432. Masjid ke sutoonon ke darmiyaan Namaz

Masjid ke sutoonon ke darmiyaan Namaz

[Sawaal]

Jab Masjid mein Namaaziyon ki kasrat ho to Kia Masjid ke sutoonon ke saath jama’at ki sif mein faasla aa jaana jaaiz hai?

[Jawab]

Laaraib , Afzal yeh hai ke safen baaham dagar mili hon, Musalsal hon aur door na hon ke Sunnat yehi hai. Nabi Kareem (ﷺ) ka yehi hukm hai ke safen khoob mili hoi hon aur un mein khalal na ho. (1) Hazraat Sahaaba Karaam رضي الله عنه‍م sutoonon ke darmiyaan safen banaane se bachte the kyunke is tarah sif ka ek hissa doosre se alag ho jaata hai lekin agar zaroorat-o-haajat dar pesh ho jaisa ke sawaal mein mazkoor hai ke agar Masjid Namaaziyon se bhari hoi ho to phir is haalat mein sutoonon ke darmiyaan safen banaane mein koi harj nahi kyunke dar pesh umoor ke liye khaas ahkaam hote hain aur zarooraton aur haajaton ke liye woh ahkaam hote hain, Jo un ke mutaabiq hon.

(1) Safon ko durust karne ke baare mein beshumaar riwayaat hain chand ke hawaale mazkoor hain. Sahih Bukhari’ Kitaab Al-Azaan’ Baab iqaamat Al-Sif min Tamaam As-Salaat’ H: 723-O-Muslim’ Kitaab Al-Salaat’ Baab Taswiyat Al-Safoof’ H: 433-Abu Dawood’ Abwaab Al-Safoof baab Taswiyat Al-Safoof’ H’ 667′ Iss se Imaam Ibn-e-Habaan aur Ibn-e-Khuzaima ne sahih kaha hai.

__Shaikh Ibn-e-‘Usaymeen__