Qurbani ke Ba’z Ahkaam o Masael 

 

• Islam mein tamam ibadaat sirf aur sirf Allah Zuljalaal ke qurb aur khushnudi ke liye hain yahi islam ki bunyaad hai aur sab se pahli da’wat jo tamam ambiya A’laihim Assalam ne apni apni ummaton ko pesh ki hain us ki assas aur bunyad bhi yahi thi ke La Ilaha Illallahu

Allah ke alawa koi ibadat ke laiq nahi hai. Tamam qism ki ibadat khwah us ka ta’lluq zaban se ho, jism se ho, maal se ho, zikr azkaar se ho, bahr haal kisi tarah ki ibadat Allah Ziljalaal ke alawa kisi ke liye bhi jaiz nahi, farman e Baari Ta’la hai: Aap kah dijiye “Yaqinan meri namaz aur meri saari ibadaat aur jeena marna yeh sab khaalis Allah Ta’la hi ke liye hai, jo saare jahan ka Rabb hai, us ka koi shareek nahi aur mujh ko usi ka hukm huwa hai aur main sab manne waalon mein se pahla hoon.”(Al Ina’aam:162-163).

 

Fehrist :

• Qurbani ki ta’reef
• Qurbani karne ki mashruiyat
• Qur’an
• Hadees
• Qurbani ka Hukm
• Qurbani karne wale ke liye Hidayat
• Qurbani ki shuroot
• Qurbani Zubah karte waqt ki Dua’
• Qurbani khana aur Taqseem karna
• Qurbani karne ka waqt
• HawalaJaat

 

Qurbani ki ta’reef:

 

Qurbani : Ayaam Eid ul Azha mein Allah Ta’la ka taqarrub haasil karne ke liye Bahimatul ana’m mein se koi Janwar Zubah karne ko kaha jata hai.(Bahimat Al Ana’m) bhed, bakri, Oont,Gaye ko kahte hain).

 

Qurbani karne ki mashruiyat:

 

Qurbani Deen Islam ke sha’aer mein se ek sha’r hai, iski mashruiyat kitaabullah aur Sunnat e Nabawi ﷺ aur Musalmanon ke ijma’ se saabit hai.

 

 

Qur’an :

 

 Allah Subhanahuwatala ka Farman hai:

Allah Ta’la ke liye hi namaz ada karo aur Qurbani karo. (Al Kauser:2)

 

Ek doosre maqam par Allah Ta’la ne kuch is tarah Farmaya:

Aap kah dijiye yaqinan meri namaz aur meri saari ibadaat, mera jeena aur mera marna yeh sab khaalis Allah Ta’la hi ke liye hai jo saare jahan ka maalik hai, Uska koi shareek nahi aur Mujh ko Usi ka hukm huwa hai aur main sab manne walon mein se pahla hoon.

(Al In’am:162-163)

 

 Aur ek aur maqam par Allah Ta’la ne is tarah Farmaya:  Aur Ummat ke liye humne

Qurbani ke tariqe muqarrar farmaye take woh un chaupaye jaanwar par Allah Ta’la ka naam len jo Allah Ta’la ne unhen de rakhe hain, samajh lo ke tum sabka ma’bood  barhaq sirf ek hi hai tum Usi ke tabe’ farma ho jao aur a’jizi karne walon ko khushkhabri suna dijiye.

(Alhajj:34)

 

Hadees:

 

Anas Bin Malik Razi Allahu Ta’la Anhu bayan karte hain keh Nabiﷺ ne siyah o safed mendhon ki Qurbani di unhen apne haath se Zubah kiya aur Zubah karte huye Bismillah Allahu Akbar kaha aur apna paaon unki gardan par rakha.

(Sahih Bukhaari:5558, Sahih Muslim:1966) ۔

 

Abdullah Bin Umar Razi Allahu Ta’la Anhu bayan karte hain keh:Nabi ﷺ ne Madina Shareef mein das baras qayaam kiya aur har baras Qurbani ki.

