10. Azaan Se Mutaalliq Ahkaam-o-Masaael 

كِتَابُ الْأَذَانِ

---

 

Baab 1: Azaan Ki Ibteda

---

Irshad-e-Baari Ta’ala hai: “Jab Tum Namaz Ke Liye Azaan Dete Ho, To Ye Log Uska Mazaaq Udaate Aur Usey Shugal Banaate Hain, Iski Wajah Ye Hai Ke Wo Log Bewaqoof Hain”.[1] Nez Allah Azzawajal ka farmaan hai: “Jab Juma Ke Din Namaz Ke Liye Azaan Di Jaae (to zikr-e-ilaahi ki taraf daudkar aao)”.[2]

[603] Hazrat Anas (rz) se riwayat hai, unho’n ne farmaya: Namaz ke elaan ke liye logo’n ne aag aur naaqoos[3] ka zikr kiya hai, is silsile mein unho’n ne yahood-o-nasaara ka bhi tazkira kiya to Hazrat Bilal (rz) ko hukum diya gaya ke wo azaan ke kalimat do-do (2-2) aur iqaamat ke ek-ek (1-1) martaba kahe.[4]

[604] Hazrat Ibne Umar (rz) se riwayat hai, wo farmate hain: Jab musalman madina munawwara aae to namaz ke waqt ka andaaza karke uske liye jamaa hua karte the, kyou’nke us waqt namaz ke liye ba-qaaeda azaan ke ehtemaam na tha. Ek din unho’n ne uske mutaalliq baahami mashwara kiya to kisi ne kaha: Isaiyo’n ki tarah ek naaqoos bana liya jaae. Aur kuch logo’n ne kaha: Yahoodiyo’n ki bigul ki tarah ek nar-sanghaa rakh liya jaae, magar Hazrat Umar (rz) ne farmaya: Tum ek admi ko kyou’n nahi bhejte jo namaz ki ittela de? To Rasool Allah (s) ne farmaya: “Aye Bilal! Utho aur namaz ki ittela do”.

Faaeda: Is riwayat se pataa chalta hai ke azaan ki mashruiyat Hazrat Umar (rz) ke kehne se hui, halaa’nke aisa nahi hai. Chunache tafseeli riwayaat se pataa chalta hai ke madina taiyyaba aane ke baad namaz ke liye jamaa hone ke mutaalliq musalmano ko hasb-e-zel teen (3) maraahil se guzarna pada: | Namaz ke waqt ka andaaza lagakar masjid mein jamaa ho jaate aur namaz padh lete. Uska nuqsaan ye hota ke kuch log pehle aajaate, jabke aisa karne se unka karobaar mutaassir hota aur kuch log waqt ke baad aate, isse namaz mein takheer ho jaati. | Iske baad baahami mashware se tae paaya ke kisi admi ko mutaiyyan kar diya jaae, jo buland jagah par khada ho kar namaz ke waqt “اَلصَّلَاةُ جَامِعَةٌ” ke alfaaz se namaz ke waqt ka elaan kar diya kare. Ye tajweez Hazrat Umar (rz) ki thi, jaisa ke mazkura hadees se maaloom hota hai, chunache us par amal shuru ho gaya. | Aakhir-kar Hazrat Abdullah bin Zaid (rz) ko khwaab mein ek shakhs ne azaan ki taaleem di, to unho’n ne apna khwaab Rasool Allah (s) se bayan kiya, aap ne farmaya ke: “Ye saccha khwaab hai”. Chunache  aapke hukum par jab Hazrat Bilal (rz) azaan de rahe the, to Hazrat Umar (rz) apni chaadar ghaseet-te hue ghar se nikle aur Rasool Allah (s) ki khidmat mein haazir ho kar arz kiya: Maine bhi is tarah ka khwaab dekha hai.[5] Iske baad azaan dene ka silsila shuru hua, jo aaj tak jaari hai.

---

 

Baab 2: Azaan Mein Do-do (2-2) Martaba Kalimaat Kehna

---

[605] Hazrat Anas (rz) se riwayat hai, unho’n ne farmaya: Hazrat Bilal (rz) ko ye hukum diya gaya tha ke azaan mein juft (do-do (2-2) martaba) kalimaa kahe, aur takbeer mein “قدْ قَامَتِ الصَّلَاةُ” ke alaawa deegar kalimaat taaq (ek-ek (1-1) martaba) kahe.[6]

[606] Hazrat Anas (rz) se riwayat hai, unho’n ne farmaya: Jab musalman (madina taiyyaba mein) ziyaada ho gae to mashwara hua ke kisi aisee cheez ke zariye se namaz ke waqt ka elaan ho jise sab log samajh le’n. Kuch logo’n ne mashwara diya ke aag ka alaao[7] raushan kar diya aae, yaa naaqoos ke zariye se elaan kar diya jaae. Aakhir-kaar Bilal (rz) ko hukum diya gaya ke wo azaan ke kalimaat do-do (2-2) martaba aur iqaamat ke kalimaat ek-ek (1-1) martaba kahe.[8]

---

 

Baab 3: “قَدْ قَامَتِ الصَّلَاةُ” Ke Alaawa Iqaamat Ke Alfaaz Ek-Ek (1-1) Martaba Kehna

---

[607] Hazrat Anas (rz) se riwayat hai, unho’n ne farmaya: Hazrat Bilal (rz) ko hukum diya gaya ke wo azaan (ke kalimaat) juft[9] aur iqaamat (ke kalimaat) taaq (ek-ek (1-1) martaba) kahe’n. (Raawi-e-hadees) Ismail kehte hain: Maine (apne shaikh) Ayyub se uska zikr kiya to unho’n ne farmaya: Haa’n (iqaamat ke kalimaat taaq hone chaahiye’n) siwaae “قَدْ قَامَتِ الصَّلَاةُ” ke (ke unho’n ne do (2) martaba kaha jaae).[10]

 

Faaeda: Iqaamat ke taaq kalimaat ki wazaahat baae’n-taur hai:

 

الله أكبر، الله أكبر، أشهد أن لا إلٰه إِلا الله، أشهد أن محمدًا رسول الله، حي على الصلاة، حي على الفلاح، قد قامت الصلاة، قد قامت الصلاة، الله أكبر، الله أكبر، لا إلٰه إلا الله.[11]

 

Hamaare nazdeek raajeh ye hai ke agar azaan dohri kahi jaae, jiske 19 kalimaat hain to us waqt takbeer bhi dohri honi chaahiye, jiske 17 kalimaat hain. Aur agar Abdullah bin Zaid ke khwaab waali ikheri azaan di jaae jiske 15 kalimaat hain to us waqt iqaamat bhi ikheri honi chaahiye jiske 11 kalimat hain.[12]

 

---

 

Baab 4: Azaan Dene Ki Fazilat

 

---

 

[608] Hazrat Abu Huraira (rz) se riwayat hai, Rasool Allah (s) ne farmaya: “Jab namaz ke liye azaan di jaati hai to shaitan peeth pherkar gooz[13] maarta hua bhaagta hai, taake azaan ki awaaz na sun sakey. Jab azaan poori ho jaati hai to waapas aajaata hai. Phir jab namaz ke iqaamat kahi jaati hai to dobaara peeth de kar bhaag nikalta hai. Aur jab iqaamat khatam ho jaati hai to phir saamne aata hai, taake namazi aur uske dil mein waswasa daale”. Aur kehta hai: “Ye baat yaad kar, wo baat yaad kar, yaane wo baate’n jo namazi bhool gaya tha (unhe’n yaad dilaata hai) hatta ke namazi bhool jaata hai ke usne kis qadar namaz padhi hai”.[14]

 

---

 

Baab 5: Ba-awaaz-e-Buland Azaan Dena

 

---

 

Hazrat Umar bin Abdul Aziz (rh) ne (apne muezzin se) kaha tha ke saaf aur seedhi-seedhi azaan kho, ba-soorat-e-deegar ham se alag ho jaao.

[609] Hazrat Abdullah bin Abdur Rahman (rz) se riwayat hai, unse Hazrat Abu Saeed Khudri (rz) ne kaha tha: Main dekhta hoo’n ke tumhe’n bakriyo’n aur jungle mein rehna pasand hai, is liye tum jab apni bakriyo’n ke hamraah jungle mein raho aur namaz ke liye azaan do (2) to buland awaaz se azaan diya karo, is liye ke moazzin ki awaaz ki jo koi jin-o-ins yaa aur koi sunega, to wo uske liye qiyaamat ke din gawaahi de ga. Hazrat Abu Saeed Khudri (rz) ne farmaya: Maine ye baat Rasool Allah (s) se suni hai.[15]

 

---

 

Baab 6: Azaan Sun Kar Khoon-rezi Se Ruk Jaana

 

---

 

[610] Hazrat Anas (rz) se riwayat hai, wo Nabi (s) se bayan karte hain ke aap jab bhi hamaare saath kisi qaum par chadhaai karte to us waqt tak hamla na karte jab tat subah na ho jaati. Aur aap intezaar farmate, agar azaan sun lete to hamle ka iraada tark kar dete aur agar azaan na sunte to un par ghaarat-giri karte, chunache ham log khybar ki ladaai ke liye nikle to ham raat ko unke yahaa’n pohnche. Jab subah hui aur Nabi (s) ne azaan ne suni to aap sawaar hue. Main bhi Abu Talha (rz) ke peeche sawaar ho gaya, mera paao’n Nabi (s) ke qadam mubarak se choo raha tha. Hazrat Anas (rz) ne farmaya: Khybar ke log apne tokre aur deegar alaat-e-ziraa-at le kar kaam-kaaj ke liye baahar nikle, jab unho’n ne Nabi (s) ko dekha to kehne lagey ke Muhammad, Allah ki qasam! Muhammad (s) poori fauj ke saath aagae. Hazrat Anas (rz) ne kaha: Jab Rasool Allah (s) ne unhe’n dekha to farmaya: “ألله أكبر، الله أكبر” Kybar barbaad ho gaya. Yaqeenan jab ham kisi qaum ke maidaan mein utarte hain to un logo’n ki subah kharab ho jaati hai, jinhe’n pehle daraaya gaya ho.[16]

 

---

 

Baab 7: Moazzin Ki Azaan Sunte Waqt Kya Kehna Chaahiye?

 

---

 

[611] Hazrat Abu Saeed Khudri (rz) se riwayat hai, Rasool Allah (s) ne farmaya: “Jab tum azaan suno to wohi kalimaat kah jo moazzin kehta hai”.

 

Faaeda: Azaan ke jawab ke mutaalliq teen (3) soorate’n mumkinhain: | Be-aenihi wohi kalimaat dohraae jaae’n to moazzin kehta hai. | “حي على الصلاة” aur “حي على الفلاح” par “لا حول ولا قوة إلا بالله” padha jaae, aur baaqi kalimaat par moazzin ki tarah kahe jaae’n. | “حي على الصلاة” aur “حي على الفلاح” par ye kalimaat bhi kahe jaae’n aur “لا حول ولا قوة إلا بالله” bhi kaha jaae. Jamhoor fuqaha ne doosre qaul ko ikhteyar kiya hai. Imam Bukhari (rh) ke andaaz-e-bayan se bhi yehi maaloom hota hai.

 

---

 

[612] Hazrat Isa bin Talha se riwayat hai, unho’n ne ek din Hazrat Muawiya (rz) ko ye kehte hue suna ke unho’n ne “أشهد أن محمدًا رسول الله” tak isi tarah kaha jis tarah moazzin ne kaha tha.

Phir Imam Bukhari (rh) ne Ishaq bin Rahwiya ke tareeq se isi tarah ki ek riwayat bayan ki hai.[17]

 

---

 

[613] Hazrat Yahya bin Abu Kaseer se riwayat hai, unho’n ne kaha: Mujhse mere baaz bhaiyo’n ne bayan kiya ke moazzin ne jab “حي على الصلاة” kaha to Hazrat Muawiya (rz) ne “لا حول ولا قوة إلا بالله” kaha aur farmaya: Maine tumhare Nabi (s) ko isi tarah kehte suna hai.[18]

 

---

 

Baab 8: Azaan Ke Waqt Dua Padhna

 

---

 

[614] Hazrat Jabir bin Abdullah (rz) se riwayat hai, Rasool Allah (s) ne farmaya: “Jo shakhs azaan sunte waqt ye dua padh”: “اَللّٰهُمَّ رَبَّ… وَعَدْتَّهُ” “Aye Allah! Is kaamil pukaar aur qaaem hone waali namaz ke Rabb! Hazrat Muhammad (s) ko wasila aur buzurgi ataa farma aur unhe’n us muqaam par poh’ncha, jiska toone unse waada kiya hai, to usey qiyaamat ke din meri shafaa-at naseeb hogi”.[19]

 

Faaeda: Waazeh rahe ke wasila ke mutaalliq khud Rasool Allah (s) ka farmaan hai: “Ye Jannat mein ek darje ka naam hai jo Allah ke bando’n mein se sirf ek bande ke laayaq hai aur mujhe ummeed hai ke wo banda main hi hoo’n. Jisne mere liye Allah Ta’ala se wasila ki dua ki uske liye meri shafaa-at waajib hogai”.[20]

 

---

 

Baab 9: Azaan Dene Ke Liye Qura Andaazi Karna

 

---

 

Bayan kiya jaata hai ke kuch logo’n ne azaan dene mein jhagda kiya to (usey khatam karne ke liye) Hazrat Sa’ad (rz) ne unke maa-bain qura andaazi ki.

[615] Hazrat Abu Huraira (rz) se riwayat hai ke Rasool Allah (s) ne farmaya: “Agar logo’n ko maaloom ho jaae ke azaan aur saff-e-awwal mein kya sawab hai, phir wo apne liye qura daalne ke alaawa koi chaara na paae’n to zaroor qura-andazi kare’n. Aur agar logo’n koi lm ho ke namaz-e-zohar ke liye jaldi aane ka kitna sawab hai to zaroor sabqat kare’n. Aur agar wo jaan le’n ke isha aur fajr ba-jamaat adaa karne mein kitna sawaab hai to un dono (ki jamat) mein zaroor aae’n, agarche unhe’n sureno’n[21] ke bal chalkar aana pade”.[22]

 

---

 

Baab 10: Dauran-e-Azaan Mein Guftagu Karna

 

---

 

Hazrat Sulaiman bin Surad ne apni azaan ke dauran mein guftagu ki, nez Imam Hasan Basri farmate hain ke dauran-e-azaan yaa iqaamat mein hasne mein koi harj nahi hai.

 

[616] Hazrat Abdullah bin Haaris se riwayat hai, unho’n ne farmaya: Hazrat Ibne Abbas (rz) ne bearish ke din khutba dene ka iraada kiya. Jab moazzin “حي على الصلاة” tak pohonchna to unho’n ne usey hukum diya ke elaan kar “Har shakhs apne ghar mein namaz padh le”. (Ye sun kar) Log ek doosre ki taraf dekhne lagey to Hazrat Ibne Abbas (rz) ne farmaya: Ye kaam us shakhs ne kiya hai jo hamse behtar tha. Aur ye (namaz-e-juma) azimat (zaroori) hai.[23]

 

---

 

Baab 11: Andhe Shakhs Ka Azaan Dena Jabke Usko Koi Waqt Bataane Waala Ho

 

---

 

[617] Hazrat Ibne Umar (rz) se riwayat hai, Rasool Allah (s) ne farmaya: “Bilal raat ko azaan deta hai, is liye tum (roze ke liye) khaate peete raho, ta-aa’nke Ibne Umme Maktoom azaan de”. Raawi-e-ahdees ne kaha: Ibne Umme Maktoom (rz) ek nabina aadmi the, wo us waqt tak azaan nahi dete the, yahaa’n tak ke unse kaha jaata ke subah ho gai, subah ho gai.[24]

Baab 12: Tuloo-e-Fajr Ke Baad Azaan Dena

[618] Hazrat Hafsa (rza) se riwayat hai ke Rasool Allah (s) ki aadat thi ke jab moazzin subah ki azaan ke liye khada ho jaata aur subah numayaa’n ho jaati to aap namaz khadi hone se pehle halki si do (2) rakate’n padhte.[25]

Faaeda: “إِذَا اعْتَكَفَ” Ke maane ye hain ke jab moazzin fajr ke intezar mein rehta, taake subah acchi tarah raushan ho jaae to azaan de. Moazzin ki azaan ke baad Rasool Allah (s) do (2) rakat sunnat-e-fajr padhte the, jaisa ke doosri riwayat mein hai ke jab moazzin azaan deta aur subah khoob raushan ho jaati to Rasool Allah (s) do (2) Rakat padhte.[26]

[619] Hazrat Ayesha (rza) se riwayat hai ke Nabi (s) namaz-e-subah ki azaan aur iqaamat ke darmiyan do (2) halki si rakaat padhte the.[27]

[620] Hazrat Abdullah bin Umar (rz) se riwayat hai ke Rasool Allah (s) ne farmaya: “Bilal (rz) raat ko azaan deta hai, is liye khaao aur piyo, ta-aa’nke Ibne Umme Maktoom azaan de”.[28]

Baab 13: Subah-e-Saadiq Se Pehle Azaan Kehna

[621] Hazrat Abdullah bin Masood (rz) se riawayat hai, wo Nabi (s) se bayan karte hain. Aap ne farmaya: “Tum mein se koi bilal ki azaan sun kar sehri khana tark na kare, kyou’nke wo raat ko azaan deta hai, taake tahajjud padhne waala laut jaae, jo abhi soya hua ho, usey bedaar karde aur fajr aise nahi hai”. Aap ne apni ungliyo’n se ishaara karte hue pehle unko oopar uthaaya phir aahista aahista neeche ki taraf jhukaya, phir farmaya: “Fajr is tarah hoti hai”. Zohair raawi ne wazaahat ki, ke aap ne apni dono shahadat ki ungliya’n ek doosri ke oopar rakh kar unhe’n daae’n-baae’n phaila diya. Yaane dono gosho’n mein raushni phail jaae to subah hoti hai.[29]

[622, 623] Hazrat Abdullah bin Umar (rz) aur Hazrat Ayesha (rza) se riwayat hai, wo Nabi (s) se bayan karte hain, aap ne farmaya: “Bilal raat ko azaan deta hai, is liye sehri khaao aur piyo, ta-aa’nke Ibne Umme Maktoob azaan de”.[30]

Faaeda: Hamaare yahaa’n azaan-e-awaal ke mutaalliq aam aadat ye hai ke usey azaan-e-tahajjud ka naam diya jaata hai, phir usey azaan-e-fajr se kam-az-kam ek ghante pehle kaha jaata hai, halaa’nke ye azaan qatai taur par tahajjud ke liye nahi, balke tahajjud padhne waalo’n ko waapas ghar lautaane ke liye di jaati hai. Taake wo araam kar le’n aur agar roza rakhna hai to sehri waghaira tanaawul kar le’n. Aur uska doosra maqsad ye bayan hua hai ke ye soe huwo’n ko bedaar karne ke liye hai, taake wo uthe’n aur apni hawaaej-e-zarooriya se faarigh ho kar namaz-e-fajr ke liye tayyari kare’n. Is kaam ke liye 15-20 minute hi kaafi hain, kyou’nke ahadees mein wazaahat hai ke dono hazraat ke azaan dene ke darmiyan sirf itna waqt hota ke pehli azaan se faraaghat ke baad wo neeche utar raha hota aur doosra azaan dene ke liye oopar jaa raha hota.[31]

Baab 14: Azaan Aur Takbeer Ke Darmiyan Kitna Waqt Hona Chaahiye Aur (us shakhs ka hukum) Jo Iqaamat Ka Intezaar Karta Hai?

[624] Hazrat Abdullah bin Maghfal Muzani (rz) se riwayat hai, Rasool Allah (s) ne farmaya: “Har do (2) azaano’n (azaan-o-iqaamat) ke darmiyan namaz hai”. Aap ne teen (3) dafa ye alfaaz kahe, phir farmaya: “ye namaz us shakhs ke liye hai jo padhna chaahe”.[32]

[625] Hazrat Anas bin Maalik (rz) se riwayat hai, unho’n ne farmaya: Jab moazzin azaan kehta tha, to Nabi (s) ke Sahaba Ikraam mein se kuch hazraat khade hote aur sutoono’n ke paas jaane mein jaane mein jaldi karte the, yahaa’n tak ke jab Rasool Allah (s) tashreef laate to-o-usi tarah maghrib se pehle do (2) rakat namaz padh rahe hote the. Nez azaan aur takbeer ke ke darmiyan kuch ziyaada faasla nahi hota tha. Usman bin Jabla aur Abu Dawood Hazrat Shu’ba se bayan karte hain ke un dono’n ke darmiyan bohot kam faasla hota tha.[33]

Faaeda: Is riwayat se ye bhi maaloom hota hai ke azaan aur takbeer ke darmiyan kam-az-kam itna faasla to zaroor hona chaahiye ke do (2) rakate’n padhi jaa sake’n. Chunache is hadees mein wazaahat hai ke Rasool Allah (s) ke Sahaba Ikraam (riz) maghrib ki azaan ke waqt masjid ke sutoono’n ka rukh karte, taake unhe’n sutra banakar jamat se pehle-pehle do (2) nafil padh sake’n. Phir jab Rasool Allah (s) ghar se masjid mein tashreef laate to Sahaba Ikraam (riz) abhi namaz mein mashghool hote the. Chunache ek aur hadees mein hai, Hazrat Anas (rz) farmate hain ke ham ghuroob-e-aftaab ke baad do (2) rakat adaa karte, jabke Rasool Allah (s) hame’n dekh rahe hote. Aap na to hame’n iska hukum dete aur na manaa hi farmate.[34]

Baab 15: Us Shakhs Ka Bayaan Jo Iqaamat Ka Intezaar Kare

[626] Hazrat Ayesha (rza) se riwayat hai, unho’n ne farmaya: Jab moazzin fajr ki azaan de kar khamosh ho jaata to fauran Rasool Allah (s) fajr ke zaahir hone ke baad namaz-e-fajr se pehle halki-phulki do (2) rakate’n adaa farmate, phir apne daae’n pehlu par lait jaate, ta-aa’nke moazzin takbeer ke liye aapke yahaa’n haazir-e-khimat hota.[35]

Faaeda: Is hadees mein takbeer ke etebaar se azaan-e-fajr ko pehli azaan kaha gaya hai. Goya is azaan ki do (2) haisiyate’n hain: Sehri ke muqable mein usey azaan-e-saani kaha jaata hai, aur jamat ke liye iqaamat ke etebaar se usey azaan-e-oola kaha gaya hai.

Baab 16: Agar Koi Chaahe To Har Azaan Aur Iqaamat Ke Darmiyan Nafil Namaz Padh Sakta Hai

[627] Hazrat Abdullah bin Mughaffal (rz) se riwayat hai ke Nabi (s) ne farmaya: “Har azan aur iqaamat ke darmiyan namaz hai. Har azan aur iqaamat ke darmiyan namaz hai”. Phir teesri martaba farmaya: “Agar koi padhna chaahe”.[36]

Baab 17: Us Shakhs Ka Mauqif Jo Kehta Hai Ke Safar Mein Ek Hi Moazzin Azaan De

[628] Hazrat Maalik bin Huwairis (rz) se riwayat hai, unho’n ne faramya: Main apni qaum ke chand aadmiyo’n ke hamraah Nabi (s) ki khidmat mein haazir hua aur ham ne aapke yahaa’n 20 raate’n qiyaam kiya. Aap intehaai meherban aur naram-dil the. Jab aapne mehsoos farmaya ek hamaara ishtiyaaq ahle khana ki taraf hai, to farmaya: “Apne gharo’n ko laut jaao. Apne ahle khana ke saath raho. Unhe’n deen ki taaleem do aur namaz padha karo. Azaan ka waqt aae to tum mein se koi azaan de, phir tum mein se jo bada ho wo imaamat ke faraaez sar-anjaam de”.[37]

Baab 18: Musaafir Agar Ziyaada Ho’n To Unhe’n Azaan Aur Iqaamat Kehni Chaahiye, Isi Tarah Arafaat Aur Muzdalifa Mein Bhi

Nez sardi aur bearish waali raat mein moazzin As Salah Fir Rihaali “الصلاة في الرحال” kahe

[629] Hazrat Abu Zar Ghaffari (rz) se riwayat hai, unho’n ne farmaya: Ham kisi safar mein Nabi (s) ke hamraah the, moazzin ne (zohar ki) azaan kehne ka iraada kiya to aap ne usse farmaya: “Zara thanda ho jaane do”. Usne phir azaan kehne ka iraada kiya to aap ne phir farmaya: “Zara aur thanda ho jaane do”. Usne teesri martaba azaan kehne ka iraada kiya to aap ne usse farmaya: “Zara mazeed thanda hone do”. yahaa’n tak ke jab saaya teelon ke baraabar ho gaya to Nabi (s) ne farmaya: “Garmi ki shiddat, jahannum ki bhaap se hoti hai”.[38]

[630] Hazrat Maalik bin Huwairis (rz) se riwayat hai, unho’n ne kaha: Do (2) aadmi Nabi (s) ki khidmat mein haazir hue, jo safar ka iraada rakhte the. Nabi (s) ne farmaya: “Jab tum safar par rawaana ho jaao to dauran-e-safar mein azaan do, aur takbeer kaho, phir tum mein se jo umr mein bada ho, wo imaamat karaae”.[39]

Faaeda: Is hadees mein waazeh taur par hukum hai ke dauran-e-safar mein azaan di jaae, takbeer bhi kahi jaae, aur phir ba-jamaat namaz adaa ki jaae. Is mein ameer ke hone ya naa hone ka koi zikr nahi. Lekin is hadees ke zaahiri siyaaq[40] se maaloom hota hai ke dono azaan de’n aur dono takbeer kahe’n. Baaz aslaaf ne ye mauqif ikhteyar kiya hai ke dauran-e-safar mein dono ko ba-yak-waqt azaan deni chaahiye, lekin unka mauqif marjooh[41]  hai. In alfaaz ka saheeh matlab ye hai ke tum mein se koi azaan de aur doosra takbeer kehde, jaisa ke H631 se maaloom hota hai.

[631] Hazrat Maalik bin Huwairis (rz) se riwayat hai, unho’n ne farmaya ke ham chand-ek ham-umr naujawan saathi Nabi (s) ki khidmat mein haazir hue, aur 20 din tak aap ke yahaa’n qiyaam kiya. Aap intehaai naram-dil aur bade meherbaan the. Jab aapne khayaal kiya ke hame’n apne ghar waalo’n ka shauq be-chain kar raha hai, to aap ne hamse unki ahwaal-pursi farmaai, jinhe’n ham apne peeche chode aae the. Ham ne aapko unke haalaat se agaah kiya to aap ne farmaya: “Waapas apne ahle-khaana ke paas laut jaao aur unhee’n ke paas raho. Unhe’n deen ki taaleem do, aur unhe’n acchi baato’n ki talqeen karo”. Aap ne mazeed baate’n bayan farmaee’n, jin mein se kuch mujhe yaad hain aur kuch yaad nahi. Nez aap ne farmaya: “Jis tarah tum ne muhe namaz padhte dekha hai, usi tarah namaz padha karo aur jab namaz ka waqt aajaae to tum mein se koi shakhs azaan kehde, albatta tum mein se umr ke etabaar se bada jaamat karaae”.[42]

[632] Hazrat Naafe se riwayat hai ke Hazrat Abdullah bin Umar (rz) ne ek martaba sakht sardi ki raat mein zajnaan pahaadi par azaan di. Phir farmaya: Apne apne thikaano’n mein namaz padhlo. Unho’n ne hame’n bataaya ke Rasool Allah (s) dauran-e-safar mein sakht sardi yaa bearish ki raat mein apne moazzin ko hukum dete the ke wo azaan kehne ke baad you’n kehde: “Tawaajo se suno! Apne apne thikaano’n mein namaz padhlo”.[43]

[633] Hazrat Abu Juhaifa (rz) se riwayat hai, unho’n ne farmaya: Maine Rasool Allah (s) ko waadi-e-batha mein dekha ke aapke paas Hazrat Bilal (rz) aae aur aapko namaz ki ittela di, phir neza le kar chale gae, ta-aa’nke usey Rasool Allah (s) ke saamne waadi-e-batha mein gaad diya, phir unho’n ne namaz ke liye takbeer kahi.[44]

Baab 19: Kya Moazzin Apna Mu’n Idhar-Udhar Pher Sakta Hai? Nez Kya Wo Azaan Mein Idhar-Udhar Dekh Sakta Hai?

Hazrat Bilal (rz) se manqool hai ke unho’n ne apni dono ungliyo’n ko apne kaano’n mein daala. (Uske bar-aks) Hazrat Ibne Umar (rz) apne kaano’n mein ungliyaa’n nahi dete the. Ibrahim Nakhai kehte hain: Baghair wazoo azaan dene mein koi harj nahi, jabke Hazrat Ataa ka kehna hai ke azaan mein wazoo saabit aur masnoon hai. Hazrat Ayesha (rza) farmati hain: Nabi (s) apne tamaam auqaat mein Allah ka zikr kiya karte the.

[634] Hazrat Abu Juhaifa (rz) se riwayat hai, unho’n ne Hazrat Bilal (rz) ko azaan kehte hue dekha. (Wo kehte hain:) Main bhi azaan dete waqt unke chehre ki itteba karte hue azaan mein apne chehre ko idhar-udhar pherta tha.[45]

Baab 20: Kisi Aadmi Ka Ye Kehna Ke Ham Se Namaz Faut Ho Gai (Iski Kya Haisiyat Hai?)

Imam Ibne Sireen ne isey makrooh khayaal kiya hai ke aadmi kahe: Hamaari namaz jaati rahi, balke is tarah kehna chaahiy ke ham namaz ko nahi paa-sakey, lekin Nabi (s) ka farmaan ziyaada shaeeh hai.

[635] Hazrat Abu Qatada (rz) se riwayat hai, unho’n ne farmaya: Ek dafa ham Nabi (s) ke hamraah namaz padh rahe the ke achaanak aapne logo’n ka kuch shor-o-ghul suna. Jab aap namaz se faarigh hue to farmaya: “Tumhara kya haal hai?” Unho’n ne arz kiya: Ham ne namaz mein shumooliyat ke liye bohot jaldi ki thi. Aap ne farmaya: “Aainda aisa na karna, balke jab tum namaz ke liye aao to wiqaar aur sukoon ko malhooz rakho, phir jis qadar namaz miley padhlo, aur jo reh jaae usey (baad mein) poora karlo”.

Baab 21: Namaz Ke Liye Daudkar Nahi Balke Sukoon Aur Wiqaar Se Aana Chaahiye

Rasool Allah (s) ne farmaya: “Jis qadar namaz tumhe’n mil jaae usey padhlo aur jo reh jaae usey poora karlo”. Ye masla Hazrat Abu Qatada (rz) ne Nabi (s) se bayan kiya hai.

[636] Hazrat Abu Huraira (rz) se riwayat hai, wo Nabi (s) se bayan karte hain, Aap ne farmaya: “Jab tum iqaamat suno to namaz ke liye sukoon-o-wiqaar ke saath chalo, tezi ikhteyar na karo, phir jis qadar namaz mil jaae padhlo, aur jo reh jaae usey (baad mein) poora karlo”.[46]

Faaeda: Salat-e-Masbooq (jis aadmi ki namaz ka kuch hissa faut ho jaae) ki tarteeb ka masla bhi is hadees ke tahat aata hai, kyou’nke is hadees ko bayan karne waale aksar raawi baaqi maandah namaz padhne ke liye lafz-e-itmaam bayan karte hain, jiska taqaaza hai ke uski namaz ka aakhri hissa reh gaya hai, usey poora karna hoga, jabke kuch raawi baaqi maanda namaz padhne ko lafz qazaa se taabeer se karte hain, jiska taqaaza hai ke imam ke saath adaa karda namaz aakhri hissa hai, usey pehle hisse ko poora karna hoga. Is ikhtelaaf ka nateeja us soorat mein bar-aamad hoga ke ek aadmi imam ke saath maghrib ki teesri rakaat mein shamil hota hai, Imam ke salaam pherne ke baad usne baaqi maanda do (2) rakat adaa karni hain. Itmaam waale (shawaafe) hazraat ke nazdeek agarche Imam ki aakhri rakat thi, lekin masbooq ki pehli rakat mukammal hai. Is liye salaam ke baad pehli rakat ke saath ek rakat milaakar tashahud baithega. Phir teesri rakaat padhkar qaaeda-e-akheera karega, aur salaam pherega. Iske bar-aks qazaa waale (ahnaaf) hazraat ka mauqif hai ke imam ke saath uski aakhri rakat adaa hui hai. Abh usne pehli aur doosri rakat padhni hai. Is liye wo salaam ke baad pehli rakat mein sana, ta’awwuz aur faatiha ke saath koi aur soorat bhi milaaega. Is tarah wo doosri rakat padhkar qaaeda-e-akheera baithega aur salaam pherega. Hamaare nazdeek pehli soorat raajeh hai, jiske hasb-e-zel dalaael hain: | Hazrat Ali (rz) se marwi hai ke Imam ke saath jo namaz tum paalo wo tumhaari pehli namaz hai.[47] | Itmaam إتمام ka hukum is baat ka suboot hai ke imam ke saath masbooq ne jitni namaz padhi thi, wo uski ibtedaai namaz thi, aur jin riwayaat mein lafz-e-qazaa hai, wo bhi itmaam ke maane mein hai, jaisa ke irshad-e-baari ta’ala hai:

فَإِذَا قُضِيَتِ الصَّلَاةُ فَانتَشِرُوا فِي الْأَرْضِ.

Phir Jab Namaz Adaa Ho Chuke To Zameen Mein Muntashir Ho Jaao.[48]

Agar imam ke saath padhi gai namaz masbooq ki aakhri rakat ho to usey baaqi maanda namaz ki aakhri rakat ke liye tasshhud padhne ki zaroorat nahi hai, kyou’nke wo imam ke saath usey padh chuka hai. Halaa’nke iska koi bhi qaael nahi hai, balke tamaam hazraat usey imam ke saath tasshahud padh lene ke ba-wujood bhi aakhri rakat mein tasshudh padhne ki talqeen karte hain.

Baab 22: Iqaamat Ke Waqt Log Imam Ko Dekhkar Kab Khade Ho’n?

