02. Safar ke Aadaab

Safar ke Aadaab

 

• Hajj aur Umrah karne walon par waajib hai ke apne Hajj aur Umrah mein Allah ki khushnudi aur us ke taqarrub ko apna maqsad banayein, duniyaawi gharz ya fakhar-o-mubaahaat se door rahain, alqaab ya riya kaari aur dikhawa se parhez karain.

 

• Musafir ke liye mustahab hai ke apne maal, jaaidad, qarz aur lain den ke baare mein wasiyyat likhe aur amaanaton ko mustahiqeen ke hawalay kar de ya un se ijaazat haasil kar le is liye ke maut Allah ke haath mein hai…

 

• Gunaahon aur na farmaniyon se taubah kar le, jo gunaah ho chuke hain un par sharminda ho aur aaindah na karne ka azm kar le.

 

• Logonbke huqooq lauta de masalan kisi ka maal liya ho, ya kisi ka dil dukhaaya ho to us se muaafi talab kar le.

 

• Apne Hajj aur Umrah ke liye halaal aur paak maal ka intikhaab kare, is liye ke Allah Ta‘ala paak hai aur sirf paak cheezon ko qubool karta hai.

 

• Tamaam gunahon se door rahay; apni zabaan aur haath se kisi ko takleef na de, aisi bheed na kare ke jis se hajiyon ko takleef pohanche, chugli na kare, gheebat mein na pade, apnon ya ghairon se ladaai jhagra na kare balkeh behtareen tareeqa apnaye, jhoot se parhez kare aur baghair ilm ke koi deeni baat na kahe.

 

• Hajj aur Umrah karne walon par zaroori hai ke woh Hajj aur Umrah ke ahkaam seekhein aur unhein achi tarah samajh lein.

 

• Tamaam wajibaat ki paabandi karein, jin mein sab se badh kar namaaz ba-waqt aur ba-jama‘at ada karna hai, aur ziyaadah se ziyaadah naik kaam karein, masalan Quran padhein, zikr karein, du‘aain karein, apne qaul-o-fail se logon ke saath ehsaan karein, zarooratmandon ki madad karein, musalmanon ke saath narmi se paish aayein, fuqaraa ko sadaqah-o-khairaat dein, bhalaaiyon ka hukm dein aur buraaiyon se rokein.

 

• Musafir ke liye mustahab hai ke woh naik aur saaleh hamsafar ka intikhaab kare.

 

• Apne andar achay akhlaaq paida kare aur logon ke saath akhlaaq-e-hasanah se paish aaye jin mein: sabr, mu’aafi, narmi, burdbaari, kisi par hukum lagane mein jaldi na karna, inkisaari, karam farmaai, sakhaawat, insaaf, reham dili, amaanat daari, parhezgaari, wafadaari, sharm-o-haya, sachaai, neki aur ehsaan karna shaamil hai.

 

• Musafir ke liye mustahab hai ke woh apne ghar walon ko Allah se darrne ki wasiyat kare jo Allah Ta‘ala ki aglon aur pichlon ke liye wasiyat hai.

 

• Isi tarah yeh bhi mustahab hai ke Nabi Kareem ﷺ se saabit azkaar aur du‘aon ki pabandi karein: jin mein safar aur sawaari par sawaar hone ki dua bhi hai.

 

[Dekhiye safha: 75]

 

 

REFERENCE:

Book: Rahnuma-e-Hajj aur Umrah.

Compiled/Murattab: Talaal Bin Ahmed Al-Aqeel.