285. Jumbi ka ghusl karne se pehle sona

Jumbi ka ghusl karne se pehle sona

[Sawaal]

Main ne mubaashirat ki aur phir so gaya to mujh se kaha gaya ke mubaashirat karne waale ke liye zaroori hai ke agar woh sone ya khaane ka iraada kare to kam az kam Wuzu zaroor kare jab ke ba’az deegar logon ne kaha ke yeh waajib nahi balkeh mustahab hai lehaaza is masla mein fatwa farmaaiye. Jazakum Allah khairan.

[Jawab]

Jumbi ke liye masnoon yeh hai ke woh sone, khaane ya dobaraah mubaashirat karne ke liye sharamgaah ko dho kar Wuzu kare lekin yeh zaroori nahi hai. Albatta sone ke silsila mein is ki takeed bohat aai hai. Hadees se saabit hai Hazrat ‘Umar رَضِيَ اللَّهُ عَنْهُ ne kaha ya Rasoolullah! Kia hum mein se koi bhi haalat-e-janaabat mein so sakta hai? Aap (ﷺ) ne farmaaya “Haan jab woh Wuzu kare.” Lekin agar koi sone se pehle Wuzu ya ghusl na kare to koi gunaah nahi ho ga kyunke Hadees se yeh saabit hai ke Rasoolullah (ﷺ) kabhi kabhi haalat-e-janaabat mein paani ko chuwe baghair hi so jaaya karte the. lehaaza janaabat ki haalat mein sone se pehle Wuzu kar lena chaahiye aur agar na kiya jaae to gunaah nahi. Wuzu kar lene se janaabat mein takhfeef ho jaati hai aur agar sone se pehle ghusl kar liya jaae to yeh afzal hai. Wallahu A’lam

__Shaikh Ibn-e-Jibreen__