[637] Hazrat Abu Qatada (rz) se riwayat hai, unho’n ne kaha: Rasool Allah (s) ne farmaya: “Jab namaz ki iqaamat kahi jaae to us waqt tak khade na ho, jab tak mujhe aata na dekh lo”.[49]

Faaeda: Logo’n ko jamaat ke liye kab khada hona chaahiye? Iske mutaalliq mutaqaddimeen mein ikhtelaaf hai. Yehi wajah hai ke Imam Bukhari (rh) ne koi faisla-kun unwaan qaaem nahi kiya. Kuch hazraat ka khayaal hai ke iqaamat khatam hone ke baad muqtadiyo’n ko uthna chaahiye, jabke kuch fuqaha kehte hain ke iqaamat ke aghaaz hi mein muqtadiyo’n ko namaz ke liye khada ho jaana chaahiye. Isi tarah baaz “حي على الصلاة” aur baaz “قد قامت الصلاة” kehne ke waqt uthne ke qaael hain. Tanqeeh-e-masla ye hai ke agar imam-e-masjid se baahar ho to muqtadiyo’n ko chaahiye ke jab wo masjid mein aajaae to saff-bandi ke liye khade ho’n. Agar wo masjid ke andar ho to jab wo apni jagah se jamaat ke liye uthe to muqtadi bhi us waqt khade ho’n. Mazkoora hadees ke zaahiri alfaaz se maaloom hota hai ke Rasool Allah (s) abhi ghar mein hote the ke namaz ke liye iqaamat kehdi jaati thi, lekin ek doosri hadees mein hai ke Hazrat Bilal (rz) us waqt tak takbeer na kehte the, jab tak Rasool Allah (s) ghar se bar-aamad na ho jaate. Unke darmiyan baae’n-taur par tatbeeq di gai hai ke Hazrat Bilal (rz) Rasool Allah (s) ke ghar se nikalne ka intezar karte rehte. Jab Rasool Allah (s) par Hazrat Bilal (rz) ki nazar padti to iqaamat kehna shuru kar dete, jabke Rasool Allah (s) aksar logo’n ki nigaho’n se ojhal hote the. Jab log aapko dekhte to namaz ke liye khade ho jaate, phir Rasool Allah (s) us waqt tak jamaat ke liye musalle par na aate, jab tak ke log apni safe’n durust na kar lete.[50]

Baab 23: Namaz Ke Liye Jald-baazi Karte Hue Daudne Ke Bajaae Itmenaan Aur Wiqaar Se Uthan Chaahiye

[638] Hazrat Abu Qatada (rz) hi se riwayat hai, unho’n ne kaha: Rasool Allah (s) ne farmaya: “Jab namaz ki iqaamat kahi jaae to us waqt tak na utho jab tak mujhe na dekh lo aur tum sukoon-o-wiqaar aur aahistagi ko khud par laazim rakho”. Ali bin Mubarak ne Shaiban raawi ki mataabeat ki hai.[51]

Baab 24: Kya (Iqaamat ke baad) Koi Kisi Uzr Ki Binaa Par Masji Se Nikal Sakta Hai?

[639] Hazrat Abu Huraira (rz) se riwayat hai ke ek martaba Rasool Allah (s) us waqt ghar se baahar tashreef laae jab namaz ke liye iqaamat ho chuki thi, aur safe’n bhi durust Karli gai thee’n, hatta ke jab Aap (s) musalle par khade ho gae to ham aapke Allahu Akbar kehne ka intezar karne lagey, lekin aap ne ham se farmaya: “Tum apni apni jagah par khade raho”. Aur khud waapas tashreef le gae, chunache ham sab apni apni jagah par khade rahe yahaa’n tak ke aap thodi der baad jab hamaare paas dobaara tashreef laae to aapke sar se paani tapak raha tha kyou’nke aap ne ghusl farmaya tha.[52]

Baab 25: Jab Imam Kahe: Tum Khade Raho Main Abhi Waapas Aata Hoo’n To Logo’n Ko Uska Intezaar Karna Chaahiye

[640] Hazrat Abu Huraira (rz) se riwayat hai, unho’n ne farmaya: Ek dafa namaz ke liye iqaamat ho chuki thi aur logo’n ne safe’n bhi durust Karli thee’n. Itne mein Rasool Allah (s) tashreef laae aur namaz ke liye aage badhe jabke aapko janaabat laahiq thi. Phir aap ne farmaya: “Tum apni jagah par thehre raho”. Chunache aap ghar laut gae aur ghusl farmaya. Jab dobaara tashreef laae to aapke sar-e-mubarak se paani tapak raha tha, phir aap ne logo’n ko namaz padhai.[53]

Faaeda: Jab imam kisi zaroorat ke pesh-e-nazar qabl-az namaz chalaa jaae aur kisi qareene se maaloom ho jaae ke laut kar waapas aaega to muqtadi hazraat ko uska intezaar karna chaahiye, ba-soorat-e-deegar koi doosra imam namaz padha sakta hai.

Baab 26: Aadmi Ka Nabi (s) Ye Kehna Ke Ham Ne Namaz Nahi Padhi

[641] Hazrat Jabir bin Abdullah (rz) se riwayat hai ke ghazwa-e-khandaq ke mauqa par Hazrat Umar bin Khattab Nabi (s) ki khidmat mein haazir hue aur arz karne lagey: Allah ke Rasool! Allah ki Qasam! Main namaz nahi padh saka yahaa’n tak ke sooraj ghuroob hone ke qareeb ho gaya. Ye guftagu rozedaar ke roza-e-iftaar karne ke baad hui. Nabi (s) ne farmaya: “Allah ki qasam! Main bhi namaz nahi padh saka”. Chunache aap neehce utre aur waadi-e-bathaan mein chale, main bhi aapke hamraah tha. Aap ne wazoo kiya aur aftaab ghuroob hone ke baad pehle namaz-e-asr padhi, uske baad maghrib ki namaz adaa ki.[54]

Baab 27: Iqaamat Ke Baad Agar Imam Ko Koi Zaroorat Pesh Aajae (to kya kare?)

[642] Hazrat Anas (rz) se riwayat hai, unho’n ne farmaya: Ek dafa namaz ke liye iqaamat ho gai jabke Nabi (s) masjid ke ek goshe mein kisi se aahista-aahista baate’n kar rahe the, chunache aap namaz ke liye khade nahi hue yahaa’n tak ke kuch logo’n ko neend aane lagi.[55]

Baab 28: Namaz Ke Liye Iqaamat Ho Jaane Ke Baad Guftagu Karna

[643] Humaid at Taweel farmate hain: Maine saabit banaani se aise aadmi ke baare mein poocha, jo iqaamat ke baad guftagu karta hai. To unho’n ne kaha: Hazrat Anas (rz) se riwayat hai, unho’n ne farmaya: Ek dafa namaz ke liye iqaamat ho chuki thi ke Nabi (s) ke paas ek aadmi aaya, usne aapko iqaamat ho jaane ke baad rok liya (aur baate’n karta raha).[56]

Faaeda: Ek riwayat mein hai: Rasool Allah (s) us shakhs se gosha-e-masjid mein ta-der guftagu karte rahe, yahaa’n tak ke logo’n ko oongh aane lagi.[57] Isse saabit hua ke kisi sheri muaamale se mutaalliq iqaamat aur takbeer-e-tehreema ke darmiyan guftagu karne mein chandaa’n harj nahi.

Baab 29: Namaz-e-Ba-jamaat Ka Waajib Hona

Imam Hasan Basri (rh) bayan karte hain agar walida mohtarma az-raah-e-shafaqat apne bete ko isha ki namaz ba-jamaat padhne se manaa kare to wo uska kaha na maane.

[644] Hazrat Abu Huraira (rz) se riwayat hai, Rasool Allah (s) ne farmaya: “Us zaat ki qasam jiske haath mein meri jaan hai! Maine iraada kar liya tha ke kisi ko lakdiya’n jamaa karne ka hukum doo’n taake lakdiyo’n ka dher lag jaae, phir namaz ke liye kisi ko azaan dene ke mutaalliq kahoo’n. Phir kisi shakhs ko hukum doo’n ke wo logo’n ka imam baney aur main khud un logo’n ke paas jaau’n (jo jamaat mein shareek nahi hote), phir unhe’n unke gharo’n samet jalaa doo’n. Us zaat ki qasam jiske haath mein meri jaan hai! Agar un mein se kisi ko maaloom ho jaae ke wo masjid mein moti haddi yaa do (2) umda gosht waale paae haasil kar le ga to wo namaz-e-isha mein zaroor haazir ho”.[58]

Baab 30: Namaz-e-Ba-jamaat Ki Fazilat

Hazrat Aswad bin Yazid (rh) ki agar namaz-e-ba-jamaat faut ho jaati to wo doosri masjid mein jaate.

Hazrat Anas (rz) ek masjid mein aae, jis mein namaz ho chuki thi to unho’n ne waha’n azaan di, phir iqaamat kehkar namaz-e-ba-jamaat adaa farmaai.

[645] Hazrat Abdullah bin Umar (rz) se riwayat hai, Rasool Allah (s) ne farmaya: “Namaz-e-ba-jamaat, akele shakhs ki namaz se 27 darje ziyaada fazilat rakhti hai”.[59]

[646] Hazrat Abu Saeed Khudri (rz) se riwayat hai, unho’n ne Nabi (s) ko ye farmate hue suna: “Jamaat ki namaz akele shakhs ki namaz se 25 darje ziyaada fazilat rakhti hai”.

[647] Hazrat Abu Huraira (rz) se riwayat hai, unho’n ne kaha: Rasool Allah (s) ne farmaya: “Aadmi ka ba-jamaat namaz adaa karna uske apne ghar aur apne bazaar mein namaz padhne se 25 guna ziyaada sawaab hai aur ye is tarah ke jab wo umda tareeqe se wazoo karke masjid ki taraf rawaana ho aur mahez namaz ke liye chale to jo qadam bhi uthaaega, uske badle uska ek (1) darja buland hoga aur ek (1) gunah bhi moaaf hoga. Phir jab wo namaz adaa kar le ga to jab tak apni jaae namaz par rahega, farishte uske liye dua karte rahe’nge, ke Ya Allah! Tu us par apna fazal-o-karam farma, Ya Allah! Tu us par raham-o-shafqat farma, aur jab tak tum mein se koi namaz ka intezaar karta hai to wo gaya namaz hi mein rehta hai”.[60]

Baab 31: Namaz-e-Fajr Ba-jamaat Padhne Ki Fazilat

[648] Hazrat Abu Huraira (rz) se riwayat hai, unho’n ne kaha: Maine Rasool Allah (s) ko ye farmate hue suna: “Namaz-e-ba-jamaat tanha shakhs ki namaz se sawab mein 25 darje ziyaada hai aur raat din ke farishte namaz-e-fajr mein jamaa hote hain”. Phir Hazrat Abu Huraira (rz) ne kaha: Agar tum chaaho to ye aayat padhlo: “Fajr mein quran ki tilaawat par farishte haazir hote hain”.[61]

Faaeda: Imam Bukhari (rh) ne is hadees mein namaz-e-fajr ba-jamaat adaa karne ki wajah-e-fazilat ko bayan kiya hai, ke us mein din raat ke farishte jamaa hote hain. Usi fazilat ke pesh-e-nazar Hazrat Umar (rz) farmate hain ke tamaam raat nawaafil padhne se mujhe ye ziyaada pasand hai ke namaz-e-fajr ki jamaat mein shirkat karoo’n. Ye fazilat namaz-e-asr ko bhi haasil hai, jaisa ke ahadees mein saraahat ke saath uska zikr hai.

[649] Hazrat Abdullah bin Umar (rz) se riwayat hai ke namaz-e-ba-jamaat ki fazilat tanha shakhs ki namaz se 27 darje ziyaada hai.[62]

[650] Hazrat Umme Darda (rh) se riwayat hai, unho’n ne kaha: Ek dafa Hazrat Abu Darda (rz) intehaai ghusse ki haalat mein mere paas tashreef laae. Maine arz kiya: Aapko kis baat ne ghazabnaak bana diya hai? Unho’n ne farmaya: Allah ki qasam! Hazrat Muhammad (s) ki laai hui shariyat se main ab koi baat nahi paata siwaae iske, ke log jamaat ke saath namaz padh lete hain.

[651] Hazrat Abu Moosa Ashari (rz) se riwayat hai, unho’n ne kaha: Nabi (s) ne farmaya: “Namaz ke mutaalliq sab logo’n se ziyaada sawab un hazraat ko milta hai, jinki masaafat masjid se door hai, phir (unse ziyaada unhe’n) jinki unse door hai aur jo shakhs Imam ke hamraah namaz padhne ka intezaar karta hai, ba-etebaar-e-sawaab ke us shakhs se badhkar hai jo namaz padhkar so jaata hai”.

Baab 32: Namaz-e-Zohar Awwal Waqt Par Padhne Ki Fazilat

[652] Hazrat Abu Huraira (rz) se riwayat hai, Rasool Allah (s) ne farmaya: “Ek shaksh raaste mein jaa raha tha, usne waha’n khaardaar tehni dekhi to usey ek taraf hataa diya. Allah Ta’ala ne uski qadar-daani karte hue usey moaaf kar diya”.[63]

[653] Phir Aap (s) ne farmaya: “Shohada 5 qism ke hain: Taaoon mein marne waale, pait ke aarze se marne waale, doob kar marne waale, dab kar marne waale aur Allah ki raah mein ladte hue Shaheed hone waale”. Iske baad aap ne farmaya: “Agar logo’n ko maaloom ho jaae ke azaan aur saff-e-awwal mein kya sawaab hai, to phir apne liye qura daalne ke liye siwa koi chaara na paae’n to zaroor qura-andaazi kare’n”.[64]

[654] (Aap ne farmaya:) “Agar logo’n koi lm ho ke (namaz-e-zohar ke liye) jaldi aane mein kitna sawaab hai to zaroor ek doosre se aage badhe’n, aur agar jaan le’n ke isha aur fajr ki namaz (ba-jamaat) adaa karne mein kya sawaab hai to un dono’n ki jamaat mein zaroor aae’n, agarche unhe’n sureno’n ke bal chalkar aana pade”.[65]

Baab 33: (Masjid Ko Jaate Waqt) Har Qadam Par Sawaab Ki Niyyat Karna

[655] Hazrat Anas (rz) se riwayat hai, unho’n ne kaha: Nabi (s) ne farmaya: “Aye Banu Salma! Tum apne qadmo’n ke badle sawaab ke talabgaar kyou’n nahi ho?”.

Hazrat Imam Mujahid (rh) ne irshad-e-Baari Ta’ala: “Ham Unke Wo Amaal Bhi Likhte Hain Jo Unho’n Ne Aage Bheje Aur Wo Asaar Bhi Jo Peeche Chodh Gae Hain”, ki tafseer karte hue farmaya: “آثَارَهُمْ” se muraad unke qadam hain.[66]

[656] Hazrat Anas (rz) hi se riwayat hai ke Banu Salama qabile ne naqal-e-makaani karke Nabi (s) ke qareeb rehne ka iraada kiya to Nabi (s) ne usey na-pasand farmaya, ke wo madina ko wiraan kar de’n. Phir aap ne unse farmaya: “Tum apne qadamo’n ke badle sawaab ke talabgaar kyou’n nahi ho?”

Imam Mujahid ne “آثَارَهُمْ” ki tafseer karte hue farmaya: Iske maane zameen par apne qadamo’n se chalne ke nishanaat hain.[67]

Baab 34: Namaz-e-Isha Ba-Jamaat Adaa Karne Ki Fazilat

[657] Hazrat Abu Huraira (rz) se riwayat hai, unho’n ne kaha: Nabi (s) ne farmaya: “Fajr aur Isha ki namaz se ziyada aur koi namaz munafiqeen par giraa’n nahi hai. Agar wo jaan le’n ke un dono’n mein kya (sawaab) hai to unke liye zaroor haazir ho’n, agarche unhe’n ghutno’n aur sureno’n ke bal chalkar aana pade. Maine pukhta iraada kar liya tha ke muezzin ko takbeer kehne ka hukum doo’n, phir kisi ko logo’n ki imaamat par maamoor karu’n, aur khud aag ke shole le kar un logo’n ko jalaa du’n jo abhi tak namaz ke liye nahi nikle”.[68]

Baab 35: Do (2) Yaa Do (2) Se Ziyaada Aadmi Jamaat Ke Hukum Mein Hain

[658] Hazrat Maalik bin Huwairis (rz) se riwayat hai, wo Nabi (s) se bayan karte hain, Aap ne farmaya: “Jab namaz ka waqt aajaae to tum mein se koi azaan de aur takbeer kahe, phir tum mein se badi umr waala imaamat karaae”.[69]

Baab 36: Masaajid Aur Un Mein Namaz Ke Intezaar Mein Baithne Ki Fazilat

[659] Hazrat Abu Huraira (rz) se riwayat hai, Rasool Allah (s) ne farmaya: “Farishte tum mein se us shakhs ke liye dua karte rehte hain jab tak wo apni jaae namaz par rahe, ba-sharte ke be-wazoo na ho. (Dua ye hai:) Aye Allah! Isey bakhsh de, Aye Allah! Is par raham farma, nez tum mein se har ek us waqt tak namaz hi mein rehta hai, jab tak namaz ne usey rok rakha ho, aur apne ghar waapas aane ke liye namaz ke alaawa aur koi cheez maane[70] “مانع” na ho”.[71]

Faaeda: Masjid mein namaz ke alaawa kisi aur maqsad ke liye thehra yaa namaz ke intezar ki niyyat mein kisi aur maqsad ko bhi shamil kar liya to mazkoora sawab ka haqdaar nahi hoga. Agar koi masjid se nikal jaata hai, lekin dobaara laut kar masjid mein hi doosri namaz adaa karne ki fikr mein rehta hai to usey bhi mazkoora sawaab nahi milega. Haa’n! Us qism ke aadmi ko aur nauiyyat[72] ka sawaab haasil hoga jise aainda hadees mein bayan kiya gaya hai.

[660] Hazrat Abu Huraira (rz) hi se riwayat hai, wo Nabi (s) se bayan karte hain ke Aap ne farmaya: “Saat (7) qism ke logo’n ko Allah Ta’ala apne saae mein jagah de ga, jis roz uske saae ke alaawa aur koi saaya na hoga. Insaaf karne waala hukumraan, wo naujawaan jo apne Rabb ki ibaadat mein parwaan chadhe, wo shakhs jiska dil masjido’n mein atka rehta ho, wo do (2) shakhs jo Allah ke liye dosti kare’n, jamaa ho’n to uske liye aur judaa ho’n to bhi uske liye, wo shakhs jise koi khoobru aur muazzaz aurat buraai ki daawat de aur wo kehde: Main Allah se darta hoo’n. Wo shakhs jo is qadar posheeda taur par sadqa de, ke uske baae’n haath ko bhi pataa na chale ke uska daaya’n haath kya kharch karta hai aur saatwa’n wo shakhs jo khilwat mein Allah ko yaad kare to (be-saakhta) uski aankho’n se aansu jaari ho jaae’n”.[73]

[661] Hazrat Anas (rz) se sawal kiya gaya: Kya Rasool Allah (s) ne anghoti banwaai thi? Unho’n ne farmaya: Haa’n! Ek din Aap (s) ne namaz-e-isha ko aadhi raat tak muakh-khar farmaya, namaz se faraaghat ke baad apne chehra-e-anwar se hamari taraf mutawajja hue aur farmaya: “Log to namaz padhkar so gae aur tum ne jab namaz ka intezar kiya to goya tum namaz hi ki haalat mein rahe”. Hazrat Anas (rz) ne farmaya: Goya main ab bhi us anghoti ki chamak dekh raha hoo’n, jo aap ne pehen rakhi thi.[74]

Baab 37: Masjid Mein Subah-o-Shaam Aamad-o-Raft Rakhne Waale Ki Fazilat

[662] Hazrat Abu Huraira (rz) se riwayat hai, wo Nabi (s) se bayan karte hain, aap ne farmaya: “Jo shakhs masjid ki taraf subah-o-shaam baar-baar aata-jaata hai, to Allah Ta’ala Jannat mein uski mehmaani taiyyaar karta hai, jab bhi wo subah-o-shaam (masjid mein) aata aur jaata hai”.

Baab 38: Namaz Ki Iqaamat Ke Baad Farz Namaz Ke Alaawa Aur Koi Namaz Nahi Hoti

[663] Hazrat Abdullah bin Maalik bin Buhaina se riwayat hai, unho’n ne kaha: Nabi (s) ek shakhs ke paas se guzre. Hafs bin Aasim (raawi-e-hadees) kehte hain: Maine azd qabile ke ek admi se suna, usey Maalik bin Buhaina kaha jaata tha ke Rasool Allah (s) ne ek shakhs ko do (2) rakat namaz padhte dekha, jabke namaz ke liye iqaamat ho chuki thi. Jab Rasool Allah (s) namaz se faarigh hue to logo’n ne us aadmi ko gher liya. Rasool Allah (s) ne us shakhs se farmaya: “Kya subah ki 4 rakate’n hain? Kya subah ki 4 rakate’n hain?”.

Ghundar aur Moaaz ne Bahaz bin Asad ki mataabe-at ki hai, wo Shu’ba se bayan karte hain aur Shu’ba Maalik se riwayat karte hain. Ibne Ishaq ne iski sanad bayan karte hue kaha: “عن سعد عن حفص عن عبد الله ابن بحينه” A’an Saad a’an Hafs a’an Abdullah bin Buhaina. Hammad ne iski sanad baae’n-taur bayan ki: Hame’n Saad ne khabar di, usne Hafs se byan kiya, wo Maalik se riwayat karte hain.

Faaeda: Is unwaan se maaloom hota hai ke jab takbeer ho jaae to har qism ki namaz manaa hai, khwah sunnat ho’n yaa nawaafil, aur raatiba[75] ho’n yaa ghair raatibah. Albatta alfaaz ke eteaar se har qism ke faraaez isse khaarij hain.

Baab 39: Mareez Ko Kis Hadd Tak (ki bimaari mein) Jamaat Ke Liye Aana Chaahiye

[664] Hazrat Aswad (rh) farmate hain ke ham Hazrat Ayesha (rza) ke paas baithe hue the, us dauran mein ham ne namaz ki paabandi aur uski azmat ka zikr kiya to Hazrat Ayesha (rza) ne farmaya: Jab Rasool Allah (s) marz-e-wafaat mein mubtalaa hue aur namaz ke liye azaan hui to aap ne farmaya: “Abu Bakar se akho ke wo logo’n ko namaz padhaae’n”. Us waqt aapse arz kiya gaya: Abu Bakar bade naram dil insaan hain, jab wo aap ki jagah khade ho’nge to (shiddat-e-gham se) logo’n ko namaz nahi padha sake’nge. Aap ne dobaara wohi hukum diya to phir wohi arz kiya gaya. Aap ne teesri martaba phir wohi kaha aur farmaya: “Tum Hazrat Yusuf (a) ke saath waali aurto’n ki tarah ho, Abu Bakar se kaho ke wo logo’n ko namaz padhaae’n”. Chunache Hazrat Abu Bakar (rz) namaz padhane ke liye tashreef le gae. Uske baad Rasool Allah (s) ne apni bimaari mein kuch kami mehsoos ki, to aap do (2) aadmiyo’n ke darmiyan sahaara le kar nikle. Goya main ab bhi aapke dono paao’n dekh rahi hoo’n ke wo kamzori ki wajah se zameen par ghaseet-te jaa rahe the. Hazrat Abu Bakar (rz) ne aapko dekh kar peeche hanta chaaha to Nabi (s) ne unhe’n ishaara farmaya ke apni jagah par raho. Phir aapko laaya gaya ta-aa’nke aap Abu Bakar (rz) ke pehlu mein baith gae.

Hazrat Amash se dariyaaft kiya gaya: Aaya Nabi (s) namaz padha rahe the aur Hazrat Abu Bakar (rz) aap ki iqteda kar rahe the, aur log Hazrat Abu Bakar (rz) ki iqteda mein namaz padh rahe the? To Hazrat Amash ne sar ke ishare se haa’n mein jawaab diya. Abu Dawood (Tayaalsi) ne is hadees ka kuch hissa Shu’ba se riwayat kiya hai. Aur Abu Muawiya ne Hazrat Amash se jo riwayat bayan ki hai us mein mundarja-zel alfaaz ka izaafa hai: Rasool Allah (s) Hazrat Abu Bakar (rz) ki baaee’n jaanib baith gae, jabke Abu Bakar (rz) ne khade ho kar namaz adaa ki.[76]

Faaeda: Rasool Allah (s) ka apni azwaaj-e-mutahharaat ko Hazrat Yusuf (a) ke saath waali aurte’n qaraar dene se muraad ye tha ke jis tarah unho’n ne khilaaf-e-baatin ka izhar kiya, usi tarah tumhare dil mein baat kuch aur hai, aur zaahir kuch aur kar rahi ho. Dar-asl Yusuf (a) ki saath waali aurto’n se muraad Aziz-e-Misr ki biwi hai. Isi tarah aap ne agarche jamaa ka segha istemaal karke sab azwaaj ko mukhatib kiya, lekin muraad sirf Hazrat Ayesha (rza) thee’n. Is mushaabahat ki tafseel kuch you’n hai ke aziz-e-misr ki biwi ne khawateen-e-misr ki daawat ka ehtemaam kiya, ba-zaahir wo unki mehman nawaazi kar rahi thi, lekin maqsood ye tha ke wo bhi zara husn-e-yusuf ka nazaarah kar le’n. Taake mujhe ek zar-khareed ghulam se mohabbat karne mein mazoor khayaal kare’n. Usi tarah Hazrat Ayesha (rza) ba-zaahir ye keh rahi thee’n ke unke waalid riqqat-e-qalbi ki wajah se jamaat nahi karwa sake’nge, lehaaza ye zimmedaari kisi aur ke supurd ki jaae, lekin unka maqsood ye tha ke aise haalaat mein Abu Bakar (rz) ke musalla-e-nabuwwat par khade hone se log bad-shagoni le’nge. Is liye Hazrat Abu Bakar (rz) ke mutaalliq uzr-khwahi kar rahi thee’n, jaisa ke Hazrat Ayesha (rza) ne khud ek hadees mein iski wazaahat farmaai hai.[77]

[665] Hazrat Ayesha (rz) se riwwayat hai, unho’n ne farmaya: Jab Nabi (s) bimaar hue aur aap ki bimaari shiddat ikhteyar kar gai to aap ne apni biwiyo’n se ijaazat chaahi ke mere ghar aap ki timaardaari ki jaae. Tamaam biwiyo’n ne ijaazat dedi. Chunache aap do (2) aadmiyo’n ka sahaara le kar nikle, jabke aapke paao’n ghisat[78] rahe the. Aap us waqt Hazrat Abbas (rz) aur ek doosre aadmi ke darmiyan the.

Raawi-e-hadees Hazrat Obaidullah bin Abdullah kehte hain: Maine Hazrat Ibne Abbas (rz) se Hazrat Ayesha (rza) ki is baat ka tazkira kiya to aap ne farmaya: Kya tumhe’n maaloom hai ke Dosra aadmi kaun tha, jiska Hazrat Ayesha (rza) ne naam nahi liya? Maine kaha: Nahi. Kehne lagey: Ali bin Abi Taalib (rz) the.[79]

Baab 40: Baarish Yaa Kisi Aur Uzr Ki Wajah Se Ghar Mein Namaz Padhne Ki Ijaazat

[666] Hazrat Naafe (rh) bayan karte hain k eek sard aur tez aandhi ki raat ko Hazrat Abdullah bin Umar (rz) ne azaan di, phir kaha: Logo! Apne apne ghar mein namaz padhlo. Uske baad farmaya: Jab kabhi shab-e-baad-o-baaraa’n[80]  ka saamna hota to Rasool Allah (s) moazzin ko hukum dete ke wo “أَلَاصَلُّوْا فِيْ الرِّحَالِ” ke de, yaane apne gharo’n mein namaz padh lene ka elaan kar de.[81]

[667] Hazrat Mahmood bin Rabeea Ansari (rz) se riwayat hai ke Hazrat Itbaan bin Maalik (rz) naabina the aur apni qaum ke imam the. Unho’n ne Rasool Allah (s) se darkhwaast ki ke Andheri aur siyaah raate’n hoti hain, aur main naabina shakhs hoo’n (masjid mein haazir nahi ho sakta). Lehaza aap mere ghar mein kisi muqaam par namaz padh le’n taake main is jagah aapna “musalla” banaaloo’n. Chunacha Rasool Allah (s) uske yahaa’n tashreef le gae aur farmaya: “Tum meri namaz ke liye kis jagah ka intekhaab karte ho?” Unho’n ne apne ghar mein ek jagah ki taraf ishaara kar diya, chunache Rasool Allah (s) ne waha’n namaz adaa farmaai.[82]

Faaeda: Rasool Allah (s) ne Hazrat Itbaan (rz) ko tark jamaat ki ijaazat dedi lekin Hazrat Ibne Umme Maktoom (rz) ko ijaazat na di, jabke wo bhi naabina the, uski chand-ek wujuhaat ho sakti hain, masalan: | Rasool Allah (s) ne Hazrat Itbaan (rz) ke liye rukhsat ko pasand farmaya aur Hazrat Ibne Umme Maktoob (rz) ke liye azimat ka intekaab farmaya. | Hazrat Itbaan (rz) ke liye rukhsat ko pasand farmaya aur Hazrat Ibne Umme Maktoom (rz) ke liye azimat ka intekhaab farmaya. | Hazrat Itbaan (rz) azaan na sunte ho’nge, jabke Hazrat Ibne Umme Maktoom (rz) azaan ki awaaz sunte the, jaisa ke hadees mein iski saraahat hai. | Mumkin hai Hazrat Ibne Umme Maktoom (rz) ka uzr Hazrat Itbaan (rz) ke muqaable mein kam darje ka ho, is liye unhe’n ijaazat nahi di gai.

Baab 41: Kya Imam Baarish Ke Waqt Haazireen Ko Namaz Padhaae? Nez, Kya Juma Ke Din Baarish Mein Bhi Khutbe Ka Ehtemaam Kare?

[668] Hazrat Ibne Abbas (rz) se riwayat hai, unho’n ne bearish aur keechad ke din logo’n ke saamne khutba diya aur moazzin ko hukum diya ke jab wo “حي على الصلاة” par pohnche to is tarah kahe: “Logo’n! Apni apni qiyaam-gaaho’n par namaz padhlo”. Ye sun kar waha’n maujood log ek doosre ki taraf dekhne lagey. Gya unho’n ne usey bura mehsoos kiiya. Hazrat Ibne Abbas (rz) ne farmaya: Mujhe aisa maaloom hota hai ke tumne usey bura khayaal kiya hai? Halaa’nke ye kaam us shakhsiyat ne kiya hai jo mujhse kahee’n behtar thi, yaane Nabi (s) ne. Choo’nke azaan se masjid mein aana zaroori ho jaata hai, is liye maine accha nahi samjha ke tumhe’n takleef mein daaloo’n.

Aasim ki riwayat bhi isi tarah hai, albatta iske aakhri alfaaz is tarah hain ke Abdullah bin Abbas (rz) ne farmaya: Main nahi chahta ke tumhe’n gunah mein mubtalaa karoo’n, tum tang-dili ke saath ghanto’n tak keechad ko raundte[83]  hue masjid mein aao.[84]

Faaeda: Hadees ke zaahir alfaaz se maaloom hota hai ke Hazrat Ibne Abbas (rz) ne azaan se pehle khutba diya, halaa’nke khutbe ka waqt azaan ke baad hai, pehle nahi? Iska jawaab ye hai ke us muqaam par fe’l se muraad iraada-e-fe’l hai, yaane jab Hazrat Ibne Abbas (rz) ne khutba dene ka iraada kiya to us waqt moazzin ko hidaayat ki, ke azaan mein “أَلَاصَلُّوْا فِيْ الرِّحَال” ke de.[85]

[669] Hazrat Abu Salama (rh) se riwayat hai, unho’nne kaha: Maine Hazrat Abu Saeed Khudri (rz) se (shab-e-qadar ke mutaalliq) dariyaaft kiya to aap ne farmaya: Baadal ka ek tukda aaya aur khoob barsa, yahaa’n tak ke masjid ki chatt tapakne lagi, jo-ke khajoor ki shaakho’n se taiyyaar ki gai thi. Uske baad namaz ke liye iqaamat kahi gai. Maine Rasool Allah (s) ko paani aur mitti mein sajda karte hue dekha. yahaa’n tak ke keechad ka nishaan maine aap ki peshaani par bhi dekha.[86]

[670] Hazrat Anas (rz) se riwayat hai, unho’n ne farmaya: Ek Ansari shakhs ne (Rasool Allah (s) se) arz kiya ke wo aapke saath namaz nahi padh sakta, kyou’nke wo ghair maamooli motaape ka shikaar tha. Chunache usne Nabi (s) ke liye khana taiyyaar kiya aur aapko apne ghar aane ki daawat di. (Aap uske ghar tashreef le gae to) usne aapke liye ek chataai bichaai. Uske ek kinaare ko dho kar us par aap ne do (2) rakate’n adaa kee’n. Aal-e-Jaarood mein se ek aadmi ne Hazrat Anas (rz) se dariyaaft kiya: Aaya Nabi (s) namaz-e-chaasht padha karte the? Hazrat Anas (rz) ne jawab diya: Maine us roz ke alaawa kabhi aapko ye namaz padhte nahi dekha.[87]

Baab 42: Dauraan-e-Iqaamat Mein Agar Khana Aajaae

Hazrat Abdullah bin Umar (rz) (aise halaat mein namaz se) pehle raat ka khana tanaawul farmate. Aur Hazrat Abu Darda (rz) ka irshad-e-giraami hai: Aadmi ka pehle apni zaroorat ko poora kar lena taake itmenaan-e-qalb ke saath namaz ki taraf mutawajja ho, uske aqalmandi hone ki alaamat hai.

[671] Hazrat Ayesha (rza) se riwayat hai, Nabi (s) ne farmaya: “Agar dauran-e-iqaamat mein khana saamne rakh diya jaae to pehle khana khaalo”.[88]

[672] Hazrat Anas (rz) se riwayat hai, Rasool Allah (s) ne farmaya: “Jab khana saamne rakh diya jaae to namaz maghrib se pehle khana khaalo aur apna khana chodhkar namaz ke liye ujlat[89] na karo”.[90]

[673] Hazrat Abdullah bin Umar (rz) se riwayat hai, unho’n ne kaha: Rasool Allah (s) ne farmaya: “Jab tum mein se kisi ka khana saamne rakh diya jaae aur us dauraan mein namaz ke liye iqaamat kehdi jaae to pehle khana tanaawul kar le, jaldi na kare balke khaane se faraaghat haasil kare”. Hazrat Abdulalh bin Umar (rz) ki aadat thi ke agar unke liye khana rakh diya jaata aur us dauraan mein iqaamat ho jaati, to jab tak khaane se faarigh na ho jaate, namaz mein shareek na hua karte the, halaa’nke wo imam ki qirat bhi sun rahe hote the.[91]

Faaeda: Hazrat Abdullah bin Umar (rz) ka mazkoora amal unka apna ikhtiyar karda ijatihaad hai, hamaare nazdeek behtar hai ke agar insaan is qadar rakha chuka ho ke itemanaan-e-qalb ke saath namaz padh sakey to namaz ki taraf mutawajja hona chaahiye. Mukammal taur par khane se faraaghat zaroori nahi. Rasool Allah (s) ka amal-e-mubarak bhi hamaare is mauqif ka muaiyyad[92] hai. Hadees mein hai ke Rasool Allah (s) ek martaba shaane ka gosht khaa rahe the ke aapko namaz ke liye bulaya gaya, aap ne gosht wahee’n rakha aur namaz ke liye khade ho gae.[93]

[674] Hazrat Abdullah bin Umar (rz) se riwayat hai, unho’n ne kaha: Nabi (s) ne farmaya: “Jab tum mein se koi khana kha raha ho to jaldi naa kare, ta-aa’nke khane se apni zaroorat poori kar le, agarche namaz khadi ho chuki ho”.

