558. Kia Imaam ko dekhna waajib hai?

Kia Imaam ko dekhna waajib hai?

[Sawaal]

Hamari Masjid ke shumaali jaanib ek qata’a-e-zameen hai, Jo Masjid se mulhaq hai aur us ki chaar dewaari bani hoi hai. Hum us zameen ko ‘Aurton ke liye makhsoos kar dena chaahte hain taake woh Ramzan mein yahan Namaz adaa kar sakein, To Kia yeh jaaiz hai jab ke woh yahan Namaz padhte hue Imaam ko na dekh saken gi balkeh sirf loudspeaker hi se Imaam ki mutaabi’at kar saken gi?

[Jawab]

Is mazkoora-e-zameen mein un ki Namaz ki sehat ke baare mein ‘Ulama mein ikhtilaaf hai, Jahan se woh na Imaam ko dekh saken aur na muqtadiyon ko balkeh sirf takbeer ki awaaz sun saken.Un ke liye ziyaada ehtiyaat is mein hai ke mazkoora jagah Namaz adaa na karen balkeh apne ghar mein Namaz adaa karen illa yeh ke Masjid mein unhein Namaaziyon ke peeche koi jagah mil jaae ya koi aisi jagah ho jahan se woh Imaam ya kuch muqtadiyon ko dekh saken to wahan Namaz adaa kar len.

__Shaikh Ibn-e-Baaz__