Hazrat Noumaan Bin Muqarrin Al Muzani رضی اللہ عنہ

Baaz gharaane imaan ka gehwaara hote hain aur baaz khandan nifaq ki aamajgaah, Bila-shubaa Banno Muqrrin ka gharaana imaan ka gehwaara hai

Irshaad: Abdullah Bin Maso’od

Qabeela Muzaina ne apni qiyaam gaahein Madinah Tayyiba ke qareeb hi is sadak par bana rakhi theen jo Madinah Tayyiba se Makkah  Muazzama ki taraf jati thi, Rasool-e- Akram (ﷺ) hijrat kar kay Madinah Munawwara tashreef le aaye thay, Qabeela Muzaina ke paas anay jane walon ki wasaatat se Rasool-e-Akram (ﷺ) ke muta’aliq khush aaind khabrain pounchanay lagein.

Aik shaam qoum ke sardaar Hazrat Nouman Bin Muqarrin Muzani apne bhaaiyon aur qabeeley ke buzurgon ke paas baithey aur sab ko mukhatib kar ke irshaad farmaya:

“Meri qoum! ba-khudaa hamein Hazrat Mohammad (ﷺ) ke muta’aliq umdah aur behtar khabrain hi ma’aloom huien, Aap ki daawat rahmat, Ahsaan aur Adal-o-Insaaf par mushtamil hai, Kitney ta’ajjub ki baat hai ke hum peechay rehtay jaa rahay hain aur log Aap ki daawat qubool karne ke liye Aap ki taraf sarpat doday jaa rahay hain aur sath hi farmanay lagey:

Mein to pukhtaa iraadah kar chuka hon ke subah Huzoor (ﷺ) ki Khidmat-e- Aqdas mein haazri ke liye rawaana ho jaoon ga, Aap mein se jo shakhs mere sath jana chahay woh taiyaar ho jaye, “Nouman ki baatein Ahal-e-Majlis ke dilon mein utar gaien.

Subah hui to aap kiya dekhte hain ke aap ke das(10) bhai aur qabeela Muzaina  ke chaar so (400) shehsawaar aap ke hamrah Madinah Tayyiba jane ke liye tayyaar hain taa’kay Nabbi Akram (ﷺ)  ki ziyaarat aur Deen-e-Ilaahi ko qubool karne ki Sa’adat haasil kar sakein.

Hazrat Nouman رضی اللہ عنہ ke dil mein khaiyaal aaya ke khaali haath jana munaasib nahi, Nabi-e- Akram (ﷺ) aur Muslmaan bhaiyon  ke liye kuch tahaaif zaroor sath le jane chahien, Lekin qaht saali ki bina par gharon mein farawaani nah rahi thi.

 Hazrat Noman رضی اللہ عنہ apne aur tamaam bhaiyon ke ghar chakkar lagaya aur jo kuch haath laga apne sath le liya aur khandan ke jumla ahbaab ko apne sath le kar sooye Madinah rawanaa ho gaye.

Huzoor (ﷺ)  ki bargaah mein pahonch kar tamaam tahaaif aap ki khidmat mein paish kar diye,  Aap aur aap ke tamaam rufqaa Huzoor (ﷺ)  ke roo-baroo Halqaa-e- Bagosh-e-Islaam ho gaye.

---

Un ke imaan laane se Madinah Tayyiba ke aik konay se le kar dosray konay tak musalmanoon ke gharon mein khushi ki lehar daur gayi, Kiyun keh is se pehlay koi aisi misaal nahi millti ke aik gharaane se das (10) haqeeqi bhaiyon aur chaar so (400) shehsawaaron ne baik waqat islaam qubool kiya ho.

Hazrat Noman رضی اللہ عنہ ke Halqa-e-Bagosh-e-Islaam honay se Rasool-e-Akram (ﷺ)  ko bhi be intahaa musarrat hui.

