Al’lati Behan ki wiraasat

Al’lati Behan Mayyat ki woh Behan hai jin ka Baap aur Mayyat ka Baap aik hi ho, Aur unki Maan alag alag hon.

✦ Al’lati Behan ki wiraasat mein chay (6) halatein hain:

Pehli haalat: Al’lati Behan apnay Bhai ki jaedaad ka Nisf hissa (1/2) lay gi. Jab woh akeeli ho aur Mayyat ka Beta, Beti, Pota, Poti, Baap, Daada, A’ini Bhai, A’ini Behan aur Al’lati Bhai mujood nah hon.

Misaal: Aik aadmi faut ho gaya. Us nay apni Biwi, Al’lati Behan aur Chacha ko zindah chodha.

Hal: Biwi (1/4) lay gi, Al’lati Behan (1/2) aur baqi jaedaad Chacha Bator-e-Asabah lay ga. Asal masla (4) hai Biwi ko (1) mila, Al’lati Behan ko (2) aur baqi (1) Chacha lay ga.

Doosri haalat: Al’lati Behan jaedaad ka do tihai hissa (2/3) lay gi. Jab woh aik say zayaada hon. Aur Mayyat ka Beta, Beti, hota, Poti, Baap, Daada, A’ini Bhai, A’ini Behan aur Al’lati Bhai mujood nah hon.

Misaal: Aik aadmi faut ho gaya. Aur apni Biwi, Do Al’lati behnein aur Chacha ko zindah chodha.

Hal: Biwi (1/4) lay gi, Do Al’lati behnein (2/3) aur baqi Chacha Bator-e-Asabah lay ga. Asal masla (12) hai, Biwi ko (3) milay ga do Al’lati behnon ko (8) har aik ko (4) aur baqi (1) Chacha lay ga.

Teesri haalat: Al’lati Behan chahay aik ho ya zayaada usay Mayyat ki A’ini Behan ki mujoodgi mein tarka ka chatta hissa (1/6) “تكملة للثلثین” milay ga. Jab Mayyat ki aulaad, Baap Daada, A’ini Bhai aur Al’lati Bhai mujood nah hon.

Misaal: Aik aadmi faut ho gaya aur apni Biwi, Aini Behan, Al’lati Behan aur Chacha ko zindah chodha.

Hal: Biwi ko (1/4) milay ga. A’ini Behan ko (1/2), Al’lati Behan ko (1/6) “تكملة للثلثین” aur baqi Chacha Bator-e-Asabah lay ga. Asal masla (12) hai Biwi ko (3) milay Aini Behan ko (6) Al’lati Behan ko (2) baqi (1) Chacha lay ga.

Chouthi haalat: Al’lati Behan chahay aik ho ya zayaada Mayyat ki Beti ya Poti ki mujoodgi mein Bator-e-Asabah ma’al ghair waaris banti hai. Jab Mayyat ka Beta, Pota, Baap, Daada, A’ini Bhai, A’ini Behan aur Al’lati Bhai mujood nah hon.

Misaal: Aik aadmi faut ho gaya. Apni Biwi, Beti, Poti aur Al’lati Behan ko zindah chodha.

Hal: Biwi ko (1/8), Beti ko (1/2), Poti ko (1/6) milay ga “تكملة للثلثین” aur Al’lati Behan Batore- Asabah ma’al ghair waaris hai. Asal masla (24) hai. Biwi (3) Beti (12) Poti (4) lay gi aur baqi (5) Al’lati Behan Bator-e-Asabah lay gi.

Note: Al’lati Behan jab Asabah ma’al ghair waaris banti hai to Al’lati Bhai kay darja mein ho jati hai aur jin waarison ko Bhai mahroom karta hai yeh bhi unhein wiraasat say mahroom kar deti hai.

Panchwein haalat: Al’lati Behan, Al’lati Bhai ki mujoodgi mein Bator-e-Asabah bil ghair waaris banti hai. Jab un kay hamrah Mayyat ka Beta, Pota, Baap aur A’ini Bhai mujood nah hon “لِلذَّكَرِ مِثۡلُ حَظِّ ٱلۡأُنثَيَيۡنِ‌” ki ro say Al’lati Bhai, Al’lati Behan say do guna lay ga.

Misaal: Aik aadmi faut ho gaya. Apni Biwi, Beti, Al’lati Bhai aur Al’lati Behan ko zindah chodha.

Hal:Biwi ko (1/8) Beti ko (1/2) milein gay aur baqi Al’lati Bhai aur Al’lati Behan Bator-e-Asabah layn gay. Asal masla (8) hai Biwi ko (1) mila. Beti ko (4) aur baqi (3) Al’lati Bhai Behan lein gay. Un mein say Al’lati Bhai (2) lay ga aur Al’lati Behan (1) lay gi.

