللہ علیہ وسلم کو قرآن سکھایا، ایسے ہی ہے جیسے کوئی یہ سمجھ بیٹھے کہ چین سے انگلستان نقل مکانی کرنے والے ایک شخص نے جو مناسب انگریزی بھی نہیں جانتا تھا، شیکسپیئر کو پڑھایا یا لکھایا۔

 

ورقہ بن نوفل کا کردار

 

محمدصلی اللہ علیہ وسلم نے خدیجہ رضی اللہ عنہاکے رشتے دار ورقہ سے پڑھا،حالانکہ محمد صلی اللہ علیہ وسلم کے یہودی اور عیسائی علماء سے روابط بہت محدود تھے۔ آپ صلی اللہ علیہ وسلم جس نمایاں ترین عیسائی سے واقفیت رکھتے تھے، وہ ورقہ بن نوفل نامی نابینا شخص تھے جو نبیٔ کریم صلی اللہ علیہ وسلم کی پہلی زوجۂ محترمہ حضرت خدیجہ رضی اللہ عنہا کے ایک رشتے دار تھے۔ وہ اگرچہ عربی النسل تھے لیکن انھوں نے عیسائی مذہب اپنالیا تھا اور وہ عہد نامہ جدید سے اچھے خاصے واقف تھے۔ نبیٔ کریم صلی اللہ علیہ وسلم کی صرف دوبار ان سے ملاقات ہوئی۔ پہلی مرتبہ اس وقت جب ورقہ (اعلان نبوت سے قبل) کعبۃ اللہ میں عبادت کررہے تھے اورانھوں نے نبیٔ کریم صلی اللہ علیہ وسلم کی پیشانی پر وفور محبت سے بوسہ دیا۔ دوسری ملاقات اس وقت ہوئی جب نبیٔ کریم صلی اللہ علیہ وسلم پہلی وحی کے نزول کے بعد ورقہ بن نوفل سے ملنے گئے۔ اس واقعے کے تین سال بعدورقہ کا انتقال ہوگیا جبکہ نزول کا سلسلہ تقریباً 23برس جاری رہا۔ یہ مفروضہ کہ قرآن مجید کی وحی کا ذریعہ ورقہ بن نوفل تھے، قطعی مضحکہ خیز مفروضہ ہے۔

 

اہل کتاب سے مذہبی بحثیں

 

یہ بات درست ہے کہ نبیٔ کریمeکی یہودیوں اور عیسائیوں سے بحثیں ہوئیں لیکن یہ بحثیں نزول وحی کے13برس سے زیادہ عرصے کے بعد مدینہ منورہ میں وقوع پذیر ہوئیں۔ یہ الزام کہ یہی یہودی اور عیسائی قرآن کا ماخذ تھے، ایک بیہودہ الزام ہے کیونکہ محمد رسول اللہ صلی اللہ علیہ وسلم تو ان بحثوں میں ایک معلم اور مبلغ کا کردار ادا کررہے تھے اورانھیں قبول اسلام کی دعوت دیتے ہوئے یہ نشاندہی کررہے تھے کہ وہ توحید کے بارے میں اپنے دین کی حقیقی تعلیمات سے منحرف ہوگئے ہیں۔ ان میں سے متعدد یہودیوں اور عیسائیوں نے بعد میں اسلام قبول کرلیا۔

 

پیغمبرصلی اللہ علیہ وسلم کا عجمیوں سے قرآن مجید سیکھنا

 

تمام دستیاب تاریخی شواہد سے یہ ثابت ہے کہ محمد صلی اللہ علیہ وسلم نے نبوت سے قبل مکہ سے باہر کے صرف تین سفر کیے:

1) 9برس کی عمر میں آپ اپنی والدہ ماجدہ کے ہمراہ یثرب (مدینہ) تشریف لے گئے۔
2) 9اور 12برس کی عمر کے درمیان آپ اپنے چچا ابو طالب کے ہمراہ تجارتی سفر پر شام گئے۔
3) 25برس کی عمر میں آپ حضرت خدیجہtکا تجارتی قافلہ لے کر شام تشریف لے گئے۔

یہ فرض کرلینا کہ مذکورہ تین سفروں کے دوران میں عیسائیوں اور یہودیوں سے عمومی گفتگوئوں اورملاقاتوں کے نتیجے میں قرآن وجود میں آگیا،ایک بے بنیاد اور خیالی بات ہے۔

 

ماخذِ قرآن

 

نبیٔ مکرم صلی اللہ علیہ وسلم نے قرآن کریم کو یہودیوں اور عیسائیوں سے ہر گز نہیں سیکھا۔ نبی صلی اللہ علیہ وسلم کی روز مرہ کی زندگی ایک کھلی کتاب کے مانند تھی ۔ حقیقت تو یہ ہے کہ ایک وحی کے ذریعے سے لوگوں کو حکم دیا گیا کہ وہ نبی صلی اللہ علیہ وسلم کواپنے گھر میں علیحدگی (پرائیویسی) کا موقع دیں۔ارشاد باری تعالیٰ ہے:

