ہمارے پیغمبر (ﷺ) کا آخری حج

۞حجتہ الوداع کی تفصیلات

حجتہ الوداع •ا ہجری:

اللّٰہ تعالیٰ نے محمد (ﷺ) کو جس مقصد کی خاطر زمین کے پردے پر بھیجا تھا جب وہ انجام پاچکا تو اطلاع آئی کہ تمہارا کام پورا ہوچکا اب تم اللہ کے پاس واپسی کے لیے تیار ہو جاؤ ۔ سورت نصر ۔۔۔۔۔۔۔۔۔اسی واقعے کی خبر ہے ۔
ذیقعدہ •ا ہجری میں ہر طرف منادی ہوی کہ رسول اللہ(ﷺ) اس سال حج کے ارادے سے مکہ معظمّہ تشریف لے جائیں گے۔یہ خبر دفعتاً پودے ارب میں پھیل گئی اور سارا ارب ساتھ چلنے کے لیے امڈ آیا۔ذیقعدہ کی 26 تاریخ کو آپ(ﷺ) نے غسل فرمایا اور چادر اور تہبند باندھی اور ظہر کی نماز کے بعد مدینے سے باہر نکلے۔مدینے سے چھ میل پر ذوالحلیفہ کے مقام پر رات گزاری اور دوسرے دن دوبارہ غسل فرما کر دو رکعت نماز ادا کی اور احرام باندھ کر قصواء(1) نامی اونٹنی پر سوار ہوئے اور بلند آواز سے یہ الفاظ فرماے جو آج تک ہر حاجی کا ترانہ ہے :

((لبيك اللهم لبيك لبيك لا شريك لك لبيك إن الحمد و النعمة لك و الملك لا شريك لك))

“اے اللہ! ہم تیرے لیے حاضر ہیں۔ اے اللہ! ہم تیرے لیے حاضر ہیں تیرا کوئی شریک نہیں ہم تیرے سامنے حاضر ہیں ۔ تعریف اور نعمت سب تیری ہے اور بادشاہی تیری ہے تیرا کوئی شریک نہیں۔“

حضرت جابر رضى اللہ تعالى عنہ جو اس حدیث کے بیان کرنے والے ہیں، کہتے ہیں کہ ہم نے نظر اٹھا کر دیکھا تو آگے پیچھے، دائیں بائیں جہاں کم نظر کام کرتی تھی آدمیوں کا جنگل نظر آتا تھا۔ جب آنحضرت(ﷺ) لبیک فرماتے تھے تو اس کے ساتھ کم و بیش ایک لاکھ آدمیوں کی زبان سے یہی نعرہ بلند ہوتا تھا اور دفعتًا پہاڑوں کی چوٹیاں اس کی جوابی آواز سے گونج اٹھتی تھیں ۔ اس طرح منزل به منزل آپ(ﷺ) آگے بڑھتے چلے گئے یہاں تک کہ اتوار کے روز زوالجہ کی تاریخ کو مکہ میں داخل ہوئے۔

کعبہ نظر آیا تو فرمایا : اے اللہ! اس گھر کو عزت اور شرف دے۔ کعبہ کا طواف کیا، مقام ابراہیم علیہ السلام میں کھڑے ہو کر دو رکعت نماز ادا کی اور صفا کی پہاڑی پر چڑھ کر فرمایا:

لَا إِلَهَ إِلاَّ اللهُ وَحْدَهُ لَا شَرِيْكَ لَهُ، لَهُ الـمُلْكُ ولَهُ الـحَمْدُ، وَهُوَ عَلَى كُلِّ شَيءٍ قَديرٌ، لَا إلَهَ إِلاَّ اللهُ وَحْدَهُ، أَنْجَزَ وَعْدَهُ، وَنَصَرَ عَبْدَهُ، وهَزَمَ الأَحْزَابَ وَحْدَهُ

