279. Paani ki maujoodgi mein tayammum jaaiz nahi

Paani ki maujoodgi mein tayammum jaaiz nahi

[Sawaal]

Mein ek naujawaan hoon, Padhaai mein masroof hoon aur raat ko hone waale ehtilaam ki wajah se mushaqqat mein mubtala hoon, Kabhi tangi waqt aur kabhi sharmindgi ki wajah se fori taur par ghusl nahi kar sakta. Kabhi mein baahalaat-e-janaabat hi ba jama’at Namaz padh leta hoon aur phir munaasib waqt par ghusl kar ke Namaz dohra leta hoon aur kabhi paak mitti se tayammum karke aur phir Wuzu kar ke Namaz padh leta hoon aur us se dohrata bhi nahi hoon kyunke main ne yeh masla sun rakha hai ke agar koi dost kisi dost ke haan shab-e-basar kare, us se ehtilaam ho jaae aur us se khauf ho ke us se shak ki nigaah se dekha jaae ga to woh tayammum kar le. Aur kabhi kabhi mein subah ki Namaz ko mo’akkhar kar ke Zuhr ke saath adaa kar leta hoon taakeh asaani ke saath ghusl kar sakoon. In sooraton ke baare mein aap ki Kia raae?

[Jawab]

Brother! Aap ke liye yeh laazim hai ke ehtilaam hone par Namaz se pehle ghusl zaroor kar lein khuwah ehtilaam har raat ho kyunke us se ghusl waajib hai. Jab aap shehar mein hon aur paani bhi waafir miqdaar mein maujood ho to ghusl saaqit nahi hota aur na kisi ko tark-e-ghusl mein ma’zoor samjha jaae ga. Aur phir ab to Masjidon mein, Gharon mein aur bazaaron mein har jagah ghusl khaane maujood hone ki wajah se ghusl karne mein koi dushwaari nahi balkeh bohat asaani paida ho gai hai. lehaaza har haal mein aap ke liye ghusl karna laazim hai aur Deen ke hukm par ‘amal karne mein sharmaney ki zaroorat nahi hai.

Tayammum to sirf us soorat mein jaaiz hai jab paani maujood na ho jaisa ke Irshaad-e-Baari Ta’ala hai:

فَلَمۡ تَجِدُوۡا مَآءً فَتَيَمَّمُوۡا

(Al-Maa’idah 5 6)

“Agar paani na paao to tayammum karo.”

Us dost ka qissa hujjat nahi hai, Jis ne dost ke paas shab basar ki aur us se ehtilaam ho gaya aur us ne su-e-zani se bachne ke liye tayammum kar liya to yeh kisi ne apne ijtehaad se fatwa diya ho ga aur shaayad us ka ta’lluq kisi khaas haalat se ho ‘aam haalat par us se muntabiq nahi kiya jaa sakta lehaaza ghusl karna azbas zaroori hai, Qudrat ke baawajood us se Zuhr ya kisi aur waqt tak mu’akkhar karna bhi jaaiz nahi, Isi tarah paani ki maujoodgi mein tayammum karna bhi hargiz jaaiz nahi illa yeh ke bohat sakht sardi ho, Paani garam karne ka koi intizaam na ho aur thande paani se ghusl karne ki soorat mein mout ya kisi aur nuqsaan ke pohanchne ka andesha ho to us soorat mein tayammum ka jawaaz hai.

__Shaikh Ibn-e-Jibreen__