372. Masjid se muttasil sadkon par bhi Namaz jaaiz hai

Masjid se muttasil sadkon par bhi Namaz jaaiz hai

[Sawaal]

Masjid ke shar’i taur par mu’tabir hadood Kia hain? Kia Masjid ke saath muttasil sadkon ko bhi Masjid ke taab’a shumaar kiya jaae ga? Aur agar logon ki kasrat ki wajah se Masjid mein jagah na ho to Kia sadkon par Namaz-e-Jumm’a adaa ki jaa sakti hai? Halaanke shehar mein aur bhi Masjidein hain jo Namaaziyon se bhaari nahi hotin?

[Jawab]

Us Masjid ke hadood jis se is liye banaaya gaya ho ke musalmaan us mein Namaz-e-panjgaana ba jama’at adaa karen, Wahi hain jin ka ihaata us ki ‘imaarat Ya lakdi ya khajoor ki shaakhon ya sarkandon waghaira se kiya gaya ho, Us ka hukm Masjid ka ho ga aur us mein haaiza nifaas waali ‘Aurat aur jumbi ke liye thehrna mamn’o hai. Jo shakhs Masjid mein aae Masjid Namaaziyon se khacha khach bhari ho aur us mein jagah na ho to ba’ad mein aane waale us shakhs ke liye yeh jaaiz hai ke woh Namaz-e-Jumm’a aur deegar faraaiz-o-nawaafil Masjid se baahir qareeb tareen jagah mein Masjid ke saath muttasil sadak waghaira par adaa kare. Zaroorat ki wajah se aisa jaaiz hai basharteke woh apni Namaz ko Imaam ki Namaz ke saath munzabit rakh sakta ho aur Imaam ke aage na khada ho lekin un raaston aur sadkon waghaira ka hukm Masjid ka nahi ho ga. Wallahu A’lam

__Fatwa-e-committee__