اللہ کے سوا کوئی معبود نہیں، اس کا کوئی شریک نہیں، اسی کی بادشاہی اور اسی کی حمد ہے۔ وہی مارتا اور جلاتا ہے۔ وہ ہر چیز پر قدرت رکھتا ہے۔ کوئی اللہ نہیں، مگر وہی اکیلا اللہ، اس نے اپنا وعدہ پورا کیا۔ اپنے بندے کی مدد کی اور اکیلے سارے جتھوں کو شکست دی۔‘

عمرے سے فارغ ہو کر آپ نے دوسرے صحابیوں کو احرام کھول دینے کی ہدایت فرمائی ۔ اسی وقت حضرت علی مرتضی رضی اللہ عنہ یمنی حاجیوں کے ساتھ مکہ پہنچے۔ جمعرات کے روز آٹھویں ذی الحجہ کو آپ نے سارے مسلمانوں کے ساتھ منی میں قیام فرمایا۔ دوسرے دن نویں ذی الحج کوصبح کی نماز پڑھ کر منی سے روانہ ہوئے ۔ عام مسلمانوں کے ساتھ عرفات آ کر ٹھرے، دوپہر ڈھل گئی تو قصواء پر سوار ہو کر میدان میں آئے اور اونٹنی پر بیٹھے حج کا خطبہ دیا۔

آج پہلا دن تھا کہ اسلام اپنے جاہ و جلال کے ساتھ نمودار ہوا اور جاہلیت کے سارے بے ہودہ مراسم مٹا دیئے گئے۔ آپ صل اللہ علیہ والہ وسلم نے فرمایا:

ألا إنَّ كلَّ شيٍء من أمرِ الجاهليةِ تحتَ قدمي موضوعٌ

“ہاں ! جاہلیت کے سارے دستور اور رسم و رواج میرے دونوں پاؤں کے نیچےہیں۔ “

عرب کی زمین ہمیشہ انتقام کے خون سے رنگین رہتی تھی۔ آج عرب کی نہ ختم ہونے والی آپس کی لڑائیوں کے سلسلے کو توڑا جاتا ہے اور اس کے لیے نبوت کا منادی سب سے پہلے اپنے خاندان کا نمونہ پیش کرتا ہے۔

وَدِمَاءُ الجَاهِلِيَّةِ مَوْضُوعَةٌ، وإنَّ أَوَّلَ دَمٍ أَضَعُ مِن دِمَائِنَا دَمُ ابْنِ رَبِيعَةَ بنِ الحَارِثِ

’’جاہلیت کے سارے خون کے بدلے ختم کر دیئے گئے اور سب سے پہلے میں اپنے خاندان کا ون ربیہ بن حارث کے بیٹے کے انتقامی خون کے بدلہ لینے کا حق چھوڑتا ہوں۔ (یعنی دشمن کو معاف کرتا ہوں) »

الراوي : جابر بن عبدالله | المحدث : مسلم | المصدر : صحيح مسلم
الصفحة أو الرقم: 1218 | خلاصة حكم المحدث : [صحيح]

تمام عرب میں سودی کاروبار کا ایک جال بچھا تھا جس سے عرب کے غریب مزدور اور کاشت کار، یہودی مہاجنوں اور عرب سرمایہ داروں کے ہاتھوں میں پھنسے تھے اور ہمیشہ کے لیے وہ ان کے غلام ہو جاتے تھے۔ آج اس جال کا تار تارالگ کیا جاتا ہے اور اس کے لیے بھی سب سے پہلے اپنے خاندان کا نمونہ پیش کیا جارہا ہے۔ ارشاد ہے :

وَرِبَا الجَاهِلِيَّةِ مَوْضُوعٌ، وَأَوَّلُ رِبًا أَضَعُ رِبَانَا؛ رِبَا عَبَّاسِ بنِ عبدِ المُطَّلِبِ

“جاہلیت کے سود مٹا دیئے گئے اور سب سے پہلا سود جس کو میں مٹاتا ہوں وہ اپنے خاندان کا یعنی عباس بن عبدالمطلب کا ہے۔“