Allah Subhana wa Ta’alaa ne is wafad ke tahaaif  ko bhi Sharf-e-Qabooliyat bakhshaa aur Qura’ani aayaat naazil farmaein:

وَمِنَ الْاَعْرَابِ مَنْ يُّؤْمِنُ بِاللّٰهِ وَالْيَوْمِ الْاٰخِرِ وَيَتَّخِذُ مَا يُنْفِقُ قُرُبٰتٍ عِنْدَ اللّٰهِ وَصَلَوٰتِ الرَّسُوْلِ ۭ اَلَآ اِنَّهَا قُرْبَةٌ لَّھُمْ  ۭ سَـيُدْخِلُھُمُ اللّٰهُ فِيْ رَحْمَتِهٖ  ۭ اِنَّ اللّٰهَ غَفُوْرٌ رَّحِيْمٌ      

(Al-toubaa 99)

“Aur baddoiyon mein kuch log aisay bhi hain jo Allah aur Roz-e-Akhirat par imaan rakhtay hain aur jo kuch kharch karte hain usay Allah ke haan taqarub ka aur Rasool (ﷺ) ki taraf se rahmat ki dua’aien lainay ka zar’iya banatay hain haan! woh zaroor un ke liye taqarrub ka zari’ya hai aur Allah zaroor un ko apni rahmat mein daakhil kere ga yaqeenan Allah dar guzar karne wala aur raham farmanay wala hai .”

---

Hazrat No’uman Bin Muqarrin رضی اللہ عنہ ne Rasool Allah (ﷺ) ke  jhanday talay aa kar tamaam ghazwaat mein poori bahaduri aur jawaanmardi se  hissa liya.

Siddiq-e-Akbar رضی اللہ عنہ ke daur khilaafat mein Hazrat Nou’man رضی اللہ عنہ aur un ki poori qoum bano  Muzaina ne Fitnah-e-Irtidaad ko dabanay ke liye bhar poor kirdaar adaa kiya.

---

Hazrat Farooq-e-Azam رضی اللہ عنہ ke Daur-e-Khilaafat mein to Hazrat No’uman رضی اللہ عنہ ne woh Kaar-haa-e-Numaiyaan sir injaam diye ke Tareekh-e-Islaam mein jinhein qabil sataish haisiyat haasil rahay gi.

---

Jung-e-Qadsiyah se pehlay sipahsalaar Lashkar-e-Islam Hazrat Sa’ad Bin Abbi Waqas رضی اللہ عنہ ne Hazrat No’uman Bin Muqarrin رضی اللہ عنہ ki qayaadat mein Shah-e-Iran ki taraf aik wafad bheja taakeh woh is ke samnay islaam ki da’awat paish kere, Jab yeh wafad Iran ke Dar-ul-Hukoomat pouncha aur Shah-e-Iran se milnay ki ei’jaazat talabb ki to usay ijazat day di gayi. Aur aik tarjumaan ko bhi bulaaya gaya.

Shah-e-Iran ne tarjumaan ko hukum diya: In se poocho keh yahaan kiyun aaye ho? Ham se kiyun jung karna chahtay ho? Tumhen  kisi lalach ne ghair rakha hai? Ya hamari be parwaahi ki bina par tumhen yeh jurrat hui?

Yeh baat sun kar Hazrat Nou’man Bin Muqarrin ne apne saathiyon se mukhaatib ho kar farmaaya:  Shah-e-Iran ki baat ka jawaab mein doun ya tum mein se koi jawaab dainay ka iradaah rakhta hai?

Sab ne kaha: Aap hi is se baat kijiye, Phir sab ne yak zubaan ho kar Shah-e-Iran se kaha: Yahi hamaari tarjumaani karein ge,  In ki baatein zarraa ghor se suno!

Hazrat Nou’man رضی اللہ عنہ ne Hamd-o-Salaat ke ba’ad irshaad farmaaya: Allah Subhana Wa Ta’ala ne hum par bohat bada karam kiya ke hamaari taraf apna Rasool (ﷺ) bheja jo hamein naiki ka hukum detaa hai aur har qisam ke shar se baaz rehne ki talqeen karta hai, Aur unhon ne hum se yeh waada kiya hai ke agar hum un ki da’awat qubool kar letay hain to Allah Ta’alaa Duniyaa-o-Aakhirat ki bhalai se sarfraaz farmaaye ga.