 

﴿إِنَّ الَّذِينَ يُنَادُونَكَ مِن وَرَاءِ الْحُجُرَاتِ أَكْثَرُهُمْ لَا يَعْقِلُونَ وَلَوْ أَنَّهُمْ صَبَرُوا حَتَّىٰ تَخْرُجَ إِلَيْهِمْ لَكَانَ خَيْرًا لَّهُمْ ۚ وَاللّٰهُ غَفُورٌ رَّحِيمٌ ﴾

 

’’بے شک جو لوگ آپ کو حجروں کے باہر سے پکارتے ہیں، ان میں سے اکثر بے عقل ہیں اور اگر بے شک وہ صبر کرتے حتی کہ آپ خود ہی ان کی طرف نکلتے تو ان کے لیے بہت بہتر ہوتا۔ اور اللہ بہت بخشنے والا نہایت رحم کرنے والا ہے۔‘‘

الحجرات:49/4۔5

 

اگر نبیٔ کریم صلی اللہ علیہ وسلم ایسے لوگوں سے مل رہے ہوتے جو کفار کے دعوے کے مطابق انھیں وہ کلمات بتاتے تھے جنھیں وحی کے طورپر پیش کیا گیا تو یہ بات زیادہ دیر تک چھپی نہ رہتی۔

قریش کے انتہائی ممتاز سردار جنھوں نے رسول اللہeکی پیروی کی اور اسلام قبول کیا، اتنے ذہین اور دانشمند تھے کہ جس ذریعے سے پیغمبر ان کے پاس وحی لے کر آتے تھے، اس کے متعلق اگر وہ کوئی بات مشکوک پاتے تو بآسانی بھانپ سکتے تھے، پھر یہ کوئی مختصر وقت کی بات نہیں تھی۔ نبی صلی اللہ علیہ وسلم کی دعوت اور تحریک 23برس تک جاری رہی۔ اس دوران میں کبھی کسی کو اس طرح کا شک نہ گزرا۔

رسول کریم صلی اللہ علیہ وسلم کے دشمن اپنا یہ دعویٰ ثابت کرنے کے لیے مسلسل ٹوہ میں لگے رہتے تھے

 

کہ نبیٔ کریم صلی اللہ علیہ وسلم (نعوذ باللہ) جھوٹے ہیں لیکن وہ اس بات کے حق میں ایک بھی مثال پیش نہ کرسکے کہ کبھی آپ نے مخصوص یہودیوں اور عیسائیوں سے کوئی خفیہ ملاقات کی ہو۔

یہ بات بھی ناقابل تصور ہے کہ کوئی شخص ایسی صورت حال قبول کرسکتا ہے کہ وہ قرآن وضع کرے لیکن اس کا کوئی کریڈٹ بھی نہ لے، لہٰذا تاریخی اور منطقی طورپر یہ دعویٰ ثابت نہیں کیا جاسکتا کہ قرآن کا کوئی انسانی ماخذ تھا۔ 

 سوال پیدا ہوتا ہے کہ اگر آپ نے یہودیوں اور عیسائیوں سے قرآن سیکھا تھا تو پھر انھیں قبول قرآن میں تامل نہیں کرنا چاہیے تھا جبکہ تاریخ شاہد ہے کہ یہودیوں اور عیسائیوں نے ہی آپ کی مخالفت کی جو آج تک جاری ہے۔ (عثمان منیب)

 

محمد صلی اللہ علیہ وسلم پڑھنا لکھنا نہیں جانتے تھے

 

یہ دعویٰ کہ محمد صلی اللہ علیہ وسلم نے خود قرآن تصنیف کیایا اسے دوسرے ذرائع سے نقل کیا، محض اس ایک تاریخی حقیقت سے غلط ثابت ہو جاتا ہے کہ آپ صلی اللہ علیہ وسلم پڑھنا لکھنا نہیں جانتے تھے۔ اللہ تعالیٰ خود قرآن میں اس بات کی تصدیق فرماتا ہے۔ سورۂ عنکبوت میں ارشاد ہوا:

 

﴿وَمَا كُنتَ تَتْلُو مِن قَبْلِهِ مِن كِتَابٍ وَلَا تَخُطُّهُ بِيَمِينِكَ ۖ إِذًا لَّارْتَابَ الْمُبْطِلُونَ ﴾

 

’’اور (اے نبی!) آپ اس (قرآن) سے پہلے کوئی کتاب نہیں پڑھتے تھے اور نہ اپنے دائیں ہاتھ سے لکھتے تھے، (اگر ایسا ہوتا) تو باطل پرست یقینا شک کرسکتے تھے۔‘‘ 

العنکبوت :29/48

 

