Imaam Hakim (رحمتہ اللہ)

(933AD/321H – 1014AD/405H)

NAAM AUR NASAB:

▶ Apka naam Muhammad bin Abd-Allah bin Muhammad bin Hamdviyah bin Nayeem bin Haakim hai aur aap ki kunniyat “Abu Abd-Allah” hai.

PAIDAISH: 

▶ Imaam Hakim ؒ peer ke din, 13 Rabiul Awwal, 321 Hijri mein “Nishapur” mein paida hue.

▶ 330 Hijri mein unhone apne walid aur maamu ki khaas tawajjo aur tarbiyat ke nateeje mein ahaadees ke sama’ ka aaghaaz kiya.

▶ 334 Hijri mein, jab unki umr sirf 13 baras thi, us waqt ke shaykh Abu Hatim bin Hibban ki ahaadees ko imla karna shuru kiya.

▶ Unhone Khurasan, Iraq aur Mavra Al-Nahar (Transoxiana) ki buland martaba asaanid ka ilm hasil kiya.

▶ Imaam Hakim ؒ ne 2000 ke kareeb mashaikh se ahadees ka sama’ kiya tha.

▶ Imaam Hakim ؒ ne sirf Nishapur mein 1000 mashaikh se ahadees ka sama’ kiya tha.

▶ Jab Imaam Hakim ؒ 20 baras ke hue to unho ne ilm e Hadees ke husool ke liye Iraq ka safar iqhtiyar kiya.

▶ Jab Imaam Hakim ؒ Iraq pahunche to us waqt wahan ke sab se jaleel ul qadar muhaddis “Ismail Safaar” ka inteqal hue zyada arsa nahi hua tha.

▶ Imaam Hakim ؒ ne darjazel hazraat se ahadees ka sama’ kiya hai.

▶ Aap ke walid Abd-Allah bin Muhammad ؒ  (unho ne “Sahih Muslim” ke moallif Imaam Muslim ؒ ki ziyarat ki hai).

Imaam Hakim ؒ ko akabir Ahle ilm ne zabardast khiraaj tehseen pesh kiya hai.

• Shaykh Abu Abd-Ar Rahman Salmi ؒ farmaate hai, mai ne Imaam Dar-Qatniؒ se daryaft kiya. Shaykh Ibn Mundah ؒ aur Shaykh ibn Ba’y ؒ (yaani Imaam Hakim ؒ) dono mein se kaun bada hafiz hai? To unho ne jawab diya : Ibn Al-Ba’yؒ (yaani Imaam Hakim ؒ) mustanad hafiz hai.

• Shaykh Abu hazim ؒ bayan karte hai, mai 30 baras tak Shaykh Abu Abd-Allah Asami ؒ ke pas raha hun. Mai ne apne mashaikh mein unse zyada paaye ka aalim nahi dekha lekin jab unhe bhi koi mushkil darpesh hoti to wo mujhe ye hidayat karte the ke mai iske baare mein Imaam Hakim ؒ ko khat likhun aur jab Imaam Hakim ؒ ka jawabi khat aata to Shaykh Asami ؒ us ke mutabiq fatwa dete aur Imaam Hakim ؒ ki raay ko durust samajhte the.

TASANEEF:

Imaam Hakim ؒ ne darjazel kutub yaadgaar chhodi hai:

• Al-Mustadrak `alâ al-Sahîhayn (jo is waqt apke haathon mein hai)
• Târîkh Nishapur
• Al-Iklîl
• Al-Madkhal ilâ `Ilm al-Sahîh
• Tarâjim al-Shuyûkh
• Fadâ’il al-Shâfi`î
• Fawâ’id

WAFFAT:

▶ Imaam Hakim ؒ ka inteqal budh ke din 3 Safar al-Muzaffar 405 hijri mein hua.

Qadhi Abu Bakr al-Hiri ؒ ne unki namaze janaza padhai.

▶ Shaykh Hasan ibn Ash`ath al-Qurashî ؒ bayan karte hai (Imaam Hakim ؒ ke inteqal ke baad) mai ne Imaam Hakim ؒ ko khwab mein ghode per sawar dekha. Un ki haalat bahut achi thi aur wo yeh farma rahe the: Mujhe nijaat naseeb hogayi.

Qurashî ؒ kehte hai, mai ne daryaft kiya:

Aye Hakim! Wo kis wajah se? To unho ne jawab diya: Ahadees likhne ki wajah se.

REFERENCE:

“Mustadrak Ala Sahiheen” (Urdu)

“Shaikh Al Hafiz Abu Fazil Mohammad Shafiq ur Rahman Al Qadri Al Razvi”