Thoday hi arsay mein Allah Ta’ala ne hamaari tangi ko faraakhi mein, Hamaari zillat ko izzat mein aur hamaari adaawat ko ukhuwwat mein badal diya, Unhon ne hamein yeh hukum diya hai ke hum logon ko is Khair-o-Barkat ki taraf da’awat den aur apne hamsaaiyon se is ka aaghaz karein.

Hum tumhen Daaira-e-Islaam mein daakhil honay ki da’awat dete hain, Yeh aik aisa nazriya haiyaat hai jis ne har naiki ke kaam ko Ba-nazar-e-Istehsaan dekha aur is ki targheeb dilaai aur har qisam ki buraai ko bura girdaana aur is se bachney ki talqeen ki aur yeh apne maanny walon ko kufar ki athaah gehraaiyon se nikaal kar Noor-e-Imaan ki bulandiyon tak pounchaa detaa hai.

Agar tum islaam qubool kar lo ge to hum tumahray paas Allah ki kitaab chod jayein ge, Tum us ke ahkaam ke mutaabiq Nizaam-e-Hukoomat ko ustawaar karna. Ham tumahray kisi mua’mlay mein mudakhlat nahi karein ge.

Agar tum ne Deen-e-Ilaahi ko qubool karne se inkaar kar diya to phir hum tum se jaziya wusool karein ge aur tumhari hifaazat ki zimma daari hum par hogi lekin agar tum ne jaziya dainay se inkaar kar diya to hamari tum se jung hogi.

Shah-e-Iran Hazrat No’man رضی اللہ عنہ ki yeh baatein sun kar mushta’il ho gaya aur kehnay laga: Meri nazar mein rooye zameen par tum se ziyadaa bad bakhat, Puragandah Haal-o-Kamtar koi aur qoum nah hogi.

Hum tumhara ma’amla sarhadi hukmaraanon ke supurd kar dein ge, Woh tumhe hamara mute’e banaein ge.

Phir gussa zara naram huwa to kehnay laga:

Agar kisi zaroorat ne tumhen hamaray paas anay par majboor kiya hai to hum tumhen itna ghalla dein ge jis se tumahray gharon mein khush-haali aa jaye gi, Is ke i’lawa tumhen aur tumahray sardaaron ko umdaah libaas bhi muhaiyya karein ge, Aur apni taraf se tum par aik aisa hukmaraan bhi muqarrar karein ge jo tumahray sath Husan-e-Sulook se paish aaye ga.

Yeh baatein sun kar wafad ke aik rukan ne Shah-e-Iran ko khoob khoob sunaain jis se ghusse ki aag phir bhadak uthi aur ghazab-naak andaaz mein kehnay laga: Agar qasidon ke tahaffuz ka bain-ul-Aqwami muhaaida nah hota to aaj mein tumhe qatal kar deta.

Meri aankhon se door ho jao mere paas tumahray liye kuch nahi. Apne salaar ko jaa kar bataa dena ke mein tumhari taraf Rustam ko bhejoon ga, Woh tumahray sardaar aur tumhen aik sath qadsiyah ki khundaq mein dafan kar day ga, Phir is ne matti ka aik thailaa mangwaya, Aur apne kaarindon ko hukum diya ke yeh thailaa in mein se is shakhs ke sir par rakhna jo ziyada mu’azaz samjhaa jata hai, Aur tamaam logon ke samnay usay haank kar Daar-ul-Hukoomat se nikaal do.

Darbaariyon ne wafad se poocha: Tum mein sab se ziyada Muazaz kon hai?

Hazrat Asim Bin Umiar agay badhay aur farmaaya: “Mein.”

To unhon ne us par matti ka thailaa laad diya , Aur woh isi haalat mein Daar-ul-Hukoomt Madaayin se niklay. Shehar se bahir aa kar woh matti ka thailaa unhon ne apni uontni par laad diya aur usay Hazrat Sa’ad Bin Abbi Waqas رضی اللہ عنہ ke paas le aaye aur yeh khush-khabri di ke Allah Ta’alaa musalmanoon ke liye Iran ko fatah kar day ga aur inhen Sarzameen-e-Faris ka maalik bana de ga,  Kuch arsay ba’ad jung qaadsiyah ka waqi’yaa paish aaya aur qaadsiyah ki khandaq hazaaron laashon se bhar gayi, Lekin yeh lashain musalmanoon ki nahi thein, Balkeh yeh Irani lashkar ki thein.