اللہ تعالیٰ کویہ علم تھا کہ بہت سے لوگ قرآن کے مستند ہونے پر شک کریں گے اوراسے محمد صلی اللہ علیہ وسلم کی ذات سے منسوب کریں گے، لہٰذا اللہ تعالیٰ نے اپنی ابدی حکمت سے ایک ’’اُمّی‘‘ کواپنا آخری نبی بنا کر بھیجا تاکہ باطل پرستوں کے پاس نبی صلی اللہ علیہ وسلم پر شک کرنے کا کوئی معمولی

 

سا جواز بھی باقی نہ رہنے دیا جائے۔ آپ صلی اللہ علیہ وسلم کے دشمنوں کا یہ الزام کہ آپ نے دوسرے ذرائع سے قرآن اخذ کیا اور پھراسے خوبصورت عربی زبان میں ڈھال لیا، شاید کسی وزن کا حامل ہوسکتاتھا لیکن اس کمزور عذر کوبھی کافروں اور شک کرنے والوں پر الٹ دیا گیا ہے۔ اللہ تعالیٰ سورۂ ا عراف میں اس کی دوبارہ توثیق کرتے ہوئے فرماتاہے:

 

﴿الَّذِينَ يَتَّبِعُونَ الرَّسُولَ النَّبِيَّ الْأُمِّيَّ الَّذِي يَجِدُونَهُ مَكْتُوبًا عِندَهُمْ فِي التَّوْرَاةِ وَالْإِنجِيلِ ﴾

 

’’ (متقی اورمومن) وہ لوگ ہیں جو اس رسول امی نبی (محمدصلی اللہ علیہ وسلم) کی پیروی کرتے ہیں جس کاذکر وہ اپنے ہاں تورات اورانجیل میں لکھا پاتے ہیں۔‘‘

 الاعراف:7/157

 

اُمّی نبی صلی اللہ علیہ وسلم کی آمد کی پیش گوئی بائبل میں

 

امی نبی صلی اللہ علیہ وسلم کی آمد کی پیش گوئی بائبل کی کتاب یسعیاہ باب: 29 فقرہ: 12 میں بھی موجود ہے:

 

’’پھر وہ کتاب اسے دیں جو لکھنا پڑھنا نہیں جانتا اور کہیں، اسے پڑھ اور وہ کہے میں تو پڑھنا نہیں جانتا۔“

 کتاب مقدس‘یسعیاہ:29/12

 

قرآن کریم کم از کم چارمقامات پر اس بات کی تصدیق کرتا ہے کہ نبیٔ کریم صلی اللہ علیہ وسلم لکھنا پڑھنا نہیں جانتے تھے۔ اس امر کا ذکر سورۂ اعراف کی آیت:158اور سورۂ جمعہ کی آیت:2میں بھی کیا گیا ہے۔

 

بائبل کا عربی مسودہ

 

نبیٔ کریم صلی اللہ علیہ وسلم کے دور مبارک میں بائبل کا عربی زبان میں کوئی مسودہ موجود نہیں تھا۔

 

عہد نامۂ عتیق (Old Testament)کا سب سے پہلا عربی نسخہ وہ ہے جوپادری سعادیاس گین (R.Saadias Gaon) نے 900 عیسوی میں تیار کیا، یعنی ہمارے پیارے نبی صلی اللہ علیہ وسلم کی رحلت کے تقریباً 250 برس بعد۔ عہدنامۂ جدید (New Teslament) کا سب سے قدیم عربی نسخہ ارپینئس (Erpenius) نے ہمارے نبی صلی اللہ علیہ وسلم کی وفات کے تقریباً ایک ہزار سال بعد 1616عیسوی میں شائع کیا۔

 

قرآن اور بائبل میں یکسانیت

 

قرآن اوربائبل میں پائی جانے والی یکساں باتوں سے لازمی طورپر یہ مطلب نہیں لیا جا سکتا کہ اول الذکر مؤخرالذکر سے نقل کیا گیا ہے۔ فی الحقیقت یہ اس بات کی شہادت ہے کہ یہ دونوں کسی تیسرے مشترک ذریعے پر مبنی ہیں۔ تمام صحائف ربانی کا منبع ایک ہی ذات، یعنی رب کائنات ہے۔ یہودونصارٰی کی کتب اور ان سے بھی قدیم آسمانی صحیفوں میں انسانی ہاتھوں سے کی جانے والی تحریفات کے باوجود، ان کے بعض حصے تحریف سے محفوظ رہے ہیں اور اسی لیے وہ کئی مذاہب میں مشترک ہیں۔