Is hadees ko Ibrahim bin Munzir ne Wahab bin Usman se riwayat kiya hai, aur Wahab madani hai.[94]

Baab 43: Jab Imam Ko Namaz Ke Liye Bulaya Jaae Aur Uske Haath Mein Koi Cheez Ho Jise Wo Khaa Raha Ho

[675] Hazrat Amr bin Umaiyya (rz) se riwayat hai, unho’n ne kaha ke maine Rasool Allah (s) ko shaane ka gosht kaat-kaat kar khaate hue dekha. Itne mein aapko namaz ke liye bulaya gaya. Aap ne churi ko wahee’n phenk diya aur namaz ke liye uth-khade hue. Chunache aap ne namaz padhaai aur wazoo nahi kiya.[95]

Baab 44: Jamaat Khadi Ho Jaae To Gharelu Masrufiyaat Tark Karke Namaz Mein Shareek Hona Chaahiye

[676] Hazrat Aswad se riwayat hai, unho’n ne kaha: Maine Hazrat Ayesha (rz) se Nabi (s) ki gharelu masrufiyaat ke mutaalliq sawaal kiya to unho’n ne farmaya: Aap (s) apne ahle khana ki khidmat mein masroof rehte aur jab namaz ka waqt aajaata to aap namaz ke liye tashreef le jaate.[96]

Baab 45: Masnoon Tareeqa-e-Namaz Sikhaane Ke Liye Logo’n Ke Saamne Namaz Padhna

[677] Hazrat Abu Qilaaba se riwayat hai, unho’n ne kaha: Hamaare paas us masjid mein ek dafaa Hazrat Maalik bin Huwairis (rz) tashreef laae aur farmaane lagey: Main tumhare saamne namaz padhta hoo’n, halaa’nke meri niyyat namaz padhne ki nahi. Mera maqsad sirf ye hai ke tumhe’n wo tareeqa bataau’n jis tareeqe se Nabi (s) namaz padha karte the. (Raawi-e-hadees Ayyub ne kaha:) Maine Abu Qilaaba se sawaal kiya: Unho’n ne kis tarah tarah namaz padhi thi? Abu Qilaaba ne jawab diya: Hamaare is buzurg (Amr bin Salma) ki tarah. Hamaare wo buzurg jab pehli rakat mein sajde se sar uthaate to khade hone se pehle zara baith jaaya karte the.[97]

Baab 46: Saaheb-e-Ilm-o-Fazal Imaamat Ka Ziyada Hadaar Hai

[678] Hazrat Abu Moosa Ashari (rz) se riwayat hai, unho’n ne farmaya: Jab Nabi (s) bimaar hue aur bimaari ne shiddat ikhteyar ki, to aap ne farmaya: “Abu Bakar se kaho, wo logo’n ko namaz padhaae’n”. Is par Hazrat Ayesha (rza) goya huee’n: Wo naram-dil aadmi hain, jab aap ki jagah khade ho’nge to logo’n ko namaz na padha sake’nge. Aap ne farmaya: “Abu Bakar se kaho, wo logo’n ko namaz padhaae’n”. Hazrat Ayesha (rza) ne pehle waali baat phir keh di. Aap (s) ne se-baara[98] farmaya: “Tum Abu bakar se kaho, wo logo’n ko namaz padhaae’n, tum aurte’n mujhe Hazrat Yusuf (a) ke saath waali aurte’n maaloom hoti ho”.

Phir ek aadmi Hazrat Abu Bakar (rz) ke paas aaya aur unho’n ne Nabi (s) ki hayaat-e-mubaraka hi mein logo’n ko namaz padhaai.[99]

[679] Hazrat Ummul Momineen Ayesha (rza) se riwayat hai, unho’n ne kaha: Rasool Allah (s) ne apne ayyam-e-alaalat mein farmaya: “Abu Bakar (rz) se kaho, wo logo’n ko namaz padhaae’n”. Hazrat Ayesha (rza) farmati hain: Maine arz kiya: Abu Bakar (rz) aap ki jagah khade ho kar (fart-e-gham se) rone lage’nge. Is wajah se logo’n ko unki awaaz sunaai nahi degi. Lehaza aap Hazrat Umar (rz) ko hukum de’n ke wo logo’n ko namaz padhaae, Hazrat Ayesha (rz) farmati hain ke maine Hazrat Hafsa (rza) se kaha ke tum bhi Rasool Allah (s) se kaho ke Abu Bakar (rz) jab Aap ki jagah khade ho’nge to girye[100] ke baais logo’n ko apni awaaz nahi suna sake’nge, is liye aap Hazrat Umar (rz) ko hukum de’n ke wo logo’n ko namaz padhaae’n. Chunache Hazrat Hafsa (rza) ne arz kiya to Rasool Allah (s) ne farmaya: “Khamosh raho, yaqeenan tum Yusuf (a) ke saath waali aurto’n ki tarah ho. Abu Bakar (rz) ne arz kiya to Rasool Allah (s) ne farmaya: “Khamosh raho, yaqeenan tum Yusuf (a) ke saath waali aurto’n ki tarah ho”. Abu Bakar (rz) se kaho, wo logo’n ko padhaae’n”. Us par Hazrat Hafsa (rza) ne Hazrat Ayesha (rza) se kaha: Maine kabhi tumse koi faaeda nahi paaya.[101]

[680] Hazrat Anas (rz) se riwayat hai, jo Nabi (s) ke pairokaar, khidmat-guzaar aur sohbat-daar hain. Unho’n ne farmaya: Hazrat Abu Bakar Siddiq (rz) Nabi (s) ke marz-e-wafaat mein logo’n ko namaz padhaate the. Peer ke din jab log namaz ke liye saff-basta the, to Nabi (s) ne apne hujre ka parda uthaya aur khade ho kar logo’n ki taraf dekhne lagey. Us waqt aapka chehra (husn-o-jamaal aur ra’naai-o-zebaai mein) Goya mushaf ka warq tha. Phir aap bashashat[102] ke saath muskuraae to ham logo’n ko intehaai khusi hui, andesha tha ke ham Nabi (s) ko dekhte dekhte namaz se ghaafil ho jaae’n. Uske baad Hazrat Abu Bakar Siddiq (rz) ultey peeche lotne lagey, taake logo’n ki saff mein shaail ho jaae’n. Wo samajhne ke Nabi (s) namaz ke liye tashreef laa rahe hain. Lekin aap ne hamari taraf ishaara kiya ke apni namaz poori karlo. Phir aap ne parda daal diya aur usi din aap ne wafaat paai.[103]

[681] Hazrat Anas (rz) se riwayat hai, unho’n ne farmaya: Nabi (s) ayyam-e-alaalat mein teen (3) din tak baahar tashreef na laa sakey. Phir ek din namaz ke liye takbeer ho chuki thi, aur Hazrat Abu Bakar (rz) jamaat ke liye pesh-qadmi karne ko the ke Allah ke Nabi (s) ne (hujre ka) parda uthaaya. Aap ka rukh zeba dikhaai diya. Yaqeenan aapke rooe anwar se badhkar haseen-o-jameel manzar ham ne kabhi na dekha tha. Nabi (s) ne apne haath se ishaara karke Hazrat Abu Bakar (rz) ko namaz kel iye aage badhne ko kaha aur parda giraa diya. Uske baad koi bhi aapko na dekh saka, hatta ke aap daai-e-ajal ko labbaik keh gae.[104]  إِنَّا لِلّٰهِ وَإِنَّا إِلَيْهِ رَاجِعُوْنَ

[682] Hazrat Abdullah bin Umar (rz) se riwayat hai, unho’n ne farmaya: Jab Rasool Allah (s) ki bimaari shiddat ikhteyar kar gai, us dauraan mein aap se namaz ka kaha gaya to aap ne irshad farmaya: “Abu Bakar se kaho, wo logo’n ko namaz padha de’n”. Hazrat Ayesha (rza) ne arz kiya: Abu Bakar Siddiq (rz) bohot naram-dil aadmi hain, jab qirat kare’nge to shiddat gham se rone lage’nge. Aap ne farmaya: “Unse kaho, wo namaz padhaae’n, tum to bilkul Yusuf (a) ke saath waali aurto’n maaloom hoti ho”. Is hadees ki mataabeat Muhammad bin Waleed Zubaidi, Zohri ke bateeje aur Ishaq bin Yahya Kalbi ne Zohri se ki hai. Aur Aqeel aur Ma’amar ne bhi Zohri se, unho’n ne Hamza bin Abdullah bin Umar se, unho’n ne Hamza bin Abdullah bin Umar se, unho’n ne Nabi-e-Akram (s) se bayan kiya hai.[105]

Baab 47: Uzr Ki Wajah Se Muqtadi Ka Imaam Ke Pehlu Mein Khade Hona

[683] Hazrat Ayesha (rza) se riwayat hai, unho’n ne farmaya: Rasool Allah (s) ne dauran-e-alaalat mein hukum diya ke Hazrat Abu Bakar (rz) logo’n ko namaz padhae’n, chunache wo wo us dauran mein namaz padhate rahe. Hazrat Urwah kehte hain: Ek din Rasool Allah (s) ne kuch ifaaqa mehsoos kiya, chunache aap baahar tashreef laae to dekha ke Hazrat Abu Bakar (rz) logo’n ko namaz padha rahe hain. Jab Hazrat Abu Bakar (rz) ki nigaah Aap (s) par padi to unho’n ne peeche hanta chaaha lekin aap ne ishaara farmaya ke apni jagah par raho. Uske baad Rasool Allah (s) Hazrat Abu Bakar (rz) ke pehlu mein unke baraabar baith gae. Andaree’n halaat Hazrat Abu Bakar (rz) Rasool Allah (s) ki iqteda mein namaz adaa kar rahe the aur deegar log Hazrat Abu Bakar (rz) ki iqteda mein namaz padh rahe the.[106]

Baab 48: Ek Shakhs Imaamat Karaae Us Dauraan Mein Imam-e-Awwal Aajaae To Ab Pehla Shakhs Peeche Hate Ya Naa Hate, Uski Namaz Jaaez Hai

Is silsile mein Nabi (s) Hazrat Ayesha (rza) ki ek riwayat maujood hai.

[684] Hazrat Sahal bin Saad Saa’di (rz) se riwayat hai ke Rasool Allah (s) Amr bin Awf qabile mein sulah karane ke liye tashreef le gae. Jab namaz ka waqt hua to moazzin ne Hazrat Abu Bakar (rz) ke paas aakar kaha: Agar aap namaz padhae’n to mein iqaamat keh doo’n? Unho’n ne farmaya: Haa’n. Uske baad Hazrat Abu Bakar (rz) namaz padhaaen lagey. Itne mein Rasool Allah (s) tashreef le aae jabke log namaz mein masroof the. Aap safo’n mein guzarkar pehli saff mein pohonche. Us par logo’n ne taaliya’n peetna shuru kar de’n, lekin Abu Bakar (rz) apni namaz mein idhar-udhar dekhne ke aadi na the. Jab logo’n ne musalsal taaliya’n bajaee’n to Hazrat Abu Bakar (rz) mutawajja hue to Rasool Allah (s) par unki nazar padi (wo peeche hatne lagey) to Rasool Allah (s) ne ishaara kiya: Tum apni jagah par thehre raho. Us par Hazrat Abu Bakar (rz) ne apne dono haath uthakar Allah Ta’ala ka shukar adaa kiya ke Rasool Allah (s) ne unhe’n imaamat ka ezaaz bakhshna hai, taaham wo peeche hatkar logo’n ki saff mein shamil hogae aur Rasool Allah (s) ne aage badhkar namaz padhaai. Faraaghat ke baad aap ne farmaya: “Aye Abu Bakar! Jab maine tumhe’n hukum diya tha to tum khade kyou’n na rahe?” Hazrat Abu Bakar (rz) ne arz kiya: Abu Quhaafa ke bete ki kya majaal ke wo Rasool Allah (s) ke aage namaz padhaae. Phir Rasool Allah (s) ne logo’n ki taraf mutawajja ho kar farmaya: “Kya wajah hai ke maine tumhe’n ba-kasrat taaliya’n bajaate hue dekha? (dekho!) jab kisi ko dauran-e-namaz mein koi baat pesh aajaae to Subhan-Allah kehna chaahiye kyou’nke jab wo Subhan Aallah kahega to uski taraf tawajjo di jaaegi aur taali bajaana to sirf aurto’n ke liye hai”.[107]

Baab 49: Agar Tamaam Namazi Qirat Mein Barabar Ho’n To Badi Umar Waala Imam Bane

[685] Hazrat Malik bin Huwairis (rz) riwayat hai, unho’n ne kaha: Ham Nabi (s) ki khidmat mein haazir hue, ham chand-ek naujawan the. Ham taqriban 20 raate’n Rasool Allah (s) ke yahaa’n muqeem rahe. Aap intehaai meherbaan aur rahem-dil the. Aap ne (hamari ghareeb-ul-watani ko mehsso kiya aur) farmaya: “Jab tum apne watan ko laut kar jaao to unhe’n deen ki taaleem se araasta karna. Unhe’n talqeen karna ke falaa’n-falaa’n namaz, falaa’n-falaa’n waqt mein adaa kare’n. Jab namaz ka waqt ho jaae to koi ek azaan de aur jo umr mein bada ho wo imaamat karaae”.[108]

Baab 50: Jab Imam Kisi Qaum Ke yahaa’n Jaae To Unhe’n Namaz Padha Sakta Hai

[686] Hazrat Itbaan bin Maalik (rz) se riwayat hai, unho’n ne kaha: Nabi (s) ne mere ghar aane ki ijaazat talab farmaai. Maine aapko ijaazat dedi. Aap ne dariyaaft farmaya: “Tum apne ghar ke kaunse hisse mein mera namaz padhana pasand karte ho?” Maine makaan ke us kone ki taraf ishaara kar diya jise main pasand karta tha. Chunache aap khade ho gae, ham ne bhi aapke peeche saff baandhi. Aakhir mein aap ne salaam phera to ham ne bhi salaam pher diya.[109]

Faaeda: Asal ye hai ke jab koi shakhs kisi ke yahaa’n mulaqaat ke liye jaae to na imaamat ke musalle par khada ho aur na unki masnad-e-izzat par hi farokash ho jaisa ke hadees mein hai. Albatta do (2) soorato’n mein mehman ko mezbaan ke ghar mein imam banaaya jaa sakta hai: | Mezbaan khud mehman se imaamat ki darkhwaast kare yaa usey ijaazat dede. | Mehman bada imam, yaane khalifa-e-waqt ho, mezbaan ko chaahiye ke agar mehman khalifa-e-waqt hai to khud hi usey imaamat ki peshkash karde. Haafiz Ibne Hajar (rh) farmate hain ke jin riwayaat mein doosre ke ghar jaakar imaamat na karaane ka zikr hai. Imam Bukhari (rh) us hukum-e-imtenaai se “khalifa-e-waqt” ko mustashna qaraar dena chaahte hain ke usey ijaazat hai jaha’n jaae wahaa’n namaz padhaae kyou’nke usey wilayat-e-uzma haasil hai. Is bina par unwan mein imam ki qaid ehteraazi[110] hai.

Baab 51: Imam Is Liye Muqarrar Kiya Jaata Hai Ke Uski Pairawi Ki Jaae

Nabi (s) ne marz-e-wafaat mein logo’n ko baithkar namaz padhai (jabke log khade hue the) Hazrat Abdullah bin Masood (rz) ne farmaya: Jo shakhs imam se pehle (rukoo yaa sajde se) sar uthaale, wo dobaara rukoo yaa sajde mein chala jaae aur itni der thehra rahe jitni der usne sar uthaae rakha tha, phir Imam ki periwi kare. Imam Hasan Basri (rh) ne farmaya: Jo shakhs imam ke saath do (2) rakat adaa kare, lekin (bheed ki wajah se) sajda na kar sakey, wo doosri rakat ke liye do (2) sajde kare. Phir pehli rakat sajdo’n samet dobaara padhe. Aur jo shakhs bhoolkar sajda kiye baghair khada ho gaya, wo saje mein chala jaae.

Wazaahat: Isse maqsood imaamat ka taqaaza bayan karna hai ke muqtadi tamaam ahwaal-o-amaal mein imam ki iqteda kare, na to imam ke saath-saath chale aur na imam se aage badhne ki koshish kare aur na uski mukhalefat hi ka irtekaab kare. Albatta aisee mukhalefat kar sakta hai jiske mutaalliq koi sharai daleel ho. Masalan: Imam kisi majboori ki binaa par agar baithkar jamaat karaata hai to muqtadi hazraat uski mukhalefat karte hue khade ho kar namaz padhe’nge.

[687] Hazrat Obaidullah bin Abdullah bin Utbah se riwayat hai, unho’n ne kaha: Main Hazrat Ayesha (rza) ki khidmat mein haazir hua aur arz kiya: Aap mujhe Rasool Allah (s) ke marz-e-wafaat ke mutaalliq kuch bataana pasand farmae’ngi? Hazrat Ayesha (rza) ne farmaya: Kyou’n nahi, suniye jab Nabi (s) bimaar the, to aap ne dariyaaft farmaya: “Log namaz padh chuke hain?” Ham ne arz kiya: Nahi, Yaa Rasool Allah! Balke wo aapke muntazir hain. Uske baad aap ne farmaya: “Mere liye ek lagan mein paani bhardo”. Hazrat Ayesha (rza) ne farmaya: Ham ne aisa hi kiya, chunache aap ne ghusl farmaya: Phir uthne lagey to behosh ho gae. Jab hosh aaya to Aap (s) ne farmaya: “Kya log namaz padh chuke hain?” Ham ne arz kiya: Nahi, Yaa Rasool Allah! Wo to aap ke muntazir hain. Aap ne farmaya: “Mere liye tub mein paani rakh do”. Hazrat Ayesha (rza) ka bayan hai ke aap baith gae aur ghusl farmaya. Phir jab aap ne khade hone ka iraada kiya to behosh ho gae. Uske baad hosh aaya to aap ne farmaya: “Kya log namaz padh chuke hain?” Ham ne kaha: Nahi, Yaa Rasool Allah! Wo aap ke muntazir hain. Log isha ki namaz ke liye masjid mein baithe Rasool Allah (s) ka intezar kar rahe the. Anjaam-e-kaar Nabi (s) ne Hazrat Abu Bakar (rz) ke paas ek aadmi bheja aur hukum diya ke wo logo’n ko namaz padhaae’n. Aap (s) ka farsitaada[111] unke paas aaya aur kaha ke Rasool Allah (s) aapko hukum de rahe hain ke aap logo’n ko namaz padhaae’n. Hazrat Abu Bakar (rz) choo’nke intehaai naram-dil insan the, is liye unho’n ne Hazrat Umar (rz) se kaha: Aye Umar! Tum logo’n ko namaz padhaa do. Hazrat Umar (rz) ne unse kaha: Aap us mansab ke ziyaada haqdaar hain. Chunache Hazrat Abu Bakar (rz) ne un dino’n logo’n ko namaze’n padhaae’n. Uske baad Nabi (s) ne apne marz mein kuch ifaaqa mehsoos farmaya to aap do (2) aadmiyo’n ke darmiyan sahaara le kar namaz-e-zohar ke liye bar-aamad hue. Un mein se ek (1) Hazrat Abbas (rz) the. Us waqt Hazrat Abu Bakar (rz) logo’n ko namaz padha rahe the. Jab aapko Hazrat Abu Bakar (rz) ne dekha to peeche hatne lagey. Magar Nabi (s) ne ishaara farmaya ke peeche naa the’n. Phir aap ne farmaya: “Mujhe unke pehlu mein bithaado”. Chunache un dono’n ne aap ko Abu Bakar (rz) ke pehlu mein bithaa diya. Us waqt Hazrat Abu Bakar (rz) to khade ho kar Nabi (s) ki iqteda mein namaz padh rahe the, jabke log Hazrat Abu Bakar (rz) ki iqteda mein namaz adaa kar rahe the, aur Nabi (s) baithe hue the.

Obaidullah ne kaha: Phir main Abdullah bin Abbas (rz) ke paas gaya aur unse kaha ke wo hadees tumhare gosh-e-guzaar karu’n, jo mujhse Hazrat Ayesha (rza) ne Rasool Allah (s) ke marz-e-wafaat ke mutaalliq bayan ki hai? Unho’n ne farmaya: Pesh karo. Maine unke saamne Hazrat Ayesha (rza) ki bayan karda hadees pesh ki to Hazrat Ibne Abbas (rz) ne us mein se kisi baat ka inkaar na kiya, sirf itna kaha ke Hazrat Ayesha (rza) ne tumhe us shakhs ka naam bhi bataaya jo Hazrat Abbas (rz) ke hamraah tha? Maine kaha: Nahi. Ibne Abbas (rz) ne farmaya: Wo Hazrat Ali (rz) the.[112]

[688] Ummul Momineen Hazrat Ayesha (rza) se riwayat hai, unho’n ne farmaya: Ek martaba Rasool Allah (s) ne apne ghar mein namaz padhi. Choo’nke aap bimaar the, is liye aap baith kar namaz padh rahe the, jabke log dauran-e-namaz mein aapke peeche khade the. Aap ne unhe’n baith jaane ka ishaara farmaya. Phir jab aap namaz se faarigh hue to farmaya: “Imam is liye banaaya jaata hai ke uski peirwee ki jaae, jab wo rukoo mein chala jaae to tum bhi rukoo mein chale jaae, aur jab wo sar uthaae to tum bhi sar uthaalo, aur jab wo “سَمِعَ اللهُ لِمَنْ حَمِدَهُ” Sami Allahu Liman Hamida kahe to tum “رَبَّنَا لَكَ الْحَمْدُ” Rabbana Wa Lakal Hamd kaho, aur jab wo baith kar namaz padhe to tum bhi baith kar namaz padho”.[113]

[689] Hazrat Anas bin Maalik (rz) se riwayat hai, ek martaba Rasool Allah (s) ghode par sawaar hue to us par se gir pade, jisse aapke daae’n pehlu mein chote’n aaee’n. Chunache aap ne ek namaz baith kar padhi to ham ne bhi aapke peeche baith kar wo nama padhi. Jab aap ne salaam phera to farmaya: “Imam is liye muqarrar kiya jaata hai ke uski iqteda ki jaae, lehaaza jab wo khada ho kar namaz padhe to tum bhi khade ho kar namaz padho. Jab wo rukoo kare to tum bhi rukoo karo, jab wo sar uthaae to tum bhi sar uthaao aur jab wo “سَمِعَ اللهُ لِمَنْ حَمِدَهُ” Sami Allahu Liman Hamida kahe to tum “رَبَّنَا لَكَ الْحَمْدُ” Rabbana Wa Lakal Hamd kaho, aur jab wo khada ho kar namaz padhe to tum bhi khade ho kar namaz padho, aur jab wo baith kar namaz padhe to tum bhi baith kar namaz padho”.

Abu Abdullah (Imam Bukhari (rh)) farmate hain ke Rasool Allah (s) ke farmaan: “Jab imam baith kar namaz padhe to tum bhi baith kar namaz padho”. Iske mutaalliq Imam Humaidi bayan karte hain ke Nabi (s) ka mazkoora farmaan aap ki pehli bimaari ke mutaalliq hai. Uske baad aap ne khud (marz-e-wafaat mein) baith kar namaz padhaai, jabke log aapke peeche khade hue the. Aap ne unhe’n baithne ka hukum nahi diya. Qaaeda bhi hai ke Nabi (s) ke aakhri aur aakhri amal ko liya jaae.[114]

Baab 52: Imam Ke Peeche Khada Hone Waala Kab Sajda Kare?

Hazrat Anas (rz) bayan karte hain jab imam sajde mein jaae to phir tum sajda karo.

[690] Hazrat Baraa bin Aazib (rz) …jo jhoote nahi hain… unse riwayat hai, unho’n ne farmaya: Jab Rasool Allah (s) “سَمِعَ اللهُ لِمَنْ حَمِدَهُ” Sami Allahu Liman Hamida kehte to ham mein se koi shakhs apni kamar na jhukaata, hatta ke Nabi (s) sajde mein chale jaate. Phir ham aapke baad sajda-rez hote.

Ham se Abu Nayeem ne bayan kiya, unho’n ne kaha: Ham se Sufiyan Soori ne, unho’n ne Abu Ishaq se isi ki misl (hadees) bayan ki.[115]

Baab 53: Us Shakhs Ke Gunah Ka Bayaan Jisne (Rukoo Aur Sajde Mein) Imam Se Pehle Sar Uthaaya

[691] Hazrat Abu Huraira (rz) se riwayat hai, wo Nabi (s) se bayan karte hain ke Aap ne farmaya: “Tum mein se jo shakhs apna sar imam se pehle uthaata hai, usey kya is baat ka khauf nahi ke Allah Ta’ala uske sar ko gadhe ke sar jaisa bana de? Yaa uski soorat gadhe ki soorat jaisee banaade?”.

Faaeda: Agarche is hadees mein imam se pehle sar uthaane waale ke liye waeed ka bayaan hai, taaham dauran-e-namaz mein koi kaam bhi imam se pehle sar-anjaam dena manaa hai.

Baab 54: Ghulam Aur Aazaad Karda Ghulam Ki Imaamat

Hazrat Ayesha (rza) ki imaamat unka ghulam Zakwan quran se dekh kar kiya karta tha. Isi tarah walad-uz-zina, eraabi[116] aur na-baaligh ladke ki imaamat bhi jaaez hai, kyou’nke irshad-e-nabawi (s) hai: “Logo’n ki imaamat wo shaksh karaae jo sabse ziyaada quran padha hua ho”. Nez Ghualm ko bila-wajah jamaat karaane se nahi roka jaa sakta.

[692] Hazrat Abdullah bin Umar (rz) se riwayat hai, unho’n ne farmaya: Rasool Allah (s) ki madina aamad se qabl jab awwaleen muhajireen quba ke muqaam “Usbah” par pohonche to unki imaamat Saalim, Maula Abu Huzaifa (rz) kiya karte the. Unhe’n sabse ziyaada quran yaad tha.[117]

Faaeda: Baaz hazraat ne na-baaligh ki imaamat ko naajaaez kaha hai. Wo ek hadees pesh karte hain, jise Musannaf Abdur Razzaq ke hawaale se Haafiz Ibne Hajar (rh) ne bayan kiya hai, ke baccha baaligh hone tak imaamat na karaae, lekin ye riwayat zaeef hai. Imam Bukhari (rh) ne apni saheeh mein ek waaqea naqal kiya hai, ke Amr bin Salama (rz) apni qaum ki imaamat karaate the, jabke unki umr 7 saal thi.[118]

[693] Hazrat Anas bin Maalik (rz) se riwayat hai, wo Nabi (s) se bayan karte hain ke Aap ne farmaya: “Apne  haakim ki baat suno aur uski itaa-at karo, agarche koi siyaah-faam habshi hi tum par haakim bana diya aae, jiska sar munaqqe jaisa ho”.[119]

Baab 55: Agar Imam Apni Namaz Ko Poora Na Kare Aur Muqtadi Poora Kar Le’n

[694] Hazrat Abu Huraira (rz) se riwayat hai ke Rasool Allah (s) ne farmaya: “Jo log tumhe’n namaz padhaate hain agar theek-theek padhaae’nge to tumhare liye aur unke liye bhi sawaab hai, aur agar wo ghalati kare’nge to tumhare liye to sawaab hai, lekin un par gunah hoga”.

Baab 56: Fitna Parwar Aur bidati Ki Imaamat Ka Bayaan

Imam Hasan Basri (rh) farmate hain ke bidati ke peeche namaz padhlo, uski bidat ka gunah sirf us par hoga.

[695] Hazrat Obaidulalh bin Adi se riwayat hai ke wo Hazrat Usman (rz) ke paas us waqt haazir-e-khidmat hue jab aap nazar-band the, aur aap se arz kiya ke aap to tamaam logo’n ke imam hain aur aap ek aisee aazmaaesh se do-chaar hain jise ham dekh rahe hain. Soorat-e-haal ye hai ke hame’n imam-e-fitna namaz padhaata hai, jisse ham tang-dil hote hain. Hazrat Usman (rz) ne farmaya: Namaz logo’n ke amaal mein se accha amal hai, jab log umda kaam kare’n to tum bhi unke saath acchaai mein shaamil ho jaao aur jab wo bura kaam kare’n to tum unki buraai se alag raho.

Zubaidi ne kaha: Imam Zohri farmate hain ke ham mukhannas[120] ke peeche namaz padhne ko saheeh nahi samajhte. Haa’n agar koi aisee zaroorat ho jiske baghair koi chaara na ho, to aise haalaat mein koi harj nahi hai.

[696] Hazrat Anas (rz) se riwayat hai, unho’n ne kaha: Nabi (s) ne Hazrat Abu Zar (rz) se farmaya ke ameer ka hukum suno, aur uski farma-bardaari karo agarche wo habshi ghulam ho jiska sar angoor ki tarah ho.[121]

Faaeda: Waazeh rahe ke bidat agar kufr-o-shirk tak pohonch jaae to uska hukum shirk hi ka hai, ke jis arha mushrik ki iqteda jaaez nahi usi tarah bidat-e-mukaffirah ka haamil insan bhi imaamat ke ahl nahi. Agar wo bidat-e-mukaffirah ka haamil nahi to ba-waqt-e-zaroorat kabhi uski iqteda mein namaz padhli jaae to jaaez hoga. Uska hukum faasiq ka hai aur uske peeche namaz saheeh hai. Albatta bidati aur fitna-parwar ko mustaqil taur par imam nahi banana chaahiye. والله أعلم

Baab 57: Agar Imam Aur Muqtadi Do (2) Hi Aadmi Ho’n to Muqtadi Imam Ki Daaee’n Jaanib Uske Bilkul Baraabar Khada Ho

[697] Hazrat Ibne Abbas (rz) se riwayat hai, unho’n ne farmaya: Maine ek martaba apni khaala Hazrat Maimoona (rza) ke ghar raat basar ki. Rasool Allah (s) isha ki namaz se faraaghat ke baad ghar tashreef laae aur chaar (4) rakat namaz padhkar so gae. Baad-zaa’n (namaz ke liye) uthe to main bhi aap ki baaee’n jaanib khada ho gaya. Aap ne mujhe apni daaee’n jaanib khada kiya, phir paanch (5) rakate’n padhee’n. Uske baad do (2) rakat (sunnat-e-fajr) padhkar so gae, yahaa’n tak ke maine aapke kharaato’n ki awaaz suni. Phir aap subah ki namaz ke liye tashreef le gae.[122]

Baab 58: Jab Koi Imam Ki Baaee’n Jaanib Khada Ho Aur Imam Usey Apni Daaee’n Jaanib Pher De To Kisi Ki Namaz Faasid Nahi Hogi

[698] Hazrat Ibne Abbas (rz) se riwayat hai, unho’n ne farmaya: Main ek raat Hazrat Maimoona (rza) ke yahaa’n so gaya. Nabi (s) bhi us raat unke paas the. Aap ne wazoo farmaya, phir uthkar nafil padhne lagey. Main bhi aap ki baaee’n jaanib khada ho gaya. Aap ne mujhe pakda aur apni daaee’n jaanib kar diya. Aap terah (13) rakat padh kar so gae, yahaa’n tak ke aap kharaate lene lagey aur ye aap ki aadat thi ke jab sote to kharaate lete the. Uske baad moazzin aaya, aap tashreef le gae aur namaz padhaai aur wazoo na kiya.

Amr bin Haaris kehte hain ke maine jab Bakeer bin Abdullah se ye hadees li to usne Hazrat Kuraib se baraah-e-raast usey bayaan kiye.[123]

Baab 59: Jab Imam Imaamat Ki Niyyat Nahi Karta, Lekin Logo’n Ke Aane Par Jamaat Karaade To (Kya Hukum Hai?)

[699] Hazrat Ibne Abbas (rz) se riwayat hai, unho’n ne farmaya: Maine apni khala Hazrat Maimoona (razz) ke yahaa’n raat basar ki. Jab Nabi (s) raat ko namaz padhne ke liye khade hue to main bhi aapke saath baaee’n jaanib khada ho gaya. Aap ne mera sar pakada aur mujhe apni daaee’n jaanib khada kar liya.[124]

Faaeda: Jamhoor ka mauqif hai ke agar koi shakhs akela namaz padh raha ho, aur usne imaamat ki niyyat na ki ho aur kuch log az-khud uski iqteda mein namaz adaa karne lage’n to unki namaz saheeh hai. Lehaza hanaabela ka farz-o-nawaafil mein farq karna saheeh nahi hai.

Baab 60: Jab Imam Qirat Lambi Karde Aur Koi Zaroorat-mand Nikal Kar Akela Namaz Padhle

[700] Hazrat Jaabir bin Abdullah (rz) se riwayat hai ke Hazrat Moaaz bin Jabal (rz) Nabi (s) ke saath isha ki namaz padhte, uske baad waapas lautkar apni qaum ki imaamat karaate.[125]

[701] Hazrat Jaabir bin Abdullah (rz) se riwayat hai, unho’n ne farmaya: Hazrat Moaaz bin Jabal (rz) Nabi (s) ke hamraah namaz (e isha) padhte the. Faraaghat ke baad waapas jaakar apni qaum ki imaamat karte. Ek roz unho’n ne namaz-e-isha mein Surah Baqara padhi to ek shakhs ne namaz todhkar chal diya. Hazrat Moaaz bin Jabal (rz) usey bura-bhala kete the. Ye khabar Nabi (s) ko pohonchi to aap ne (Hazrat Moaaz (rz) se) teen (3) dafa farmaya: فَتَّانٌ “Fattaanun, fattaanun, fattaanun (fitna-parwar)”. Yaa ye farmaya: فَاتِنًا “Faatinan, faatinan, faatinan (fitna-pardaaz)”. Phir aap ne unhe’n hukum diya ke ausaat-e-mufassil ki do (2) soorate’n padha karo.

Raawi-e-hadees Amr kehte hain ke main unko bhool gaya hoo’n.[126]

Faaeda: Is hadees se ye bhi pataa chalta hai ke Nabil padhne waale ke peeche farz padhe jaa sakte hain, jaisa ke Hazrat Moaaz (rz) ke mutaliq baaz turq mein saraahat hai ke doosri martaba adaa ki hui namaz unke liye nafil aur logo’n ke liye farz hoti thi.[127]

Baab 61: Imam Ka Qiyaam Mein Takhfeef Lekin Rukoo Aur Sujood Ko Poora Adaa Karna

[702] Hazrat Abu Masood Ansari (rz) se riwayat hai ke ek aadmi ne arz kiya: Alah ke Rasool! Allah ki qasam! Main namaz-e-fajr mein falaa’n shakhs ki tawaalat ki wajah se peech reh jaata hoo’n. Maine Rasool Allah (s) ko kabhi naseehat ke waqt us din se ziyaada ghazabnaak nahi dekha. Uske baad aap ne farmaya: “Tum mein se kuch log doosro’n ko mutanaffir karte hain, lehza jo shakhs tum mein se logo’n ko namaz padhaae to ikhtesaar se kaam le, kyou’nke muqtadiyo’n mein kamzor, boodhe, aur zaroorat-mand bhi hote hain”.[128]

Baab 62: Jab Koi Shakhs Tanha Namaz Padhe To Jis Qadar Chaahe Taweel Kar Sakta Hai

[703] Hazrat Abu Huraira (rz) se riwayat hai, unho’n ne kaha ke Rasool Allah (s) ne farmaya: “Jab tum mein se koi shakhs logo’n ko namaz padhaae to takfeef kare. Kyou’nke un mein kamzor, bimaar aur boodhe hote hain aur jab wo khud akela padhe to jis qadar chaahe tawaalat kare”.

Baab 63: Agar Koi Imam Qirat Lambi Kare To Doosra Uski Shikaayat Karde

Hazrat Abu Asyad (rz) ne apne bete se kaha ke toone hamari namaz ko taweel kar diya.

