458. Mein Kia karoon?

Mein Kia karoon?

[Sawaal]

Agar kuch log musaafir hon aur woh Maghrib-o-‘Isha ki Namaazein jam’a kar ke padh rahe hon aur un mein ek aisa aadmi aa kar shaamil ho jaae jis ki pehli Namaz Faut ho gai ho lekin log doosri Namaz padh rahe hon aur us se yeh ma’loom na ho ke woh kon si Namaz padh rahe hain to us ke liye Kia hukm hai? Kia intezaar kare hatta ke log faarigh ho jaaein aur phir yeh un se pooche ya Kia kare?

[Jawab]

Soorat-e-mazkoora mein agar saail ko yeh ma’loom ho ke woh doosri Namaz padh rahe hain aur us doosri Namaz ke waqt ke khatam hone ka andesha ho to woh doosri Namaz hi ki niyyat kar ke un logon ke saath shaamil ho jaae taake us se to waqt par adaa kar sake aur us se faarigh ho kar phir pehli Namaz padh le aur is tarah us ne hasb-e-istata’at Allah Ta’ala ke hukm ki baja aawri kar li aur agar woh pehli Namaz ki niyyat kar ke daakhil hoa lekin ma’loom hoa ke yeh to doosri Namaz padh rahe hain to us ki yeh pehli Namaz hi ho gi. Agar woh ek raka’at padh chuka hai to yeh Imaam ke saath doosri raka’at padhe ga aur Imaam ke itteb’a ki wajah se us ke saath tashahhud mein bhi bethe ga aur jab Imaam salaam pher de ga to yeh khade ho kar ek raka’at aur padhe ga phir pehla tashahhud bethe ga. Phir teesri raka’at padhe ga. Phir tashahhud ke ba’d salaam pher de ga aur phir ‘Ishaa ki Namaz padhe ga. Aur agar yeh pehli raka’at hi mein shaamil ho jaae to Imaam ke (‘Ishaa ki do raka’at Namaz qasar se) salaam pherne ke ba’d (Maghrib ki) teesri raka’at padhe ga. tashahhud ke ba’d salaam pher de ga aur phir Namaz-e-‘Ishaa padhe ga.

__Fatwa-e-committee__