آج تک عورتیں ایک طرح سے شوہروں کی منقولہ جائیداد تھیں جو جوؤں میں ہاری اور جیتی جا سکتی تھیں۔ آج پہلا دن ہے کہ یہ مظلوم گروہ انصاف کی داد پاتا ہے۔ فرمایا:

فَاتَّقُوا اللَّهَ في النِّسَاءِ۔۔۔۔وَلَكُمْ عليهنَّ۔۔۔وَلَهُنَّ علَيْكُم

“عورتوں کے معاملے میں اللہ سے ڈرو،تمہاراحق عورتوں پر ہے اور عورتوں کا تم پر ہے “

عورتوں کے بعد انسانوں کا سب سے مظلوم طبقہ غلاموں کا تھا۔ آج اس کے انصاف پانے کا دن آیا ہے۔ فرمایا:

أرِقَّاءَ كُمْ أَرِقَّاءَ كُمْ! أَطْعِمُوْهُمْ مِّمَّا تَأْكُلُوْنَ، وَاكْسُوْ هُمْ تَلْبَسُونَ

“تمہارے غلام تمہارے غلام، ان کے حق میں انصاف کرو۔ جو خود کھاؤ وہ ان کو کھلاؤ، اور جو خود پہنو وہ ان کو پہناؤ“

عرب میں امن و امان نہ تھا ،اس لیے جان و مال کی کوئی قیمت نہ تھی۔ آج امن و سلامتی کا بادشاہ ساری دنیا کوصلح کا پیغام دیتا ہے۔

إنَّ دِمَاءَكُمْ وَأَمْوَالَكُمْ حَرَامٌ علَيْكُم، كَحُرْمَةِ يَومِكُمْ هذا، في شَهْرِكُمْ هذا، في بَلَدِكُمْ هذا، إِلٰي يَوْمِ تَلْقَوْنَ رَبَّكُمْ

“آپس میں تمہاری جان اور تمہارا مال ایک دوسرے کے لیے قیامت تک اتنا ہی عزت کے قابل ہے جتنا آج کا دن اس پاک مہینے میں اور اس پاک شہر میں “

امن و امان کی اس منادی میں سب سے پہلی چیز اس دینی برادری کا وجود ہے جس نے قبیلوں اور خاندانوں کے رشتوں سے بڑھ کر عرب کے سارے قبیلوں بلکہ دنیا کے سارے انسانوں میں اسلام برادری کا رشتہ جوڑ دیا۔ ارشاد ہوا:

“أَلَا! إِنَّ الْمُسْلِمَ، (المُسْلِمُوْنَ إِخْوَةٌ)

“ہر مسلمان دوسرے مسلمان کا بھائی ہے اور سارے مسلمان بھائی بھائی ہیں۔ “

دنیا کی بے اطمینانی کی سب سے بڑی چیز جس نے ہزاروں سال تک قوموں کو باہم لڑایا ہے وہ قومی فخر وغرور ہے۔ آج اس فخروغرور کا سر کچلا جاتا ہے۔ اعلان ہوتا ہے:

لا فضلَ لعربيٍّ على عجميٍّ ، ولا لعجميٍّ على عربيٍّ

الراوي : – | المحدث : الألباني | المصدر : شرح الطحاوية | الصفحة أو الرقم : 361 | خلاصة حكم المحدث : صحيح

ہاں! کسی عربی کو کسی عجمی پر اور کسی عجمی کو کسی عربی پر کوئی برائی نہیں ۔ تم سب ایک آدم کے بیٹے ہو اور آدم مٹی کا بنا تھا۔“

اس کے بعد چند اصولی قانون کا اعلان فرمایا گیا:

إِنَّ الله تَبَارَكَ وَتَعَا لٰي قَدْ أَعْطٰي لِكُلِّ ذِي حَقٍّ حَقَّهُ، فَلاَ وَصِيَّةَ لِوَارِثٍ

۞ اللہ نے ہر حق دار کو( وراثت کی رو سے) اس کا حق دے دیا۔ اب کسی وارث کے حق میں وصیت جائز نہیں۔