---

Iraaniyon ne qaadsiyah ki shikast se hoslaa nah haara balkeh az sir nou afraad ko jama kiya aur lashkar ko tarteeb diya yahan tak ke aik laakh pachaas hazaar (1,50,000) tajurbah kaar jangju ikathay ho gaye,  Jab Farooq-e-A’azam رضی اللہ عنہ ko is Jamm-e-Ghafeer ke muta’aliq ilam huwa to is baday khatray ka muqaabla karne ke liye khud taiyyaar hue, Lekin Lashkar-e-Islaam ki ba’az aham shakhsiyaton ne Aap ko is se rokk diya aur yeh tajweez paish ki ke aik aisay sipaah salaar ko yeh muhim sir karne ke liye rawaana karein jo Qabil-e-Ai’tmaad ho .

Hazrat Umar ne farmaaya:

Mujhe aisay shakhs ki nishaan-dahi karo jisay Qaaid banaa kar is muhim ko sir karne ke liye rawaana karon.

Sab ne a’raz ki:

Ameer-ul-Momineen! aap apne lashkar ke muta’aliq khoob achi tarhaan jantay hain.

 Aap ne irshaad farmaya:

“Allah ki qasam! Main musalmanoon ke lashkar ka salaar aik aisay shakhs ko banaaon ga ke jis mein yeh khoobi ho keh jab dono foujon mein ghamsaan ki jung chihdti hai to woh tairay se bhi ziyada taiz saabit hota hai aur woh hai N’oman Bin Muqarrin Muzani رضی اللہ عنہ”

Sab ne kaha:

Waqa’i woh is mansab ke laaiq hai.

To Hazrat Umar رضی اللہ عنہ ne is ki taraf yeh khat likha.

Umar Bin khataab رضی اللہ عنہ ki jaanib se No’man Bin Muqarrin رضی اللہ عنہ ki taraf.

Ba’ad az tasleemaat:

Mujhe yeh ittila mili hai ke Iraniyon ne Nahwand shehar mein kaseer ta’daad mein fouj jama kar li hai, Jab Aap ko mera yeh khatt  milay, Allah ka naam le kar aur is ko Shaamil-e-Haal samajte hue dushman ke muqablay ke liye rawana ho jayen…. Yaad rakhna. Aik musalman mere nazdeek aik laakh dinaar se ziyada qeemti aur mehboob hai.

Wa-al-salaam

Hazrat No’man رضی اللہ عنہ ne dushman se muqablay ke liye apne lashkar ko tayyaar kiya aur tajurbah kaar shehsawaar Soorat-e-Haal ma’aloom karne ke liye rawana kiye jab yeh shehsawaar shehar ke qareeb puhanche to un ke ghoday achanak ruk gaye, Shehsawaaron ne unhein dodaanay ki koshish ki lekin woh isi jagah jamay rahay. Aik qadam bhi agay nah badhay. Shehsawaar ghodon ki peeth say neechay utar aaye, Taakeh sahih Soorat-e-Haal ma’aloom kar sakein, Woh yeh dekh kar hairaan reh gaye ke ghodon ke paaon mein keel paivast ho chuke hain, Unhon ne jab ird gird ka ba-ghor jaaizah liya to kiya dekhte hain keh Iraniyon ne Nahawand ki taraf jane walay tamaam raaston mein lohay ke nok-daar keel bikhair diye hain taakay shehsawaaron aur piyadah fouj ka rastaa roka jaa sakay aur woh Nahawand shehar tak pahonch nah sakein.