[704] Hazrat Abu Masood Ansari (rz) se riwayat hai, unho’n ne kaha ke ek aadmi ne arz kiya: Allah ke Rasool! Main namaz-e-fajr se is liye peeche reh jaata hoo’n ke falaa’n shakhs us mein tawaalat karta hai. Rasool Allah (s) ye sun kar bohot naaraaz hue. Maine Rasool Allah (s) ko waaz karte waqt us din se ziyaada kabhi izhar-e-naaraazi karte hue nahi dekha. Phir aap ne farmaya: “Aye logo! Tum mein se kuch doosro’n ki nafrat ka baais bante hain, lehaaza tum mein se jo shakhs namaz padhaae to usey ikhtesaar se kaam lena chaahiye, kyou’nke uske peeche kamzor, natawaa’n, boodhe aur zaroorat-mand bhi hote hain”.[129]

[705] Hazrat Jabir bin Abdullah Ansari (rz) se riwayat hai, unho’n ne farmaya: Ek shakhs aab-paashi[130] ke do (2) oont le kar aaya jabke raat kaafi guzar chuki thi. Ittefaaqan Hazrat Moaaz (rz) namaz padha rahe the. Usne apne oont bithae aur Hazrat Moaaz (rz) ki taraf namaz ke liye chala aaya. Unho’n ne Surah Baqara yaa Surah Nisa padhni shuru kardi, chunache wo shakhs waha’n se chala gaya aur usey maaloom hua ke Hazrat Moaaz ne uske mutaalliq koi takleef-deh baat kahi hai. Wo shakhs Nabi (s) ke paas aaya aur aapse Hazrat Moaaz (rz) ki shikaayat ki, to Aap ne teen (3) martaba farmaya: “Aye Moaaz! Kya tu fitna-parwar yaa fitna-angez hai? Toone “سَبِّحِ اسْمَ رَبِّكَ الْأَعْلَى”, “وَالشَّمْسِ وَضُحَاهَا” aur “وَاللَّيْلِ إِذَا يَغْشَىٰ” ke saath namaz kyou’n nahi padhaai. Jake tere peeche umar-raseeda, natawaa’n, aur zaroorat-mand log namaz padhte hain”. (Shu’ba kehte hain) Mere gumaan ke mutaaibq aakhri jumla bhi hadees ka hissa hai.

(Imam Bukhari (rh) farmate hain ke ye hadees bayan karne mein) Saeed bin Masrooq, Mis-ar aur Shaibaani ne Hazrat Shu’ba ki mataabe-at ki hai. Amr bin Dinar, Obaidullah bin Miqsam aur Abu Zubair ne Hazrat Jabir (rz) se is riwayat ko baae’n-alfaaz[131] bayan kiya hai ke Hazrat Moaaz (rz) ne namaz-e-isha mein Surah Baqara tilaawat ki thi, ne Muharib se bayan karne mein Imam Amash ne bhi Shu’ba ki mataabe-at ki hai.[132]

Baab 64: Namaz Mein Ikhtesaar Ke Ba-wujood Usey Poore Taur Par Adaa Karna

[706] Hazrat Anas (rz) se riwayat hai, unho’n ne farmaya ke Nabi (s) namaz ko mukhtasar padhte aur usey mukammal bhi karte the.

Baab 65: Us Shakhs Ka Bayan Jo Bacche Ke Rone Ki Awaaz Sun Kar Namaz Ko Mukhtasar Karde

[707] Hazrat Abu Qatada (rz) se riwayat hai, wo Nabi (s) se bayan karte hain ke aap ne farmaya: “Main namaz shuru karta hoo’n to usey tool-dena[133] chaahta hoo’n, phir main bacche ke rone ki awaaz suntan hoo’n to namaz ko mukhtasar kar deta hoo’n. Usko naa-pasand karte hue ke us (bacche) ki maa’n ko takleef mein mubtalaa karu’n”.

Bashar bin Bakar, Ibne Mubarak aur baqiya ne Imam Auzaai se is riwayat ko bayan karne mein Waleed bin Muslim ki mataabe-at ki hai.[134]

[708] Hazrat Anas (rz) se riwayat hai, farmate hain ke maine kisi imam ke peeche namaz nahi padhi jo Nabi (s) se ziyada mukhtasar aur usey mukammal taur par adaa karne waala ho. Beshak aap bacche ka girya[135] sun kar namaz ko halka kar dete the, mabaada uski maa’n pareshan ho jaae.

Faaeda: Imam Bukhari (rh) ke saabeqa unwanaat mein muqtadi hazraat ki riaayat karte hue namaz mein takhfeef kar dene ka zikr tha. Is baab mein aisee riwayaat pesh ki hain, jin se pataa chalta hai ke muqtadi hazraat ke alaawa doosre logo’n ki riaaayat karte hue bhi namaz ko mukhtasar kiya jaa sakta hai, lekin ghair-muqtadi ka kisi na kisi tarah muqtadi se taalluq zaroor hota hai, jaisa ke is riwayat mein hai. Kyou’nke namaz mein takhfeef ka sabab agarche bacche ka rona hai, lekin dar-haqeeqat uska taalluq maa ki mamta se hai. Goya takhfeef maa ki khaatir hi ki jaa rahi hai.[136]

[709] Hazrat Anas (rz) se riwayat hai ke Allah ke Nabi (s) ne farmaya: “Main namaz ke aghaaz ke aqt usey tool dene ka iraada karta hoo’n, lekin bacche ka rona sun kar usey mukhtasar kar deta hoo’n. Kyou’nke mujhe maaloom hai ke bacche ke rone se uski maa ko pareshani aur tashweesh laahiq hogi”.[137]

[710] Hazrat Anas (rz) se riwayat hai wo Nabi (s) se bayan karte hain ke aap ne farmaya: “Maine namaz shuru karte waqt usey tool dene ka iraada karta hoo’n, lekin bacche ke rone ki awaaz sun kar usey mukhtasar kar deta hoo’n, kyou’nke uske rone se main mehsoos karta hoo’n ke maa ki mamta tadap jaaegi”.

(Raawi-e-hadees) Moosa (a) ne kaha ke ham se Abaan ne hadees bayan ki, usse Qatada ne, phir usne Hazrat Anas se usey bayan kiya. Hazrat Anas (rz) Nabi (s) se usi tarah bayan karte hain.[138]

Baab 66: Jab Khud Namaz Padh Chuka Ho, Phir Logo’n Ki Imaamat Karaae (To Uska Kya Hukum Hai?)

[711] Hazrat Jabir (rz) se riwayat hai, unho’n ne farmaya ke Hazrat Moaaz (rz) Nabi (s) ke hamraah namaz padhte phir apni qaum ke paas jaate aur unhe’n namaz padhaate the.[139]

Baab 67: Jo Logo’n Ko Imam Ki Takbeer Sunaae

Wazaahat: Agar imam ki awaaz kisi wajah se pasth[140] ho yaa muqtadi ziyaada ho’n to imam ki takbiraat logo’n tak pohochaane ke liye kisi ko bataur-e-mukabbir muqarrar kiya jaa sakta hai. Lekin speaker ki maujoodgi mein aaj uski zaroorat nahi hai.

[712] Hazrat Ayesha (rza) se riwayat hai, unho’n ne farmaya ke jab Nabi (s) marz-e-wafat mein mubtalaa hue to aap ke paas Hazrat Bilal (rz) namaz ki ittela dene ke liye aae. Aap ne farmaya: “Abu Bakar se kaho wo logo’n ko namaz padha de’n”. Maine arz kiya ke Abu Bakar ek naram-dil aadmi hain, agar aap ki jagah khade ho’nge to rone lage’nge aur qirat par qaadir nahi ho’nge. Aap ne farmaya: “Abu Bakar (rz) se kaho ke wo namaz padhaae’n”. Maine phir wohi arz kiya to aap ne teesri yaa chauthi martaba farmaya: “Tum to Yusuf (a) waali aurto’n ki misl ho. Abu Bakar se kaho ke wo logo’n ko namaz padhaae’n”. Chunache Hazrat Abu Bakar (rz) ne namaz padhana shuru ki to Nabi (s) do (2) admiyo’n ke sahaare baahar tashreef laae. Goya main us waqt bhi aap ki taraf dekh rahi hoo’n ke aapke dono paao’n zameen par ghaseet-te jaate the. Jab Hazrat Abu Bakar (rz) ne aapko dekha to peeche hatne lagey, magar Aap (s) ne ishare se farmaya ke namaz padhate raho, lekin Abu Bakar (rz) kuch peeche hat gae, aur Nabi (s) unke pehlu mein baith gae. Hazrat Abu Bakar (rz) logo’n ko aap ki takbiraat sunaate the.

Muhaazir ne Imam Amash se riwayat karne mein Abdullah bin Dawood ki mataabe-at ki hai.[141]

Baab 68: Ek Shakhs Imam Ki Iqteda Kare Aur Baaqi Muqtadi Us Shakhs Ki Iqteda Kare’n

Nabi (s) se manqool hai ke aap ne farmaya: “Tum log meri iqteda karo aur tumhare baad waale tumhari iqteda kare’n”.

[713] Hazrat Ayesha (rza) se riwayat hai, unho’n ne farmaya: Jab Rasool Allah (s) bimaar hue to Hazrat Bilal (rz) aapke paas namaz ki ittela dene ke liye haazir hue. Aap ne farmaya: “Abu Bakar se kaho wo logo’n ko namaz padha de’n”. Maine kaha: Allah ke Rasool! Hazrat Abu Bakar (rz) ek naram-dil insan hain, is liye jab wo aap ki jagah par khade ho’nge to logo’n ko apni awaaz na suna sake’nge. Agar aap Hazrat Umar (rz) ko hukum de’n (to behtar hai). Aap ne farmaya: “Abu Bakar se kaho wo logo’n ko namaz padha de’n”. Maine Hazrat Hafsa (rza) se kaha ke aap arz kare’n ke Hazrat Abu Bakar (rz) ek naram-dil insan hain. Is liye jab wo aap ki jagah par khade ho’nge to logo’n ko apni awaaz na suna sake’nge. Lehaza agar aap Hazrat Umar (rz) ko hukum de’n (to behtar hai). Aap ne farmaya: “Tum to Yusuf (a) ke saath waali aurte’n maaloom hoti ho. Abu Bakar se kaho wo logo’n ko namaz padha de’n”. Jab Hazrat Abu Bakar (rz) ne namaz ka aghaaz kar diya to Rasool Allah (s) ne apne andar kuch takhfeef mehsoos farmaai, chunache aap khade hue aur do (2) admiyo’n ke sahare chal pade. Aapke dono paao’n zameen par ghaseet-te jaate the, ta-aa’nke aap masjid mein dakhil hue. Jab Abu Bakar (rz) ne aap ki aahat suni to peeche hatne lagey. Rasool Allah (s) ne unhe’n ishaara farmaya: (Ke peeche na hate’n). Bahar-haal Rasool Allah (s) Hazrat Abu Bakar (rz) ki baae’n jaanib baith gae. Hazrat Abu Bakar (rz) khade ho kar namaz padh rahe the, jabke Rasool Allah (s) baith kar namaz adaa karte the. (Goya) Hazrat Abu Bakar (rz) Rasool Allah (s) ki iqteda karte the aur log Hazrat Abu Bakar (rz) ki iqteda mein the.[142]

Baab 69: Jab Imam Ko Shak Guzre To Kya Wo Logo’n Ki Baat Par Amal Kar Sakta Hai?

[714] Hazrat Abu Huraira (rz) se riwayat hai ke Rasool Allah (s) (chaar (4) rakat waali namaz mein) do (2) rakat padhkar alaaheda ho gae. Aap se Dhul-yadain (rz) ne arz kiya: Yaa Rasool Allah! Kya namaz kam ho gai hai, yaa aap bhool gae hain? Allah ke Rasool (s) ne logo’n se poocha: “Kya Dhul-yadain sach kehta hai?” Logo’n ne “haa’n” mein jawab diya to Rasool Allah (s) khade ho gae aur do (2) rakat mazeed padh lee’n, phir salaam phera, uske baad takbeer kehkar sajde mein chale gae. Ye sajde pehle sajdo’n ki tarah the, yaa unse kuch taweel the.[143]

Hazrat Abu Huraira (rza) se riwayat hai, unho’n ne kaha ke Nabi (s) ne (ek (1) dafa) zohar ki namaz do (2) rakat padh di. Aapse kaha gaya ke aap ne do (2) rakat padhi hain. Uske baad aap ne do (2) rakat aur padh lee’n, phir salaam pher kar do (2) sajde (sahoo) kiye.[144]

Baab 70: Jab Imam Namaz Mein Rone Lagey (To Kya Hukum Hai?)

Hazrat Abdullah bin Shaddad kehte hain ke maine dauran-e-namaz mein Hazrat Umar (rz) ke rone ki awaaz suni, halaa’nke main sabse pichli saff mein tha. Aap ye aayat-e-karima tilaawat kar rahe the: “نَّمَا أَشْكُو بَثِّي وَحُزْنِي إِلَى اللَّهِ” “Main Apne Gham Aur Pareshani Ki Shikaayat Sirf Allah Hi Se Karta Hoo’n”.[145]

[716] Ummul Momineen Hazrat Ayesha (rza) se riwayat hai ke Rasool Allah (s) ne apni marz (e wafat) mein farmaya: “Abu Bakar se kaho wo logo’n ko namaz padhaae’n”. Hazrat Ayesha (rza) kehti hain: Maine aap se arz kiya ke Abu Bakar (rz) jab aap ki jagah khade ho’nge to rone ki wajah se logo’n ko apni awaaz nahi suna sake’nge. Is liye aap Hazrat Umar (rz) ko hukum deejiye ke wo logo’n ko namaz padhaae’n. Aap ne farmaya: “Abu Bakar se kaho wo logo’n ko namaz padhae’n”. Hazrat Ayesha (rza) kehti hain: Maine Hazrat Hafsa se kaha ke tum Nabi (s) se arz karo ke jab Abu Bakar (rz) aap ki jagah khade ho’nge to rone ki wajah se logo’n ko apni qirat nahi suna sake’nge. Lehaza aap Hazrat Umar (rz) ko hukum deejiye ke wo logo’n ko namaz padhaae’n. Chunache Hazrat Hafsa (rza) ne aise hi kiya, to Rasool Allah (s) ne farmaya: “Chup raho! Tum to Yusuf (a) waali aurto’n ki tarah maaloom hoti ho. Abu Bakar se kaho wo logo’n ko namaz padhae’n”. Is par Hazrat Hafsa (rza) ne Hazrat Ayesha (rza) se kaha ke maine kabhi tujh se bhalaai nahi paai.[146]

Baab 71: Iqaamat Ke Waqt Yaa Uske Baad Safo’n Ko Seedha Karna

[717] Hazrat Noman bin Bahseer (rz) se riwayat hai, wo kehte hain ke Nabi (s) ne farmaya: “Apni safo’n ko zaroor seedha karo, ba-soorat-e-deegar Allah Ta’ala tumhare chehro’n mein mukhalifat paida kar de ga”.

[718] Hazrat Anas (rz) se riwayat hai ke Nabi (s) ne farmaya: “Safo’n ko theek aur durust rakho, main tumhe’n apni peeth ke peeche se bhi dekhta hoo’n”.[147]

Faaeda: Iska matlab ye hai ke safo’n ko durust karne mein kotaahi na kiya karo, tumhari ghaflat ka mujhe ilm ho jaata hai, kyou’nke main jis tarah aage se dekhta hoo’n, peeche se bhi dekhta hoo’n. Choo’nke ye kharq-e-aadat Rasool Allah (s) ka ek mo’jeza hai aur wahee se saabit hai. Is liye us par yaqeen karna chaahiye aur aqalan aisa mumtana’[148] bhi nahi.[149] Yaad rahe, aisa sirf namaz mein hota tha.

Baab 72: Safo’n Ko Baraabar Karte Waqt Imam Ka Logo’n Ki Taraf Mutawajja Hona

[719] Hazrat Anas (rz) se riwayat hai, unho’n ne kaha ke ek dafa namaz ke liye iqaamat kahi gai, to Rasool Allah (s) ne hamari taraf mutawajja ho kar farmaya: “Apni safo’n ko durust karlo aur baaham milkar khade ho jaaeo. Kyou’nke main tumhe’n apni peeth ke peeche se bhi dekhta hoo’n”.[150]

Baab 73: Saff-e-Awwal Ka Bayan

[720] Hazrat Abu Huraira (rz) se riwayat hai, unho’n ne kaha ke Nabi (s) ne farmaya: “Shohada ye log hain: Jo doob kar marey, jo pait ke marz mein mubtalaa ho kar faut ho jaae, jo taaoon (طاعُون) mein chal basey, aur jo deewaar ke neeche dabkar is jahaan se rukhsat ho jaae”.[151]

[721] Aap ne farmaya: “Agar logo’n koi lm ho ke sakht garmi yaa awwal waqt mein namaz padhne ki kya fazilat hai, to usey adaa karne ke liye daud lagaae’n aur agar wo jaan le’n ke isha aur subah ki namaz mein kya sawaab hai, to yaqeenan un mein shareek ho’n, agarche unhe’n ghutno’n ke bal chalkar aana pade. Aur agar unhe’n maaloom ho ke pehli saff mein kya fazilat hai to uske husool ke liye zaroor qura-andaazi[152] kare’n”.[153]

Baab 74: Saff Ka Durust Karna Namaz Ka Poora Karna Hai

[722] Hazrat Abu Huraira (rz) se riwayat hai, wo Nabi (s) se bayan karte hain ke aap ne farmaya: “Imam is liye banaaya jaata hai ke uski iqteda ki jaae. Lehaza usse ikhtelaaf na karo, jab wo rukoo kare to tum bhi rukoo karo aur jab wo “سَمِعَ اللهُ لِمَنْ حَمِدَهُ” “Sami Allahu Liman Hamida” kahe to tum “رَبَّنَا لَكَ الْحَمْدُ” “Rabbana Lakal Hamdu” kaho. Jab wo sajda kare to tum bhi sajda karo, aur jab wo baith kar namaz padhe to sab ke sab baith kar namaz adaa karo. Nez, namaz mein safo’n ko seedha karo kyou’nke saff ka durust karna namaz ki khoobi ka ek juzz hai.[154]

[723] Hazrat Anas (rz) se riwayat hai, wo Nabi (s) se bayan karte hain ke aap ne farmaya: “Safo’n ko baraabar karo, kyou’nke safo’n ka baraabar karna namaz ka qaaem karna hai”.

Baab 75: Us Shakhs Ke Gunah Ka Bayaan Jo Saff-bandi Nahi Karta

[724] Hazrat Anas (rz) se riwayat hai ke jab wo madina tashreef laae to unse kaha gaya: Aap ne (ham mein) kaunsi mukar baat mehsoos ki hai, jo aap ne Rasool Allah (s) ke ahd-e-mubarak mein na dekhi ho? Unho’n ne farmaya: Main aur to koi khilaaf warzi nahi dekhta, albatta tum namaz mein apni safe’n durust nahi karte ho.

Uqba bin Obaid ne Bushair bin Yasaar se baae’n-alfaaz ye riwayat bayan ki hai: Hazrat Anas (rz) ham logo’n ke paas jab madina tashreef laae… ilkh

Baab 76: Saff-bandi Karte Waqt Kandhe Se Kandha Aur Paao’n Se Paao’n Milaana

Hazrat Noman bin Basheer (rz) farmate hain: Maine dekha ke ham mein se har shakhs dauran-e-namaz mein apna takhna apne saath waale aadmi ke takhne se milaa deta tha.

Wazaahat: Hazrat Noman bin Basheer (rz) bayan karte hain ke Rasool Allah (s) ne ek (1) martaba logo’n ki taraf mutawajja ho kar farmaya: “Safo’n ko seedha karo”. Aap ne teen (#) dafa in alfaaz ko dohraya: “Allah ki qasam! Safo’n ko seedha rakho, ba-soorat-e-deegar Allah Ta’ala tumhare dilo’n mein mukhalifat paida kar de ga”. Hazrat Noman kehte hain ke uske baad maine dekha, aadmi apne kandhe ko apne saathi ke kandhe se aur apna takhna apne saathi ke takhne se milakar khada hota tha.[155]

Baab 77: Agar Ko Shakhs Imam Ki Baaee’n Jaanib Khada Ho Aur Imam Usey Apne Peeche Se Daaee’n Jaanib Pher De To Uski Namaz Saheeh Hogi

[726] Hazrat Ibne Abbas (rz) se riwayat hai, unho’n ne farmaya ke maine ek raat Nabi (s) ke hamraah namaz padhi. Main aap ki baae’n jaanib khada ho gaya to Rasool Allah (s) ne peeche se mera sar pakad kar mujhe apni daaee’n jaanib khada kar diya, phir namaz padhi aur so gae. Jab moazzin aaya to aap khade hue, namaz padhai aur wazoo nahi kiya.[156]

Baab 78: Akeli Aurat, Saff Ka Hukum Rakhti Hai

[727] Hazrat Anas bin Maalik (rz) se riwayat hai, unho’n ne kaha ke maine aur hamaare ghar mein rehne waale ek yateem ladke ne Nabi (s) ke peeche namaz padhi. Meri walida Umme Sulaim ham sabke peeche thee’n.[157]

Baab 79: Masjid Aur Imam Ki Daae’n Jaanib Ka Bayan

[728] Hazrat Ibne Abbas (rz) se riwayat hai, unho’n ne kaha ke main ek shab namaz padhne ke liye Nabi (s) ki baaee’n jaanib khada ho gaya. Aap ne mera haath yaa kandha pakad kar mujhe apni daaee’n jaanib khada kar liya aur mere peeche hi se apne haath se mujhe pakda.[158]

Baab 80: Jab Imam Aur Muqtadiyo’n Ke Darmiyan Koi Deewaar Yaa Parda Haael Ho

Hasan Basri (rh) ka qaul hai ke agar tumhare aur imam ke darmiyan koi neher haael[159] ho to bhi iqteda karo us mein koi harj nahi. Aur Abu Mijlaz ne kaha ke imam ki iqteda karo, agarche imam aur muqtadi ke darmiyan koi raasta yaa deewaar ho, ba-sharte-ke imam ki takbeer sunaai deti ho.

[729] Hazrat Ayesha (rza) se riwayat hai, unho’n ne farmaya ke Rasool Allah (s) namaz-e-tahajjud apne hujre mein padha karte the. Choo’nke hujre ki deewaare’n bohot choti thee’n, is liye logo’n ne Nabi (s) ki shkhsiyat ko dekh liya aur kuch log namaz ki iqteda karne ke liye aapke saath khade ho gae. Phir subah ko unho’n ne doosro’n se uska zikr kiya. Baad-azaa’n doosri raat namaz ke liye khade hue to kuch log us raat bhi aap ki iqteda mein khade ho gae. Ye soorat-e-haal do (2) yaa teen (3) raato’n tak rahi. Uske baad Rasool Allah (s) baith rahe aur namaz ke liye tashreef na laae. Uske baad subah ke waqt logo’n ne uska zikr kiya to aap ne farmaya: “Mujhe is baat ka dar hua ke kahee’n namaz-e-shab tum par farz na kardi jaae”.[160]

Faaeda: Choo’nke Rasool Allah (s) hujre ke andar namaz padhte the aur logo’n ne aap ki iqteda baahar khade ho kar ki, aapke aur logo’n ke darmiyan deewaar haael thi, usey bar-qaraar rakha gaya, lehaaza aisa karna jaaez hai.[161] وهو المقصود

Baab 81: Namaz-e-Shab Ka Bayan

[730] Hazrat Ayesha (rza) se riwayat hai, unho’n ne farmaya ke Nabi (s) ki ek chataai thi, jise aap din ke waqt bicha lete aur raat ko uska hujra bana lete the. Kuch log aap ke paas jama hone lagey aur unho’n ne aapke peeche (saff banakar) namaz padhna shuru kardi.[162]

[731] Hazrat Zaid bin Saabit (rz) se riwayat hai ke Rasool Allah (s) ne ramzan-ul-mubarak mein ek hujra banaaya tha, mera guman hai ke wo chataai ka tha. Aap ne kai raate’n us mein namaz padhi. Aap ke sahaaba mein se kai logo’n ne aap ki iqteda mein namaz adaa ki. Jab aapko unke mutaalliq maaloom hua to aap baith rahe. Ohir unki taraf tashreef laae aur farmaya: “Maine tumhara amal dekha aur tumhara iraada pehchan liya hai. Aye logo! Apne gharo’n mein namaz padho kyou’nke Afzal namaz aadmi ki wohi hai jo uske ghar mein adaa ho, magar farz namaz (ke uski adaaegi masjid mein honi chaahiye)”.

Affan bin Muslim ne kaha ke ham se Wuhaib ne bayan kiya, usne kaha ke ham se Moosa bin Uqba ne bayan kiya, usne bataaya ke maine Abu Nazar bin Abu Umaiyya se suna, wo Busr bin Saeed se riwayat karte hain, wo Hazrat Zaid (bin Saabit (rz)) se, wo Nabi (s) se bayan karte hain.[163]

Baab 82: Takbeer-e-Tehrima Ka Wujoob Aur Namaz Ke Aghaz Ka Bayan

[732] Hazrat Anas bin Maalik (rz) se riwayat hai ke Rasool Allah (s) ek martaba ghode par sawaar hue (aur gir pade) to aap ki baaee’n jaanib kuch zakhmi ho gai. Hazrat Anas (rz) kehte hain ke hame’n un dono aapne namazo’n mein se jo namaz bhi padhaai wo baith kar padhaai. Ham ne bhi aapke peeche baith kar namaz padhi. Phir jab aap ne salaam phera to farmaya: “Imam is liye banaaya jaata hai ke uski iqteda ki jaae, lehza jab wo khade ho kar namaz padhe to tum bhi khade ho kar namaz padho, jab wo rukoo kare to tum bhi rukoo karo, jab wo sar uthaae to tum bhi uthaao, jab wo sajda kare to tum bhi sajda karo aur jab wo “سَمِعَ اللهُ لِمَنْ حَمِدَهُ” “Sami Allahu Liman Hamida” kahe to tum “رَبَّنَا لَكَ الْحَمْدُ” “Rabbana Lakal Hamdu” kaho”.[164]

[733] Hazrat Anas bin Maalik (rz) se riwayat hai, unho’n ne farmaya: Ek martaba Rasool Allah (s) ghode se gir pade to jism par kharashe’n aaee’n. Us wajah se aap ne hame’n baith kar namaz padhaai to ham ne bhi aapke hamraah baith kar namaz padhi. Jab aap namaz se faarigh hue to farmaya: “Imam is liye banaaya jaata hai ke uski iqteda ki jaae, jab wo Allahu Akbar kahe to tum bhi Allahu Akbar kaho, jab wo rukoo kare to tum bhi rukoo karo. Jab wo sar uthaae to tum bhi uthaao, jab wo “سَمِعَ اللهُ لِمَنْ حَمِدَهُ” “Sami Allahu Liman Hamida” kahe to tum “رَبَّنَا لَكَ الْحَمْدُ” “Rabbana Lakal Hamdu” kaho. Aur jab wo sajda kare to tum bhi sajda karo”.[165]

Faaeda: Jamhoor ahle ilm ke nazdeek takbeer-e-therima, yaane aghaaz-e-namaz mein Allahu Akbar kehna namaz ke liye rukn hai, jabke kuch hazraat isey sehat-e-namaz ke liye shart qaraar dete hain. Yaad rahe ke rukn aur shart ka mafhoom taqriban ek hi hai, ke unke baghair matlooba fe’l mukammal nahi hota, albatta un dono’n mein is tarah farq kiya jaata hai ke rukn kisi cheez ki maahiyat[166] mein daakhil hota hai. Jaise rukoo aur sajda waghaira jabke shart usse khaarij hoti hai, jise wazoo waghaira, nez takbeer-e-tehrima ka itlaaq sirf Allahu Akbar par hoga, jaisa ke jamhoor ahle ilm ka mauqif hai.

[734] Hazrat Abu Huraira (rz) se riwayat hai, unho’n ne kaha ke Nabi (s) ne farmaya: “Imam isi liye banaaya jaata hai ke uski iqteda ki jaae. Lehaza jab wo Allahu Akbar keh to tum bhi Allahu Akbar kaho. Jab wo rukoo kare to tum bhi rukoo karo, aur jab wo “سَمِعَ اللهُ لِمَنْ حَمِدَهُ” “Sami Allahu Liman Hamida” kahe to tum “رَبَّنَا لَكَ الْحَمْدُ” “Rabbana Lakal Hamdu” kaho”. Jab wo sajda kare to tum bhi sajda karo aur jab wo baith kar namaz padhe to tum bhi baith kar namaz padho.[167]

Faaeda: Ab hukum ye hai ke jab imam kisi uzr ki binaa par baith kar namaz padhae to tandrust muqtadiyo’n ko baith kar nahi, balke khade ho kar iqteda karni chaahiye. Kyou’nke Rasool Allah (s) ne apni marz-e-wafaat mein baith kar namaz padhaai thi, aur aapke peeche tamaam Sahaba Ikraam (riz) ne khade ho kar namaz adaa ki.

Baab 83: Takbeer-e-Oola Mein Namaz Shuru Karne Ke saath Hi Dono Haatho’n Ko Uthaana

[735] Hazrat Abdullah bin Umar (rz) se riwayat hai ke Rasool Allah (s) jab namaz shuru karte to apne dono haath apne kandho’n ke baraabar uthaate. Jab rukoo ke liye Allahu Akbar kehte, jab apna sar rukoo se uthaate tab bhi apne dono haath usi tarah uthaate aur “سَمِعَ اللهُ لِمَنْ حَمِدَهُ” “Sami Allahu Liman Hamida”, “رَبَّنَا لَكَ الْحَمْدُ” “Rabbana Lakal Hamdu” (dono) kehte. Lekin sajdo’n mein ye amal na karte the.[168]

Baab 84: Takbeer-e-Tehrima Ke Waqt, Rukoo Mein Jaate Aur Rukoo Se Sar Uthaate Waqt Raful Yadain Karna

[736] Hazrat Abdullah bin Umar (rz) se riwayat hai, unho’n ne farmaya: Maine Rasool Allah (s) ko dekha jab aap namaz ke liye khade hote the, to doono haath kandho’n ke barabar uthaate the, aur us tarah jab rukoo ke liye Allahu Akbar kehte. Nez jab aap rukoo se sar uthaate to bhi usi tarah karte aur “سَمِعَ اللهُ لِمَنْ حَمِدَهُ” “Sami Allahu Liman Hamida” kehte. Aur sajdo’n mein aap ye amal na karte the.[169]

Faaeda: Ham ne mukhtasar Saheeh Bukhari ke tarjume mein is hadees ke fawaaed mein likha tha ke takbeer-e-tehrima ke waqt aur rukoo mein jaate aur rukoo se sar uthaate waqt aur teesri rakat ke liye uth-te waqt dono haatho’n ko kandho’n yaa kaano’n tak uthaana raful yadain kehlaata hai. Ba-qaul-e-Imam Shafai (rh) iska maqsad Allah Ta’ala ki azmat ka izhaar aur Rasool Allah (s) ki sunnat ka itteba hai. Takbeer-e-tehrima ke waqt RY par tamaam ummat ka ijma hai aur baaqi muqamaat-e-salaasa mein ry karne par bhi ahle kufa ke alaawa tamaam ulama-e-ummat ka ittefaq hai. Rasool Allah (s) ne saari zindagi is sunnat par amal kiya aur ye aisee sunnat-e-mutawaatirah hai jaise ashra-e-mubashhara ke alaawa deegar Sahaba Ikraam (riz) bhi bayan karte hain, aur is par amal peira dikhai dete hain. Lehaza mazkoora hadees ki binaa par tamaam musalmano ke liye zaroori hai ke wo rukoo mein jaate, usse sar uthaate aur teesri rakat ke liye uth-te waqt Allah ki azmat ka izhar karte hue RY kare’n.

[737] Hazrat Maalik bin Huwairis (rz) se riwayat hai ke jab wo namaz shuru karte to Allahu Akbar kehte waqt apne dono haath uthaate aur jab rukoo karna chaahte to bhi apne dono’n haath uthaate aur jab rukoo se apna sar uthaate to apne dono haath uthaate aur wo bayan karte ke Rasool Allah (s) ne isi tarah kiya tha.

Baab 85: Namazi Kaha’n Tak Apne Haatho’n Ko Uthaae?

Hazrat Abu Humaid Saa’di (rz) ne apne saathiyo’n mein baith kar bayan kiya ke Nabi (s) apne dono’n haath kandho’n ke baraabar uthaate the.

[738] Hazrat Abdullah bin Umar (rz) se riwayat hai, unho’n ne farmaya: Maine Nabi (s) ko dekha, aap ne namaz ke aghaaz mein Allahu Akbar kaha. Takbeer kehte waqt aap ne apne dono haath is qadar uthaae ke unhe’n apne dono kaandho’n ke baraabar kar liya. Jab aap ne rukoo ke liye Allahu Akbar kaha to bhi aisa kiya. Jab “سَمِعَ اللهُ لِمَنْ حَمِدَهُ” “Sami Allahu Liman Hamida” kaha tab bhi isi tarah kiya aur “رَبَّنَا لَكَ الْحَمْدُ” “Rabbana Lakal Hamdu” bhi kaha. Aap ye amal sajda karte waqt nahi karte the, aur us waqt jab sajde se sar uthaate the.[170]

Baab 86: Do (2) Rakato’n Se Khade Hote Waqt RY Ka Bayan

[739] Hazrat Abdullah bin Umar (rz) se riwayat hai ke jab wo namaz shuru karte to Allahu Akbar kehte aur apne dono haath uthaate. Jab rukoo karte, tab bhi apne dono haath uthaate. Aur jab “سَمِعَ اللهُ لِمَنْ حَمِدَهُ” “Sami Allahu Liman Hamida” kehte to bhi apne dono haath uthaate aur jab do (2) rakat adaa karke khade hote to bhi apne dono haath uthaate the. Mazkoora bayan ko Hazrat Abdullah bin Umar (rz) ne Nabi (s) ki taraf mansoob kiya hai.

Is riwayat ko Hammad bin Salma, Hazrat Ayyub se, wo Hazrat Naafe se, wo Ibne Umar se, aur Ibne Umar Nabi (s) se bayan karte hain. Isi tarah Ibne Tahmaan ne is riwayat ko mukhtasar taur par Ayyub aur Moosa bin Uqba se bayan kiya hai.[171]

Baab 87: Namaz Mein Daaya’n Haath Baae’n Par Rakhna

[74] Hazrat Sahal bin Saad (rz) se riwayat hai, unho’n ne farmaya: Logo’n ko ye hukum diya jaata tha ke aadmi namaz mein apna daayaa’n haath baae’n haath ki kalaai par rakhe. Abu Haazim, raawi ne kaha ke wo (Hazrat Sahal bin Saad (rz)) is hukum ko Rasool Allah (s) ki taraf mansoob karte the. (Ek (1) aur raawi-e-hadees) Ismail kehte hain ke ye hukum mansoob kiya jaata tha, ye alfaaz nahi kahe ke wo is hukum ko mansoob karte the.