(Masand Ahmed:4935, SananTirmazi:1507,Hasan).

 

A’qba Bin A’mer Razi Allahu Ta’la Anhu bayan karte hain keh Nabi Kareem ﷺ ne apne sahaba karam ke mabain Qurbaniyan taqseem ki to A’qba Razi Allahu Ta’la Anhu ke hisse mein jaza’a aaya to woh kahne lage aye Allah ke Rasoolﷺ mere hisse mein jaza’a aaya hai to Nabi kareem ﷺ ne farmaya usko hi zubah kardo.

(Sahih Bukhaari:5547).

 

Baraa Bin A’zab Razi Allahu Ta’la Anhu bayan karte hain keh Nabi Kareem ﷺ ne farmaya: jis ne bhi namaz (Eid) ke ba’d qurbani ka janwar zubah kiya to us ki qurbani hogayi aur us ne muslamano ki sunnat par amal karliya .

(Sahih Bukhaari:5545)

 

• Ma’loom huwa keh Nabi Kareem ﷺ ne khud bhi qurbani ke janwar zubah kiye aur sahaba karam Razi Allahu Ta’la Anhum bhi qurbani karte rahe aur Nabi kareem ﷺ ne hamen yeh bataya keh qurbani karna musalmano ki sunnat ya’ni unka tariqa hai. Lehaza musalmanon ka qurbani ki mashruiyat par ijma’ hai, jaisa keh kayi ek Ahle Ilm ne bhi is ijma ko naqal kiya hai.

 

 

Qurbani ka hukm:

 

Jamhoor ulma’ karaam ka maslak yeh hai keh qurbani karna sunnat e Muakkadah hai (ya’ni intehayi taakidi sunnat hai),Imam Shafa’e Ahmed se bhi mashoor maslak yahi hai.

 

Aur kuch ulma Karaam kahte hain keh qurbani karna waajib hai,yeh Imam Abu Hanifa

Rahmahullah ka maslak hai aur Imam Ahmed ki ek riwayat yeh bhi hai aur Shaikh Al-Islam ibn Tameema Rahmahullah Ta’la ne bhi ise hi ikhtiyar karte huye kaha hai: yeh maslak maaliki mazhab ka ek qaul hai ya Imam maalik ke mazhab ka zaahir .

(Ahkam Al Aazhat o Al Zakaat Taalif  Abn Usaimeen Rahmahullah).

 

Shaikh Mohammad Bin Usaimeen Rahmahullah Ta’la ka kahna hai:jo shakhs Qurbani karne ki isteta’t rakhta ho us ke liye Qurbani karna sunnat e Muakkadah hai, lehaza Insan apni aur apne ahle o ayaal ki jaanib se qurbani kare.

(Fataawa Abn Usaimeen:2/661).

 

 

Qurbani karne waley ke liye Hidayat:

 

• Jab koi shakhs Qurbani karna chahe

aur chaand nazar aanay ya Zil Qa’dah ke tees (30) din poore hone ki bina par Zil Hajja ka mahina shuru ho jaaye to qurbani zubah karne tak us ke liye apne baal aur nakhun ya jild waghaira se kuch kaatna haraam hai.  Umm Salma Razi Allahu Ta’la anha bayan karti hain keh Rasool Allah Ta’la ﷺ ne farmaya: jab tum Zil Hijja ka chaand dekhlo .

 

• Aur ek riwayat ke alfaz hain: jab Ashrah (Zil Hijja) shuru ho jaaye aur tum mein se koi Qurbani karna chahe to woh apne baal aur nakhun na katwaye.

(Sahih Muslim:1977, Masand Ahmed:26571)

 

• Aur jab koi shakhs Ashrah Zil Hijja ke dauran qurbani karne ki niyat kare to usay apni niyat ke waqt se hi ruk jana chahiye aur us ne qurbani karne ki niyat se qabl jo kuch kaata hai uska koi gunah nahi hoga.