یہ بات بھی درست ہے کہ قرآن اور بائبل میں بعض یکساں چیزیں موجود ہیں لیکن اس کی بنا پر محمد صلی اللہ علیہ وسلم پر یہ الزام لگانے کا کوئی جواز نہیں کہ انھوں نے بائبل سے کوئی چیز نقل کی یا اس سے اخذ کر کے قرآن مرتب کیا۔ اگر یہ منطق درست ہے تو یہ مسیحیت اور یہودیت پر بھی لاگو ہوگی اور غلط طورپریہ دعویٰ بھی کیا جاسکے گا کہ یسوع مسیح علیہ السلام (نعوذ باللہ) سچے نبی نہیں تھے اورانھوں نے محض عہد نامہ عتیق کی نقل کرنے پر اکتفا کیا۔
قرآن اور بائبل کے درمیان یکساں باتیں درحقیقت اس امر کی نشاندہی کرتی ہیں کہ ان کا منبع مشترک، یعنی ذات حق تعالیٰ ہے۔ یہ توحید کے بنیادی پیغام کا تسلسل ہے اور یہ مفروضہ غلط ہے کہ بعد میں آنے والے انبیاء نے گزشتہ انبیاء کی باتیں ان سے مستعارلے لی ہیں۔غلط ہے کہ بعد میں آنے والے انبیاء نے گزشتہ انبیاء کی باتیں ان سے مستعارلے لی ہیں۔

اگر کوئی امتحان میں نقل کررہا ہوتو وہ یقینا اپنے پرچے میں یہ نہیں لکھے گا کہ میں نے اپنے پاس بیٹھے طالب علم زید یا بکر سے نقل کی ہے جبکہ محمدرسول اللہ صلی اللہ علیہ وسلم گزشتہ انبیائے کرام کا احترام کرتے اوران کی عظمت بیان کرتے ہیں اور قرآن کریم میں یہ بھی فرمایا گیا ہے کہ مختلف انبیاء و رسل پر اللہ قادر مطلق کی طرف سے صحیفے نازل کیے گئے تھے۔

 

تمام آسمانی کتابوں پر ایمان

 

اللہ تعالیٰ کی چار کتابوں کا قرآن میں نام لے کرذکر کیا گیا ہے اورمسلمان ان سب پر ایمان رکھتے ہیں ۔یہ ہیں : تورات، زبور، انجیل اور قرآن۔
تورات حضرت موسیٰ علیہ السلام (Moses) پر بصورت الواح(تختیاں) نازل کی گئی۔
زبور حضرت داؤد علیہ السلام (David) پر اتری۔
انجیل حضرت عیسیٰ علیہ السلام (Jesus) نازل ہوئی۔
قرآن مجید وہ آخری کتاب ہے جس کانزول اللہ کے آخری نبی اور خاتم النبیین حضرت محمد صلی اللہ علیہ وسلم پر ہوا۔

تمام نبیوں اورتمام الہامی کتابوں پرایمان لانا ہرمسلمان کے ایمان کا حصہ ہے، تاہم موجودہ بائبل کے عہد نامہ عتیق کی پہلی پانچ کتابیں حضرت موسیٰ علیہ السلام سے منسوب ہیں اور مزامیر (Psalms) حضرت داؤد علیہ السلام کی طرف منسوب کیے جاتے ہیں،مزید براں عہد نامۂ عتیق کی یہ کتابیں اورعہد نامۂ جدید یا اس کی چارانجیلیں وہ تورات، زبور یا انجیل نہیں ہیں جن کاذکر قرآن مجید میں کیا گیا ہے۔ موجودہ بائبل میں جزوی طورپر کلامِ خداوندی موجود ہو سکتا ہے لیکن یہ کتابیں یقینا اپنی اصل حالت میں نہیں ہیں۔ نہ وہ پوری طرح صحیح ہیں اورنہ ان میں پیغمبروں پرنازل شدہ مکمل کلامِ وحی موجود ہے۔

 

 چار انجیلوں (Gospels)یعنی انجیل متی ، انجیل لوقا، انجیل یوحنا اور انجیل مرقس کی موجودگی سے صاف ظاہر ہوتا ہے کہ یہ انسانوں کی تصنیف کی ہوئی ہیں اور حضرت عیسیٰ علیہ السلام پر نازل شدہ انجیل کا اب اپنی اصلی صورت میں کوئی وجود نہیں۔ یاد رہے متی (St,Mthew)، لوقا (St,Luke)یوحنا (St,John)اور مرقس (St,Mark)حضرت عیسیٰ علیہ السلام کے حواری تھے ۔ (محسن فارانی)

 

