399. Namaz ko tod dena

Namaz ko tod dena

[Sawaal]

Jab main bhool kar aise kapde mein Namaz shur’u kar doon jo napaak ho aur yeh mujhe Namaz mein yaad aae to Kia yeh jaaiz hai ke mein Namaz tod kar libaas tabdeel kar loon? Aur woh kon se halaat hain jin mein aadmi ke liye Namaz ko tod dena jaaiz hai?

[Jawab]

Jo shakhs is haalat mein Namaz padhe ke us ke kapde waghaira napaak hon aur us se is ka ‘ilm bhi ho to us ki Namaz baatil ho jaati hai agar us se is ka ‘ilm nahi hai aur us ne poori Namaz adaa kar li to us ki Namaz sahih ho gi us se dobaraah padhna laazim na ho ga.

Agar Namaz ke dauraan is ka ‘ilm ho aur jaldi se us ka azaala mumkin ho to us se zaail karde aur apni Namaz ko jaari rakhte hue mukammal kar le jaisa ke Nabi (ﷺ) se yeh saabit hai ke aap ne ek martaba Namaz padhte hue na’leen utaar diye the jab ke Jibreel عليه السلام ne aap ko bataaya ke woh saaf nahi hain lekin aap ne un na’aleen mein adaa kiye hue Namaz ke ibtidaai hissa ko baatil nahi kiya tha, Isi tarah agar sar par ‘amaama ho aur woh napaak ho to us se bhi foran utaar de aur Namaz ko jaari rakhte hue mukammal kar le aur agar napaak kapde waghaira ki tabdeeli ke liye ‘amal ki zaroorat ho maslan yeh ke qamees ya shalwaar waghaira ko utaarna pade to phir us se utaar kar az sar-e-nau Namaz shur’u kare, Isi tarah agar us se yaad aae ke woh be Wuzu hai ya Namaz mein be Wuzu ho jaae ya hansne ki wajah se us ne Namaz ko baatil kar liya ho to us se Namaz tod kar dobaraah padhni ho gi.

__Shaikh Ibn-e-Jibreen__