Faaeda: Mahel-o-wazaa ke mutaalliq bhi saraahat hai ke haatho’n ko seene par rakha jaae. Hazrat Waael bin Hujar (rz) farmate hain ke maine Rasool Allah (s) ke saath namaz padhi, aap ne apna daayaa’n haath apne baae’n haath ke oopar seene par rakha.[172] Hazrat Sahal bin Saad (rz) se marwi hadees ke mutaabiq baaee’n kalaai par daayaa’n haath rakha jaae to dono haath khud-ba-khud seene par aajaae’nge. Seene par rakhne ki tasdeeq us riwayat se bhi hoti hai, jiske alfaaz hain ke Rasool Allah (s) apne haath apne seene par rakhte the.[173] Zer-e-naaf haath baadhne ki ek hadees bhi saheeh nahi.

Baab 88: Namaz Mein Khushoo Ka Bayaan

[741] Hazrat Abu Huraira (rz) se riwayat hai ke Rasool Allah (s) ne farmaya: “Kya tum samajhte ho ke mera mu’n isi qible ki taraf hai? Allah ki qasam! Mujh par tumhara rukoo aur khushoo posheeda nahi rehta aur main tumhe’n pas-e-pusht se bhi dekhta hoo’n”.[174]

[742] Hazrat Anas bin Maalik (rz) se riwayat hai, wo Rasool Allah (s) se bayan karte hain ke Aap ne farmaya: “Tum apna rukoo aur sujood theek-theek adaa kiya karo. Allah ki qasam! Jab tum rukoo aur sajda karte ho to main tumhe’n apne peeche se bhi dekhta ho’n”. Aur kabhi farmaya: “Main apni pusht se tumhe’n dekhta hoo’n”.[175]

Baab 89: Namazi Takbeer-e-Tehrima Ke Baad Kya Padhe?

[743] Hazrat Anas (rz) se riwayat hai ke Nabi (s), Hazrat Abu Bakar aur Hazrat Umar (riz) namaz ka iftetaah Alhamdulillahi Rabbil A’alameen se kiya karte the.

Faaeda: Surah Fateha se pehle bismillah padhni chaahiye yaa nahi, hamaare nazdeek raajeh mauqif ye hai ke Bismillahir Rahman Nir Raheem aahista aur oonchi awaaz se padhi jaa sakti hai. Albatta posheeda padhne ke mutaalliq ahadees ziyaada saheeh aur waazeh hain. Haa’n jin ahadees mein Bismillah ka zikr nahi, unhe’n raawi ke adm-e-ilm yaa uski qirat ke makhfi hone par mahmool kiya jaaega, aur jin riwayaat mein Bismillah oonchi awaaz se padhne ka zikr hai, unhe’n is baat par mahmool kiya jaaega ke Rasool Allah (s) baaz auqaat ba-awaaz-e-buland bhi padhte the, taake logo’n ko uski mashrooiyyat ka pataa chal jaae. Yaad rahe ke Bismillah, Surah Faatiha ki ek aayat hai, jaisa ke hadees mein iski saraahat hai.[176]

[744] Hazrat Abu Huraira (rz) se riwayat hai, unho’n ne farmaya ke Rasool Allah (s) takbeer-e-tehrima aur qirat ke darmiyan kuch sukoot farmate the. Maine arz kiya: Allah ke Rasool! Mere maa-baap aap par qurban ho’n! Aap takbeer aur qirat ke darmiyan sukoot mein kya padhte hain? Aap ne farmaya: “Yaa Allah! Mujhse mere gunah itne dor karde, jitna toone mashriq aur maghrib ke darmiyan faasla rakha hai. Aye Allah! Mujhe gunaaho’n se is tarah paak saaf karde, jaise safed kapda mael-kuchail se paak-saaf kiya jaata hai. Aye Allah! Mere gunah paani, barf aur olo’n se dho de”.

Baab 90: Bila-unwaan

[745] Hazrat Asma bint Abi Bakr (rz) se riwayat hai ke Nabi (s) ne namaz-e-kasoof padhaai to aap ne taweel qiyaam kiya. Phir rukoo kiya to usey khoob taweel kiya. Phir khade hue to qiyaam ko khoob taweel kiya. Uske baad rukoo kiya to usey khob taweel kiya, phir apna sar uthaaya aur sajda kiya, phir sadje ko khoob taweel kiya. Phir apna sar uthaaya aur sajda kiya, phir sajde ko khoob taweel kiya. Phir khade ho kar qiyaam kiya aur qiyaam ko lamba kiya, phir rukoo kiya to rukoo ko lamba kiya, phir sar uthaa kar qiyaam kiya aur usey khoob lamba kiya, phir rukoo kiya aur usey lamba kiya, phir sar uthaa kar sajda kiya aur usey khob lamba kiya. Uske baad apna sar uthaya aur sajda kiya aur sajde ko lamba kiya. Phir namaz se faarigh ho kar farmaya: “Jannat mere itna qareeb ho chuki thi ke agar main jur-at karta to uske khosho’n mein se koi khosha tumhare paas le aata aur dozakh bhi mere itna qareeb ho gai ke main kehne lagaa: Aye Maaik! Kya maine bhi in log’n ke saath rakha jaau’nga. Itna mein ek (1) aurat dekhi, jise billi panja maar rahi thi”. Maine poocha: “Us aurat ka kya qusoor hai?” Farishto’n ne jawab diya: Us aurat ne billi ko baandhe rakha tha, hatta ke wo bhook se mar gai, na t wo usey khud khilaati thi, aur naa usey khula chod-deti thi, ke wo khud hasharaat-ul-arz se apna pait bhare.[177]

Baab 91: Namaz Mein Imam Ki Taraf Dekhna

Hazrat Ayesha (rz) farmati hain ke Nabi (s) ne namaz-e-kasoof ke mutaalliq farmaya: “Jab tum ne mujhe dekha ke main peeche hat raha hoo’n to maine us waqt jahannum ko dekha jiska ek hissa doosre hisse ko tod-phod raha tha”.

[746] Hazrat Abu Ma’amar se riwayat hai ke ham ne Hazrat Khabbab bin Arat (rz) se sawal kiya: Aaya Rasool Allah (s) namaz-e-zohar aur namaz-e-asr mein kuch padhte the? Unho’n ne farmaya: Haa’n. Ham ne poocha: Aap log kaise pehchaante the? Unho’n ne farmaya: Aap ki daadhi mubarak ke hilne ki wajah se.[178]

[747] Hazrat Baraa bin Aazib (rz), jinho’n ne jhoot nahi bola, bayan karte hain ke Sahaba Ikraam (riz) jab Nabi (s) ke hamraah namaz padhte the to jab aap apna sar rukoo se uthaa lete to Sahaba Ikraam (riz) khade rehte taa-ke aap ko sajda karte hue dekh lete (tab wo sajda karte the).[179]

[748] Hazrat Abdullah bin Abbas (rz) se riwayat hai, unho’n ne farmaya: Nabi (s) ke ahd-e-mubarak mein sooraj grahan hua to aap ne namaz kasoof padhi. Sahaba Ikraam (riz) ne arz kiya: Allah ke Rasool! Ham ne aap ko apni jagah khade hue kisi chee zko pakadte dekha. Phir ham ne aapko dekha ke aap peeche hat rahe hain. Aap ne farmaya: “Maine jannat ko dekha to usse ek khosha lena chaaha. Agar main usey le leta to jab tak duniya baaqi hai us waqt tak tum usse khaate rehte”.

[749] Hazrat Anas bin Maalik (rz) se riwayat hai, unho’n ne farmaya ke hame’n Nabi (s) ne namaz padhai. Uske baad mimbar par tashreef laae aur apne dono haatho’n se masjid ke qible ki taraf ishaara karke farmaya: “Maine abhi jabke tumhe’n namaz padha raha tha, Jannat aur dozakh ko dekha, un dono’n ki us deewaar ke qible mein tasweere’n banadi gai thee’n. Maine aaj ke din jaisa koi din nahi dekha, jis mein khair aur shard ono jamaa ho’n”. Aap ne aisa teen (3) martaba farmaya.[180]

Faaeda: Ye hukum qiyaam ki soorat mein hai ke nazar sajda-gaah par ho, taaham tasshahud ki haalat mein nazar daae’n haath ki shahadat ki ungli par honi chaahiye, is tarah ke usey uthaae rakhe aur dua kare.[181]

Baab 92: Namaz Mein Asmaan Ki Taraf Nazar Uthaana

[750] Hazrat Anas bin Maalik (rz) se riwayat hai, unho’n ne kaha: Rasool Allah (s) ne farmaya: “Logo’n ko kya hua, wo namaz mein nigaahe’n aasmaan ki taraf uthaate hain?” Phir aap ne uske mutaalliq badi sakhti se farmaya: “Logo’n ko usse baaz aana chaahiye, yaa phir unki binaai ko uchak liya jaaega”.

Baab 93: Namaz Mein Idhar-Udhar Dekhna

[751] Hazrat Ayesha (rza) se riwayat hai, unho’n ne kaha ke maine Rasool Allah (s) se dauran-e-namaz mein idhar-udhar dekhne ke mutaliq dariyaaft kiya to aap ne farmaya: “Ye to (kushoo ko) uchak[182] lena hai, jo shaitan bande ki namaz mein se uchak leta hai”.[183]

[752] Hazrat Ayesha (rza) se riwayat hai ke Nabi (s) ne ek (1) martaba aisee chaadar pehen kar namaz padhi jis par kuch nuqoosh the. Faraaghar ke baad aap ne farmaya: “Mujhe is chaadar ke naqsh-o-nigaar ne namaz se ghaafil kar diya tha, isey Abu Jaham ke paas le jaao aur mujhe saada chaadar laado”.[184]

Baab 94: Kya (Namazi) Kisi Hangaami Zaroorat Ki Binaa Par Yaa Koi Cheez, Yaa Thook Qible Ki Taraf Dekhe To Uski Taraf Tawajjo Kar Sakta Hai?

Hazrat Sahal (rz) bayan karte hain ke (namaz mein) Hazrat Abu Bakar (rz) idhar-udhar mutawajja hue to unho’n ne Nabi (s) ko dekha.

Wazaahat: Imam Bukhari (rh) iltefaat ke mutaalliq isteshnaai[185] soorate’n bayan karte hain ke agar kisi hangaami zaroorat aur waqti jaahat ke pesh-e-nazar iltefaat ho to wo namaz ke liye kharaabi ka baais nahi, jaisa ke Hazrat Abu Bakar Siddiq (rz) ne dauran namaz mein iltefaat kiya aur Rasool Allah (s) ko dekha to Rasool Allah (s) ne unhe’n namaz dobaara padhne ke mutaalliq nahi kaha, balke unhe’n apni namaz jaari rakhne ki talqeen farmaai kyou’nke ye iltefaat ek hangami zaroorat ke pesh-e-nazar tha.[186] Imam Bukhari (rh) ne us taaleeq ko apni sanad se muttasil bayan kiya hai.[187]

[753] Hazrat Abdullah bin Umar (rz) se riwayat hai, unho’n ne farmaya: Nabi (s) ne masjid ke qible ki taraf thook dekha, jabke aap logo’n ke aage khade ho kar unhe’n namaz padha rahe the, aap ne usey zaael kar diya. Uske baad jab namaz se faarigh hue to farmaya: “Jab tum mein se koi namaz mein mashghool hota hai to Allah Ta’ala uske saamne chehre ki taraf hota hai, lehaaza koi shakhs namaz mein apne saamne na thooke”. Is riwayat ko Moosa bin Uqba aur Ibne Abu Rawwaad ne Hazrat Naafe se bayan kiya hai.[188]

[754] Hazrat Anas bin Maalik (rz) se riwayat hai unho’n ne farmaya ke ek (1) din musalman namaz-e-fajr mein mashghool the ke achaanak Rasool Allah (s) saamne aagae. Aap ne Hazrat Ayesha (rza) ke hujre ka parda uthaaya aur musalmano ki taraf dekha jabke us waqt wo namaz mein saff-basta the. Aap (s) khushi ke baais muskuraane lagey. Hazrat Abu Bakar (rz) apne ulte paao’n peeche hatne lagey taake khud saff mein shaamil ho jaae’n kyou’nke unho’n ne samjha ke aap bahar tashfreef laana chaahte hain. Aur musalmano ne qasd kar liya ke maare khushi ke apni namaz tod de’n, lekin aap ne unhe’n ishaara farmaya ke tum apni namaz ko poora karo, phir aap ne parda neeche kar diya aur usi din ke aakhri hisse mein aap ki wafaat ho gai.[189]

Baab 95: Safar-o-Hazar Ki Tamaam Sirri Aur Jehri Namazo’n Mein Imam Aur Muqtadi Ke Liye Qirat Ka Waajib Hona

[755] Hazrat Jabir bin Samra (rz) se riwayat hai, unho’n ne farmaya ke ahle kufa ne Hazrat Umar (rz) se Hazrat Saad bin Abi Waqaas (rz) ki shikaayat ki to Hazrat Umar (rz) ne unhe’n maazool karke Hazrat Ammar bin Yaasir (rz) ko un (kufiyo’n) par taenaat kar diya. Al-gharz un logo’n ne Hazrat Saad (rz) ki bohot shikaayat kee’n. Ye bhi keh diya ke wo acchi namaz nahi padhte. Is par Hazrat Umar (rz) ne unhe’n bula-bheja aur kaha: Aye Abu Ishaq! Ye log kehte hain ke tum namaz acchi tarah nahi padhte ho. Unho’n ne jawab diya: Allah ki Qasam! Main unhe’n Rasool Allah (s) ki namaz padhaata tha. Maine us mein zarra bhar bhi kotaahi ko rawaa nahi rakha. Main namaz-e-isha padhata to pehli do (2) rakato’n mein zyaada der lagaata aur aakhri do (2) rakato’n mein takhfeef karta tha. Hazrat Umar (rz) ne farmaya: Aye Abu Ishaq! Tumhari nisbat hamaara gumaan yehi hai. Phir aap ne ek shakhs yaa chand ashkhaas ko Hazrat Saad (rz) ke hamraah Kufa rawaana kiya (taake wo ahle kufa se Hazrat Saad (rz) ke mutaalliq shikayaat ki tehqeeq kare’n). Unho’n ne waha’n jaakar koi masjid na chodi, jaha’n Hazrat Saad (rz) ka haal na poocha ho. Sab logo’n ne unki taareef ki. Phir wo Qabila Abas ki masjid mein gae to waha’n ek (1) shakhs khada hua jiski kunniyat Abu Saadah thi, aur usey Usama bin Qatada kaha jaata tha. Wo bola: Jab tum ne hame’n qasam dilaai hai to sune’n! Saad (rz) jihad mein lashkar ke saath khud na jaate the, aur naa hi maal-e-ghanimat mein baraabar taqseem karte the. Nez, muqaddamaat mein insaf se kaam na lete the. Hazrat Saad (rz) ne ye sun kar kaha: Allah ki qasam! Main tujhe teen (3) bad-duaae’n deta hoo. Aye Allah! Agar tera ye banda jhoota hai aur sirf logo’n ko dikhane yaa sunaane ke liye khada hua hai to uski umr daraaz karde, uski faqeeri badha de aur aafato’n mein phasaa de. (Chunache aisa hi hua) Uske baad jab se uska haal dariyaaft kiya jaata to kehta ke main ek aafat-raseeda, daraaz-umr boodha hoo’n. Mujhe Hazrat Saad (rz) ki bad-dua lag gai hai. Abdul Malik raawi kehta hai ke maine bhi usey dekha tha. Budhaape ki haalat mein uske dono aabru aankho’n par girne ke ba-wujood raaste chalti chokriyo’n ko chedta aur un par dast-daraazi karta-phirta tha.

[756] Hazrat Ubadah bin Saamit (rz) se riwayat hai ke Rasool Allah (s) ne farmaya: “Jis shakhs ne Surah Faatiha nahi padhi, uski namaz hi nahi hui”.

Faaeda: Waazeh rahe ke qirat-e-faatiha namaz ke arkaan mein se hai aur rukn aisee cheez ko kehte hain ke wo waajib-ut-taameel kaam uske baghair mukammal na ho. Aur rukn ke na hone se shariyat ki nazar mein us kaam ka koi etebaar na ho. Shah Waliullah Mohaddis Dehelwi (rh) ne arkaan-e-namaz ke mutaalliq likha hai ke jaise Rasool Allah (s) ne lafz rukn se zikr kiya ho. Jaise aap ne farmaya: “Faatiha ke baghair namaz nahi hoti”. Nez, aap ka farmaan hai ke aadmi ki namaz jaaez nahi, jab tak wo rukkoo aur sujood mein apni pusht ko seedha na kare aur jise shaare (شارع) ne namaz kaha hai, namaz ke liye uske rukn hone ki badi zabardast tambeeh hai.[190] Phir ye bhi qaaeda hai ke laae nafi jins ki khabar mahzoof ho to us mein wujood ki nafi muraad hoti hai, illa ye ke waha’n koi qareena-e-saarifa maujood ho. Hadees mazkoor mein bhi laa-nafi jins ke liye hai, jiske maane hain ke Surah Faatiha ke baghair namaz ke sire se wujood hi barqaraar nahi rehta. Usey laae nafi-e-kamaal qaraar dena mahez seena-zori hai.

[757] Hazrat Abu Huraira (rz) se riwayat hai ke ek dafa Rasool Allah (s) masjid mein tashreef laae, itne mein ek aadmi aaya aur usne namaz padhi, phir us ne Nabi (s) ko salaam kiya. Aap ne (salaam ka jawaab dene ke baad) farmaya: “Waapas jaao aur namaz padho, tum ne namaz nahi padhi”. Wo aadmi waapas gaya aur usi tarah namaz padhi jaise usne (pehle_ padhi thi. Phir usne aakar Nabi (s) ko salaam kiya. Aap ne (salaam ka jawab dene ke baad) farmaya: “Waapas jaao aur namaz padho, tum ne namaz nahi padhi”. Phir usi tarah teen (3) dafaa hua. Bil-aakhir usne kaha: Qasam hai us Allah ki, jisne aap ko haq ke saath behja hai! Main isse acchi namaz nahi padh sakta, lehaaza aap mujhe bata deejiye. Aap ne farmaya: “Accha jab tum namaz ke liye khade ho to Allahu Akbar kaho, phir quran se jo tumhe’n yaad ho padho, uske baad itmenaan se rukoo karo, phir sar uthaao, aur seedhe khade ho jaao, phir sajda karo, aur sajde mein itmenaan se raho. Phir sar uthaakar itmenaan se baith jaao, usi tarah apni poori namaz mukammal karo”.[191]

Baab 96: Namaz-e-Zohar Mein Qirat Ka Bayan

[758] Hazrat Jabir bin Samra (rz) se riwayat hai, unho’n ne kaha ke Hazrat Saad bin Abi Waqaas (rz) ne farmaya: Main ahle kufa ko (baad az dopaher) shaam ki dono namaze’n Rasool Allah (s) ki namaz ki tarah padhata tha. Yaane un mein kisi qism ki kami nahi karta tha. Main pehli do (2) rakat mein der lagaata aur aakhri do (2) rakat mein takhfeef karta tha. Hazrat Umar (rz) ne farmaya: Mera bhi tumhare mutaalliq yehi gumaan tha.[192]

[759] Hazrat Abu Qatada (rz) se riwayat hai, unho’n ne farmaya ke Rasool Allah (s) namaz-e-zohar ki pehli do (2) rakat mein Surah Faatiha aur do (2) surah padhte the. Pehli rakat ko lamba karte aur doosri rakat ko chota karte the, nez kabhi bhi koi aayat suna bhi dete the. Namaz-e-Asr mein bhi Surah Faatiha aur deegar do (2) surah tilaawat farmate aur pehli rakat ko doosri rakat se kuch lamba karte. Usi tarah subah ki namaz mein bhi pehli rakat ko taweel aur doosri ko mukhtasar karte the.[193]

[760] Hazrat Abu Ma’amar se riwayat hai, wo kehte hain ke ham ne Hazrat Khabbab bin Arat (rz) se dariyaaft kiya: Aaya Nabi (s) zohar aur asr mein qirat kiya karte the? Unho’n ne jawab diya ke haa’n. Phir ham ne arz kiya ke aap logo’n ko kaise maaloom hota tha? Unho’n ne farmaya ke hame’n aap ki daadhi-e-mubarak ki jumbish[194] se pataa chalta tha.[195]

Baab 97: Namaz-e-Asr Mein Qirat Ka Bayaan

[761] Hazrat Abu Ma’amar se riwayat hai, wo kehte hain ke maine Hazrat Khabbab bin Arat (rz) se dariyaaft kiya: Aaya Nabi (s) zohar aur asr ki namaz mein qirat kiya karte the? Unho’n ne farmaya: Haa’n. Maine arz kiya: Aap hazraat ko Rasool Allah (s) ki qirat ka kaise pataa chalta tha? Unho’n ne farmaya: Aap ki daadhi mubarak ke harkat karne ki wajah se.[196]

[762] Hazrat Abu Qatada (rz) se riwayat hai, aap ne farmaya ke Nabi (s) zohar aur asr ki do (2) rakat mein Surah Faatiha aur koi ek-ek surah padhte the. Aur kabhi-kabhar hame’n ek-aadh aayat suna bhi dete the.[197]

Baab 98: Namaz-e-Maghrib Mein Qirat Ka Bayan

Wazaahat: Is unwaan ke tahat namaz-e-maghrib mein qirat ka andaaza aur miqdaar bayan karna maqsood hai. Saabeqa abwaab ki tarah us mein nafs-e-qirat ka isbaat muraad nahi, kyou’nke namaz-e-maghrib mein qirat ba-awaaz-e-buland hoti hai. Is liye nafs qirat ke isbaat ke chandaa’n zaroorat nahi.[198]

[763] Hazrat Ibne Abbas (rz) se riwayat hai ke (unki walida) Umme Fazal (rza) ne unhe’n Surah “وَالْمُرْسَلَاتِ عُرْفًا” padhte suna to kehne lagee’n: Mere bete! Toone ye surah padhkar mujhe yaad dila diya ke yehi wo aakhri surah hai jo maine Rasool Allah (s) se suni thi. Aap ye surah namaz-e-maghrib mein padh rahe the.[199]

[764] Marwan bin Hakam se riwayat hai, unho’n ne kaha ke mujhe Hazrat Zaid bin Saabit (rz) ne farmaya: Tu namaz-e-maghrib mein choti-choti surah (qisaar) padhta hai, jabke maine Rasool Allah (s) ko namaz-e-maghrib mein do (2) badi surah mein se ziyaada badi surah padhte hue suna hai.

Baab 99: Namaz Maghrib Mein Ba-awaaz-e-Bulan Qirat Karna

[765] Hazrat Jubair bin Muti’m (rz) se riwayat hai, unho’n ne farmaya: Maine Nabi (s) ko namaz-e-maghrib mein Surah Toor padhte suna hai.[200]

Baab 100: Namaz-e-Isha Mein Ba-awaaz-e-Buland Qirat Karna

[766] Hazrat Abu Raafe se riwayat hai, unho’n ne kaha ke maine Hazrat Abu Huraira (rz) ke hamraah namaz-e-isha padhi to unho’n ne Surah “اِذَا السَّمَآءُ الْشَقَّتْ” padhi aur us mein sajda kiya. Jab maine unse sajde ke mutaalliq dariyaaft kiya to unho’n ne farmaya: Maine Hazrat Abul Qasim (s) ke peeche sajda kiya hai, lehaaza main hamesha us mein sajda karta rahu’nga ta-aa’nke (qiyamat ke din) meri aapse mulaqaat ho jaae.[201]

[767] Hazrat Bara bin Aazib (rz) se riwayat hai ke Nabi (s) ne dauran-e-safar mein namaz-e-isha ki do (2) rakat mein se ek mein surah “وَالتِّيْنِ وَالزَّيْتُوْنِ” padhi.[202]

Baab 101: Namaz-e-Isha Mein Sajde Waali Surah Padhna

[768] Hazrat Abu Raafe se riwayat hai, unho’n ne kaha ke maine Hazrat Abu Huraira (rz) ke hamraah namaz-e-isha padhi to unho’n ne Surah “اِذَا السَّمَآءُ انْشَقَّتْ” padhi aur us mein sajda kiya. Maine arz kiya: Ye kaunsa sajda hai? Unho’n ne farmaya: Maine Hazrat Abul Qasim (s) ke peeche us mein sajda kiya hai, is liye ab to main is surah mein sajda karta rahu’nga, ta-aa’nke qiyaamat ke din meri aapse mulaqaat ho jaae.[203]

Baab 102: Namaz-e-Isha Mein Qirat Ka Bayan

[769] Hazrat Baraa bin Aazib (rz) se riwayat hai, unho’n ne kaha ke maine Nabi (s) ko namaz-e-isha mein “وَالتِّيْنِ وَالزَّيْتُوْنِ” padhte suna aur maine Rasool Allah (s) se ziyada khush-al-lehaan yaa accha padhne waala koi nahi suna.[204]

Baab 103: (Imam Ko Chaahiye Ke) Pehli Do (2) Rakat Ko Taweel Aur Aakhri Do (2) Rakat Ko Mukhtasar Kare

[770] Hazrat Jabir bin Samra (rz) se riwayat hai, unho’n ne kaha ke Hazrat Umar (rz) ne Hazrat Saad bin Abi Waqqas (rz) se farmaya: Ahle Kufa ne aapke mutaalliq har muaamala, hatta ke namaz ke mutaalliq bhi shikaayat ki hai. Hazrat Saad bin Abi Waqqas (rz) ne jawab diya: Main pehli do (2) rakat mein tawaalat aur aakhri do (2) rakat mein ikhtesaar karta hoo’n. Aur jab se maine Rasool Allah (s) ke peeche namaz ki iqteda ki hai, kabhi uski adaaegi mein kotaahi nahi ki. Hazrat Umar (rz) ne farmaya: Aap ne sach kaha, mera bhi aapke mutaalliq yehi gumaan tha.[205]

Baab 104: Namaz-e-Fajr Mein Qirat Karna

Hazrat Umme Salama (rza) farmati hain ke Nabi (s) ne Surah “والطُّور” tilaawat farmaai.

[771] Sayaar bin Salama se riwayat hai, unho’n ne kaha ke main aur mera baap (ham dono) Hazrat Abu Barzah Aslami (rz) ke paas gae aur un se namazo’n ke auqaat dariyaaft kiye. Unho’n ne farmaya: Jab aftaab dhal jaata to Nabi (s) zohar ki namaz padhte the aur namaz-e-asr aise waqt mein adaa karte ke aadmi madina ke aakhri kinaare tak waapas pohonch jaata, jabke aftaab abhi taghaiyyur-pazeer[206] na hua hota. Namaz-e-Maghrib ke mutaalliq jo kuch Abu Barzah (rz) ne farmaya, usey main bhool gaya hoo’n. Albatta aap namaz-e-isha raat ke teesre hisse tak muakh-khar karne mein koi qabaahat mehsoos nahi karte the. Lekin usse pehle neend karne aur uske baad baato’n mein masroof hone ko naa-pasand karte the. Aur namaz subah aise waqt mein padhte ke aadmi namaz se faraaghat ke baad apne saathi ko pehchaan sakta tha, jabke aap dono rakat yaa har ek mein 60 se 100 ayaat tak tilaawat farmate the.[207]

[772] Hazrat Abu Huraira (rz) se riwayat hai, unho’n ne farmaya: Har namaz mein qirat karni chaahiye, phir jin namazo’n mein Rasool Allah (s) ne hame’n ba-awaaz-e-buland sunaaya hai, ham un mein tumhe’n ba-awaaz-e-buland sunaate hain, aur jin mein aap ne hamse qirat ko posheeda rakha hai, un mein ham bhi tum se posheeda rakhte hain. Aur agar tu Surah Faatiha se ziyada qirat na kare to bhi kaafi hai, aur agar ziyada padhle to accha hai.

Faaeda: Is riwayat se maaloom hua ke jo shakhs namaz mein faatiha nahi padhta uski namaz nahi hoti aur faatiha ke alaawa zaaed padhna mustahab hai, agarche Sahaba Ikraam (riz) ke yahaa’n faatiha ke alaawa deegar aayaat ka padhna bhi zaroori hai. Hazrat Usman bin Abil Aas (rz) ka yehi mauqif hai. Bahar-haal Hazrat Abu Huraira (rz) ki is riwayat ka ba-zaahir taqaaza ye hai ke faatiha ke baghair namaz nahi hoti aur uske alaawa deegar ayaat ka tamaam rakaat mein padhna mustahab hai, zaroori nahi.[208]

Baab 105: Namaz-e-Fajr Mein Ba-awaaz-e-Buland Qirat Karna

Hazrat Umme Salama (rza) farmati hain ke main logo’n ke peeche se tawaaf kar rahi thi, jabke Nabi (s) namaz padha rahe the, aur namaz mein Surah at Toor ki tilaawat kar rahe the.

[773] Hazrat Ibne Abbas (rz) se riwayat hai, unho’n ne farmaya ke Nabi (s) apne chand Sahaba Ikraam (riz) ke hamraah souq okaz ka iraada karke chale, jabke un dino’n shayateen ko aasmaani khabre’n lene se rok diya gaya tha aur un par sholey barsaae jaa rahe the. Un halaat mein shayateen apni qaum ki taraf laut aae, qaum ne poocha: Kya haal hai? Shayateen ne kaha: Hamaare aur aasmaani khabro’n ke darmiyan rukawat khadi kardi gai hai, aur ab ham par sholey barsaae jaa rahe hain. Qaum ne kaha: Tumhare aur aasmaani khabro’n ke darmiyan koi aisee cheez haael ho gai hai, jo abhi abhi zaahir hui hai, is liye tum roo-e-zameen mein mashriq-o-maghrib tak chal-phir kar dekho, ke wo kya cheez hai, jo tumhare aur aasmaani khabro’n ke darmiyan haael ho gai hai? Chunache wo uski talaash mein nikle, un mein wo jinnaat jo Tihaama ki taraf nikle the, wo Nabi (s) ke paas aapohche. Aap us waqt muqam-e-nakhla mein the aur okaaz ki mandi ki taraf jaane ki niyyat rakhte the. Us waqt aap apne Sahaba Ikraam (riz) ko namaz-e-fajr padha rahe the. Jab un jinnaat ne kaan lagakar quran suna to kehne lagey: Allah ki qasam! Yehi wo quran hai jisne tumhare aur aasmaani khabro’n ke darmiyan hijab daal diya hai. Chunache usi muqaam se wo apni qaum ki taraf laut gae aur unse kehne lagey: Bhaiyyo! Ham ne ajeeb quran suna hai, jo hidayat ka raasta bataata hai, lehaaza ham us par imaan le aae hain. Ab ham hargiz apne parwardigaar ke saath kisi ko shareek nahi banae’nge. Tab Allah Ta’ala ne apne Nabi (s) par ye surah “قُلْ اُوْحِىَ اِلَّىَّ”…  naazil farmaai aur aapko jinno’n ki guftagu ba-zariya-e-wahee bataai gai.[209]

[774] Hazrat Ibne Abbas (rz) se riwayat hai, unho’n ne farmaya ke Nabi (s) ko jis namaz mein jahr[210] ka hukum hua, aap ne us mein jahar kiya, aur jis namaz mein aahista padhne ka hukum hua wahaa’n aahista padha (Aur Tumhara Parwardigaar Bhoolne Waala Nahi)[211], (Aur Bila-shubha Tumhare Liye Rasool Allah (s) Ki Zaat-e-Giraami Mein Behtareen Namoona Hai, Yaane Unki Paerwee Karna Hi Accha Hai)[212].

Baab 106: Ek (1) Rakat Mein Do (2) Surah Jamaa Karna, Surah Ki Sirf Aakhri Ayaat Tilaawat Karna. Nez Ek (1) Surah Ko Doosri Surah Se Pehle Padhna Aur Surah Ka Sirf Ibtedaai Hissa Tilaawat Karna

Hazrat Abdullah bin Saaeb (rz) se manqool hai ke Nabi (s) ne subah ki namaz mein Surah Mominoon padhna shuru ki, jab Hazrat Moosa aur Haroon yaa Hazrat Isa (AA) ka zikr aaya to aapko khaansi aagai, aap usi waqt rukoo mein chale gae. Hazrat Umar (rz) ne pehli rakat mein Surah Baqara ki 120 ayaat padheen aur doosri rakat mein masaani[213] ki ek (1) surah tilaawat ki.

Hazrat Ahnaf bin Qais ne pehli rakat mein Surah Kahaf aur doosri mein Surah Yusuf yaa Yunus padhi, aur bayan kiya ke Hazrat Umar (rz) ne inhi do (2) surah ko namaz-e-subah mein padha tha. Hazrat Abdullah bin Masood (rz) ne (pehli rakat mein) Surah Anfaal ki 40 ayaat aur doosri rakat mein mufassalaat[214] se ek (1) surah padhi. Hazrat Qatada ne us shakhs ke mutaalliq, jo ek (1) surah ko do (2) rakato’n mein (uske do (2) hisse karke) yaa ek (1) hi surah ko do (2) rakaat mein dohraata hai, farmaya ke sab kitabullah hai. (Har tarah se padhna jaaez hai.)

[774[215]م] Hazrat Anas (rz) se riwayat hai k eek (1) ansari shakhs masjid-e-quba mein ansari ki imaamat karaata tha. Uski ye aadat thi ke jin namazo’n mein qirat ba-awaaz ba-awaaz-e-buland ki jaati hai, un mein jab wo koi surah shuru karne ka irada karta to isse pehle (قُلْ هُوَ اللهُ اَحَدٌ) se aghaaz karta hai. Us se faraaghat ke baad phir koi doosri surah shuru karta. Wo har rakat mein aisa hi karta tha. Uske muqtadiyo’n ne usse baat ki aur kaha ke tum is surah se ibteda karte ho aur usey kaafi khayaal nahi karte, yahaa’n tak ke dooosri surah padhte ho. Lehaza tum usi surah ko padho, uske saath doosri surah na milaao, usey chodhkar sirf doosri surah padha karo. Usne jawab diya ke main to is surah ko nahi chodh sakta, agar tumhe’n pasand ho to isi tarah tumhari imaamat karaau’nga, aur agar tum isey naa-pasand karte ho to main tumhe’n chodh sakta hoo’n (surah ko nahi chodh sakta). Ahle Quba ne usey apne mein se afzal khayaal karte the, is liye unho’n ne usey chodhkar doosre ki imaamat ko pasand na kiya. Ittefaaq se jab Nabi (s) unke paas tashreef laae to unho’n ne ye maajra aapko sunaaya. Aap ne us imam se farmaya: “Aye falaa’n! Tumhe’n apne muqtadiyo’n ki baat maanne se kis cheez ne roka hai? Aur kya wajah hai ke toone har rakat mein ye surah padhne ka iltezaam kar rakha hai?” Usne jawab diya ke mujhe is surah se mohabbat hai. Is par aap ne farmaya: “Tera is surah se mohabbat karna tujhe Jannat mein daakhil karega”.