قرآن مجید تمام انبیاء ورسل کو ایک ہی سلسلے سے متعلق قراردیتا ہے او ر ہمیں بتاتا ہے کہ ان سب کی نبوت کا ایک ہی نصب العین تھا اوران کا بنیادی پیغام بھی ایک ہی تھا۔ اسی بنا پر قرآن کریم وضاحت کرتا ہے کہ بڑے بڑے مذاہب کی بنیادی تعلیمات باہم متضاد نہیں ہوسکتیں، باوجود اس کے کہ مختلف نبوتوں کے مابین قابل ذکر بُعدِ زمانی موجود ہے۔ اس کی وجہ یہ ہے کہ ان سب نبوتوں کا منبع صرف ایک تھا، یعنی اللہ جو قادر مطلق ہے۔ یہی وجہ ہے کہ قرآن کریم یہ کہتاہے کہ مختلف ادیان کے درمیان جو اختلافات پائے جاتے ہیں ان کی ذمہ داری انبیاء پر نہیں بلکہ ان کے پیروکاروں پرعائد ہوتی ہے جو سکھائے ہوئے علم کا ایک حصہ بھول گئے، مزیدبرآں انھوں نے الہامی کتابوں کی غلط تعبیر کی اوران میں تحریف بھی کرڈالی، لہٰذا قرآن کریم کو ایک ایسی کتاب تصور نہیں کیا جاسکتا جوموسیٰ، عیسیٰ اور دیگر انبیاء علیہم السلام کی تعلیمات کے مقابلے میں اتاری گئی ہے۔ اس کے برعکس یہ کتاب گزشتہ انبیاء کی طرف سے ان کی امتوں کی طرف لائے گئے پیغامات کی توثیق و تصدیق اوران کی تکمیل کرتی اور انھیں نقطۂ کمال تک پہنچاتی ہے۔

قرآن کا ایک نام فرقان بھی ہے جس کامطلب حق و باطل میں امتیاز کرنے کی کسوٹی یا معیار ہے اور قرآن ہی کی بنیاد پر ہم یہ دریافت کرسکتے ہیں کہ سابقہ الہامی کتابوں کے کون سے حصے کو کلام الٰہی تصور کیا جاسکتا ہے۔

 

قرآن اور بائبل کے درمیان سائنسی بنیاد پر تقابل

 

قرآن مجید اوربائبل کے سرسری مطالعے میں آپ کو متعدد ایسے نکات نظر آئیں گے جو دونوں میں قطعی یکساں معلوم ہوتے ہیں لیکن جب آپ بغور ان کا جائزہ لیں گے تو معلوم ہوگا کہ ان میں سراسر اختلاف پایا جاتا ہے۔ صرف تاریخی تفصیلات کی بنیاد پرکسی ایسے شخص کے لیے جو مسیحیت یا اسلام میں سے کسی کی تعلیمات پر عبور نہ رکھتا ہو، یہ فیصلہ کرنا سخت مشکل ہوگا کہ دونوں الہامی کتب میں سے صحیح کون سی ہے؟تاہم اگر آپ دونوں کتابوں کے متعلقہ اقتباسات کو سائنسی علوم کے معیار پر پرکھنے کی کوشش کریں گے تو آپ کو معلوم ہوجائے گا کہ سچ کیا ہے۔ ذیل میں دی گئی چند مثالوں سے آپ حقیقت حال سے آگاہ ہو سکتے ہیں۔

 

بائبل اورکائنات کی تخلیق:

 

بائبل کی پہلی کتاب پیدائش (Genesis)کے باب اول میں لکھا ہے کہ کائنات چھ دنوں میں پیدا کی گئی اور ہر دن سے مراد24گھنٹے کادورانیہ ہے۔ اگرچہ قرآن مجید میں بھی یہ ذکر کیا گیا ہے کہ یہ کائنات چھ ’’ایام‘‘ میں پیدا کی گئی لیکن قرآن کے مطابق یہ ’’ایام‘‘ سالہا سال طویل ہیں۔ اس لفظ’’یوم‘‘ کے دومعانی ہیں، اول یہ کہ دن سے مراد معمول کے 24گھنٹے کا دن ہے اور دوم اس سے مراد ایک مرحلہ ، یاایک دور یا ایک ایسا عہد ہے جو بہت طویل زمانے پر مشتمل ہو۔
جب قرآن مجید یہ کہتا ہے کہ کائنات چھ دنوں میں پیدا کی گئی تو اس سے مراد یہ ہوتا ہے کہ آسمانوں اورزمین کو چھ طویل ادوار یا زمانوں میں پیدا کیا گیا۔ سائنسدانوں کواس بیان پر کوئی اعتراض نہیں۔ کائنات کی تخلیق میں اربوں سال صرف ہوئے اور یہ بات بائبل کے اس تصور کے منافی ہے جس میں کہا گیا ہے کہ کائنات صرف چھ دنوں میں پیدا کی گئی جبکہ ہر دن چوبیس گھنٹے کا تھا۔

 

بائبل اورسورج کی تخلیق:

 

بائبل کی کتاب’’پیدائش‘‘ میں کہا گیا ہے کہ روشنی،دن اور رات کو خدا نے کائنات کی تخلیق کے پہلے روز پیدا کیا، چنانچہ اس میں لکھا ہے :
”خدا نے ابتدا میں زمین و آسمان کو پیدا کیا، اورزمین ویران اور سنسان تھی اور گہرائو کے اوپر اندھیرا تھا اور خدا کی روح پانی کی سطح پر جنبش کرتی تھی۔ اور خدا نے کہا کہ روشنی ہوجا اور روشنی ہوگئی۔ اور خدا نے دیکھا کہ روشنی اچھی ہے اور خدا نے روشنی کو تاریکی سے جدا کیا۔ اور خدا نے روشنی کو تو دن کہا اور تاریکی کو رات، اور شام ہوئی اور صبح ہوئی۔ سو پہلا دن ہوا۔‘‘ 

