413. Masjidon mein bachon ki Namaz

Masjidon mein bachon ki Namaz

[Sawaal]

Kia das saal se kam ‘Umar ke bachhe saf ke darmiyaan mein khade ho sakte hain jabke unhon ne choti shalwaarein aur teen chaar saal ki ‘Umar ke bachon ne nikar pehn rakhi hon?Kia Imaam ke liye ek chaadar mein Namaz padhana jaaiz hai?

[Jawab]

Samajhdar aur basha’oor bachhe ke liye saf ke darmiyaan mein khade ho kar Namaz adaa karna jaaiz hai. basharteke us se Masjid aur Namaaziyon ke ehtiraam ke baare mein ta’leem di gai aur adab sikhaaya gaya ho Nez woh ‘abas kaam na kare aur tahaarat-e-kaamila ka iltizam lekin afzal yeh hai ke bachon ki saf mardon ki saf se peeche ho haan albatta agar un ke yakja khade hone ki soorat mein yeh andesha ho ke woh khelen ge aur hansen ge, Jis se Namaaziyon ko pareshaani ho gi to phir unhein alag alag karke khada karna waajib hai. Jo bachhe abhi sun-e-tameez ko na pohanche hon unhein Namaz aur khutba ke waqt Masjid mein daakhil na kiya jaae kyunke woh Masjid ke ehtiraam se aagah nahi hain.

Imaam waghaira ke liye ek hi kapde mein Namaz padhne mein koi harj nahi basharteke is se satar poshi ke taqaaze poore hote hon lekin afzal yeh hai ke aadmi neeche izaar ya shalwaar pehn le taakeh woh be pardagi se mehfooz ho jaae.