اَلْوَ لَدُ لِلفِرَاشِ وَلِلْعَاهِرِ الْحَجَرُ

۞لڑکا اس کا ہے جس کے بستر پر وہ پیدا ہوا۔ زنا کار کے لیے پھر ہیں اور ان کا حساب اللہ کے ذمے ہے۔

   ۞ قرض دار کو قرض ادا کیا جائے۔ عاریتًہ لیا ہوا مال واپس کیا جائے۔ ہنگامی عطیے واپس کیے جائیں جو ضامن بنے وہ تاوان کا ذمہ دار ہو۔

آج امت کے ہاتھوں میں اس کی ہدایت کے لئے وہ دائمی قرار مرحمت ہوتا ہے جس کی روشنی میں جب تک کوئی چلتا رہے گا ہر گمراہی سے بچتا رہے گا اور فرمایا:

وَقَدْ تَرَكْتُ فِيْكُمْ مَّالَنْ تَضِلُّوا بَعْدَهُ إِنِ اعْتَصَمْتُُمْ بِهِ، كِتَابُ اللهِ

“تم میں ایک چیز چھوڑ جاتا ہوں اگر تم نے اس کو مضبوط پکڑ لیا تو پھر کبھی گمراہ نہ ہوگے وہ اللہ کی کتاب ہے

۞ ہاں عورتوں کو اپنے شوہر کے مال سے اس کی اجازت کے بغیر کسی کو کچھ دینا جائز نہیں۔

( یہ فرما کر آپ صلی اللہ علیہ وسلم نے مجمع کی طرف سے خطاب کیا)

وَأَنْتُمْ تُسْأَلُوْنَ لُونَ عَنِّي، فَمَا أَنْتُمْ قَائلُونَ؟

 تم سے اللہ کے ہاں میری نسبت پوچھا جائے گا تو تم کیا جواب دو گے؟

ایک لاکھ زبانوں نے ایک ساتھ گواہی دی:

نَشْهَدُ أَنَّكَ قَدْ بَلَّغْتَ وَأَدَّيْتَ وَنَصَحْتَ

 “ہم کہیں گے کہ آپ صلی اللہ علیہ وسلم نے اللہ کا پیغام پہنچا دیا اور اپنا فرض ادا کر دیا ہے. “

یہ سن کر آپ صلی اللہ علیہ وسلم نے آسمان کی طرف انگلی اٹھائی اور تین بار فرمایا:

اَللَّهُمَّ ! اشْهَدْ، اَللَّهُمَّ ! اشْهَدْ

” اے اللہ تو گواہ رہ۔؟

“عین اسی وقت جب آپ صلی اللہ علیہ وسلم نبوت کا یہ آخری فرض ادا کر رہے تھے اللہ کی بارگاہ سے یہ بشارت آئی:

 الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا

(اليوم اكملت لكم دينكم و اتممت عليكم نعمتي ورضيت لكم اسلام دينا) (المائدہ ؛3)

“آج میں نے تمہارے لئے تمہارے دین کو پورا کردیا اور اپنی نعمت تم پر پوری کر دی اور تمہارے لئے اسلام کے دین کو چن لیا۔”

خطبہ سے فارغ ہوئے تو حضرت بلال رضی اللہ تعالی عنہ نے اذان دی اور حضرت محمد صلی اللہ علیہ وسلم نے ظہر اور عصر کی نماز ایک ساتھ ادا فرمائی کیسا عجیب منظر تھا کہ آج سے 22 سال پہلے جب محمد صلی اللہ علیہ وسلم نے اللہ کی پرستش کی دعوت دی تو محمد رسول صلی اللہ علیہ وسلم اور ان کے چند ساتھیوں کے سوا کوئی گردن اللہ کے آگے خم نہ تھی اور آج 22 سال کے بعد محمد رسول صلی اللہ علیہ وسلم کے ساتھ ایک لاکھ گردنیں اللہ کے حضور میں جھکی تھیں اور اللہ اکبر کا نعرہ ذرے ذرے سے بلند تھا۔

