390. Namaz mein ‘adam-e-khush’o ka ‘ilaaj

Namaz mein ‘adam-e-khush’o ka ‘ilaaj

[Sawaal]

Hum Namaz mein khush’oo ke baare mein bohat kuch sunte hain aur mein yeh chaahta bhi hoon ke khush’oo-o-khuz’oo se Namaz adaa karoon lekin yeh baat jald khatam ho jaati hai aur phir se dobaraah waswase mujhe gher lete hain to is ka Kia ‘ilaaj hai? (Jazakum Allah Khairan)

[Jawab]

Namaz khoob tawajjuh aur hazoor-e-qalab ke saath padhne ki koshish karen, Jo aap zabaan se keh rahe ya Imaam se sun rahe hon, Us par ghour karen aur us ke ma’ani ko samajhne ki koshish karen aur waswasa aur Hadees-e-nafs ke bajaae dil ko ghour-o-fikar mein masroof rakhen Isi tarah Namaz ke af’aal Harkaat aur un ki hikmat par ghour karen to yeh baatein aap ko waswason se bachayein gi lekin agar koi khaarji ghour-o-fikar ghaalib aa jaae to is mein koi gunaah nahi hai kyunke yeh insaani tabiyat ka taqaaza hai aur Isi wajah se sajdag-e-Sahav ka hukm diya gaya hai. (Ke agar Namaz mein waswason ki wajah se ya bhoolne ki wajah se koi kami beshi ho jaae to sajdah-e-Sahav kar liya jaae is se us ki talaafi ho jaae gi)

__Shaikh Ibn-e-Jibreen__