---

Shehsawaaron  ne is Soorat-e-Haal se Hazrat No’uman رضی اللہ عنہ ko mutal’aa kiya aur un se raye talabb ki unhon ne hukum diya ke sab apni jagah khaday rahein, Jab raat ki tareeki chaa jaye to be- tahaasha aag jalaaein taakay dushman is roshni mein tumhen dekh le, Jab roshni chahaar soo phaili hui ho to Khauf-o-Haraas aur Hazeemat-o-Paspaai ka muzaahiraa karein, Is se dushman fouj ke dil mein tumahray paas pounchanay ki shadeed dili khawahish paidaa ho gi jis ki takmeel ke liye woh az khood raaston mein bikhray hue kaantay aur keel chunnay par majboor hon ge. Is tarhaan tumahray tamaam rastay saaf ho jaein ge Iraniyon ke khilaaf yeh tadbeer kargar saabit hui. Jab unhon ne aag ke alaao ki roshni mein dekhaa ke musalmaan lashkar pispaa ho kar bhaagna chahta hai to unhon ne jaldi se apne karinde bhaij kar tamam rastay saaf karwaa diye, Jab rastay saaf ho gaye to musalmanoon ne yak-dam peechay mud kar achanak dushman par zor daar hamlaa kar diya.

---

Hazrat No’man Bin Muqarrin رضی اللہ عنہ ne apne lashkar ke sath Nahawand  shehar ke balaai jaanib paraao daal diya aur dushman par hamla karne ke liye mansoobah bandi ki, Aap ne lashkar ko mukhaatib karte hue farmaaya:

---

“Mein teen martaba na’ara takbeer buland karoon ga,  jab pehli martaba na’ara takbeer karoon to sab log chokas ho jaaein, Jab doosri martaba na’ara takbeer kahoon to apne hathiyaar sambhaal lein aur jab teesri martaba na’ara takbeer kahoon to mere sath mil kar dushman par zor daar hamla kar dein.”

---

Hazrat No’man Bin Maqrran رضی اللہ عنہ ne teen dafa’a Allah-o-Akbar kahaa aur sher ki si dilairi ke sath dushman ki safon mein jaa ghusay aur Aap ke peechay Lashkar-e-Islaam Sail-e-Rawaan ki tarhaan dushman ke Khas-o-Khashaak ko bahaata huwa musalsal agay bhadne laga aur dono foujon ke darmiyan aisaa ghamsaan ka run padaa keh jungi tareekh mein kam hi kisi aisi ladaai ki misaal millti hogi, Irani fouj gaajar mooli ki tarhaan katne lagi laashon ke ambaar lag gaye, Maidaan aur pahaad jis taraf nigaah uthti laashon ke kashton ke pashte lagey hue thay guzar gaahon aur raaston mein khoon pani ki tarhaan beh rahaa tha, Isi aalam mein sipah salaar Hazrat N’oman Bin Muqarrin رضی اللہ عنہ ka ghoda phislaa aur girtay hi dam tor gaya aur Hazrat N’oman رضی اللہ عنہ bhi girtay hi shaheed ho gaye.

Foran Aap ke bhaai ne agay badh kar jhandaa apne haath mein thaam liya aur Aap ke Jasad-e-Khaaki par apni chaadar daal di taakay Aap ki shahaadat ki khabar musalmaan fouj ko nah honay paye.

Jab Lashkar-e-Islaam ko aisi mukammal fatah naseeb hui, Jisay Fatah-e-Mubeen ka naam diya gaya to fatah-yaab lashkar ne apne qaaid ke muta’aliq dariyaaft kiya ke woh kahan hain?

Un ke bhai ne un ke Jasad-e-Khaaki se chaadar uthaai aur farmaaya:

yeh hain aap ke Ameer.

Bilaa-shubaa fatah se in ki aankhein thandhi ho chuki hain, Aur Allah Subhanaa wa Ta’alaa ne inhen shahaadat ka azeem martaba bhi naseeb farmaa diya.

---

Hazrat No’man Bin Maqrran رضی اللہ عنہ ke mufassal Halaat-e Zindagi ma’aloom karne ke liye darj zail kitaabon ka muta’liya karein:

1: Al Isaabah Mutarjim                                                                  8745

2: Ibn ul Aseer                                                                                       2/211-7/3

3: Tahzeeb ul Tahzeeb                                                                    10/456

4: Futooh ul Buldan                                                                           311

5: Sarah Alfiat ul Iraqi                                                                      3/76

6: Al Aaalam                                                                                           9/9

7: Al Qadsiyyah                                                                                     66-73

REFERENCE:

Book: Hayat-e-Sahaba kay darakh shah pahelo.
By: Dr. Abdur Rahman Rafat Al- Pasha.