نماز سے فارغ ہوکر ناقہ پر سوار مسلمانوں کے ساتھ موقف تشریف لائے اور وہاں کھڑے ہو کر دیر تک قبلے کی طرف منہ کیے ہوئے دعا و زاری میں مصروف رہےجب آفتاب ڈوبنے لگا تو چلنے کی تیاری کی۔ دفعتًا ایک لاکھ آدمیوں کے سمندر میں تلاطم برپا ہو گیا۔ آپ آگے بڑھتے جاتے تھے اور ہاتھ سے اشارہ کرتے، اور زبان سے فرماتے جاتے تھے؛ لوگوں امن اور سکون کے ساتھ لوگوں امن اور سکون کے ساتھ ۔”مغرب کا وقت تنگ ہو رہا تھا کہ سارا قافلہ مزدلفہ کے مقام پر پہنچا. یہاں پہلے مغرب اور پھر فورا عشاء کی نماز ادا ہوئی .

۔صبح سویرے فجر کی نماز پڑھ کر قافلہ آگے بڑھا ۔جانثار دائیں بائیں تھے۔ اہل ضرورت اپنی اپنی ضرورت کے مسئلے پوچھ رہے تھے اور آپ صلی اللہ علیہ وسلم ان کے جواب دیتے جاتے تھے۔

جمرہ پہنچ کر کنکریاں پھینکیں اور لوگوں سے خطاب کرکے فرمایا؛

ذروني ما ترَكتُكم فإنَّما هلَكَ مَنْ كَانَ قَبْلَكُمْ بِكثرةِ سُؤَالِهِمْ

” مذہب میں اللہ کی مقرر کی ہوئی حد سے آگے نہ بڑھنا، تم سے پہلی قومیں اسی سے برباد ہوئیں۔”

اسی درمیان میں یہ فقرہ بھی فرمایا, جس سے وداع درخت کا اشارہ ملتا ہے:

لِتَأْخُذُوا مَنَاسِكَكُمْ، فإنِّي لا أَدْرِي لَعَلِّي لا أَحُجُّ بَعْدَ حَجَّتي هذِه.

” حج کے مسئلے سیکھ لو, میں نہیں جانتا کہ پھر حج کر سکوں گا.”

یہاں سے نکل کر اب منی میں تشریف لائے۔ داہنے بائیں آگے پیچھے مسلمانوں کا ہجوم تھا۔ مہاجرین قبلہ کے داہنے انصار بائیں اور بیچ میں عام مسلمانوں کی صفیں تھیں۔

انحضرت صلی اللہ علیہ وسلم ناقہ پر سوار تھے۔ آپ صلی اللہ علیہ وسلم نے آنکھیں اٹھا کر اس عظیم الشان مجمع کی طرف دیکھا تو نبوت کے تئیس سال کے کارنامے نگاہوں کے سامنے تھے زمین سے آسمان تک قبول اور اعتراف کا نور پھیلا تھا۔ اب ایک نئی شریعت ایک نئے نظام اور ایک نئے عہد کا آغاز تھا ۔اسی عالم میں محمد رسول صلی اللہ علیہ وسلم کی زبان فیض ترجمان سے یہ فقرے ادا ہوئے؛

الزَّمانُ قَدِ اسْتَدارَ كَهَيْئَةِ يَومَ خَلَقَ السَّمَواتِ والأرْضَ؛
دِماءَكُمْ وأَمْوالَكُمْ -قالَ مُحَمَّدٌ: وأَحْسِبُهُ قالَ- وأَعْراضَكُمْ علَيْكُم حَرامٌ، كَحُرْمَةِ يَومِكُمْ هذا، في بَلَدِكُمْ هذا، في شَهْرِكُمْ هذا، وسَتَلْقَوْنَ رَبَّكُمْ، فَسَيَسْأَلُكُمْ عن أعْمالِكُمْ، ألَا فلا تَرْجِعُوا بَعْدِي ضُلَّالًا، يَضْرِبُ بَعْضُكُمْ رِقابَ بَعْضٍ،