[775] Hazrat Abdullah bin Masood (rz) se riwayat hai ke unke paas ek aadmi aaya aur kehne laga: Maine aaj raat mufassil ki tamaam soorate’n ek (1) hi rakat mein padh de’n. Hazrat Abdullah bin Masood (rz) ne farmaya: Toone is qadar tezi se padhe’n jaise ashaar padhe jaate hain. Beshak main un joda-joda soorato’n ko jaanta hoo’n jinhe’n Rasool Allah (s) milakar padha karte the, phir aap ne mufassil ki 20 soorate’n bayan kee’n. Yaane har rakat mein padhi jaane waali do-do (2-2) surah.[216]

Baab 107: Akhri Do (2) Rakato’n Mein Sirf Surah Faatiha Padhna

[776] Hazrat Abu Qatada (rz) se riwayat hai ke Nabi (s) zohar ki pehli do (2) rakato’n mein Surah Faatiha aur do (2) surah mazeed padhte the, aur aakhri do (2) rakato’n mein sirf Surah Faatiha padhte the. Aur kabhi-kabhi koi aayat hame’n suna bhi dete the. Aur aap pehli rakat ko doosri rakat se lamba karte the. Isi tarah asr aur subah ki namaz mein bhi yehi maamool tha.[217]

Baab 108: Zohar Aur Asr Ki Namaz Mein Aahista Qirat Karna

[777] Hazrat Abu Ma’amar se riwayat hai, unho’n ne kaha ke ham ne Khabbab bin Arat (rz) se dariyaaft kiya: Aaya Rasool Allah (s) zohar aur Asr ki namaz mein qirat karte the? Unho’n ne farmaya: Haa’n, ham ne dobaara arz kiya ke aapko kaise pata chalta tha? Unho’n ne farmaya: Aap ki daadhi mubarak ki jumbish ki wajah se hame’n maaloom ho jaata tha.[218]

Baab 109: Jab Imam (Sirri Namaz Mein) Koi Aayat Sunaa De.

[778] Hazrat Abu Qatada (rz) se riwayat hai ke Nabi (s) zohar aur asr ki pehli do (2) rakato’n mein surah faatiha aur uske saath koi doosri surah bhi padhte the, aur kabhi kabhaar hame’n koi aayat suna diya karte the, nez aap pehli rakat ko lamba karte the.[219]

Faaeda: Sirri namaz mein agar koi aayat ba-awaaz-e-buland padh di jaae to usse namaz makrooh nahi hogi, isi tarah agar ek aayat ke bajaae do (2) ayaat sunaa di jaae’n to bhi namaz saheeh hai. Ye mauqif un logo’n ke khilaaf hai jo shaoo yaa ghair-sahoo ki wajah se koi aayat ba-awaaz-e-buland padhne par sajda-e-sahoo zaroori qaraar dete hain. Is hadees se un hazraat ki khule aflaaz mein tardeed hoti hai.

Baab 110: Pehli Rakat Mein Qirat Ko Lamba Karna

[779] Hazrat Abu Qatada (rz) se riwayat hai ke Nabi (s) namaz-e-zohar ki pehli rakat ko lamba karte the aur doosri rakat ko mukhtasar farmate the aur subah ki namaz mein bhi aapka yehi maamool tha.[220]

Baab 111: Imam Ka Ba-Awaaz-e-Buland Ameen Kehna

Hazrat Ataa (rh) bayan karte hain ke aameen ek dua hai. Hazrat Abdullah bin Zubair (rz) aur unke muqtadiyo’n ne itni zor se aameen kahi ke masjid gooj uthi. Hazrat Abu Huraira (rz) apne imam ko kaha karte the ke mujhe ameen se mehroom na karna. Hazrat Naafe ka kehna hai ke Abdullah bin Umar (rz) aameen kehne ko kisi soorat mein nahi chodte the, balke doosro’n ko bhi uske mutaalliq targheeb diya karte the, aur maine aameen ke mutaalliq unse acche kalimaat sune hain.

[780] Hazrat Abu Huraira (rz) se riwayat hai ke Nabi (s) ne farmaya: “Jab imam ameen kahe to tum bhi ameen kao, kyou’nke jiski ameen farishto’n ki ameen ke muwaafiq hogi, uske guzishta gunah moaaf kar diye jaae’nge”. Ibne Shihab ka kehna hai ke Rasool Allah (s) khud bhi ameen kaha karte the.[221]

Faaeda: Imam ibne Khuzaima is hadees “jab imam ameen kahe to tum bhi ameen kaho” ki wazaahat karte hue farmate hain: Is farmaan-e-nabawi se waazeh taur par saabit hota hai ke imam ko ba-awaaz-e-buland ameen kehna chaahiye. Kyou’nke Rasool Allah (s) imam ki ameen ke waqt ameen kehne ka hukum isi soorat mein de sakte hain, jab muqtadi ko imam ki ameen ka pataa ho. Agar imam ba-awaaz-e-buland ameen kehne ke bajaae aahista kahe to muqtadi ko maaloom nahi ho sakega ke imam ne ameen kahi hai yaa nahi, aur ye muhaal hai ke kisi se kaha jaae ke jab falaa’n aadmi ye kahe to tum bhi usi tarah kaho, jabke wo uski baat na sun raha ho. Koi aalim bhi is muhaal ka tasawwur nahi kar sakta, ke Rasool Allah (s) muqtadi ko ameen us waqt kehne ka hukum de’n jab imam ameen kahe aur muqtadi imam ki ameen na sun raha ho.[222]

Baab 112: Ameen Kehne Ki Fazilat

[781] Hazrat Abu Huraira (rz) se riwayat hai ke Rasool Allah (s) ne farmaya: “Jab tum mein se koi ameen kehta hai to aasmaan par farishte bhi ameen kehte hain. Agar dono ki ameen ek doosre se mil jaae to us (namazi) ke tamaam guzishta gunah moaaf kar diye jaate hain”.

Baab 113: Muqtadi Ka Ba-awaaz-e-Buland Ameen Kehna

[782] Hazrat Abu Huraira (rz) se riwayat hai ke Rasool Allah (s) ne farmaya: “Jab imam “غَيْرِ الْمَغْضُوبِ عَلَيْهِمْ وَلَا الضَّالِّينَ” kahe to tum ameen kaho, kyou’nke jiski ameen farishto’n ki ameen se ham-aahang hui uske tamam guzihsta gunah moaaf kar diye jaae’nge”. Is (Sumaiyyi[223])  ki mataabe-at Muhammad bin Umru ne ki hai aur Nayeem Mujmir ne baraah-e-raast Hazrat Abu Huraira (rz) se bayan kiya hai.[224]

Faaeda: Kutub-e-hadees mein mutaaddid Sahaba Ikraam (riz) ke asaar marwi hain jo muqtadi ke liye ameen bil-jahar par dalaalat karte hain. Chand-ek ka hawaala hasb-e-zel hai: Hazrat Naafe riwayat karte hain ke Hazrat Ibne Umar (rz) imam ke saath namaz padhte to jab faatiha padhne ke baad log ameen kehte to bhi aameen kehte aur usey sunnat qaraar dete.[225] Nez Imam Bayhaqi kehte hain ke Hazrat Ibne Umar (rz) imam hote yaa muqtadi dono soorato’n mein buland awaaz se ameen kehte the.[226] Ibne Juraij kehte hain ke maine Ataa bin Abi Rabaah se sawal kiya: Aaya Hazrat Ibne Zubair (rz) Surah Faatiha ke ikhtetaam par ameen kehte the? To unho’n ne kaha: Haa’n, aur jo unke peeche namaz padhte the, wo bhi ameen kehte the, yahaa’n tak ke masjid gooj uthti thi.[227] Iske alaawa Hazrat Ikrima Maula ibne Abbas kehte hain ke maine logo’n ko is haal mein paaya ke imam “غَيْرِ الْمَغْضُوبِ عَلَيْهِمْ وَلَا الضَّالِّينَ” kehta t unke ameen kehne se masaajid goonj uthti thee’n.[228] In asaar ke muqaable mein kisi sahaabi se saheeh aur hasan sand ke saath aahista awaaz mein ameen kehna saabit nahi.

Baab 114: Shumooliyat Saff Se Pehle Rukoo Karna

[783] Hazrat Abu Bakrah (rz) se riwayat hai ke wo Nabi (s) ke qareeb us waqt pohonche jab aap rukoo mein the. Saff mein shumooliyat se pehle hi unho’n ne rukoo kar liya. Phir jab Nabi (s) se ye maajra bayan kiya to aap ne farmaya: “Allah Ta’ala tumhare shauq ko mazeed taraqqi de, aainda aisa mat karna”.

Faaeda: Is hadees se maaloom hua ke der se jamaat mein shamil hone waale ko chaahiye ke wo jis haalat mein imam ko paae usi haalat ko ikhteyar karke imam ke saath shamil ho jaae. Rasool Allah (s) ne farmaya: “Namaz ke liye araam aur sukoon ke saath aao, jitna hiss mil jaae padhlo aur jo reh jaae wo baad mein poora karlo”.[229]

Baab 115: Rukoo Mein Poore Taur Par Takbeer Kehna

Ibne Abbas (rz) ne isey Nabi (s) se bayan kiya hai, aur Hazrat Maalik bin Huwairis (rz) se bhi uske mutaalliq riwayat maujood hai.

[784] Hazrat Imran bin Hussain (rz) se riwayat hai, unho’n ne ek martaba Hazrat Ali (rz) ke hamraah Basra mein namaz adaa ki to farmaya: Us shakhs (Hazrat Ali (rz)) ne hame’n wo namaz yaad dilaadi hai jo ham Rasool Allah (s) ke hamraah padha karte the. Phir unho’n ne kaha ke Aap (s) jab namaz mein sar uthate aur sar jhukaate to us waqt Allahu Akbar kehte the.[230]

Faaeda: Rasool Allah (s) ki wafaat se kuch arsa baad Hazrat Usman (rz) ki khilaafat mein aimma-e-masaajid ne namaz padhte waqt takbiraat-e-inteqal[231] ko tark kar diya tha, jaisa ke Hazrat Abu Moosa Ashari (rz) ki riwayat mein hai ke Hazrat Ali (rz) ne hame’n wo namaz yaad dilaa di jo ham Rasool Allah (s) ke hamraah adaa karte the. Ham ne un takbiraat-e-inteqal ko bhula diya tha, yaa daanista[232] taur par chodh baite the.[233] Tark ka sabab ye hua ke Hazrat Usman (rz) ki awaaz-e-tab-ee[234] hayaa ki wajah se pasth thi, yaa budhaape ki binaa par kamzor ho gai thi. Chunache namaz padhate waqt logo’n ko unki takbiraat sunaai nahi deti thee’n, jisse ye khayaal kar liya gaya ke namaz mein takbiraat-e-inteqal zaroori nahi.

[785] Hazrat Abu Huraira (rz) se riwayat hai ke wo logo’n ko namaz padhate to jab bhi jhukte aur uth-te to takbeer kehte the aur jab salaam pherte to farmate ke tumhari nisbat meri namaz Rasool Allah (s) ki namaz se ziyada mushaaba hai.[235]

Baab 116: Sajde Mein Poore Taur Par Takbeer Kehna

[786] Hazrat Mutraf bin Abdullah se riwayat hai, unho’n ne kaha ke maine aur Hazrat Imran bin Hussain (rz) ne Hazrat Ali (rz) ke peeche namaz padhi. Aap jab bhi sajda karte to takbeer kehte aur jab bhi sar uthaate to takbeer kehte, isi tarah jab do (2) rakat se uthte to takbeer kehte. Chunache namaz mukammal hone ke baad Hazrat Imran bin Hussain ne mera haath pakad kar farmaya ke unho’n ne mujhe Hazrat Muhammad (s) ki namaz yaad dilaadi hai, yaa unho’n ne hame’n Muhammad (a) ki namaz padhaai hai.[236]

[787] Hazrat Ikrima se riwayat hai, unho’n ne kaha ke maine ek (1) aadmi ko muqam-e-Ibrahim ke paas namaz padhte hue dekha ke wo jab bhi jhukta, uthta, khada hota yaa baithta to takbeer kehta. Maine Hazrat Ibne Abbas (rz) ko bataaya to unho’n ne farmaya: Teri maa’n naho, kya ye Nabi (s) ki si namaz nahi hai.

Baab 117: Sajda Karke Khade Hote Waqt Takbeer Kehna

[788] Hazrat Ikrima se riwayat hai, unho’n ne kaha ke maine Makkah Mukarrama mein ek buzurg ke peeche namaz padhi to unho’n ne (uthte, jhukte waqt) kul 22 takbiraat kahee’n. Maine Hazrat Ibne Abbas (rz) se kaha: Ye to bewaqoof hai. Us par unho’n ne farmaya: Tujhe teri maa’n gumm paae, ye to Abul Qasim (s) ki sunnat hai.[237]

Moosa bin Ismail ne kaha ke hame’n Abaan ne hadees bayan ki, unse Qatada ne, unse Hazrat Ikrima ne ye hadees bayan ki hai.

[789] Hazrat Abu Huraira (rz) se riwayat hai, unho’n ne farmaya: Rasool Allah (s) jab namaz ke liye khade hote to Allahu Akbar kehte, jab rukoo karte to bhi takbeer kehte. Phir jab rukoo se apni peeth uthaate to “سَمِعَ اللهُ لِمَنْ حَمِدَهُ” “Sami Allahu Liman Hamida” kehte. Uske baad ba-haalat-e-qauma “رَبَّنَا لَكَ الْحَمْدُ” “Rabbana Lakal Hamdu” kehte…

Raawi-e-hadees Abdullah bin Saaleh ne apne ustad Laith se, “رَبَّنَا لَكَ الْحَمْدُ” “Rabbana Lakal Hamdu” ke alfaaz naqal kiye hain. Phir jab (sajde ke liye) jhukte to takbeer kehte. Uske baad jab (sajde se) sar uthaate to bhi takbeer kehte. Phir doosre sajde ke liye Allahu Akbar kehte aur aakhir mein jab doosre sajde se sar uthaate to bhi takbeer kehte. Phir apni tamaam namaz mein aisa hi karte, ta-aa’nke usey poora kar lete. Alaawa azee’n jab tasshahud baithne ke baad do (2) rakat se faraaghat ke baad uthte, to bhi takbeer kehte.[238]

Baab 118: Ba-haalat-e-Rukoo Haath Ghutno’n Par Rakhna

Hazrat Abu Humaid Sadi (rz) ne apne shaagirdo’n se bayan kiya hai ke Nabi (s) (ba-haalat-e-rukoo) apne dono haatho’n ko apne ghutno’n par khoob jamaa kar rakhte the.

[790] Hazrat Mus’ab bin Saad se riwayat hai, wo kehte hain ke maine ek (1) dafa apne baap (Hazrat Saad bin Abi Waqqas (rz)) ke pehlu mein namaz padhi, to maine apni dono hatheliyo’n ko milaa kar apni raano’n ke darmiyan rakh liya. Mujhe mere waalidne is fe’l se manaa farmaya aur kaha ke ham pehle aisa kiya karte the. Phir hame’n aisa karne se rok diya gaya aur hukum diya gaya ke (dauran-e-rukoo mein) apne haath ghutno’n par rakha kare’n.

Baab 119: Agar Koi Shakhs Rukoo Poora Na Kare

[791] Hazrat Zaid bin Wahb se riwayat hai ke Hazrat Huzaifa (rz) ne ek (1) shakhs ko dekha ke wo rukoo aur sujood ko poora nahi kar raha tha, to aap ne usey kaha: Toone namaz nahi padhi, agar tujhe isi haalat mein maut aagai to us deen-e-fitrat ke khilaaf marega, jis par Allah Ta’ala ne Hazrat Muhammad (s) ko paida kiya hai.[239]

Baab 120: Rukoo Mein Peeth Ko Baraabar Karne Ka Bayan

Hazrat Abu Humaid Saa’di (rz) ne apne shaagird ko bayan kiya ke Nabi (s) ne rukoo kiya, phir aap ne apni peeth ko jhukaa diya.

Baab 121: Rukoo Poora Karne Aur Us Mein Etedaal-o-Tamaaniyat[240] Ki Hadd Ka Bayan

[792] Hazrat Baraa bin Aazib (rz) se riwayat hai, unho’n ne farmaya: Rasool Allah (s) ka rukoo, sajda, sajdo’n ke darmiyan baithna aur rukoo ke baad qauma, ye sab taqriban baraabar hote the. Albatta qiyaam aur tasshahud kuch taweel hote the.[241]

Baab 122: Nabi (s) Ka Us Shakhs ko Namaz Dobaara Padhne Ka Hukum Dena Jisne Rukoo Poora Adaa Nahi Kiya Tha.

Wazaahat: Is unwaan ke zariye se Imam Bukhari (rh) ne hadees ki tashreeh ki hai, kyou’nke is mein namaz dobaara padhne ki wajah bayan nahi hui thi. Is unwan mein is wajah ko bayan kiya gaya hai ke usne rukoo-o-sujood ko poori tarah adaa nahi kiya tha.

[793] Hazrat Abu Huraira (rz) se riwayat hai ke Nabi (s) ek (1) dafa masjid mein tashreef laae, to ek (1) aur aadmi bhi masjid mein dakhil hua. Usne namaz padhi, uske baad Nabi (s) ki khidmat mein haazir ho kar usne salaam arz kiya. Nabhi (s) ne salaam ka jawab diya, aur farmaya: “Waapas jaa, namaz padh, toone namaz nahi padhi”. Usne phir namaz padhi, waapas aaya aur Nabi (s) ko salaam arz kiya. Aap ne dobaara farmaya: “Jaa, namaz padh, is liye ke toone namaz nahi padhi”. Bahar-haal aisa waqea teen (3) martaba pesh aaya. Bil-aakhir us shakhs ne kaha: Us zaat ki qasam jisne aapko haq de kar bheja hai! Main isse bethar namaz nahi padh sakta. Aap mujhe namaz ki taaleem de’n, (uske baad) aap ne farmaya: “Jab tum namaz ke liye khade ho, to Allahu Akbar kaho, phir quran se jo muyassar ho usey padho, phir rukoo karo. Jab itmenan se rukoo karlo to sar uthakar seedhe khade ho jaao. Uske baad itmenan se sajda karo. Jab itmenan se sajda karlo to sar uthakar itmenan se baith jaao, uske baad (doosra) sajda karo, ta-aa’nke sajde mein tujhe itmenan ho jaae. Phir is tarah apni saari namaz mein karo”.[242]

Faaeda: Mohaddiseen ne is hadees ko “حَدِيْث مُسِيْئِ الصَّلَاة” ka naam diya hai. Aur isse ba-kasrat masaael ka istembar kiya hai. Is hadees se maaloom hua ke namaz mein taadeel-e-arkaan[243] farz hai. Uske baghair namaz nahi hoti, kyou’nke Rasool Allah (s) ne us shakhs ko baar-baar namaz padhne ka hukum diya. Uska yehi qusoor tha ke wo rukoo-o-sujood theek taur par adaa nahi karta tha.

Baab 123: Rukoo Mein dua Karna

[794] Hazrat Ayesha (rza) se riwayat hai, unho’n ne farmaya: Nabi (s) rukoo aur sajde mein ye dua padhte the: “سُبْحَانَكَ الّٰهُمَّ رَبَّنَا وَبَحَمْدِكَ اللّٰهُمَّ اغْفِرْلِىْ” Subhanaka Allahumma Rabbana Wa Bihamdika Allahummagh Firli.[244]

Baab 124: Imam Aur Uske Muqtadi Rukoo Se Sar Uthaae’n Too Kya Padhe’n?

[795] Hazrat Abu Huraira (rz) se riwayat hai, unho’n ne farmaya: Rasool Allah (s) jab “سَمِعَ اللهُ لِمَنْ حَمِدَهُ” Sami Allahu Liman Hamida kehte the to uske baad “اَللّٰهُمَّ رَبَّنَا وَلَكَ الْحَمْدُ” Allahumma Rabbana Wa Lakal Hamdu bhi kehte. Jab rukoo karte aur rukoo se apna sar uthaate to takbeer kehte. Nez jab dono sajdo’n se faarigh ho kar khade hote to Allahu Akbar kehte the.[245]

Baab 125: “اَللّٰهُمَ رَبَّنَا لَكَ الْحَمْدُ” Kehne Ki Fazilat

[796] Hazrat Abu Huraira (rz) se riwayat hai ke Nabi (s) ne farmaya: “Jab Imam “سَمِعَ اللهُ لِمَنْ حَمِدَهُ” Sami Allahu Liman Hamida kahe, to tum “اَللّٰهُمَّ رَبَّنَا وَلَكَ الْحَمْدُ” Allahumma Rabbana Wa Lakal Hamdu kaho. Kyou’nke jiska ye kehna farishto’n ke kehne ke mutaabiq hua, uske guzishta gunah moaaf kar diye jaae’nge”.[246]

Baab 126: Bila-unwaan

[797] Hazrat Abu Huraira (rz) se riwayat hai, unho’n ne farmaya: Yaqeenan main aisee namaz padhta hoo’n, jo Nabi (s) ki namaz se mushaaba ho. Chunache Abu Huraira (rz) Zohar, Isha, aur Fajr ki aakhri rakat mein jab Sami Allahu Liman Hamida “سَمِعَ اللهُ لِمَنْ حَمِدَهُ” ke baad qunoot padha karte the, jis mein ahle imaan ke liye dua farmate aur kuffaar par laanat karte the.[247]

[798] Hazrat Anas (rz) se riwayat hai, unho’n ne farmaya ke fajr aur maghrib ki namaz mein qunoot padhi jaati thi.

[799] Hazrat Raafia Zurqi (rz) se riwayat hai, unho’n ne farmaya ke ham ek din Nabi (s) ke peeche namaz padh rahe the, jab aap ne rukoo se sar utha kar jab “سَمِعَ اللهُ لِمَنْ حَمِدَهُ” Sami Allahu Liman Hamida kaha to ek shakhs ne (ba-awaaz-e-buland) “رَبَّنَا وَلَكَ الْحَمْدُ حَمْدًا كَثِيْرًا طَيِّبًا مُبَارَكًا فِيْهِ” Rabbana Wa Lakal Hamdu Hamdan Kaseeran Toaiyyibam Mubarakan Feehi padha. Jab aap namaz se faarigh hue to farmaya: “Ya kalimaat kisne kahe the?” Wo shakhs bola: Maine padhe the. Aap ne farmaya: “Maine tees (30) se ziyaada farishto’n ko dekha ke wo in kalimaat ki taraf lapak rahe the ke kaun unhe’n pehle qalam-band kare”.

Baab 127: Rukoo Se Sar Uthaane Ke Baad Itmenan Se Seedha Khada Hona

Hazrat Abu Humaid Saa’di (rz) bayan karte hain ke Nabi (s) ne (rukoo se) sar uthaaya aur is tarah seedhe khade ho gae ke har jod apni jagah par aagaya.

[800] Hazrat Saabit se riwayat hai, unho’n ne kaha ke Hazrat Anas (rz) hame’n Nabi (s) ki namaz ka andaaza bayan karte the, chuanche wo namaz mein khade hote aur jab rukoo se sar uthaate to itni der tak khade rehte ke ham (aapas mein) kehte: Shayad aap bhool gae hain.[248]

[801] Hazrat Baraa bin Aazib (rz) se riwayat hai, unho’n ne kaha ke Nabi (s) ke rukoo, sajde, rukoo se sar uthaakar (khade hone) aur do (2) sajdo’n ke darmiyan nashist ka dauraaniya[249] taqriban barabar hota tha.[250]

[802] Hazrat Abu Qilaaba se riwayat hai, unho’n ne kaha ke Hazrat Maalik bin Huwairis (rz) hame’n auqaat-e-namaz ke alaawa Nabi (s) ki namaz padhkar dikhaya karte the. Chunache ek din wo namaz ke liye khade hue to jamkar qiyaam kiya. Phir rukoo kiya to wo bhi jamkar kiya. Uske baad rukoo se sar uthaaya to thodi der tak seedhe khade rahe. Abu Qilaaba kehte hain ke us waqt Hazrat Maalik bin Huwairis (rz) ne hame’n hamaare Shaikh Abu Yazid ki tarah namaz padhai. Aur Abu Yazid jab doosre sajde se sar uthaate to seedhe ho kar baith jaate, phir khade hote the.[251]

Baab 128: Sajde Ke Liye Allahu Akbar Kehta Hua Jhuke

Hazrat Naafe kehte hain ke Hazrat Ibne Umar (rz) (sajda karte waqt) ghutno’n se pehle apne haath (zameen par) rakhte the.

[803] Abu Bakar bin Abdur Rahman aur Abu Salama bin Abdur Rahman se riwayat hai ke Hazrat Abu Huraira (rz) har namaz mein takbeer kehte the, khwah wo namaz farz ho yaa nafil, maah-e-ramzan mein bhi aur uske alaawa bhi. Jab namaz ke liye khade hote to Allahu Akbar kehte, phir jab rukoo karte to bhi Allahu Akbar kehte, phir (rukoo se uthte waqt) “سَمِعَ اللهُ لِمَنْ حَمِدَهُ” Sami Allahu Liman Hamida kehte. Baad azaa’n sajda karne se pehle “اَللّٰهُمَّ رَبَّنَا وَلَكَ الْحَمْدُ” Allahumma Rabbana Wa Lakal Hamd kehte. Iske jab jab sajde ke liye jhukte to Allahu Akbar kehte, phir jab sajde se sar uthaate to takbeer kehte. Uske baad (doosra) sajda karte to bhi Allahu Akbar kehte. Phir jab sajdo’n se sar uthaate to takbeer kehte, phir jab do (2) rakato’n mein baith kar uthte to bhi Allahu Akbar kehte. Al-gharz har rakat mein isi tarah karte, ta-aa’nke namaz se faarigh ho jaate. Jab apni namaz khatam kar lete to farmate: Mujhe us zaat ki qasam, jiske haath mein meri jaan hai! Yaqeenan main tum sabse Rasool Allah (s) ki namaz se ziyaada mushaabahat rakhta hoo’n. Beshak yehi aap ki namaz hoti thi, ta-aa’nke aap duniya se rukhsat ho gae.[252]

[804] Un dono’n (Abu Bakar bin Abdur Rahman aur Abu Salama bin Abdur Rahman) ne kaha ke Hazrat Abu Huraira (rz) bayan karte hain ke Rasool Allah (s) jab rukoo se sar uthaate to “سَمِعَ اللهُ لِمَنْ حَمِدَهُ” Sami Allahu Liman Hamida, “رَبَّنَا وَلَكَ الْحَمْدُ” Rabbana Wa Lakal Hamdu kehte aur kuch logo’n ke liye unka naam le kar dua karte hue farmaate: “Aye Allah! Waleed bin Waleed, Salama bin Hisham, Iyaas bin Abu Rabia aur Naatawaa’n musalmano ko (kuffaar ke zulm se) najaat de. Aye Allah Qabila-e-Muzar par apni giraft sakht karde aur unhe’n aisee qahet-saali mein mubtalaa karde jaisa ke Hazrat Yusuf (a) ke ahd mein qahet pada tha”. Us waqt ahle mashriq se qabila-e-muzar ke log aapke dushmat the.[253]

[805] Hazrat Anas (rz) se riwayat hai, unho’n ne farmaya ke Rasool Allah (s) ek martaba ghode se gir pade, to aap ki daaee’n jaanib zakhri ho gai. Ham log aap ki khidmat mein timardaari ke liye haazir hue. Itne mein namaz ka waqt aagaya to aap ne hame’n baithkar namaz padhaai aur ham bhi baith gae… Sufiyan raawi ne ek martaba ye alfaaz bayan kiye ke ham ne bhi baith kar namaz padhi… Jab aap adaa kar chuke to farmaya: “Imam is liye banaaya jaata hai ke uski iqteda ki jaae, lehaaza jab wo Allahu Akbar kahe to tum bhi Allahu Akbar kaho aur jab wo rukoo kare to tum bhi rukoo karo aur jab wo sar uthaae to tum bhi sar uthaao, aur jab wo “سَمِعَ اللهُ لِمَنْ حَمِدَهُ” Sami Allahu Liman Hamida kahe to tum “رَبَّنَا وَلَكَ الْحَمْدُ” Rabbana Wa Lakal Hamdu kaho, aur jab wo sajda kare to tum bhi sajda karo”.

Hazrat Sufiyan ne kaha: Kya Ma’amar ne is tarah bayan kiya? Maine kaha: Haa’n. Sufiyan ne kaha: Usne khoob yaad rakha. Zohri farmate hain ke mujhe “وَلَكَ الْحَمْدُ” Wa Lakal Hamdu aur “شِقُّهُ الْأَيْمَنُ” Shiqquhul Aimanu ke alfaaz yaad hain. Jab Imam Zohri ke paas se waapas aae to Ibne Juraij ne kaha ke main Zohri ke paas the too unho’n ne ye aflaaz bayan kiye: Aap ki daae’n pindli zakhmi ho gai.[254]

Baab 129: Sajde Ki Fazilat Ka Bayan

[806] Hazrat Abu Huraira (rz) se riwayat hai ke logo’n ne arz kiya: Allah ke Rasool! Kya ham roz-e-qiyamat apne parwardigaar ko dekhe’nge? Aap ne farmaya: “Shab-e-Qadar ke chaand jis par koi abr na ho (usey dekhne mein) tumhe’n koi shak hota hai?” Shaba Ikram ne kaha: Allah ke Rasool! Nahi. Aap ne faramya: “To kya tum aftaab (ke dekhne) mein shak karte ho, jabke us par abr na ho?” Sahaba Ikraam ne kaha: Allah ke Rasool! Hargiz Nahi. Aap ne farmaya: “Usi tarah tum apne parwardigaar ko dekhoge. Qiyamat ke din jab log uthaae jaae’nge to Allah Ta’ala Farmaega: Jo (duniya mein) jiski pooja karta tha wo uske peeche jaae, chunache koi to sooraj ke saath ho jaaega aur koi chaand ke peeche ho le ga, aur koi butho’n aur shayateen ke peeche chalega. Baaqi is ummat ke (musalman) log reh jaae’nge jin mein munaafiq bhi ho’nge. Unke paas Allah Ta’ala (ek nai soorat mein) tashreef laaega aur farmaega: Main tumhara Rabb hoo’n. Wo arz kare’nge ham (tujhe nahi pehchaante ham) isi jagah khade rahe’nge. Jab hamaara Rabb hamaare paas aaega to ham usey pehchaan le’nge. Phir Allah Ta’ala unke paas (apni asli shakl-o-soorat mein) jalwa-gar hoga aur farmaega ke main tumhara Rabb hoo’n. To wo kahe’nge: Haa’n tu hamaara Rabb hai. Phir Allah Ta’ala unhe’n bulaaega. Us waqt jahannum ki pusht par pul rakh diya jaaega. Ye sab se pehle main apni ummat ke saath us par se guzru’nga. Us roz rasoolo’n ke alaawa kisi aur ko kalaam ki himmat aur taaqat na hogi”. “Us roz rasool kahe’nge, Ilaahi! Salaamti de. Ilaahi salaamti de. Jahannum mein saadaan ke kaanto’n ki tarah aankde ho’nge. Kya tumne saadaad ke kaante dekhe hain?” Sahaaba ne arz kiya: Ji haa’n. Aap ne farmaya: “Bas wo saadaan ke kaanto’n ki tarah ho’nge, magar unki lambaai Allah ke siwa aur koi nahi jaanta. Wo aankde logo’n ko unke (burey) amaal ke mutaabiq ghaseete’nge. Baaz shakhs to apni bad-amaaliyo’n ki wajah se halaak ho jaae’nge aur kuch zakhmo’n se choor ho kar bach jaae’nge, hatta ke jab Allah Ta’ala ahle jahannum mein se jin par meherbaani karna chaahega to farishto’n ko hukum de ga jo log Allah ki ibaadat karte the wo nikaal liye jaae’n. Chunache farishte unhe’n sajdo’n ke nishanaat se pehchaan kar nikaal le’nge. Kyou’nke Allah Ta’ala ne aag par sajdo’n ke nishanaat ko khana haraam kar diya hai. Un logo’n ko jahannum se is haalat mein nikaala jaaega ke nishanaat-e-sujood ke alaawa unki har cheez ko aag khaa chuki hogi. Ye log koele ki tarah sookhta[255] haalat mein jahannum se nikle’nge. Phir un par aab-e-hayaat daala jaaega to wo aise numoo[256] paae’nge jis tarah qudrati beej paani ke bahaao mein ugta hai. Uske baad Allah Ta’ala apne bando’n ka faisla karne se faarigh ho jaaega, lekin ek shakhs jannat aur dozakh ke darmiyan reh jaaega. Wo jahannum se nikal kar jannat mein daakhil hone ke etebaar se aakhri hoga. Uska mu’n dozakh ki jaanib hoga aur wo arz karega: Aye Allah! Mere mu’n dozakh ki taraf se pher de, kyou’nke uski bad-boo ne mujhe jhulsa diya hai aur uske sholey ne mujhe jalaa diya hai. Allah Ta’ala farmaega: Kya tu aainda aisa to nahi karega ke agar tere saath accha sulook kiya jaae to phir uske alaawa kuch aur maange? Wo arz karega: Hargiz nahi, teri izzat ki qasam! Phir Allah Ta’ala ko uski mashiyyat ke mutaabiq ehed-o-paemaan denga. Uske baad Allah Ta’ala uska mu’n dozkah ki jaanib se pher de ga. Jab wo Jannat ki taraf mu’n karega to uski tar-o-taazgi aur bahaar dekh kar jitni der tak Allah Ta’ala ko manzoor rahega khamosh rahega. Uske baad kahega: Aye mere parwardigaar! Mujhe Jannat ke darwaaze tak pohchaa de. Allah Ta’ala farmaega: Kya toone is par qaul-o-qaraar na kiya tha ke jo kuch tu maang chuka hai, uske alaawa kisi aur cheez ka mutaalba nahi karega? Us par wo arz karega: Aye mere parwardigaar! Teri makhlooq mein sabse badhkar main hi bad-naseeb na ho jaaoo’n. Irshad hoga! Agar tujhe ye bhi ataa kar diya jaae to uske alawa kuch aur sawaal to nahi karega? Wo arz-pardaaz[257] hoga: Teri buzurgi ki qasam! Main iske alaawa koi aur sawaal nahi karoo’nga. Phir Allah Ta’ala ko uski mashiyyat ke mutaaibq qaul-o-qaraar de ga. Aakhir Allah Ta’ala usey jannat ke darwaze par pohcha de ga aur jab wo jannat ke darwaze ke paas pohoch jaaega, wahaa’n ki shadaabi, taazgi aur farhat dekhkar jitni der Allah ko manzoor hoga khamosh rahega. Phir you’n goya hoga: Aye mere parwardigaar! Mujhe Jannat mein daakhil karde. Allah Ta’ala farmaega: Aye Aadam ke bete! Tujh par afsos, tu kitna ehed-shikan aur dagha-baaz hai? Kya toone is baat ka ehed na kiya tha ke ab main koi darkhwaast nahi karoo’nga? To wo arz karega: Aye mere parwardigaar! Mujhe apni makhlooq mein sabse ziyada bad-naseeb na kar. Tab uski baato’n par Allah Ta’ala has-de-ga aur usey Jannat mein jaane ki ijaazat de kar farmaega ke khwahish kar, chunache wo khwahish karega, yahaa’n tak ke uski tamaam khwahishaat khatam ho jaaengi to Allah farmaega: Ye-ye cheeze’n aur maang. Uska parwardigaar usey khud yaad dilaaega, yahaa’n tak ke jab uski tamaam khwahishe’n poori ho jaae’ngi to Allah Ta’ala farmaega: Tujhe ye bhi, balke iske misl aur bhi diya jaata hai”. Hazrat Abu Saeed Khudri (rz) ne Hazrat Abu Huraira (rz) se kaha ke Rasool Allah (s) ne is jagah par farmaya tha: “Allah Ta’ala Farmaega: Tere liye ye bhi aur iske saath das-guna mazeed ghi hai”. Hazrat Abu Huraira (rz) goya hue ke mujhe Rasool Allah (s) se yehi yaad hai ke Allah Ta’ala farmaega: “Tere liye ye aur itna aur hai”. Hazrat Abu Saeed (rz) ne kaha ke maine Rasool Allah (s) ko ye farmate suna: “Ye sab kuch tujhe diya aur isse das-guna mazeed bhi diya jaata hai”.[258]

Baab 130: Dauran-e-Sajda Mein Dono Baazu Kushaada Aur Unhe’n Raano’n Se Door Rakhna

[87] Hazrat Abdullah bin Maalik ibne Buhaina (rz) se riwayat hai ke Nabi (s) jab namaz padhte to apne dono baazuo’n ke darmiyan is qadar kushadgi rakhte ke aap ki baghlo’n ki safedi numayaa’n ho jaati thi.

