431. Muqtadi ko Imaam ki mutaabi’at karni chaahiye

Muqtadi ko Imaam ki mutaabi’at karni chaahiye

[Sawaal]

Ek shakhs jo Imaam ke peeche Namaz padh raha hai, Imaam Aayat-e-sajdah ki tilaawat karta hai lekin sajdah nahi karta to Kia us shakhs ke liye sajdah karna jaaiz hai? Aur agar woh sajdah kare to kese kare jab ke us se yeh ma’loom hai ke woh Imaam ki mukhaalifat kar raha hai?

[Jawab]

Muqtadi ke liye Namaz ke tamaam af’aal mein Imaam ki mutaabi’at laazim hai lehaaza agar Imaam sajdah-e-tilaawat kare to muqtadi bhi kare aur agar Imaam na kare to muqtadi bhi na kare aur yeh jaaiz nahi ke Imaam to qira’at mein masroof ho aur muqtadi apne taur par akela hi sajdah-e-tilaawat kare, Yeh masla hai jab Namaz jahri ho aur Namaz agar siri ho maslan Zuhr-o-‘Asar to is mein Imaam-o-muqtadi ke liye Aayat-e-sajdah ki tilaawat makrooh hai lehaaza agar koi is Aayat ko padh le to woh sajdah-e-tilaawat na kare khuwaah woh Imaam ho ya muqtadi kyunke sajdah karne ki wajah se deegar Namaaziyon ko tashweesh laahaq ho gi lehaaza is soorat mein woh salaam pherne ke ba’d sajdah kare. Agar Imaam ne jahri Namaz mein Aayat-e-sajdah ki tilaawat ki aur Imaam ne sajdah kiya lekin muqtadi ne na kiya to is soorat mein agar woh jaahil hai ke us se Aayat-e-sajdah ka ‘ilm nahi ya yeh ‘ilm nahi ke is Aayat ko padh kar ya sun kar sajdah karna laazim hai to woh is jahaalat ki wajah se ma’zoor hai aur agar woh yeh jaanta hai aur is ke bawajood sajdah nahi karta to us ki Namaz baatil hai aur us se yeh Namaz dobaraah padhni ho gi. Wallahu A’lam

__Shaikh Ibn-e-Jibreen__