Chutti haalat: Al’lati Behan mandarja zail waarison ki mujoodgi mein wiraasat say mahroom hogi.

1: Beta                                                            2: Pota                                                

3: Baap                                                            4: A’ini Bhai                                      

5: A’ini Behan jab woh Bator-e-Asabah ma’al ghair waaris banay

6: Do ya do say zayada A’ini behnon ki mujoodgi mein jab woh do tihaai (2/3) ki waaris hon. Aur Al’lati Behan kay hamrah Al’lati Bhai mujood nah ho. Agar Bhai mujood ho to donon Bator-e-Asabah baqi tarka kay mustahiq hungay.

Misaal 1: Aik aadmi faut ho gaya. Apna Beta ya Pota aur Al’lati Behan ko zindah chodha.

Hal: Saari jaedaad Beta lay ga ya Pota lay ga. Al’lati Behan wiraasat say mahroom rahay gi.

Misaal 2: Aik aadmi faut ho gaya aur apni Maan, Aini Bhai aur Al’lati Behan ko zindah chodha.

Hal:Maan (1/6) lay gi baqi Aini Bhai Bator-e-Asabah lay ga. Al’lati Behan A’ini Bhai ki wajah say mahroom ho gai. Asal masla (6) Maan ko (1) mila. Baqi (5) A’ini Bhai ko milay aur Al’lati Behan wiraasat say mahroom hai.

Misaal 3: Aik aurat faut ho gai. Apna Baap aur Al’lati Behan ko zindah chodha.

Hal: Saari jaedaad Baap lay ga. Al’lati Behan Baap ki mujoodgi ki wajah say wiraasat say mahroom hai.

Misaal 4: Aik aadmi faut ho gaya aur apni Biwi, Beti, A’ini Behan aur Al’lati Behan ko zindah chodha.

Hal: Asal masla (8) hai Biwi ko (1/8), (1) hissa milay. Beti ko (1/2), (4) milay. A’ini Behan ko Bator-e-Asabah ma’al ghair baqi (3) milay. Al’lati Behan wiraasat say mahroom hai.

Misaal 5: Aik aadmi faut ho gaya us nay apni Biwi, Do A’ini Behnein, Al’lati Behan aur Chacha ko zindah chodha.

Hal: Biwi ko (1/4) milay ga. Do Aini behnoon ko (2/3) milein gay un kay darmiyaan sulusain poooray ho gaye. Is liye Al’lati Behan wiraasat say mahroom ho gai. Aur baqi Chacha Bator-e-Asabah lay ga. Asal masla (12) hai Biwi ko (3) milay. Do A’ini behnon ko (8) har aik ko (4) milay. Al’lati Behan mahroom hai aur baqi (1) Chacha lay ga.

✦ Al’lati Behan ki wiraasat ki daleelein

Al’lati Behan ko jumla haalton ki daleelein wohi hain jo A’ini Behan kay baab mein mazkoorah hain kiunkeh surah Al Nisaa ki aayat

يَسۡتَفۡتُونَكَ قُلِ ٱللَّهُ يُفۡتِيڪُمۡ فِى ٱلۡكَلَـٰلَةِ‌ۚ إِنِ ٱمۡرُؤٌاْ هَلَكَ لَيۡسَ لَهُ ۥ وَلَدٌ۬ وَلَهُ ۥۤ أُخۡتٌ۬ فَلَهَا نِصۡفُ مَا تَرَكَ‌ۚ وَهُوَ يَرِثُهَآ إِن لَّمۡ يَكُن لَّهَا وَلَدٌ۬‌ۚ فَإِن كَانَتَا ٱثۡنَتَيۡنِ فَلَهُمَا ٱلثُّلُثَانِ مِمَّا تَرَكَ‌ۚ وَإِن كَانُوٓاْ إِخۡوَةً۬ رِّجَالاً۬ وَنِسَآءً۬ فَلِلذَّكَرِ مِثۡلُ حَظِّ ٱلۡأُنثَيَيۡنِ‌ۗ يُبَيِّنُ ٱللَّهُ لَڪُمۡ أَن تَضِلُّواْ‌ۗ وَٱللَّهُ بِكُلِّ شَىۡءٍ عَلِيمُۢ 

Mein lafz “أُخۡتٌ۬” say muraad A’ini Behan hai aur us ki Adam mujoodgi mein Al’lati Behan ko bhi shaamil hai.

is tarhan Asabah ma’al ghair ki daleel Hadees-e-Huzail bin Shurhabeel رضی اللہ عنہ hai jo Poti kay baab mein mazkoor hai jis mein Sayyiduna Abdullah bin Maso’od رضی اللہ عنہ nay Behan ko Beti ki mujoodgi mein Bator-e-Asabah waaris banaya hai.

REFERENCE:

Book: “Islam Ka Qanoon-e-Warasaat”

By Salah Uddin Haider Lakhwi.