 

• Is mumanea’t mein hikmat yeh hai keh jab qurbani karne wala shakhs qurbani karke Allah Ta’la ka taqarrub haasil karne ke liye haaji ke ba’z a’maal mein shareek huwa to baal aur nakhun na katwane ke saath ahraam ke ba’z khasaes mein bhi shareek hoga.

 

• Aur yeh hukm ya’ni baal aur nakhun waghaira na katwane ka hukm sirf Qurbani karne wale ke saath hi khaas hai aur jis ki janib se Qurbani ki ja rahi hai woh us se ta’lluq nahi rakhta kyun ke Nabi Kareem ﷺ ka farman hai: aur tum mein se koi Qurbani karne ka irada kare to, Nabi Kareem ﷺ ne yeh nahi farmaya keh: ya jis ki janib se Qurbani ki ja rahi ho aur is liye keh Nabi Kareem ﷺ apne ahl o ayal ki janib se Qurbani kiya karte the aur Aap ﷺ se yeh manqool nahin keh Aap ﷺ ne unhen baal waghaira katwane se mana farmaya ho. Is bina par qurbani karne wale ke ahlo a’yaal ke liye ashra Zil Hijja mein baal, nakhun waghaira katwana jaiz hai.

 

 

• Aur jab Qurbani karne ka irada rakhne wala ashra Zil Hijja mein apne baal nakhun ya apni jild se kuch kaat le to use Allah Ta’la ke haan tauba karna chahiye aur aainda woh aisa kaam na kare aur us par koi kaffara nahi hoga aur na hi yeh us ke liye qurbani karne mein maane’ hai, jaisa ke ba’z logon ka guman hai keh us se qurbani mein mumania’t paida ho jaati hai.

 

 

• Agar kisi shakhs ne bhool kar ya jehalat mein baal waghaira katwa liye ya us ke baal baghair qasdan irada ke gir gaye to us par koi gunah nahi aur agar use nikaalne ki zarurat pesh ajaye to use kaatne mein koi gunah aur harj nahi hoga. Maslan kisi ka nakhun toot jaaye aur use toota hua nakhun takleef deta ho to uske liye kaatna jaiz hai aur isi tarah agar uske baal aankhon mein padne lagen to uske liye use zaael karde ya use kisi zakhm ke ilaaj ke liye baal katwane ki zarurat ho to uske liye aisa karna jaiz hai. .(Shaik Abn Baaz Rahmat Ullah, Fataawi Islaami 2/316).

 

 

 

Qurbani ki shuroot:

 

Qurbani ke liye 6 shuroot ka hona zaruri hai:

 

1. Wo qurbani bahimatul ana’m mein se ho jo keh Oont, gaaye, bhed, bakre hain kyunke Allah Subhana wa ta’la ka farman hai:”aur har ummat ke liye humne Qurbani ke tariqe muqarrar farmaye hain taake woh un chaupaye janwaron par Allah Ta’la ka naam len. (Al Hajja:34)

 

2. Aur bahimatul ana’m se murad Oont, Gaaye, bhed, bakre hain. Arab ke haan bhi yahi ma’roof hai, hasan, qatada wagaira ne bhi yehi kaha hai.

 

3. Qurbani ka janwar shara’ee mahdood umar ka hona zaruri hai, woh is tarah ke bhed ki nasl mein jaza’ah ya phir uske alawa mein se saniyyah hona zaruri hai kyunke Nabi Kareem ﷺ ka farman hai: Musinnah (ya’ni do daant wala ) ke alawa koi aur zubah na karo.

 

4. Lekin agar tumhen musinnah na mile to bhed ka jaza’ah zubah karlo (Sahih Muslim:1963)

 

5. Musinnah, saniyyah aur us se oopar waali umar ka hota hai aur jaza’ah us se kam umar ka, lehaza Oont poore paanch baras ka ho to woh saniyyah kahlayega, Gaaye ki umar do baras ho to woh saniyyah kahlayegi, Bakri jab ek baras ki ho to woh saniyya kahlayegi.

