284. Mubaashirat se ghusl karne ki hikmat

Mubaashirat se ghusl karne ki hikmat

[Sawaal]

Biwi se mubaashirat karne ke ba’d ghusl mein Kia hikmat hai?

[Jawab]

Mubaashirat aur ehtilaam ki soorat mein ghusl karna waajib hai kyunke shariy’at ne hamein yeh hukm diya hai. Hikmat khuwah hamare saamne na bhi zaahir ho. Islami ta’leemat par ‘amal karna aur un ke saamne sar-e-itaa’at jhuka dena waajib hai. ‘Ulama ne is mein hikmatein aur maslhatein bayaan bhi ki hain maslan ek qawl yeh hai ke yeh chunke hadas-e-Akbar hai lehaaza is ki wajah se saare jism ka ghusl laazim hai jaisa ke hadas-e-Asghar ki soorat mein atraaf-e-badan ka dhona (Wuzu) laazim hai. Doosra qawl yeh hai ke mani ke khaarij hone se chunke kamzori aur susti laahaq hoti hai lehaaza quwwat-o-nashaat ke husool ke liye ghusl ko laazim qaraar diya gaya hai aur tajurba Shaahid hai ke ghusl karne se quwwat-o-nishaat haasil hoti hai jab ke tark-e-ghusl se kamzori aur kayi nafsiyaati beemariyaan paida hoti hain.

__Shaikh Ibn-e-Jibreen__