Lais ne kaha ke mujhe bhi Jafar bin Rabeea ne isi tarah bayan kiya.

Baab 131: Dauran-e-Sajda Mein Apne Paao’n Ki Ungliyo’n Ko Qibla Rukh Karna

Is (sunnat) ko Hazrat Abu Humaid Saa’di (rz) ne Nabi (s) se bayan kiya hai.

Wazaahat: Imam Bukhari (rh) ne Hazrat Abu Humaid Saa’di (rz) ki hadees ko apni saheeh mein muttasil sanad se bayan kiya hai.[259] Uske alfaaz ye hai ke Rasool Allah (s) ne jab sajda kiya to apne dono haath zameen par rakh diye, unhe’n bichaae hue bhi nahi the, aur naa unhe’n samet hi rakha tha, aur paao’n ki ungliyaan qibla-rukh karli thee’n.

Baab 132: Jab Namazi Apna Sajda Poora Na Kare

[808] Hazrat Huzaifa (rz) se riwayat hai, unho’n ne ek admi ko dekha ke wo dauran-e-namaz mein apne rukoo-o-sujood ko poora nahi karta tha. Jab wo apni namaz khatam kar chuka to Hazrat Huzaifa (rz) ne usse farmaya: Toone namaz nahi padhi. Mera khayaal hai ke aap ne ye bhi kaha: Agar tu isi haalat par mar gaya to Hazrat Muhammad (s) ke tareeqe ke khilaaf mare ga.[260]

Baab 133: Saat (7) Haddiyo’n Par Sajda Karna

[809] Hazrat Ibne Abbas (rz) se riwayat hai, unho’n ne farmaya ke Nabi (s) ko saat (7) azaa par sajda karne ka hukum diya gaya hai. Nez ye ke wo us dauran mein apne baalo’n ko na samete’n aur na apne kapdo’n ko ekattha kare’n. (Wo azaa) Peshaani, dono haath, dono ghutne, aur dono paao’n hain.[261]

[810] Hazrat Ibne Abbas (rz) hi se marwi hai, wo Nabi (s) se bayan karte hain ke Aap ne farmaya: “Hame’n hukum diya gaya hai ke ham saat (7) haddiyo’n par sajda kare’n. Nez us dauran mein apne baalo’n aur kapdo’n ko na samete’n”.[262]

[811] Hazrat Baraa bin Aazib (rz) se riwayat hai, aur wo jhoote aadmi nahi the. Unho’n ne farmaya: Ham Nabi (s) ke peeche namaz padhte the. Jab Aap “سَمِعَ اللهُ لِمَنْ حَمِدَهُ” Sami Allahu Liman Hamida kehte to ham mein se koi shakhs apni peeth na jhukaata jab tak Nabi (s) apni peshaani zameen par na rakh dete.[263]

Baab 134: Naak Par Sajda Karne Ka Bayan

[812] Hazrat Ibne Abbas (rz) se riwayat hai, unho’n ne kaha: Nabi (s) ne farmaya: “Mujhe saat (7) haddiyo’n par sajda karne ka hukum diya gaya hai. Peshaani par, aur apne haath se naak ki taraf ishaara kiya, dono haatho’n, dono ghutno’n aur dono paao’n ki ungliyo’n par. Isi tarah ham dauran-e-sajda mein na kapdo’n ko samete’n, aur naa baalo’n ka jooda banaae’n”.[264]

Baab 135: Keechad Mein Naak Par Sajda Karna

[813] Hazrat Abu Salama bin Abdur Rahman se riwayat hai, unho’n ne kaha ke main Hazrat Abu Saeed Khudri (rz) ki khidmat mein haazir hua. Unke paas jaakar maine arz kiya ke tabaadla-e-khyalaat ke liye aap is nakhlistaan mein hamaare saath kyou’n nahi jaate? Chunache aap nikle. Maine arz kiya ke shab-e-qadar ke mutaalliq aap ne Nabi (s) se jo suna hai usey bayan kare’n. Unho’n ne farmaya: Ek martaba Rasool Allah (s) ne ramzan ke pehle ashre mein etekaaf kiya aur ham bhi aapke saath etekaaf baith gae. Lekin Hazrat Jibraeel (a) aapke paas tashreef laae aur farmaya ke jis cheez ke aap mutalaashi hain wo aagey hai. Chunache aap ne doosre ashre ka etekaaf farmaya aur ham bhi aapke saath etekaaf baith gae. Hazrat Jibraeel (a) dobaara tashreef laae aur kehne lagey ke aap jis cheez ki talash mein hai, wo aagey hai. Phir Nabi (s) ne beeswee’n (20th) ramzan ki subah ko khutba irshad farmaya aur hukum diya: “Jo shakhs Nabi-e-Akram (s) ke saath etekaaf baith chuka hai, wo dobaara etekaaf kare, kyou’nke mujhe shab-e-qadar khwaab mein dikha di gai, lekin uska taayyun[265] mujhe bhula diya gaya hai. Albatta wo aakhri ashre ki taaq raato’n[266] mein hai. Maine khud ko khwaab mein mitti aur paani mein sajda karte dekha hai”. Un dino’n masjid ki chatt khajoor ki tehniyo’n ki thi. Ham aasmaan par koi abr waghaira nahi dekhte the, yaane matlaa’[267] bilkul saaf tha. Itne mein ek (1) baadal ka tukda aaya aur ham par barasne laga. Phir Nabi (s) ne hame’n namaz padhaai, ta-aa’nke maine Rasool Allah (s) ki peshaani aur naak par keechad ke nishanaat dekhe. Ye aapke khwaab ki tasdeeq thi.[268]

Faaeda: Imam Bukhari (rh) ka ye taweel hadees bayan karne se maqsad ye hai ke sajde mein naak ko zameen par rakhna zaroori hai, kyou’nke Rasool Allah (s) ne zameen keechad-aalood hone ke ba-wujood apni naak ko zameen par lagaaya hai, aur keechad waghaira ki koi parwaah nahi ki. Is hadees se ye bhi maaloom hua ke agar dauran-e-namaz mein namazi ki peshaani par zameen ki gard-o-ghubaar lag jaae to namaz hi mein usey saaf karne ki koshish nahi karni chaahiye.

Baab 136: Namaz Ke Waqt Kapdo’n Ko Girah Lagaana Aur Unhe’n Baandhna, Nez Satar Khulne Ke Andeshe Ke Pesh-e-Nazar Unhe’n Sametna

[814] Hazrat Sahal bin Saad (rz) se riwayat hai, unho’n ne farmaya ke log Nabi (s) ke saath namaz padhte the aur chadaro’n ke chote hone ki wajah se unhe’n gardano’n se baandhe hote the, chunache aurto’n se keh diya: “Jab tak mard seedhe ho kar baith na jaae’n tum us waqt tak apne sar sajde se naa uthaao”.[269]

Faaeda: Waazeh rahe ke is hadees mein namaziyo’n ko jo kaifiyat bayan ki gai hai, wo us waqt thi jab bohot tangi aur ghurbat ka daur tha. Haafiz ibne Hajar (rh) likhte hain ke aam haalaat mein dauran-e-namaz mein kapd’n ko sametne ki mumaaneat hai, lekin majboori ki soorat mein unhe’n girah lagaane aur sametne ki ijaazat hai.[270]

Baab 137: Namazi Apne Baalo’n Ko Na Samete

[815] Hazrat Ibne Abbas (rz) se riwayat hai, unho’n ne farmaya ke Nabi (s) ko 7 haddiyo’n par sajda karne ka hukum diya gaya, nez ye bhi kaha gaya ke aap dauran-e-namaz mein apne baalo’n aur kapdo’n ko na samete’n.[271]

Baab 138: Dauran-e-Namaz Mein Apne Kapdo’n Ko Na Samete

[816] Hazrat Ibne Abbas (rz) se riwayat hai, wo Nabi (s) se bayan karte hain ke aap ne farmaya: “Mujhe hukum diya gaya hai ke main saat (7) haddiyo’n par sajda karoo’n aur dauran-e-namaz mein apne baalo’n ko na sameto’n aur na kapdo’n hi ko ekattha karoo’n”.[272]

Baab 139: Sajde Mein Tasbeeh Padhna Aur Dua Karna

[817] Hazrat Ayesha (rz) se riwayat hai, unho’n ne farmaya ke Nabi (s) ba-kasrat apne rukoo aur saje mein ye dua padha karte the. “سُبْحَانَكَ اللّٰهُمَّ رَبَّنَا وَبِحَمْدِكَ اللّٰهُمَّ اغْفِرْلِيْ” Is tarah aap qurani hukum ki taameel karte the.[273]

Baab 140: Dono’n Sajdo’n Ke Darmiyan Therne Ka Bayan

[818] Hazrat Maalik bin Huwairis (rz) se riwayat hai, unho’n ne ek (1) martaba apne shaagirdo’n se farmaya: Kya main tumhe’n Rasool Allah (s) ki namaz ke mutaalliq khabar na doo’n? Raawi-e-hadees kehta hai ke wo kisi farz namaz ka waqt na tha. Aap khade hue aur qiyaam kiya, phir rukoo kiya. Baad azaa’n Allah Akbar kaha. Iske baad apna sar uthaya aur thodi der tak uthaae rakha. Phir sajde mein chale gae. Phir thodi der tak apna sar uthaae rakha. Is tarah unho’n ne hamaare shaikh Amr bin Salama ki si namaz padhi. Raawi-e-hadees Hazrat Ayyub kehte hain ke wo ek aisa kaam karte the jo ham ne aur logo’n ko karte nahi dekha. Chunache wo teesri aur chauthi rakat (ke darmiyan) mein baitha karte the.[274]

[819] Unho’n (Hazrat Maalik bin Huwairis (rz)) ne kaha ke ham (islam laane ke baad) Nabi (s) ki khidmat mein haazir hue aur kuch arsa ham ne aapke paas qiyaam kiya to aap ne farmaya: “Agar tum apne ahel-o-ayaal mein waapas jaao to is tarah un auqaat mein namaz adaa kiya karo, falaa’n namaz, falaa’n waqt mein padha karo. Lehaza jab namaz ka waqt aajaae to tum mein se koi azaan kehde, aur imaamat tum mein se wo karaae jo umr mein bada ho”.[275]

[820] Hazrat Baraa bin Aazib (rz) se riwayat hai, unho’n ne farmaya: Nabi (s) ka sajda rukoo aur do (2) sajdo’n ke darmiyan baithna taqriban baraabar hota tha.[276]

[821] Hazrat Anas bin Maalik (rz) se riwayat hai, unho’n ne farmaya ke main us amr mein kotaahi nahi karoo’nga ke tumhe’n aise namaz padhau’n jaisa ke maine Nabi (s) koo namaz padhate dekha hai. (Raawi-e-hadees) Hazrat Saabit kehte hain ke Hazrat Anas (rz) ek (1) aisa kaam karte the ke maine tumhe’n wo kaam karte nahi dekha. Wo jab rukoo se apna sar uthaate to itni der khade rehte ke kehne waala kehta: Shayad aap (sajda karna) bhool gae. Aur dono sajdo’n ke darmiyan itni der tak baithe rehte ke kehne waala kehta: Shayad aap (doosra sajda) bhool gae hain.[277]

Baab 141: Namazi Dauran-e-Sajda Mein Apni Kohniyaa’n (Zameen Par) Na Bichaae

Hazrat Abu Humaid Saa’di (rz) bayan karte hain ke Nabi (s) ne sajda kiya aur apne dono’n haath (zameen par) rakh diye, na unhe’n bichae hue the, aur na unhe’n samite hote the.

[822] Hazrat Anas bin Maalik (rz) se riwayat hai, wo Nabi (s) se bayan karte hain ke aap ne farmaya: “Sajde mein etedaal karo aur tum mein se koi apni kalaaiyaa’n is tarah na phailaae jis tarah kutta bachata hai”.[278]

Baab 142: Jo Shakhs Apni Namaz Ki Taaq Rakaat Mein Seedha Ho Kar Baithe Phir Khada Ho

Wazaahat: Taaq rakat se muraad pehli aur teesri rakat hain. Un mein aakhri sajde se faraaghat ke baad acchi tarah seedhe ho kar baithne ke baad khade hone ko jalsa-e-isteraahat kehte hain. Ye masnoon hai jaisa ke aainda ahadees mein saraahat se bayan hoga.

[823] Hazrat Maalik bin Huwairis (rz) se riwayat hai ke unho’n ne Nabi (s) ko namaz padhte dekha jab aap taaq rakat mein hote to us waqt tak na uthte jab tak seedhe ho kar acchi tarah baith na lete.

Baab 143: Namazi Apni Rakat Se Uthte Waqt Zameen Ka Kis Tarah Sahara Le?

[824] Hazrat Abu Qilaaba se riwayat hai, unho’n ne kaha ke ek (1) martaba Hazrat Maalik bin Huwairis (rz) hamaare paas aae aur hamari is masjid mein hame’n namaz padhai, nez farmaya ke main tumhe’n namaz padhata hoo’n. Mera namaz padhne ka irada nahi lekin main tumhe’n dikhana chahta hoo’n ke maine Rasool Allah (s) ko namaz padhte hue kis tarah dekha? (Raawi-e-hadees) Ayyub kehte hain ke maine Abu Qilaaba se kaha: To phir Hazrat Maalik bin Huwairis (rz) ki namaz kaisi thi? Unho’n ne farmaya: Hamaare is shaikh, yaane Amr bin Salama ki namaz ki tarah. Ayyub kehte hain ke wo shaikh poori tarah “Allahu Akbar” kehte aur jab apna sar doosre sajde se uthate to baith jaate, zameen par tek lagaakar phir uthte the.[279]

Faaeda: Sawal ye hai ke zameen par tek lagaakar uthte waqt haatho’n ki kaifiyat kya ho? Kya khule haatho’n uthna chaahiye yaa mutthi band karke khade hona chaahiye? Iske mutaalliq Azraq bin Qais ka byaan hai ke maine Hazrat Ibne Umar (rz) ko dekha ke wo namaz mein jab doori rakat ke liye khade hue to aata goondhne waale ki tarah mutthi band karke zameen par tek laga kar khade hote the. Maine unse uske mutaalliq dariyaaft kiya to unho’n ne farmaya: Maine Rasool Allah (s) ko aisa karte dekha hai.[280] Mohaddis-ul-Asr Allama Albani (rh) ne is riwayat ko Hasan qaraar diya hai.[281]

Baab 144: Do (2) Rakat Se Uthte Waqt “Allahu Akbar” Kehna

Hazrat Abdullah bin Zubair (rz) uthte waqt “Allahu Akbar” kehte the.

[825] Hazrat Saeed bin Haaris se riwayat hai, unho’n ne kaha ke hame’n ek (1) martaba Hazrat Abu Saeed Khudri (rz) ne namaz padhai to jis waqt unho’n ne apna sar (pehle) sajde se uthaya, phir jab sajda kiya aur jab unho’n ne (doosre sajde se) sar uthaya aur jab do (2) rakato’n se uthe to ba-awaaz-e-buland “Allahu Akbar” kaha. Phir unho’n ne farmaya: Maine Nabi (s) ko aisa karte dekha hai.

[826] Hazrat Mutraf se riwayat hai, unho’n ne kaha ke maine aur Hazrat Imran bin Hussain (rz) ne ek martaba Hazrat Ali (rz) ke peeche namaz padhi, chunache wo jab sajda karte to takbeer kehte, jab sajde se sar uthate to takbeer kehte aur jab do (2) rakato’n se uthte to bhi takbeer kehte. Jab unho’n ne salaam phera to Hazrat Imran bin Hussain (rz) ne mera haath pakda aur farmaya: Unho’n ne hame’n Hazrat Muhammad (s) ki namaz padhai yaa kaha ke unho’n ne hame’n Hazrat Muhammad (s) ki namaz yaad dilaa di.[282]

Baab 145: Tasshahud Mein Baithne Ka Masnoon Tareeqa

Hazrat Umme Darda (rza) faqeeha thee’n aur wo namaz mein mardo’n ki tarah baitha karti thee’n.

[827] Hazrat Abdullah bin Abdullah se riwayat hai, unho’n ne kaha: Maine apne baap Abdullah bin Umar (rz) ko dekha wo namaz mein chaar (4) zaanu[283] baithte the. Main choo’nke nau-umr tha, is liye maine bhi aisa kiya to Abdullah bin Umar (rz) ne mujhe manaa kar diya aur farmaya ke namaz mein baithne ka sunnat tareeqa ye hai ke tum apna daayaa’n paao’n khada karo aur baayaa’n paao’n phaila do. Maine kaha aa paisa kyou’n karte hain? Unho’n ne farmaya: Meri taange’n mera boojh nahi utha saktee’n.

[828] Hazrat Muhammad bin Amr bin Ataa se riwayat hai ke wo Rasool Allah (s) ke chand ashaab ke saath baithe hue the. Us dauran mein Nabi (s) ki namaz ka zikr hone laga to Hazrat Abu Humaid Saa’di (rz) ne farmaya: Mujhe Rasool Allah (s) ki namaz tum sab se ziyaada yaad hai. Maine Rasool Allah (s) ko dekha ke aapne takbeer-e-tehreema kahi to apne dono haath kandho’n ke baraabar le gae. Aur jab aap ne rukoo kiya to dono’n haath apne ghutno’n par jamaa liye, phir apni kamar ko khameeda[284] kiya. Aur jab aap ne sar uthaaya to aise seedhe khade hue ke har haddi apni jagah par aagai aur jab aap ne sajda kiya to aap dono’n haatho’n ko bichaae hue the aur na hi samite hue the aur paao’n ki ungliyaa’n qibla-rukh thee’n. Aur jab do (2) rakato’n mein baithte to baayaa’n paao’n peecha kar baithe aur daayaa’n paao’n khada rakhte. Aur jab aakhri rakat mein baithte to baayaa’n paao’n aage karte aur daayaa’n paao’n khada rakhte, phir apni nashisht-gaah ke bil baith jaate.

Lais ne Yazid bin Abi Habib se, Yazeed bin Abi Habib ne Muhammad bin Amr bin Halhalah se aur Ibne Halhalah ne Ibne Ataa se is hadees ko suna aur Abu Saaleh ne Hazrat Lais se “Faqaar” “فَقَارٍ” ka lafz bayan kiya hai. (Isi tarah) Ibne Mubarak ne apni sanad se “Kullu Faqaar” “كُلُّ فَقَارٍ” ke alfaaz bayan kiye hain.

Faaeda: Ye riwayat mukhtalif turq se kahee’n mujmal aur kahee’n mufassil bayan hui hai. Mazkoora riwayat ke mutaaibq pehle tasshahud mein ifteraash[285] aur doosre mein tawarruk “توَرُّك” ka zikr hai. Iske teen (3) tareeqe ahadees mein bayan hue hain: | Daayaa’n paao’n khada karke baae’n paao’n ko daaee’n raan ke neeche se aage badha diya jaae, phir suren[286] par baitha jaae, jaisa ke hadees-e-baala mein mazkoor hai. | Hazrat Abu Humaid Saa’di (rz) hi ka bayan hai ke jab Rasool Allah (s) chauthi (4^th) rakat mein hote to baaee’n suren ke saath zameen par baith jaate aur apne dono’n qadmo’n ko ek jaanib se nikaal lete.[287] | Hazrat Abdullah bin Zubair (rz) se marwi hai ke Rasool Allah (s) jab namaz mein baithte to baae’n paao’n ko raan aur pindli ke darmiyan mein kar lete aur dayaa’n paao’n bicha lete.[288]

Baab 146: Jo Shakhs Pehle Tasshahud Ko Waajib Khayaal Nahi Karta

Kyou’nke Nabi (s) do (2) rakat ke baad khade ho gae aur waapas nahi aae.

[829] Hazrat Abdullah ibne Buhaina (rz)…. Jo Qabila-e-Azd-e-Shanooah se hain aur Banu Abd Manaaf ke haleef, nez Nabi (s) ke ashaab se the… se riwayat hai ke Nabi (s) ne ek (1) din unhe’n namaz-e-zohar padhai aur pehli do (2) rakat ke baad baithne ke bajaae khade hogae. Log bhi aapke saath khade ho gae jab aap apni namaz poori kar chuke to log intezaar mein the ke ab salaam phere’nge aap ne baithe hi baithe Allahu Akbar kaha, salaam se pehle do (2) sajde kiye phir salaam phera.[289]

Faaeda: Namaz mein jo zaroori umoor hain unki do (2) aqsaam hain: Ek wo hain jin ki talaafi sajda-e-sahoo se ho sakti hai aur doosre wo jin ki baja-aawari zaroori hoti hai. Agar wo reh jaae’n to unki talaafi sajda-e-sahoo se nahi ho sakti. Pehla tasshahud ek (1) aisa amr hai ke agar reh jaae to uski talaafi sajda-e-sahoo se mumkin hai.

Baab 147: Pehle Qaaeda Mein Tasshahud Ka Bayan

[830] Hazrat Abdullah bin Maalik Ibne Buhaina (rz) se riwayat hai, unho’n ne kaha ke Rasool Allah (s) ne hame’n ek (1) din namaz-e-zohar padhai. Aap khade ho gae, halaa’nke aap ke zimme baithna tha. Phir namaz ke aakhir mein baithe-baithe aap ne do (2) sajde kiye.[290]

Baab 148: Aakhir Qaaeda Mein Tasshahud Ka Bayan

[831] Hazrat Abdullah bin Masood (rz) se riwayat hai ke ham Rasool Allah (s) ke peeche namaz mein ye padha karte the: Jibraeel aur Mikaeel par salaam ho. Falaa’n aur falaa’n par salaam ho, to Rasool Allah (s) hamari taraf mutawajja hue aur farmaya: “Allah Ta’ala to khud hi salaam hai, lehaaza tum mein se jab koi namaz padhe to kahe:”

اَلتَّحِيَّتُ لِلّٰهِ، وَالصَّلَوَاتُ وَالطَّيِّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللهِ وَبَرَكَاتُهُ، السَّلَامُ عَلَيْنَا، وَعَلٰىْ عِبَادِ اللهِ الصَّالِحِيْنَ.

Tamaam qauli, badani, aur maali ibadaat Allah ke liye khaas hain. Aye Nabi! Aap par Allah ki rahmat, salaamti aur barkate’n ho’n, nez ham par aur Allah ke (doosre) nek bando’n par bhi salaamti ho.

“Jab tum ye duaiya kalimaat kahoge to Allah ke har nek bande ko pohonch jaae’nge, khwah wo aasmaan mein ho ya zameen mein… ”

أَشْهَدُ أَنْ لَّا إِلٰهَ إِلَّا اللهُ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ.

Main gawaahi deta hoo’n ke Allah ke siwa koi maabood-e-bar-haq nahi aur main gawaahi deta hoo’n ke Hazrat Muhammad (s) Allah ke bande aur uske rasool hain.[291]

Baab 149: Salam Se Pehle Dua Ka Bayan

[832] Hazrat Ayesha (rza) se riwayat hai ke Rasool Allah (s) namaz mein ye dua kiya karte the:

اَللّٰهُمَّ إِنِّيْ أعُوْذُ بِكَ مِنْ عَذَابِ الْقَبْرِ، وَأَعُوْذُبِكَ مِنْ فَتْنَةِ الْمَسِيْحِ الدَّجَّالِ، وَأَعُوْذُ بِكَ مِنْ فِتْنَةِ الْمَحْيَا وَفِتْنَةِ الْمَمَاتِ، اَللّٰهُمَّ إِنِّيْ أَعُوْذُ بِكَ مِنَ الْمَأْثَمِ وَالْمَغْرَمِ.

“Aye Allah! Main azaab-e-qabar se teri panaah maangta hoo’n aur fitna-e-dajjaal se teri panaah talab karta hoo’n, zindagi aur maut ke fitne se teri panaah mein aata hoo’n. Aye Allah! Main gunah aur qarz se teri panaah ka taalib hoo’n“

Aap se kisi ne arz kiya: Aap qarz se bohot panaah maangte hain? Aap ne farmaya: “Insan jab qarzdaar ho jaata hai to baat karte waqt jhoot bolta hai aur jab waada karta hai to uski khilaaf-warzi karta hai”.[292]

[833] Hazrat Ayesha (rza) se riwayat hai, unho’n ne farmaya ke maine Rasool Allah (s) ko namaz mein fitna-e-dajjaal se panaah maangte hue suna.[293]

[834] Hazrat Abu Bakar Siddiq (rz) se riwayat hai, unho’n ne Rasool Allah (s) se arz kiya ke aap mujhe koi aisee dua sikha de’n jo main namaz mein padha karoo’n. Aap ne farmaya: “Ye padha karo”

اللّٰهُمَّ إِنِّيْ ظَلَمْتُ نَفْسِيْ ظُلْمًا كَثِيْرًا وَّلَاْ يَغْفِرُ الذُّنُوْبَ إِلَّا أَنْتَ، فَاغْفِرْ لِيْ مَغْفِرَةً مِّنْ عِنْدِكَ، وَارْحَمْنِيْ إِنَّكَ أَنْتَ الْغَفُوْرُ الرَّحِيْمُ.

“Aye Allah! Maine apne aap par bohot zulm kiya aur gunaho’n ko tere siwa koi moaaf karne waala nahi, is liye tu mujhe apni taraf se moaaf karde aur mujh par meherbaani karde, yaqeenan toohi bohot bakhshne waala nihayat meherban hai”.[294]

Baab 150: Tasshahud Ke Baad Apni Pasandeeda Dua Karna, Lekin Ye Waajib Nahi Hai

[835] Hazrat Abdullah bin Masood (rz) se riwayat hai, unho’n ne farmaya: Jab ham Nabi (s) ke peeche namaz padhte to you’n kehte: Allah ke bando’n ki taraf se us par salaamti ho. To Nabi (s) ne farmaya: “Aisa na kaho ke Allah par salaamti ho, Allah to khud saraapa salaamti hai, albatta you’n kaha karo:”

اَلتَّحِيَّاتُ لِلّٰهِ، وَالصَّلَوَاتُ وَالطَّيَّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللهِ وَبَرَكَاتُهُ، السَّلَامُ عَلَيْنَا وَعَلٰىْ عِبَادِ اللهِ الصَّالِحِيْنَ.

“Tamaam qauli, badani aur maali ibaadaat sirf Allah ke liye hain. Salaamti ho aap par aye Allah ke Nabi! Uski rahmat aur barkat ka nuzool ho. Ham par bhi salaamti ho aur Allah ke nek bando’n par bhi…”

“Jab tum aisa kahoge to ye salaamti Allah ke har us bande ko pohonch jaaegi jo aasmaano’n mein hai yaa zameen-o-aasmaan ke darmiyan hai”.

أَشْهَدُ أَنْ لَّا إِلٰهَ إِلَّا اللهُ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ.

“Main gawaahi deta hoo’n ke Allah ke siwa koi maabood bar-haq nahi aur main gawaahi deta hoo’n ke Hazrat Muhammad (s) Allah ke bande aur uske Rasool hain”.

“Uske baad jo dua usey pasand ho padhe”.[295]

Faaeda: Imam Bukhari (rh) ne mazkoora unwaan qaaem karke ye mauqif ikhteyar kiya hai ke dua karna waajib nahi. Albatta isteaaze[296] ke mutaalliq bohot taakeed hai, kyou’nke baaz ahadees mein isteaaze ke mutaalliq Rasool Allah (s) ka amr waarid hai jaisa ke Hazrat Abu Huraira (rz) bayan karte hain ke Rasool Allah (s) ne farmaya: “Jab tum mein se koi aakhri tasshahud se faarigh ho to chaar (4) cheezo’n se Allah ki panaah talab kare”.[297] Hamaare nazdeek dalaael ki roo-se[298] doosre tasshahud mein isteghaazah[299] zaroori hai.

Baab 151: Jo Shakhs Apni Peshaani Aur Naak Se Mitti Waghaira Namaz Khatam Hone Tak Saaf Nahi Karta

Abu Abdullah (Imam Bukhari) (rh) kehte hain ke Shaikh-e-Mohtaram Imam Humaidi is amr par darj-e-zel hadees bataur-e-daleel pesh karte the ke dauran-e-namaz mein apni peshaani se mitti waghaira saaf karna durust nahi hai.

[836] Hazrat Abu Saeed Khudri (rz) se riwayat hai, unho’n ne farmaya: Maine Rasool Allah (s) ko paani aur mitti mein sajda karte hue dekha, hatta ke mitti ke nishanaat (namaz ke baad) aap ki peshaani par nazar aarahe the.[300]

Baab 152: Salam Pherne Ka Bayan

[837] Hazrat Umme Salama (rza) se riwayat hai, unho’n ne farmaya: Rasool Allah (s) jab salaam pherte the to khawateen aapke salaam pherte hi khadi ho kar apne gharo’n ko rawaana ho jaati thee’n aur aap khade hone se pehle kuch der theher jaate.

Ibne Shahab kehte hain ke asal ilm to Allah Ta’ala ko hai, albatta jo main samjha hoo’n wo ye hai ke aap is liye kuch der thehre rehte the, taake khawateen jaldi chali jaae’n qabl-azee’n ke mard hazraat namaz se faarigh ho kar unhe’n paa sake’n.[301]

Faaeda: Hamaare nazdeek namaz ke aakhir mein salaam pherna ek rukn ki haisiyat rakhta hai, kyou’nke Hazrat Ali (rz) se marwi ek hadees ke alfaaz ye hain ke namaz ko sirf salaam hi se khatam kiya jaa sakta hai.[302]

Baab 153: Imam Ke Salaam Ke Saath Muqtadi Bhi Salam Pherde

Hazrat Ibne Umar (rz) is baat ko pasand karte the ke jab imam salaam phere to peeche waale bhi usi waqt salaam pher de’n.

[838] Hazrat Itbaan bin Maalik (rz) se riwayat hai, unho’n ne farmaya ke ham ne Nabi (s) ke saath namaz padhi jab aap ne salaam phera to ham ne bhi salaam pher diya.[303]

Baab 154: Us Shakhs Ka Bayan Jo Namaz Ke Salam Ko Kaafi Samajhte Hue Imam Ko Salam Nahi Karta

[839] Hazrat Mahmood bin Rabeea (rz) se riwayat hai, unho’n ne kaha ke mujhe Rasool Allah (s) ki aamad yaad hai aur mujhe hosh hai, jab Rasool Allah (s) ne hamaare ghar mein dol se kulli karke mere mu’n par paani daala tha.[304]

[840] Hazrat Mahmood bin Rabeea (rz) hi se riwayat hai, unho’n ne kaha ke maine Hazrat Itbaan bin Maalik (rz) se suna jo Banu Salam qabile ke ek (1) fard the. Unho’n ne farmaya: Main apni qaum Banu Salam ko namaz padhata tha, ek (1) dafaa maine Nabi (s) ki khidmat mein haazir ho kar arz kiya ke maine Nabi (s) ki khidmat mein haazir ho kar arz kiya ke main apni binaai mein kamzori mehsoos karta hoo’n aur ye saelaabo’n ka paani mere aur meri qaum ki masjid ke darmiyan haael ho jaata hai. Lehaza meri khwahish hai ke aap mere ghar mein kisi jigah par namaz padhe’n taake main usey masjid banaao’n. Aap ne farmaya: Main in-sha-Allah aisa karoo’nga. Chunache ek (1) din dhoop chadhe Rasool Allah (s) Hazrat Abu Bakar (rz) ki ma-eeyat[305]   mein tashreef laae, aap ne andar aane ki ijaazat maangi to maine aapko ijaazat dedi. Aap ne baithne se pehle hi farmaya: “Tum ghar mein kis hisse mein mera namaz padhna pasand karte ho?” Unho’n ne ek muqaam ki taraf ishaara kiya, jaha’n wo apne liye namaz padhna pasand karte the. Uske baad Rasool Allah (s) khade ho gae aur ham logo’n ne bhi aapke peeche saff banaali. Uske baad aap ne salaam phera aur ham ne bhi aapke saath salaam pher diya.[306]

Faaeda: Haafiz Ibne Hajar (rh) ne bhi likha hai ke hadees ke zaahir alfaaz se maaloom hota hai ke Sahaba Ikraam (riz) ne Rasool Allah (s) ki mataaba-at mein aapke salaam jaisa salaam kiya aur aapka salaam ek (1) tha, jisse namaz khatam ki gai, yaa uske saath doosra salaam bhi tha. Teesre salaam ke liye daleel darkaan hai jaisa ke baaz maaliki hazraat ka mauqif hai. Imam Bukhari (rh) ne is muakh-khar uz zikr mauqif ki tardeed ke liye unwan-bandi ki hai aur hadees pesh ki hai.[307] والله أعلم

Baab 155: Namaz Ke Baad Zikr Ka Bayan

[841] Hazrat Ibne Abbas (rz) se riwayat hai ke farz namaz se faraaghat ke baad ba-awaaz-e-buland zikr karna Rasool Allah (s) ke ahd-e-mubarak mein jaari tha. Nez Hazrat Ibne Abbas (rz) farmate hain ke mujhe to logo’n ka namaz se faraghat ka pataa us zikr ki awaaz sun kar chalta tha.[308]

[842] Hazrat Ibne Abbas (rz) se riwayat hai, unho’n ne farmaya ke main Nabi (s) ki namaz ka tamaam hona Allahu Akbar ki awaaz se pehchaan leta tha. Ali bin Madeeni ne kaha: Ham se Sufyan ne bayan kiya, wo Amr se bayan karte hain, unho’n ne kaha ke Ibne Abbas ke ghulamo’n mein se sab se saccha Abu Ma’abad (معبد) tha. (Jisne is hadees ko Hazrat Ibne Abbas (rz) se bayan kiya hai) Ali bin Madeeni ne kaha ke uska naam Naafiz tha.[309]

[843] Hazrat Abu Huraira (rz) se riwayat hai, unho’n ne farmaya ke kuch nadir log Nabi (s) ke paas aae aur kehne lagey ke maldaar log to badey-badey darajaat aur daaemi aesh[310] le gae, kyou’nke hamari tarah wo namaz padhte hain aur hamari tarah wo roze bhi rakhte hain. Lekin unke paas maal-o-daula tki farawaani hai. Jisse wo hajj, umrah, jihad, aur sadqa-o-khairaat bhi karte hain. Us par Aap (s) ne farmaya: “Kya main tumhe’n aisee baat na bataaou’n ke us par amal karke tum un logo’n tak pohonch jaaoge jo tumse sabqat le gae hain. Aur tumhare baad tumhe’n koi nahi paa sakega. Aur tum jin logo’n mein ho unse behtar ho jaaoge, siwaae us shakhs ke jo uske misl amal kare (wo tumhare baraabar ho sakega). Tum har namaz ke baad 33 baar “سبحان الله” SubhanAllah, 33 baar “الحمدلله” Alhamdulillah, aur 33 baar “الله أكبر” Allahu Akbar padh liya karo”. Raawi kehta hai ke phir hamaara baahami ikhtelaaf ho gaya. Ham mein se baaz ne kaha ke ham 33 martaba SubhanAllah, 33 martaba Alhamdulillah aur 3 martaba Allahu Akbar padhe’nge. Chunache maine dobaara apne ustaaz se poocha to unho’n ne farmaya ke SubhanAllahi Walhamdulillahi Wallahu Akbar “سُبْحَانَ اللهِ وَالْحَمْدُلِلّٰهِ وَاللهُ أَكْبَرُ” padha karo, hatta ke un mein se har ek (1) 33 martaba ho jaae.[311]

[844] Hazrat Mugheera bin Shu’ba (rz) se riwayat hai, unho’n ne Hazrat Ameer-e-Muawiya (rz) ko khat likha ke Nabi (s) har farz namaz ke baad padhte the:

لَا إِلٰهَ إِلَّا اللهُ وَحْدَهُ لَا شَرِيْكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلٰىْ كُلِّ شَيْءٍ قَدِيْرٌ، اَللّٰهُمَّ لَا مَانِعَ لِمَا أَعْطَيْتَ، وَلَا مُعْطِيَ لِمَا مَنَعْتَ، وَلَا يَنْفَعُ ذَا الْجَدِّ مِنْكَ الْجَدُّ.