 کتاب مقدّس، پیدائش : 3/1۔5 

 

جدید سائنس کے مطابق کائنات میں گردش کرتی ہوئی روشنی درحقیقت ستاروں میں ایک پیچیدہ عمل کا نتیجہ ہے جبکہ بائبل کے مطابق سورج، چاند اور ستارے چوتھے روز پیدا کیے گئے۔کتاب ’’پیدائش‘‘ میں لکھا ہے :

’’سو خدا نے دو بڑے نیرّ بنائے۔ ایک نیرّ اکبر کہ دن پر حکم کرے اورایک نیرّ اصغر کہ رات پر حکم کرے اوراس نے ستاروں کو بھی بنایا۔ اور خدا نے ان کو فلک پر رکھا کہ زمین پر روشنی ڈالیں ، دن اوررات پر حکم کریں اور اجالے کو اندھیرے سے جدا کریں، اور خدا نے دیکھا کہ اچھا ہے۔ اور شام ہوئی اور صبح ہوئی۔ سوچو تھا دن ہوا۔‘‘

کتاب مقدس، پیدائش: 1/16۔16

 

یہ بات خلاف منطق ہے کہ روشنی کا منبع نیرّ اکبر (سورج) تو تین دن بعد پیدا کیا گیا لیکن سلسلۂ روز و شب جو سورج کی روشنی کا نتیجہ ہے پہلے دن ہی پیدا کردیا گیا، مزید براں ایک دن کے عناصر، یعنی صبح و شام کے وجود کاادراک تو سورج کے سامنے زمین کی گردش محوری کے بعد

ہی ہوسکتا ہے مگر بائبل کے مطابق صبح اور شام کی تخلیق سورج کی تخلیق سے تین دن پہلے ہی عمل میں آگئی۔

اس کے برعکس قرآن مجید میں اس موضوع پر تخلیق کائنات کی کوئی غیر سائنسی ترتیب زمانی نہیں دی گئی، لہٰذا یہ کہنا سراسر غلط اور مضحکہ خیزہے کہ حضرت محمد صلی اللہ علیہ وسلم نے تخلیق کائنات کے موضوع پر بائبل کے اقتباسات تو نقل کرلیے مگر بائبل کی خلاف منطق اور عجیب و غریب باتیں چھوڑ دیں۔

 

سورج روشنی خارج کرتا ہے چاند نہیں:

 

بائبل کے مطابق سورج اور چاند دونوں روشنی خارج کرتے ہیں جیسا کہ کتاب پیدائش میں انھیں بالترتیب ’’نیرّا کبر‘‘ اور ’’نیرّ اصغر‘‘ قرار دیا گیا ہے لیکن جدید سائنس کے مطابق چاند کی اپنی کوئی روشنی نہیں اور وہ محض شمسی روشنی کو منعکس کرتا ہے ۔ اس سے قرآن مجید کے اس نظریے کی تائید ہوتی ہے کہ چاند ’’منیر‘‘ یعنی روشنی کو منعکس کرنے والا ہے اور اس سے آنے والی روشنی منعکس شدہ ہے ۔ اب یہ سوچنا دُور ازکار بات ہے کہ نبی صلی اللہ علیہ وسلم نے بائبل کی ان سائنسی غلطیوں کی اصلاح کی اور پھر ایسی اصلاح شدہ عبارات قرآن میں شامل کر لیں ۔

 

تخلیق نباتات اور سورج:

 

بائبل کی کتاب ’’پیدائش‘‘ باب ا ول ،فقرہ: 11تا 13کے مطابق نباتات، گھاس، بیج دار پودوں اور پھل دار درختوں کو تیسرے روز پیدا کیا گیا جبکہ اسی باب کے فقرہ: 14تا 19کے مطابق سورج کی تخلیق چوتھے روز عمل میں آئی۔ سائنسی اعتبار سے یہ کیسے ممکن ہے کہ نباتات سورج کی حرارت کے بغیر ہی وجود میں آجائیں؟ جیسا کہ بائبل میں بیان کیا گیا ہے۔

اگرغیر مسلم معترضین کے بقول نبیٔ کریم صلی اللہ علیہ وسلم (نعوذ باللہ) فی الواقع قرآن کے مصنف تھے اورانھوں نے بائبل کے مواد سے کچھ نقل کیا تو آخر یہ کیسے ممکن ہوا کہ انھوں نے بائبل میں

 

شامل وہ بیانات چھوڑ دیے جو سائنسی حقائق سے مطابقت نہیں رکھتے اور قرآن می ں ایسا کوئی بیان نہیں ملتا جو سائنسی حقائق کے خلاف ہو؟

 

تخلیق آدم اور بائبل:

 