 ہاں اللہ نےآسمان اور زمین کو جب پیدا کیا تھا آج زمانہ پھر پھرا کر اسی فطرت پر آگیا۔اور تمھاری جانیں اور تمہاری ملکیتیں آپس میں ایک دوسرے کے لئے ویسی عزت کے قابل ہیں جیسے آج کا دن اس عزت کے مہینے میں اور اس عزت والی آبادی میں، ہاں دیکھنا میرے بعد گمراہ نہ ہوجانا کہ خود ایک دوسرے کی گردنیں مارنے لگو ۔

الراوي : أبو بكرة نفيع بن الحارث | المحدث : البخاري | المصدر : صحيح البخاري الصفحة أو الرقم: 4406 | خلاصة حكم المحدث : [صحيح]التخريج : أخرجه البخاري (4406 )، ومسلم (1679)

يَاأَيُّهَا النَّاسُ! اتَّقُوْا الله وأَطِيعُوْا وَإِنْ أُمِّرَ عَلَيْكُمْ عَبْدٌ حَبَشِيٌّ مُجَدَّعٌ، فَاسْمَعُوْا وَأَطِيْعُوْا مَا أَقَامَ فِيْكُمْ كِتَابَ اللهِ

 تم کو اللہ کے سامنے حاضر ہونا ہے اور وہ تم سے تمہارے کاموں کی بابت پوچھے گا ، اگر تم پر ایک کالا نکٹا غلام بھی سردار بنا دیا جائے جوتم کو اللہ کی کتاب کے مطابق لے چلے تو اس کا کہا ماننا ۔

[مسند أحمد : ٦/٤٠٣]

قَدْ يَئِسَ الشَّيْطَانُ بِأَنْ يُعْبَدَ بِأَرْضِكُمْ وَلَكِنَّهُ رَضِيَ أَنْ يُطَاعَ فِيمَا سِوَى ذَلِكَ مِمَّا تُحَاقِرُونَ مِنْ أَعْمَالِكُمْ

ہاں ! اب شیطان اس سے ناامید ہو گیا کہ تمہارے اس شہر میں اس کی پرستش پھر کبھی ہوگی ۔

چھوٹی چھوٹی باتوں میں اس کے کہنے میں آ جاؤ گے اور وہ اسی سے خوش ہو گا ۔ “

المسدرك للحاكم: ١/٩٣

یہ کہہ کر آپ صلی اللہ علیہ وسلم نے مجمع کی طرف اشارہ کر کے فرمایا :

الا هل بلغت؟ قالوا: نعم، قال: اللَّهُمَّ! اشْهَدْ، فَلْيُبَلِّغِ الشّا هِدُ الْغَائِبَ

“کیا میں نے اپنا پیغام پہنچا دیا ؟” ہر طرف سے آوازیں آنے لگیں : “ہاں ! بے شک” فرمایا : ”اللہ گواہ رہنا“ یہ کہہ کر ارشاد فرمایا:
“جو یہاں موجود ہے وہ اس پیغام کو اس تک پہنچادے جو یہاں نہیں ۔”
یہ گویا تبلیغ کا وہ فریضہ تھا جو ہر مسلمان کی زندگی کا جزو ہے ۔

اپنے پروردگار کی پرستش کرنا ، پانچوں وقتوں کی نمازیں پڑھنا ، رمضان کے مہینے کا روزہ رکھنا اور

میرے حکموں کو ماننا ۔ تم اپنے پروردگار کی جنت میں داخل ہو گے ۔ 

 ان سب کے بعد آپ صلی اللہ علیہ وسلم نے تمام مسلمانوں کو الوداع کہا ۔

حج کے دوسرے کاموں سے فرصت کر کے 14 ذی الحجہ کو فجر کی نماز خانہ کعبہ میں پڑھ کر سارا قافلہ اپنے اپنے مقام کو روانہ ہوگیا اور آنحضرت صلی اللہ علیہ وسلم نے مہاجرین اور انصار رضی اللہ عنھم کے جھرمٹ میں مدینہ کی راہ لی ۔

حواله:

كتاب: “رحمتِ عَالم”

تاليف: “علاّ مه سيد سليمان ندوى”