 

6. Aur jaza’ah ek saal ke janwar ko kahte hain, lehaza Oont, Gaaye aur Bakre mein Saniyyah se kam umar ke janwar ki qurbani nahin hogi aur isi tarah bhed mein se jaza’ah se kam umar ke janwar ki qurbani sahi nahi hogi.

 

 

Qurbani ke Janwar (4 )chaar ‘uyoob se paak hona chahiye:

 

1. Aankh mein wazeh aur zahir a’eb: ya’ni jis ki aankh bah chuki ho ya phir button ki tarah bahar nikli ho, ya phir aankh mukammal aur saari safed ho jo us ke bhenge pan par wazeh dalalat kartaa hai.

 

1. Wazeh beemaar jaanwar: is se murad woh beemariyan hain jo janwaron par zaahir hoti hain maslan woh bukhaar jis ki bina par janwar charna hi khatam kardeta hai aur uske charne ki chaahat hi khatm ho jaati hai aur isi tarah wazeh aur zaahir kharoch jo uske gosht ko kharab kardene waali ho, ya uski sehat par asar andaz ho rahi ho aur gahra zakhm jo uski sehat par asar andaaz hota ho, wagaira doosri beemariyan.

 

1. Wazeh taur par paaya jaanay wala langda pan:woh langda pan jo usay seedha aur sahih chalne se roke aur mushkil se do chaar kare.

 

1. Goode ko zaael karne waali kamzori: kyunke Nabi Kareem ﷺ se jab ye pucha gaya ke janwar kin uyoob se saaf hona chahiye to Nabi Kareem ﷺ ne apne haath se Ishara karke farmaya chaar uyoob se :woh langda jaanwar jiski aankh ka a’eb wazeh ho aur beemar jaanwar jiski beemari wazeh ho aur woh kamzor o za’eef jaanwar jiska gooda hi na ho. Ise imam Maalik Rahmatullah alaih ne motaa mein baraa Bin A’azib Razi Allahu Ta’la Anhu se riwayat kiya hai.(Sanan Abi Daawood:2802,Sahih)

 

   Lehaza yeh chaar a’eb aise hain jinke paye jane ki bina par qurbani nahi hoti aur in chaar uyoob ke saath is tarah ke aur bhi uyoob mulhaq hote hain ya woh uyoob jo is se bhi shadeed hon to unke paaye jaane se bhi qurbani nahin hoti, ham unhen zel mein zikr karte hain:

 

1. Andha pan- woh jaanwar jiski ankhon se nazar hi na aata ho.

 

1. Woh jaanwar jisne apni taaqat se zyada char liya ho uski qurbani uswaqt tak nahi hosakti jab tak woh sahi nahi hojata aur us say khatra nahi tal jaata.

 

1. Woh jaanwar jisay jannay mein koi mushkil darpesh ho jab tak us se khatra zaael na hojaye. 

 

1. Zakhm wagaira laga huwa janwar jis se uski maut waaqe’ honay ka khadsha ho, gala ghut kar ya bulandi se neechay gir kar ya usi tarah kisi aur wajah se. Uswaqt tak aisay jaanwar ki qurbani nahin ho sakti jab tak keh us se khatra zaael nahi ho jaata. 

 

 

1. Kisi aafat ki wajah se chalne ki sakat na rakhne waala jaanwar. 

 

1. Agli yaa pichli taangon mein se koi ek taang kati huwi ho.

 

 

Jab in che( 6) ‘uyoob ko Hadees mein chaar(4) uyoob ke saath milaya jaaye to inki ta’daad das(10) hojayegi.

 

Woh jaanwar qurbani karne walay ki milkiyat ho, lehaza jo jaanwar milkiyati na ho uski qurbani sahi nahi, maslan gasab ya chori karda jaanwar aur isi tarah baatil aur galat da’way se liya gaya jaanwar, kyunke Allah Ta’la ki ma’siyat o na farmaani ke saath Uska taqarrub haasil nahi hosakta aur jab a’datan qurbani hoti ho aur na karnay se yateem ki dil aazaari ho to yateem ke liye uske maal se waali ki jaanib se qurbani karna sahi hai. Aur isi tarh muakkil ki jaanib se wakeel apne muakkil ki ijazat aur uske maal se qurbani karna sahi hoga.

