Skip to main content
Search
Sections
< All Topics
Print

05. Mahzuraat-e-Ihram Aur Jayez Umoor

Mahzuraat-e-Ihram

 

✯ Mahzuraat-e-Ihram:

 

Meeqaat se Ihram baandhnay ke baad Hajj ya Umrah karne walay par darj-e-zail kaam haraam ho jaate hain:

 

  • Baal ya naakhun nikaalna:

           Haan, agar baghair qasd-o-iraadah ke gir jaayein, ya bhool kar ya hukum ma’loom na honay             ki wajah se kuch baal nikaal dein, ya naakhun taraash lein, to us par koi gunaah nahi hai.



  • Muhrim ke liye jisam ya kapday mein khushboo lagana: Jaa’iz nahi hai. Aur agar Ihram baandhnay se pehle jisam mein lagayi huwi khushboo ka asar baaqi reh jaaye to koi harj nahi. Albatta kapday mein agar asar ho to unhein dhona zaroori hai.

 

  • Musalman muhrim (har jagah) aur ghair muhrim (jab woh hudood-e-Haram mein ho) donon ke liye:

          Khushki ka shikaar karna, ya shikaar ko bhagana ya is silsilay mein ta’awun karna, sab                            haraam hai.

 

  • Musalman chahe muhrim ho ya ghair muhrim, har donon haalaton mein: Haram kay jhaad aur haray bhare poday jo khudro hain unko ukhaadna haraam hai. Isi tarah hudood-e-Haram mein shikaar karna muhrim aur ghair muhrim donon ke liye haraam hai.

 

  • Musalman chahe muhrim ho ya ghair muhrim, har donon haalaton mein:

            Hudood-e-Haram mein giri huwi koi bhi cheez, khwah paisay hon ya sona chaandi waghera,                uthaana haraam hai. Albatta logon mein ailan karne ke liye utha sakta hai.

 

  • Mangni karna ya aqd-e-nikaah karna, khawah apne liye ho ya doosron ke liye, jimaa karna, ya aurton se mubaashirat karna (sab haraam hain).

 

Usmaan Radhi Allahu ‘Anhu ki hadees mein hai ke Nabi Kareem ﷺ ne farmaya:

“Muhrim na khud nikaah kare aur na nikaah karwaye, aur na mangni kare.”

(Muslim)

 

 

  • Aurat halat-e-Ihram mein dastaanay (Glooves) na pehne, aur apne chehray ko niqaab ya burqa se na chhupaye.

            Albatta ajnabi mard ki maujoodgi mein apne chehray ko odhni waghera se chhupana waajib                hai, jis tarah deegar  haalaat mein waajib hai.

 

  • Muhrim ko Ihram se apne sar ko dhaanpna jaa’iz nahi hai, aur na aisi cheezon se jo sar ko lag jaayein masalan topi, shumaagh, ghatrah, aur ‘Amamah.

           Agar bhool kar ya anjaane mein dhaanp le to yaad aane ke baad ya hukum ma’loom hone par             use nikaal de. Is tarah us par koi gunaah waghairah nahi hai.

 

  • Isi tarah muhrim ko poore badan par ya badan ke kuch hissay par sila huwa kapda pehin’na jaa’iz nahi hai, masalan: Jubbah, Qamees, Yopi, Paajaamah aur Mozay pehin’na.

            Haan agar khula kapda na paye to paajaamah pehen’na jaa’iz hai, aur jo shakhs joota na                        paaye us ke liye mozay pehen’na bhi jaa’iz hai. Is mein koi harj nahi hai.

 

✯ Muhrim Kay Liye Jaa’iz Hai:

 

  • Ghadi aur headphone pehin’na.
  • Angoothi aur chappal pehin’na.
  • Chashmah, belt aur kamar band pehin’na.
  • Chhatri ya gaadi ki chhat se saaya haasil karna jaa’iz hai.
  • Isi tarah sar par samaan ya bistar uthaana jaa’iz hai.
  • Zakhm par patti baandhna, sar aur badan dhona jaa’iz hai.
  • Isi tarah ehraam ke kapday badalna aur unko dhona jaa’iz hai.
  • Agar sar aur badan dhotay waqt baghair qasd ke kuch baal gir jaayen to koi baat nahi hai.
  • Agar muhrim bhool kar ya anjaanay mein apne sar ko dhank lay to yaad aanay par ya hukum ma’loom ho jaanay ke baad usko hataana waajib hai.

 

REFERENCE:
Book: Rahnuma-e-Hajj aur Umrah.
Compiled/Murattab: Talaal Bin Ahmed Al-Aqeel.  

 

 

Table of Contents