بائبل میں حضرت عیسیٰ علیہ السلام سے حضرت ابراہیم علیہ السلام اور کرۂ ارض پر پہلے انسان، یعنی آدم علیہ السلام تک بیان کردہ سلسلۂ نسب کے مطابق حضرت آدم علیہ السلام آج سے تقریباً 5800 برس قبل زمین پر مبعوث کیے گئے۔ آدم علیہ السلام اور ابراہیم علیہ السلام کے درمیان تقریباً 1948برس کابُعد ہے اور ابراہیم علیہ السلام اور حضرت عیسیٰ علیہ السلام کے درمیان تقریباً1800برس کا فاصلہ ہے جبکہ حضرت عیسیٰ علیہ السلام سے آج تک 2000برس گزر چکے ہیں۔ رائج الوقت یہودی کیلنڈر بھی تقریباً5800سال پرانا ہے جو کہ تخلیق کائنات سے شروع ہوتا ہے۔

آثار قدیمہ اور بشریات (Anthropology) کے مآخذ سے یہ معلوم ہوتا ہے کہ زمین پر قدم رکھنے والا پہلا انسان آج سے دسیوں ہزار سال پہلے پیدا ہوا تھا۔قرآن نے بھی آدم علیہ السلام کا ذکر زمین پر پہلے انسان کے طورپر کیا ہے لیکن بائبل کے برعکس اس نے نہ تو ان کی کوئی تاریخ بیان کی ہے اورنہ یہ بتایا ہے کہ وہ زمین پر کتنا عرصہ رہے۔ ادھر بائبل نے اس کے بارے میں جو کچھ بیان کیا ہے وہ سائنسی حقائق کے بالکل برعکس ہے۔

 

طوفانِ نوح اور بائبل:

 

بائبل کی کتاب پیدائش کے ابواب: 6،7اور8سے ظاہر ہوتا ہے کہ طوفان نوح عالم گیر طوفان تھا جس نے روئے زمین پر ہرزندہ چیز کو تباہ کردیا سوائے ان کے جو نوح علیہ السلام کے ہمراہ کشتی میں سوار تھے۔

’’کیا انسان، کیاحیوان، کیا رینگنے والا جاندار، کیا ہوا کا پرندہ یہ سب کے سب زمین پر مرمٹے، فقط ایک نوح باقی بچا یا وہ جو اس کے ساتھ کشتی میں تھے۔‘‘

کتاب پیدائش :7/23

 

بائبل کے بیان سے یہ اشارہ بھی ملتا ہے کہ یہ واقعہ آدم علیہ السلام کی پیدائش کے 1656 سال بعد ابراہیم علیہ السلام کی پیدائش سے292برس قبل اس وقت پیش آیا جب نوح علیہ السلام کی عمر600 برس ہوچکی تھی۔ گویا یہ طوفان 21 ویں یا 22 ویں صدی قبل مسیح میں آیا ہوگا۔

بائبل میں طوفان کی جو کہانی بیان کی گئی ہے وہ آثارِ قدیمہ کے مآخذ سے ملنے والی سائنسی شہادتوں سے متضاد ہے جو یہ ظاہر کرتے ہیں کہ مذکورہ صدیوں میں مصر کے گیارھویں حکمران خاندان اور بابل کے تیسرے خانوادے کی سلطنتیں کسی تہذیبی بحران کے بغیر مسلسل قائم تھیں اور کسی بڑے طوفان سے متاثر نہیں ہوئی تھیں جو اکیسویں بائیسویں صدی قبل مسیح میں آیا ہو۔ یہ بات بائبل کے اس قصے کی تردید کرتی ہے کہ طوفان کے پانیوں میں ساری دنیا ڈوب گئی تھی۔ اس کے برعکس قرآن مجید میں نوح علیہ السلام اور طوفان نوح کے بارے میں جو قصہ بیان کیا گیاہے وہ کسی سائنسی شہادت یا آثار قدیمہ کے کوائف سے متصادم نہیں۔ اول تو قرآن اس واقعے کی کسی متعین تاریخ یا سال کی نشاندہی نہیں کرتا۔ دوم، قرآن کے مطابق بظاہر یہ سیلاب ایک عالم گیر واقعہ نہیں تھا جس نے زمین پر موجود زندگی کو مکمل طورپر تباہ کردیا ہو۔

لہٰذا یہ فرض کرنا غیر منطقی بات ہے کہ نبیٔ کریم صلی اللہ علیہ وسلم نے طوفان نوح کا قصہ بائبل سے مستعار لیا اوراس کا ذکر قرآن میں کرنے سے پہلے غلطیوں کی تصحیح کردی۔

 

موسیٰ علیہ السلام اور فرعون:

 