Us jaanwar ke saath kisi doosre ka haq mu’allaq na ho,lehaza rehen rakhe gaye jaanwar ke sath Qurbani nahi ho sakti.

Qurbani ko shara’ii mahdood waqt ke andar zubah kiya jaaye, aur yeh waqt das (10) Zil

Hajja ko Namaz e Eid ke ba’d se shuru ho kar ayaam e tashreeq ke aakhri din tera (13) Zil Hajja ka suraj guroob hone tak baaqi rahta hai, to is tarah zubah karne ke chaar din hain. 

Eid ke din ke baad,aur uske ba’ad teen din ya’ni gyarah, baarah aur tera Zil Hajja ke ayaam,lehaza jis ne bhi Namaz Eid se qabl qurbani zubah karli ya phir tera Zill Hajja ko guroob e shams ke ba’ad koi shakhs qurbani karta hai to uski yeh qurbani sahi nahi hogi.

 

• Baraa Bin A’azib Razi Allahu Ta’la anhu se Riwayat kiya hai:woh bayan karte hain ke Rasool Allahﷺ ne farmaya : Jis ne Namaaz Eid se qabl zubah karliyaa wo sirf gosht hai jo wo apne ahle o a’yaal ko pesh kar raha hai aur uska qurbani se koi ta’luq nahi.

 

(Sahih Bukhaari:5545,Sahih Muslim:1961)

 

• Jandab Bin Sufiyaan Albajli Razi Allahu Ta’la A’nhu bayan karte hain keh :main Nabi Sallallaahu A’laihi Wasallam ke saath haazir tha to unhon ne farmaya:jis ne Namaz Eid se qabl zubah karliya woh us ke badle mein doosra Jaanwar zubah karay.

 

(Sahih Bukhaari:5562).

 

• Lekin agar usay Ayaam tashreeq se qurbani ko taakhiir karnay ka koi ‘uzr pesh aajaye maslan uski qurbani ka jaanwar us say bhaag gayaa aur usmein uski koi kotaahi nahi thi aur woh jaanwar Ayaam tashreeq ke ba’ad waapas milay, ya usne kisi ko qurbani zubah karnay ka wakeel banaya to wakeel usay zubah karna hi bhool gaya aur waqt guzar gayaa, to us ‘uzr ki bina par waqt guzarne ke ba’ad zubah karne mein koi haraj nahi, aur Namaaz ke waqt mein soye huye ya bhool jaanay waalay shakhs par qiyaas karte huye ke woh jab sokar uthay ya jab usay yaad aaye to Namaz ada karega.

 

• Waqt e muhaddada ke andar din ya raat mein kisi bhi waqt qurbani zubah ki ja sakti hai, Qurbani din ke waqt zubah karna aulaa aur behtar hai, aur Eid walay din Namaaz Eid ke ba’ad khutba ke ba’ad zubah karna afzal aur aulaa hai, aur isi tarah uske ba’d walay din mein ya’ni jitni jald zubah ki jaaye behtar aur afzal hogi, kyunke ismein khair o bhalai karne mein sabqat hai.(Qurbani aur Zubah ke Ahkaam Az Shaik Abn Usaimeen Rahmat Ullah)

 

Qurbani Zubah karte Waqt ki Dua’ :

 

Jo koi bhi Qurbani ka janwar zubah karay to uske liye mandarja zel alfaaz kahna sunnat hai:

 

Bismillah, Wallahu Akbar, Allahumma haaza Minka Walaka ,haaza A’ni  بسم الله ، والله أكبر ، اللهم هذا منك ولك ، هذا عني

 

Tarjuma: Allah Ta’la kay naam say aur Allah bahot badaa hai, Aye Allah yeh teri jaanib say hi hai aur khaalis Teray hi liye hai, yeh meri taraf say hai.

