611. aise Imaam ke peeche Namaz jo qira’at achi na karta ho

aise Imaam ke peeche Namaz jo qira’at achi na karta ho

[Sawaal]

Fazeelat-ul-Shaikh ki us Imaam ke baare mein Kia raae hai, Jo qira’at achi nahi karta? Kia us ke peeche Namaz jaaiz hai? Yaad rahe hamari basti mein is se achi qira’at karne waala aur koi nahi hai haan albatta ayyaam-e-ta’atilaat mein talba jab apne gharon mein wapas aate hain to woh yaqeenan is se achi qira’at karte hain lekin yeh us Masjid ke mustaqil Imaam hain. Yahan qareeb hi tehfeez-ul-Qur’an ka ek Madarsa bhi hai lehaaza main ne kayi daf’a un se kaha hai ke us Madarsa mein qira’at seekh lo lekin unhon ne meri baat par ‘amal nahi kiya, To umeed hai is masla mein rehnumaai farmaaein ge?

[Jawab]

Agar yeh Imaam qira’at mein aisi ghalti nahi karte ke jis se ma’ani mein tabdeeli aajaati ho, to phir un ke peeche Namaz adaa karne mein koi harj nahi. Maslan agar yeh (الْحَمْدُ لِلَّهِ رَبِّ الْعَالَمِينَ) Mein Rabb ki baa ko mansoob padh lein ya Al-Rehman Al-Rahim mein “Noon” ko mansoob padh lein ya us se mazmoom padh lein, To yeh ghalti nuqsaan-daah nahi hai lekin agar yeh qira’at mein aisi ghalti karen jis se ma’ani mein tabdeeli aa jaae to us ghalti ko un ke saamne waazeh kiya jaae, Us se sikhaaya jaae aur poori poori tawajjuh dilaai jaae taa ke un ki qira’at sahih ho jaae aur agar padhte hue is tarah ki ghalti kar bethen to dauraan-e-Namaz hi us ki tasheeh kar di jaae, Nez Madarsa tehfeez-ul-Qur’an mein daakhila ki targheeb di jaae shaayad is se hi unhein Qur’an-e-Majeed sahih taur par padhna aa jaae. Wallah Al-Musta’aan

__Shaikh Ibn-e-Baaz__