قرآن کریم اور بائبل میں حضرت موسیٰ علیہ السلام اور فرعون (جس کے دور میں یہود کا مصر سے خروج عمل میں آیا) کے جو قصے بیان کیے گئے ہیں، وہ ایک دوسرے سے بہت ملتے جلتے ہیں۔ دونوں الہامی کتب کا اس امر پر اتفاق ہے کہ فرعون نے جب موسیٰ علیہ السلام کا تعاقب کرنے کی کوشش کی تو وہ اس کھاڑی کو عبور کرنے کی کوشش کرتے ہوئے ڈوب گیا جسے موسیٰ علیہ السلام اسرائیلیوں کے ہمراہ پار کرگئے تھے۔ قرآن کریم کی سورۂ یونس میں ایک مزید خبر یہ دی گئی ہے:

 

﴿فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً ۚ وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُونَ ﴾

 

’’آج ہم تیرا جسم بچا کر (سمندر سے) باہر نکال پھینکیں گے تاکہ وہ اپنے بعد والوں کے لیے نشان (عبرت) ہو، اور بے شک بہت سے لوگ ہماری نشانیوں سے غافل ہیں۔‘‘

 یونس:10/92

 

ڈاکٹر موریس بکائے نے مکمل تحقیقات کے بعد یہ ثابت کیا ہے کہ اگرچہ فرعون رَعْمسَیس ثانی اس بات کے لیے معروف ہے کہ اس نے بائبل کے بیان کے مطابق اسرائیلیوں پر ظلم ڈھائے لیکن فی الحقیقت وہ اس وقت ہلاک ہوگیا تھا جب موسیٰ علیہ السلام مدین میں پناہ لیے ہوئے تھے۔ رعمسیس ثانی کا بیٹا منفتاح اس کا جانشین ہوا اور وہی یہود کے مصر سے خروج کے دوران میں بحیرۂ قلزم کی کھاڑی میں ڈوب کر مرگیا۔1898ء میں مصر کی وادیٔ ملوک میں منفتاح کی مومیائی ہوئی لاش پائی گئی۔ 1975ء میں ڈاکٹر موریس بکائے نے دوسرے فضلاء کے ساتھ مل کر منفتاح کی مومیا کا معاینہ کرنے کی اجازت حاصل کی۔ اس کے معاینے سے انھوں نے جو نتائج اخذ کیے، ان سے ثابت ہوتا ہے کہ منفتاح غالباً ڈوبنے سے یا اس شدید صدمے کی و جہ سے جو ڈوبنے سے عین پہلے اسے پیش آیا، ہلاک ہوا، لہٰذا اس قرآنی آیت کی صداقت کہ’’ ہم اس کی لاش کوعبرت کے طورپر محفوظ رکھیں گے۔‘‘ فرعون کی لاش ملنے سے ظاہر ہوگئی جواب مصری عجائب گھر (متحف مصری) واقع قاہرہ میں پڑی ہے۔

اس آیت قرآنی نے ڈاکٹر موریس بکائے کو، جواس وقت تک عیسائی تھا، مطالعۂ قرآن پرمجبور کردیا۔ بعد میں اس نے’’ بائبل، قرآن اور سائنس‘‘ کے عنوان سے کتاب لکھی اوراس بات کا اعتراف کیا کہ قرآن کا مصنف اللہ کے سوا کوئی اورنہیں ہوسکتا۔ ڈاکٹر بکائے نے آخرکار اسلام قبول کرلیا۔

 

قرآن اللہ کی کتاب

 

یہ شواہد اس بات کوثابت کرنے کے لیے کافی ہیں کہ قرآن مجید ، بائبل سے نقل نہیں کیا گیا بلکہ قرآن تو فرقان ہے، یعنی وہ کسوٹی جس کے ذریعے سے حق اور باطل میں امتیاز کیا جاسکتا ہے اور اس سے استفادہ کرکے یہ معلوم کیا جاسکتا ہے کہ بائبل کا کون ساحصہ کلامِ الٰہی تصور کیا جاسکتا ہے۔ قرآن مجید خود اس کی شہادت دیتا ہے۔ سورۃ السجدۃ میں ارشاد باری تعالیٰ ہے:

 

﴿الم تَنزِيلُ الْكِتَابِ لَا رَيْبَ فِيهِ مِن رَّبِّ الْعَالَمِينَ أَمْ يَقُولُونَ افْتَرَاهُ بَلْ هُوَ الْحَقُّ مِن رَّبِّكَ لِتُنذِرَ قَوْمًا مَّا أَتَاهُم مِّن نَّذِيرٍ مِّن قَبْلِكَ لَعَلَّهُمْ يَهْتَدُونَ﴾

 

’’الٓمٓ بے شک اس کتاب کا نزول رب العالمین کی طرف سے ہے۔ کیا وہ کہتے ہیں کہ نبی نے اسے خود گھڑ لیا ہے؟ (نہیں!) بلکہ یہ آپ کے رب کی طرف سے حق ہے تاکہ آپ ان لوگوں کو ڈرائیں جن کے پاس آپ سے پہلے کوئی ڈرانے والا نہیں آیا، شاید کہ وہ ہدایت پائیں۔‘‘

السجدۃ:32/1۔3