 

Aur woh kisi doosray ki jaanib say qurbani zubah kar raha ho to usay kahna chahiye ke ye falan ki janib say hai aur yeh kahay:

 

Allahumma Taqabbal Min Falaan WaAl Falan, ya’ni aye Allah falan aur falan ki Aal ki janib say qubool farma.

 

Yeh yaad rahay ke usmein sirf bismillah padhna wajib hai aur baaqi alfaaz kahna mustahab hai. 

 

• Anas Razi Allahu Ta’la A’nhu se Riwayat kiya hai ke Nabi Kareem ﷺ ne apne haath se singhon waalay do siyah o safed mendhay jin mein safedi zyada thi apne haath se zubah kiye aur Bismillah, Allahu Akbar kaha aur apni taang unki gardan par rakhi .

 

(Sahih Bukhaari:5565,Sahih Muslim: 1966)

 

• A’yesha Razi Allahu Ta’la A’nha se bayan kiya hai kah: Nabi Kareem ﷺ ne ek singhon waala mendha lanay ka hukm diya taakay uski qurbani karen, Nabiﷺ ne Ayesha Razi Allahu Ta’la A’nha se farmaya: chhuri laao, phir farmaya isey patthar par tez karo Ayesha Razi Allahu Ta’la A’nha ne aisa hi kiya phir Nabi Kareem ﷺ ne wo chhuri layli aur mendhay ko pakad kar litaya aur usay zubah karte huye kaha: Bismillah, Aye Allah Mohammad aur Mohammad ﷺ ki Aal aur Ummat e Mohammadia ki janib se qubool farma phir usay zubah kardiya,

 

(Sahih Muslim:1967).

 

• Jabir Bin Abdullah Razi Allahu Ta’la A’nhu bayan karte hain kah: Main Eid gaah mein Eid ul Azha ke din Nabi Kareem ﷺ ke saath hazir tha, jab Nabi Kareem ﷺ khutba Eid se farigh huye aur apne mimbar se utray to ek mendhaa laaya gaya jisay Nabi Kareem ﷺ ne apne haath se zubah kiya aur kaha: Bismillah Wallahu Akbar yeh meri aur meri Ummat mein se uski jaanib se hai jisne qurbani nahi ki.

 

 (SananTirmazi:1521, Sahih)

 

 

• Aur baaz Riwayaat mein yeh alfaaz zyada hain: Allahumma Hazaa Minka Walika Tarjuma: Aey Allah yeh Teri taraf se hai aur khaalis Teray hi liye hai.

 

(Arwaa e Alghaleel:11381152)

 

 

Qurbani khana aur Taqseem karna:

 

Qurbani karne waalay ke liye qurbani ka gosht khana aur usay hadya dena aur sadqa karna mashroo hai uski daleel mandaraja zel Aayat hai:

 

• Allah subhanahuwataala ka farman hai: lehaza tum usmein se khud bhi khaao aur bhooke faqiron ko bhi khilaao

 

(Al Hajja:28)

 

 

• Aur ek doosre maqaam par kuch is tarah farmaya: Tum usmein se khud bhi khaao aur miskeen sawaal karnay aur na karnay waalay ko bhi khilao,isi tarah hamne chaupayon ko tumhare maatahat kardiya hai taakay tum shukr ada karo.

 

(Al Hajja:36) 

 

• Alqaane’ woh mohtaaj hai jo sawaal na kare (na maange),
• Almu’tar woh hai jisay baghair sawaal ke (bina maange ) ‘atya diya jaye.

 

• Salma bin Akwa’Razi Allahu Ta’a A’nhu bayan karte hain, Nabi Kareem ﷺ ne farmaya: khaao aur khilao aur zakheera bhi karo.

 

(Sahih Bukhaari:5569)

 

It’aam mein ghani logon ko hadya dayna aur fuqraa, masakeen par sadqa karna shaamil hai. 

 

• Ayesha Razi Allahu Ta’la A’nha bayan karti hain, Rasool Kareem ﷺ ne farmaya: khaao aur zakheera karo aur sadqa bhi karo.

 

(Sahih Muslim:1971) 

 

• Ulmaa rahimahum Allah ne khaanay aur logon ko hadiya denay aur sadqa karne ki miqdaar ke baaray mein ikhtelaaf kiya hai,ismein wus’at hai aur mukhtaar to yehi hai ke ek tihaaii khaaye aur ek tihaaii hadya karday aur ek tihaaii sadqa karay.

 

• Aur jiska khaana jaaiz hai uska zakheera karnaa bhi jaaiz hai chaahay woh bahot der tak bhi maujood rahay lekin shart yeh hai kah uska khaana muzir sehet na hojaye, lekin jab bhook o iflaas ‘aam ho jaaye to phir teen yaum say zyada zakheera karna jaaiz nahi hai

 

• Salma Bin Akwa’ Razi Allahu Ta’la ‘anhu bayan kartay hain ke Rasool Allahﷺ ne farmaya: jis ne bhi qurbani ki hai uske ghar mein teen din se zyada qurbaaani kaa ghosht nhi rahna chahiye.

 

(Sahih Bukhaari:5569)

 

• Uske ba’ad waala saal aaya to logon ne kaha, Aye Rasool Allahﷺ kya is saal bhi pichlay saal hi ki tarah karen? To Rasool Allahﷺ ne farmaya: khaao aur khilao aur zakheera karo kyunke us saal to tangi thi lehaza main ne chaha ke tum logon ko tangi mein ta’awun karo.

 

(Sahih Bukhaari:5569)

 

• Nafli ya waajib Qurbani ka gosht khanay aur sadqa karnay mein koi faraq nahi, naa hi us mein koi faraq hai ke woh zinda ki jaanib se ho ya faut shudgaan ki jaanib say ya phir kisi wasiyat ki wajah say ki gayi ho,kyunke jisay wasiyat ki gayi ho woh wasiyat karnay waalay kay qaayem muqaam hota hai,aur hadya bhi dayta hai aur sadqa bhi karta hai aur is liye bhi ke logon mein bhi yeh a’dat hai aur ‘urf mein jaari o saari hai aur joh ‘urf mein jaari ho woh lafzi mantuuq ki tarah hota hai.

 

• Lekin wakeel ko agar muakkil (ya’ni jis ne usay wakeel banaya hai) khanay aur hadya o sadqa karnay ki ijazat dayta hai ya phir us par koi qareena ya ‘urf dalaalat karta ho to wakeel ke liye aisa karna Sahih hai wagarna woh apne muakkil ke supurd karday, woh khud hi taqseem karta rahega.

 

• Qurbani mein se koi bhi cheez bechna haraam hai chaahay wo gosht ho ya koi aur cheez hatta ke khaal aur antriyan bhi bechna haraam hai aur isi tarah qasaaee ko bhi us mein say bataur muaweza kuch nahi diya jayega kyunke yeh bhi farokht ke ma’nii mein aata hai.

 

(Sahih Bukhaari:Sahih Muslim:1317)

 

Qurbani karne ka Waqt:

 

Qurbani karne ka waqt Eid ul azha ki Namaaz ke ba’ad shuru hota aur tera(13) Zilhajja ke din ghuroob Aaftaab ke waqt khatm hota hai, ya’ni qurbani zubah karne ke liye chaar yaum hain, ek din Eid waala aur teen uske ba’ad. Haan afzal yeh hai ke Namaz Eid ke ba’ad Qurbani jald ki jaaye jaisa ke Rasool Kareem ﷺ ka ‘amal tha aur phir eid waalay din woh sab se pehle apni qurbani ka gosht khatay.

 

• Bareeda Razi Allahu Ta’la A’nhu se hadees marwi hai keh: “Rasool Kareem ﷺ Eid Al-Fitr ke roz kuch kha kar Namaz Eid ke liye jaatay aur Eid ul azha ke roz Namaaz Eid kay ba’ad aakar apni qurbani ke gosht mein se khatay”.

 

(Masand Ahmed :22475,Sahih Nasab Alraaet:2/ 221).

 

• “Zaad Alma’ad” mein ibn Qayyim Rahimahullah kahtay hain:”Ali ibn Abi Taalib Razi Allahu auhn ka qaul hai: Ayyaam nahr ya’ni qurbani ke Ayyaam, yaum un nahr ya’ni Eid waala din aur uske ba’ad teen yaum hain.”

 

• Ahle Basra ke Imam Hassan aur Ahle Makkah ke Imam ‘Ataa bin Abi Rabah,aur Ahle Shaam ke Imam Alauzaaee rahimahullah aur fuqaha ke Imam Shaafa’e rahimahullah ka maslak yahi hai aur ibn Manzir RahimahuAllah ne bhi isay hi ikhtiyar kiya hai aur teen ayyaam is liye ke yeh Mina aur Rami Jamarat ke saath khaas hain aur yehi ayaam tashreeq hain aur inke rozay rakhna mana’ hai, chunanche yeh un ahkaam mein ek jaisay hain, to phir baghair kisi nas aur ijma’ ke zubah karne ke jawaaz mein farq kaise kiya jaa sakta hai.

 

• Aur do mukhtalif wujuhaat se Nabi Kareem ﷺ se marwi hai ke Aap ne farmaya: “Mina saare ka saara nahr karne ki jagah hai aur saare ke saare ayyaam tashreeq zubah karne ke din hain.”

 

 (Alsasalat Alsahih:2476,Zaad Alma’aad :2/319).

 

• Aur Shaikh ibn Usaimeen rahimahullah Mina mein qurbani karne ke waqt ke muta’liq kahtay hain:” Yaum un nahr waalay din Namaaz Eid ke ba’ad se lekar ayyaam tashreeq ke aakhri din ka sooraj ghuroob hone tak hai aur yeh aakhri din tera (13) Zilhajja ka hogaa ,to is tarah qurbani karne ke 4 din hain, ek din Eid waala aur 3 din uske baad. chunancha jis shakhs ne bhi Namaaz Eid se faarig hone se qabl hi qurbani karli, ya phir tera (13) Zilhajja ke ghuroob aftaab ke ba’ad zubah ki toh uski qurbani sahi nahi hogi…

 

• Lekin agar uske liye ayyaam tashreeq se taakhir mein koi ‘uzr pesh aajaye, maslan uski kotaahi ke baghair Qurbani ka Jaanwar bhaag jaaye aur woh waqt khatm hone ke ba’ad usay milay, ya phir usne kisi shakhs ko Qurbani karne ka wakeel banaya to wakeel Qurbani karna hi bhool gaya hatta ke waqt nikal jaaye, to ‘uzr aur Namaaz bhool jaane ya soye rahne waalay shakhs par qiyaas karte huye ke jab usay yaad aaye ya phir bedaar ho to namaaz ada kar lay, is qiyaas ki bina par waqt nikal jaanay ke ba’ad qurbani karne mein koi harj nahi.

 

• Aur un chaar ayyaam mein din ya raat ke kisi bhi waqt qurbani karna jaiz hai, lekin din ke waqt qurbani karna zyada behtar aur afzal hai aur har pahla din dusre din se afzal hai, kyun ke aisa karne mein neki aur bhalai aur khair mein jaldi karna hai.”

 

(Qurbani aur zubah ke Ahkaam: Shaikh ibn Usaimeen Rahimahullah)

 

 Aur mustaqil fatawi committee ke fataawa jaat mein hai: “Ahle Ilm ke sahih qaul ke mutabiq Hajj Tamattu’ aur Hajj Qiraan ki qurbani karne ke chaar din hain, ek eid waala din aur teen yaum uske ba’ad aur qurbani ka waqt chauthay roz ka sooraj ghuroob hone par khatm ho jaata hai.”

 

(Fataawi Liljanat Aldaayemat Lilbahoot Ala’lmeet Walaftaa:11/406).