Allah ke siwa koi maabood-e-bar-haq nahi, wo ek (1) hai, uska koi shareek nahi. Uski baadshahat hai aur usi ke liye taareef hai aur wo har baat par qaadir hai. Aye Allah! Teri ataa ko koi rokne waala nahi aur teri roki hui cheez ko koi ataa karne waala nahi aur kis daulat-mand ko uski tawangari tere azaab se nahi bacha sakti.

Imam Shu’ba ne bhi Abdul Malik bin Umair se ye hadees bayan ki hai. Hasan Basri (rh) bayan karte hain ke “جَدٌّ” ke maane tawangari[312] aur be-niyazi ke hain. Nez, Imam Shu’ba ne Hakam ke waaste se bhi ye riwayat Warraad se bayan ki hai.[313]

Baab 156: Imam Ko Chaahiye Ke Wo Salam Pherne Ke Baad Logo’n Ki Taraf Mu’n Karke Baithe

[845] Hazrat Samra bin Jundub (rz) se riwayat hai, unho’n ne farmaya ke Nabi (s) jab namaz padh lete to apna roo-e-mubarak hamari taraf kar lete.[314]

[846] Hazrat Zaid bin Khalid Johani (rz) se riwayat hai, unho’n ne farmaya ke Nabi (s) ne muqam-e-hudaibiya par bearish ke baad jo raat aai, us mein hame’n namaz-e-fajr padhai. Faraaghat ke baad logo’n ki taraf mu’n karke farmaya: “Tum jaante ho ke tumhare parwardigaar ne kya farmaya hai?” Sahaaba ne arz kiya ke Allah aur uska Rasool hi ziyaada jaante hain. Aap ne farmaya: “(Allah Ta’ala ka irshad-e-giraami hai ke) Mere bando’n mein se kuch mere saath imaan laae aur kuch ne kufr ki rawish ikhteyar ki. Jisne kaha ke Allah ke fazal aur uski rahmat se ham par bearish hui to wo mera momin banda aur sitaare ka munkir hai aur jisne kaha ke ham par falaa’n sitaare ki wajah se bearish hui hai, wo mera munkir aur sitaare par imaan laane waala hai”.[315]

Faaeda: Sitaaro’n ki taaseer saadat-o-nahoosat ke etebaar se kuch bhi nahi hai. Hamaare yahaa’n aam taur par museebat ke waqt kaha jaata hai ke mera sitaara gardish mein hai. Aisa aqeeda rakhna kufr hai. Isi tarah unki zaati taaseer ka aqeeda rakhna bhi imaan ke manaafi hai. Albatta tahat-ul-asbaab unke tabai asaraat zaroor hain. Masalan: Mausam mein tabdeeli, garmi-o-sardi ka hona, samandar mein utaar-chadaao ka aana, jaise jawaar-bhaata[316] yaa madd-o-jazar[317] kaha jaata hai. Bahar-haal ashyaa mein tabai asaar-o-khawaas to hain, lekin unki taaseer izn-e-ilaahi par mauqoof[318] hai. Jaisa ke aag ki taaseer jalaana hai, lekin Allah ka izn na hone ki wajah se Hazrat Ibrahim (a) ko aag na jalaa saki, balke unke liye jannat-o-gulzaar ban gai. Is liye kehne waale ki niyyat ko dekha jaaega, agar wo sitaaro’n ke mutaalliq zaati taur par bearish barsaane ka aqeeda rakhta hai to bila-shubha wo deen-e-islam se khaarij hai aur agar unki taaseer bataur-e-aadat aur izn-e-ilaahi par mauqoof manta hai to kaafir nahi hoga. والله أعلم

[847] Hazrat Anas bin Malik (rz) se riwayat hai, unho’n ne farmaya ke Nabi (s) ek (1) dafa namaz ko aadhi raat tak muakh-khar[319] kar diya, phir hamaare paas namaz padhane ke liye aae. Jab namaz padh chuke to chehra-e-anwar se hamari taraf mutawajja ho kar farmaya: “Log to namaz padhkar so chuke hain, aur tum baraabar namaz mein rahe, kyou’nke tum namaz ka intezaar karte rahe”.[320]

Baab 157: Salam Pherne Ke Baad Imam Ka Apni Jagah Par Thehre Rehna

[848] Hazrat Naafe se riwayat hai, unho’n ne kaha ke Hazrat Abdullah bin Umar (rz) usi jagah par nafil waghaira padhte jaha’n pehle farz namaz adaa ki hoti. Hazrat Qasim (ibne Muhammad bin Abi Bakar Siddiq) ne bhi aise hi kiya tha. Albatta Hazrat Abu Huraira (rz) se marfoo-an bayan kiya jaata hai ke Imam usi jagah nafil namaz na padhe jaha’n usne farz namaz adaa ki thi. Lekin ye hadees saheeh nahi.

[849] Hazrat Umme Salama (rza) se riwayat hai ke Nabi (s) jab salaam pherte to kuch der apni jagah par baithe rehte. Ibne Shihab kehte hain ke hamaare khayaal ke mutaaibq Rasool Allah (s) ye is liye karte the, taake aurte’n (mardo’n se) pehle chali jaae’n.[321] والله أعلم

[850] Nabi (s) ki zauja-e-mohtarma Hazrat Umme Salama (rza) se riwayat hai, unho’n ne farmaya: Rasool Allah (s) salaam pherte to aurte’n waapas ho kar apne gharo’n mein ho jaati thee’n, qabl-azee’n[322] ke Rasool Allah (s) apni jagah se uthe’n.

Ibne Wahb (وَهْبٍ) ne Yunus a’an (عن) Ibne Shihab ki sanad se bayan kiya to hind furasiya (هِنْدُ الْفِرَاسِيَّة) kaha. Aur Usman bin Umar ne Yunus a’an (عن) Az-Zohri bayan kiya to hind qurashiya (هِنْدُ الْقُرَشِيَّة) kaha. Zubaidi ne Zohri se riwayat karte hue Hind bint Haaris qurashiya kaha aur (ye bhi kaha ke) wo Banu Zohra ke haleef Ma’abad bin Miqdaad ki biwi thi, aur Nabi (s) ki azwaaj-e-mutahharaat ke yahaa’n uska aana jaana bhi tha. Aur Shuaib ne Imam Zohri se bayan kiya to hind qurashiya kaha, jabke Ibne Ateeq ne Zohri se bayan karte hue hind farasiya kaha. Lais ne kaha ke Yahya bin Saeed ne mujhe Imam Zohri se hadees bayan karte hue kaha ke quraish ki ek khatoon ne Nabi (s) se hadees bayan ki hai.[323]

Baab 158: Agar Imam Ko Namaz Ke Baad Kisi Kaam Ka Khayaal Aae To Wo Theherne Ke Bajaae Logo’n Ki Gardane’n Phalaangta Hua Chala Jaae

[851] Hazrat Uqba bin Haaris (rz) se riwayat hai, unho’n ne kaha ke maine ek (1) dafa namaz-e-asr Nabi (s) ke peeche madina munawwara mein adaa ki. Jab aap ne salaam phera to jaldi se khade ho gae aur logo’n ki gardane’n phalaangte hue apni biwiyo’n ke kisi hujre ki taraf tashreef le gae. Log aap ki is sur-at[324] se ghabra gae. Bahar-haal aap unke paas wapas tashreef laae to dekha ke wo aap ki ujlat ki wajah se taajjub mein hain. Aap ne farmaya: “Mujhe sone ka ek (1) tukda jo hamaare paas tha yaad aagaya, maine is baat ko naa-pasand kiya ke mabaada[325] mujhe wo Allah ki yaad se rok de. Lehaza maine usey taqseem karne ka hukum de diya”.[326]

Baab 159: Namaz Se Faraaghat Ke Baad Daae’n Ya Baae’n Jaanib Se Phirne Yaa Lautne Ka Bayan

Hazrat Anas bin Malik (rz) namaz se faraaghat ke baad daae’n aur baae’n jaanib se phirte the, aur jo shakhs daanista[327] taur par daae’n jaanib phirne ko laazim qaraar deta, us par aeb lagaate the.

[852] Hazrat Abdullah bin Masood (rz) se riwayat hai, unho’n ne farmaya ke tum mein se koi shakhs apni namaz mein shaitan ka hissa na banaae, wo is tarah ke namaz ke baad daae’n jaanib se phirne ko zaroori khayaal kare. Yaqeenan maine Nabi (s) ko aksar apni baaee’n jaanib se bhi phirte dekha hai.

Baab 160: Un Riwayaat Ka Bayan Jo Kacche Lehsan, Pyaaz, Aur Gandane[328] Ke Mutaalliq Waarid Hain

Nabi (s) ka farmaan hai: “Jis ne bhook yaa uske alaawa kisi aur wajah se lehsan yaa pyaaz istemaal kiya, wo hamari masjid ke qareeb na aae”.

[853] Hazrat Ibne Umar (rz) se riwayat hai ke Nabi (s) ne ghazwa-e-khybar ke mauqa par farmaya tha: “Jo shakhs is paode yaane lehsan ko khaae, usey hamari masjid mein hargiz nahi aana chaahiye”.[329]

Faaeda: Kisi bhi badbudaar cheez ko masjid mein le jaana aur usey khane ke baad masjid mein aana sakht manaa hai. Kyou’nke logo’n ko usse takleef hoti hai. Iske alaawa waise bhi masjid ek (1) paak jagah hoti hai, jaha’n Allah ka zikr kiya jaata hai. Lehaza kisi soorat mein uske taqaddus[330] ko majrooh[331] nahi karna chaahiye. Kaccha lehsan, pyaaz, mooli, cigarette, aur beedi waghaira ka ek hi hukum hai. Farq sirf itna hai ke lehsan, pyaaz aur mooli waghaira ko pakaa kar istemaal kiya jaa sakta hai. Kyou’nke aisa karne se unki boo door ho jaati hai, lekin tambakoo-noshi aur beedi waghaira kisi soorat mein jaaez nahi hai. Dayaar-e-arab ke ulama ne uski hurmat ka fatwa diya hai.

[854] Hazrat Jaabir bin Abdullah (rz) se riwayat hai, unho’n ne kaha ke Nabi (s) ne farmaya: “Jo shakhs is paode, yaane lehsan se kuch khaae, wo hamari masjid mein hamaare paas na aae”. Raawi kehta hai, maine kaha ke isse kya muraad hai? Farmaya: Main to yehi samajhta hoo’n ke kaccha lehsan muraad hai. Aur Makhlad bin Yazid ne Ibne Juraij se bayan kiya ke isse uski boo muraad hai.[332]

[855] Hazrat Jaabir bin Abdullah (rz) se riwayat hai ke Nabi (s) ne farmaya: “Jo shakhs lehsan ya pyaaz khaae, wo ham se alaaheda rahe. Ya farmaya ke hamari masjid se alag-thalag rahe. Ya (farmaya ke) Usey chaahiye ke apne ghar mein baitha rahe”. Ek (1) martaba Nabi (s) ke paas handiya laai gai, jis mein sabz tarkariya’n thee’n. Aap ne us mein kuch naa-gawaar boo paai, to dariyaaft farmaya ke: “Is mein kya hai?” Chunache aapko un tarkariyo’n ke mutaalliq bataya gaya to aap ne farmaya: “Isey mere kisi saathi ke qareeb kar do”. Jab aap ne dekha ke wo bhi usey naa-pasand karta hai to aap ne farmaya: “Tum khaao, kyou’nke main to us zaat se munajaat karta hoo’n, jisse tum nahi karte ho”.[333]

Ahmad bin Saaleh ne Ibne Wahb se you’n naqal kiya hai ke aap ke saamne badrin (بَدْرٍ), yaane tabaaq laaya gaya, jis mein tarkariyaa’n thee’n. Lais aur Abu Safwaan ne apne Shaikh Yunus se handiya ka qissa bayan nahi kiya, is liye Imam Bukhari (rh) kehte hain ke mujhe maaloom nahi ke mazkoora alfaaz Zohri ka kalam hai yaa hadees ka hissa hain.

[856] Hazrat Anas bin Maalik (rz) se riwayat hai, unse kisi aadmi ne sawal kiya ke aap ne Nabi (s) se is lehsan ke mutaalliq kya suna hai? Unho’n ne kaha ke Nabi (s) ne farmaya: “Jo shakhs is paode se kuch khaae, wo na to hamaare paas aae aur na hamaare saath namaz hi padhe”.[334]

Baab 161: Kamsin Baccho’n Ka Wuzoo Karna, Nez Un Par Ghusl Aur Wuzoo Kab Waajib Hota Hai? Iske Alaawa Unki Jamaat, Eidain, Janaaez Mein Shumooliyat Aur Unki Saff-bandi Kis Tarah Ho?

[857] Hazrat Shu’ba se riwayat hai, unho’n ne kaha ke mujhe us shakhs ne khabar di jo Nabi (s) ki Ma’iyyat (مَعِیَّت) mein[335] ek aisee qabar se guzre jo doosri qabro’n se alag thalag thi. Rasool Allah (s) ne unki imaamat karaai aur unho’n ne saff bandi ki. Raawi kehta hai ke maine Abu Amr se sawaal kiya ke tujhe kisne bayan kiya tha? Unho’n ne jawab diya: Mujhe Hazrat Abdullah bin Abbas (rz) ne khabar di thi.[336]

[858] Hazrat Abu Saeed Khudri (rz) se riwayat hai, wo Nabi (s) se bayan karte hain ke aap ne farmaya: “Juma ke din ghusl karna har baaligh ke liye zaroori hai”.[337]

[859] Hazrat Abdullah bin Abbas (rz) se riwayat hai, unho’n ne farmaya: Maine ek raat apni khala Hazrat Maimoona (rza) ke paas guzari. Nabi (s) ne bhi unke yahaa’n qiyam farmaya. Jab raat ka kuch hissa guzar gaya to Rasool Allah (s) uth khade hue, ek (1) latke hue purine mashkeeze se halka sa wazoo kiya… Raawi-e-hadees Hazrat Amr usey bohot halka aur khafeef sa bayan karte the… phir aap khade ho kar namaz padhne lagey. Us dauran mein main bhi utha aur aapke wazoo jaisa wazoo kiya, phir aakar aap ki baaee’n jaanib khada ho gaya. Rasool Allah (s) ne mujhe apne peeche se pher kar apni daaee’n jaanib khada kar liya, phir jis qadar Allah ko manzoor tha, aap ne namaz padhi. Uske baad aap lait gae aur neend mein kharaate bharne lagey. Itne mein moazzin aaya aur usne aap ko namaz ki ittela di, to aap (s) uske hamraah namaz ke liye khada[338] hue, aap ne namaz padhi aur wazoo nahi kiya. Ham ne Hazrat Amr se kaha ke hamari shuneed[339]  ke mutaaibq Nabi (s) ki aankh soti thi, lekin dil bedaar rehta tha. Amr ne kaha: Maine (apne shaikh) Obaid bin Omair se suna, wo farmate the ke hazraat-e-ambiya (AA) ke khwaab wahee hote hain, phir unho’n ne bataur-e-taaeed[340] ye aayat tilaawat farmaai:

إِنِّي أَرَىٰ فِي الْمَنَامِ أَنِّي أَذْبَحُكَ.

(Bete!) Main Khwaab Mein Tujhe Zibah Kar Raha Hoo’n.[341]

[860] Hazrat Anas bin Maalik (rz) se riwayat hai ke unki dadi Hazrat Malaekah (rza) ne ek (1) dafa Rasool Allah (s) ko khane ke liye bulaya, jo unho’n ne aapke liye taiyyaar kiya tha. Jab aap khane se faarigh ho gae to farmaya: “Utho, main tumhe’n namaz padhau’n”. Chunache main ek (1) chataai lete ke liye utha jo der tak pade rehne ki wajah se siyaah ho chuki thi. Maine uspar paani chidka to Rasool Allah (s) us par namaz ke liye khade hue. Yateem baccha mere saath aur budhiya hamaare peeche thi, aap ne hame’n do (2) rakate’n padhaee’n.

[861] Hazrat Abdullah bin Abbas (rz) se riwayat hai, unho’n ne kaha: Main gadhi par sawaar ho kar aaya, jabke main us waqt qareeb-ul-buloogh[342] tha aur Rasool Allah (s) Mina mein deewaar ke alaawa (kisi cheez ki taraf mu’n karke) logo’n ko namaz padha rahe the. Main saff ke ek (1) hisse se guzar kar khud saff mein shamil ho gaya aur gadhi ko charne ke liye chodh diya. Is saari kaarwaai ke mutaalliq mujh par kisi ne koi eteraaz nahi kiya.[343]

[862] Hazrat Ayesha (rza) se riwayat hai, unho’n ne farmaya ke Nabi (s) ne ek (1) raat namaz-e-isha mein der kardi, yahaa’n tak Hazrat Umar (rz) ne aap ko ba-awaaz-e-buland kaha: Aurte’n aur bacche so gae hain. (Hazrat Ayesha (rza) farmati hain ke) phir Rasool Allah (s) bahar tashreef laae aur farmaya: “Roo-e-zameen par tumhare alaawa aur koi shakhs aisa nahi hai jo is waqt namaz padh raha ho”. Un dino’n ahle madina ke laawa aur koi ye namaz nahi padhta tha.[344]

[863] Hazrat Ibne Abbas (rz) se riwayat hai ke unse kisi aadmi ne dariyaaft kiya: Aaya Rasool Allah (s) ke hamraah aap ko kabhi baahar haazir hone ka ittefaaq hua hai? Unho’n ne farmaya: Haa’n, aur agar mera martaba aur muqam Rasool Allah (s) ke yahaa’n itna na hota to main chote hone ki wajah se aapke saath haazir nahi ho sakta tha. Aap pehle us nishaan ke paas aae jo Kaseer bin Salat ke makan ke qareeb hai, waha’n aap ne khutba diya, phir aurto’n ke paas tashreef laae, unhe’n wa’az-o-naseehat ki, aur sadqa-o-khairat karne ka hukum diya. Chunache koi aurat (apni baali, koi anghoti aur koi) apne zewar ki taraf haath badha kar usey utaar kar Hazrat Bilal (rz) ki chadar mein daalne lagi. Uske baad aap Hazrat Bilal (rz) ke hamraah apne ghar laut aae.[345]

Faaeda: In ahadees se maaloom hua ke bacche jab sinn-e-shaoor ko pohonch jaae’n to wo eidain aur janazo’n mein shirkat kar sakte hain aur unhe’n wazoo bhi karna hoga, agarche wo un ahkaam ke mukallaf nahi, taaham unhe’n aadat daalne ke liye in baato’n par sighar-sini[346] hi mein amal karaana chaahiye.

Baab 162: Raat Aur Andhere Mein Masturaat Ka Masjido’n Ki Taraf Jaana

[864] Hazrat Ayesha (rza) se riwayat hai, unho’n ne farmaya ke ek (1) martaba Rasool Allah (s) ne namaz-e-isha mein takheer kardi, yahaa’n tak ke Hazrat Umar (rz) ne ba-awaaz-e-buland aapko pukaara ke aurte’n aur bacche so gae hain. Uske baad Nabi (s) baahar tashreef laae aur farmaya: “Ahle zameen mein se tumhare alaawa koi bhi is namaz ka muntazir nahi hai”. Un dino’n madina ke alaawa kahee’n namaz nahi padhi jaati thi. Aur log surkhi ghayab hone ke baad raat ki pehli tihaai tak isha ki namaz padh lete the.[347]

[865] Hazrat Ibne Umar (rz) se riwayat hai, wo Nabi (s) se bayan karte hain ke aap ne farmaya: “Agar raat ke waqt tumhari aurte’n masjid mein jaane ki ijaazat maange’n to unhe’n ijaazat dedo”.

Iske mataaba-at Shu’ba ne ki hai, wo Amash se bayan karte hain, unho’n ne mujahid se riwayat kiya hai, wo Ibne Umar se wo Nabi (s) se bayan karte hain.[348]

Baab 163: Logo’n Ka Namaz Ke Baad Imam Ke Uthne Ka Intezar Karna

[866] Nabi (s) ki zauja-e-mohtarma Umme Salama (rza) se riwayat hai, unho’n ne farmaya: Rasool Allah (s) ke ahad-e-mubarak mein khawateen farz namaz se salaam pherne ke fauran baad uth jaati thee’n, jabke Rasool Allah (s) aur mard hazraat jis qadar Allah ko manzoor hota, namaz ke baad apni jagah par baithe rehte. Phir jab Rasool Allah (s) uthte to doosre mard bhi khade ho jaate.

[867] Hazrat Ayesha (rza) se riwayat hai, unho’n ne farmaya: Rasool Allah (s) jab namaz-e-subah se farigh hote to aurte’n apni chadaro’n mein lipti hui waapas hoti thee’n, aur andhere ki wajah se unhe’n pehchaana nahi jaata tha.[349]

[868] Hazrat Abu Qatada (rz) se riwayat hai, unho’n ne kaha ke Rasool Allah (s) ne farmaya: “Jab main namaz ke liye khada hota hoo’n to chahta hoo’n ke namaz ko lamba karoo’n, phir kisi bacche ke rone ki wajah se usey mukhtasar kar deta hoo’n. Mabaada[350] uski maa’n ko mashaqqat mein mubtalaa kar du’n”.[351]

[869] Hazrat Ayesha (rza) se riwayat hai, unho’n ne farmaya: Agar Nabi (s) ko in haalaat ka ilm hota jo aurto’n ne aaj paida kar liye hain to yaqeenan unhe’n masjid mein jaane se manaa kar dete. Jaisa ke Bani Israel ki aurto’n ko rok diya gaya tha. (Yahya bin Saeed kehte hain ke) Maine Hazrat Amrah se dariyaaft kiya: Waaqai Bani Israel ki aurto’n ko rok diya gaya tha? Unho’n ne jawab diya: Haa’n.

Baab 164: Aurto’n Ka Mardo’n Ke Peeche Namaz Padhna

[870] Hazrat Umme Salama (rza) se riwayat hai, unho’n ne farmaya: Rasool Allah (s) jab salaam pherte to khwateen aapke salaam pherte hi jaane ke liye uth-khadi hotee’n. Jabke Aap (s) khade hone se qabl thodi der apni jagah thehre rehte. Imam Zohri kehte hain ke hamaare khayaal ke mutaaibq aap is liye aisa karte, taake aurte’n mardo’n se pehle-pehle rawaana ho jaae’n.[352] والله أعلم

[871] Hazrat Anas (rz) se riwayat hai ke Nabi (s) ne ek (1) din Umme Sulaim (rza) ke ghar mein namaz padhi to main aur ek (1) lakda yateem aapke peeche khade hue, jabke Umme Sulaim (rza) ne hamaare peeche saff-bandi ki.[353]

Baab 165: Subah Ki Namaz Ke Waqt Aurto’n Ke Jaldi Waapas Jaane Aur Masjid Mein Kam Theherne Ka Hukum

[872] Hazrat Ayesha (rza) se riwayat hai ke Rasool Allah (s) subah ki namaz mu’n andhere padhte the, chunache momino’n ki aurte’n jab namaz padhkar waapas jaatee’n to andhere ki wajah se pehchaani nahi jaati thee’n, yaa wo khud ek doosre ko nahi pehchaan sakti thee’n.[354]

Baab 166: Aurat Ka Masjid Mein Jaane Ke Liye Apne Shauhar Se Ijaazat Lena

[873] Hazrat Ibne Umar (rz) se riwayat hai, wo Nabi (s) se bayan karte hain ke aap ne farmaya: “Jab tum mein se kisi ki aurat (masjid jaane ke liye) ijaazat maange to wo usey manaa na kare”.[355]

Faaeda: Ijaazat lene ka muaamala sirf masjid ke saath khaas nahi, balke aurat ko chaahiye ke wo eidain aur apne kisi aziz ki qabar ki ziyaarat ke liye bhi apne shauhar se ijaazat le, jab mubaah[356]  aur jaaez kaamo’n mein ijaazat lena zaroori hai to faraaez-o-mustahabaat ki adaaegi bhi shauhar ki ijaazat ke baghair nahi honi chaahiye. Masalan: Adaae shahadat, yaa fariza-e-hajj ki adaaegi ke liye baahar jaana yaa apne waledain aur aziz-o-aqaarib ki mulaqaat ke liye jaana, ye sab kaam khaawind ki ijaazat par mauqoof hain.[357]

Tambeeh: Muhammad Fawwad ke nuskhe mein is jagah saabeqa Baab: 164 apni dono hadeeso’n (870 aur 871) ki nai tarqeem: 874 aur 875 ke saath mukarrar laaya gaya hai. Jabke asal nuskhe mein ye takraar nahi hai. Is liye is takrar ko ham ne hazaf kar diya hai.

[1] Surah Maida: 58

[2] Surah Juma: 9

[3] T: (ناقُوْس) Ghanta, lakdi ka ghanta, shank [Rekhta]

[4] Dekhiye: 605, 607, 3457

[5] Sunan Abu Dawood: Al Azaan: H499

[6] راجع: 603

[7] T: (اَلَاؤ) Thand se bachne ke liye haath aur badan taapne ke liye jalaai jaani waali lakdi, ghaas-poos ka jalta hua dher [Rekhta]

[8] راجع: 603

[9] T: (جُفْت) Joda, har shae jo do (2) ho’n [Rekhta]

[10] راجع: 603

[11] Sunan Abu Dawood: Al Azaan: H502

[12] Sunan Abu Dawood: Al Azaan: H499

[13] T: (گُوز) Paadna, riyaah khaarij karna [Rekhta]

[14] Dekhiye: 1222, 1231, 1232, 3285

[15] Dekhiye: 3296, 7548

[16] راجع: 371

[17] Dekhiye: 613, 914

[18] راجع: 612

[19] Dekhiye: 4719

[20] Saheeh Muslim: As Salah: H849(384)

[21] T: Sureen ki jamaa, chootad [Rekhta]

[22] Dekhiye: 654, 721, 2689

[23] Dekhiye: 668, 901

[24] Deljoue” 620, 623, 1918, 2656, 7248

[25] Dekhiye: 1173, 1181

[26] Saheeh Bukhari: at Tatawwua’u التطوع H1181

[27] Dekhiye: 1159

[28] راجع: 617

[29] Dekhiye: 5298, 7247

[30] Dekhiye: 1919

راجع: 617

[31] Saheeh Bukhari: As Saum: H1919

[32] Dekhiye: 627

[33] راجع: 503

[34] Saheeh Muslim: Salat ul Musafireen: H1938(836)

[35] Dekhiye: 994, 1123, 1160, 1170, 6310

[36] راجع: 624

[37] 630, 631, 658, 685, 819, 2848, 6008, 7246

[38] راجع: 535

[39] راجع:628

[40] T: (سِیاق) Kisi ibaarat mein kisi lafz ya qaul ke aage-peeche ka matan [Rekhta]

[41] T: (مَرجُوح) Kamzor [Rekhta]

[42] راجع:628

[43] Dekhiye: 666

[44] راجع:187

[45] راجع:187

[46] Dekhiye: 908

[47] Sunan al Kubra lil Baheqhi: V2 P299

[48] Surah Juma 62: 10

[49] Dekhiye: 638, 909

[50] Fath-ul-Baari: V2 P158

[51] راجع: 637                                                                      

[52] راجع: 275

[53] راجع: 275

[54] راجع: 596

[55] Dekhiye: 643, 6292

[56] راجع: 642

[57] H642

[58] Dekhiye: 657, 2420, 7224

[59] Dekhiye: 649

[60] راجع: 176

[61] Surah al Isra: 78;

 راجع: 176

[62] راجع: 645

[63] Dekhiye: 2472

[64] Dekhiye: 720, 2829, 5733

[65] راجع: 615

[66] Dekhiye: 656, 1887

[67] راجع: 655

[68] راجع: 644

[69] راجع: 628

[70] T: (مانع) Rukaawat, rokne waala, manaa karne waala [Rekhta]

[71] راجع: 176

[72] T: (نَوعِیَّت) Soorat-e-haal, kaifiyat, haalat [Rekhta]

[73] Dekhiye: 1423, 6479, 6806

[74] راجع: 572

[75] T: (راتِبَہ) Wo sunnate’n jin ke adaa karne ki taakeed ki gai hai, magar jo faraaez mein shaamil nahi [Rekhta]

[76] راجع: 198

[77] Saheeh Bukhari: Al Maghaazi: H4445

[78] T: (گِھسَٹ) Zameen par ragadta hua chalna, kheench kar aana ya jaana [Rekhta]

[79] راجع: 198

[80] T: (باد و باراں) Tez hawaae’n aur baarish, aandhi-toofaan bhari baarish [Rekhta]

[81] راجع: 632

[82] راجع: 424

[83] T: (روندتے) Paamaal karte hue, paaon se kuchalte/khundalte hue [RSB]

[84] راجع:616

[85] Haashiya as Sindi: V1 P123

[86] Dekhiye: 813, 836, 2016, 2018, 2027, 2036, 2040

[87] Dekhiye: 1179, 6080

[88] Dekhiye: 5465

[89] T: (عُجْلَت) Jaldi, jald-baazi, phurti [Rekhta]

[90] Dekhiye: 5463

[91] Dekhiye: 674, 5464

[92] T: (مُؤَیَّد) Jis ki taaeed ki jaae, jis ki himaayat ki jaae [Rekhta]

[93] Fath-ul-Baari: V2 P209

[94] راجع:673

[95] راجع: 208

[96] Dekhiye: 5363, 6039

[97] Dekhiye: 802, 818, 824

[98] T: (سِہ بارَہ) Teesri baar, teesri martaba [Rekhta]

[99] Dekhiye: 3385

[100] T: (گِرْیے) Rona, aansu bahaana, aansuo’n se rone ki soorat-e-haal [Rekhta]

[101] راجع: 198

[102] T: (بَشاشَت) Khushi, shaadmaani, masarrat [Rekhta]

[103] Dekhiye: 681, 754, 1205, 4448

[104] راجع: 680

[105] راجع: 198

[106] راجع: 198

[107] Dekhiye: 1201, 1204, 1218, 1234, 2690, 2693, 7190

[108] راجع: 628

[109] راجع: 424

[110] T: (اِحْتِرازی) Ehteraaz se mansoob [Rekhta]

[111] T: (فِرِسْتادَہ) Bheja hua, qaasid, safeer [Rekhta]

[112] راجع: 198

[113] Dekhiye: 1113, 1236, 5658

[114] راجع: 378

[115] Dekhiye: 747, 811

[116] T: (اَعْرابی) Arab ka baddu, dehaati [Rekhta]

[117] Dekhiye: 7175

[118] Saheeh Bukhari: Al Maghaazi: H4302

[119] Dekhiye: 696, 7142

[120] T: (مُخَنَّث) Ek (1) shakhs jo rajooliyat se mehroom ho, naa-mard, hijda [Rekhta]

[121] راجع: 693

[122] راجع: 117

[123] راجع: 117

[124] راجع: 117

[125] Dekhiye: 701, 705, 711, 6106

[126] راجع: 700

[127] Fath-ul-Baari: V2 P254

[128] راجع: 90

[129] راجع: 90

[130] T: (آبْ پاشی) Paudo’n ya kheton ki seenchaai, paani ka chidkaao, paani daalne [Rekhta]

[131] T: بايں الفاظ

[132] راجع: 700

[133] T: (طُول دینا) Kisi mukhtasar baat ya amal ko badhaana, taweel banana [Rekhta]

[134] Dekhiye: 868

[135] T: (گِرْیہ) Rona, aansu bahaana, aansuo’n se rone ki soorat-e-haal [Rekhta]

[136] FB: V2 P262

[137] Dekhiye: 710

[138] راجع: 709

[139] راجع: 700

[140] T: (پَسْت) Dheema (lehje aur aawaaz waghaira ke liye) [Rekhta]

[141] راجع: 198

[142] راجع: 198

[143] راجع: 482

[144] راجع: 482

[145] Surah Yusuf: 86

[146] راجع: 198

[147] Dekhiye: 719, 725

[148] T: (مُمتَنَع) Jis ka wujood naamumkin ho, muhaal, dushwaar [Rekhta]

[149] Umdatul Qaari: V2 P34

[150] راجع: 718

[151] راجع: 653

[152] T: (قُرْعَہ اَنْدازی) Faisla mushkin hone ki soorat mein kisi ek (1) shakhs ke taayyun ke liye parcho’n par naam likh kar daalne ka amal, taake jis shakhs ke naam ki parchi nikal aae usi ko falaan cheez di jaae ya falaan kaam sonpa jaae [Rekhta]

[153] راجع: 615

[154] Dekhiye: 734

[155] Sunan Abu Dawood: As Salah: H662

[156] راجع: 117

[157] راجع: 380

[158] راجع: 117

[159] T: (حائِل) Beech mein aane waala, rokne waala, Aad, rok [Rekhta]

[160] Dekhiye: 730, 924, 1129, 2011, 2012, 5861

[161] Fath-ul-Baari: V2 P278

[162] راجع: 729

[163] Dekhiye: 6113, 7290

[164] راجع: 378

[165] راجع: 378

[166] T: (ماہِیئت) Kisi amr ya shae ki haqeeqat, haqeeqat-e-haal, asliyat, asal kaifiyat, khusoosiyat [Rekhta]

[167] راجع: 722

[168] Dekhiye: 736, 738, 739

[169] راجع: 735

[170]   راجع: 735

[171] راجع: 735

[172] Saheeh Ibne Khuzaima: V1 P243 H479

[173] Musnad Ahmad: V2 P226

[174] راجع: 418

[175] راجع: 419

[176] Silsila Ahadees us Saheeha: H1183

[177] Dekhiye: 2364

[178] Dekhiye: 760, 761, 777

[179] راجع: 690

[180] راجع: 93

[181] Sunan Nasai: At Tatbeeq: H1161

[182] T: (اُچَک) Kisi cheez ko jhapat lene ki kaifiyat [Rekhta]

[183] Dekhiye: 3291

[184] راجع: 373

[185] T: (اِسْتِثْنائی) Exceptional, khaas [RSB]

[186] Fath-ul-Baari: V2 P33

[187] Saheeh Bukhari: Al Azaan: H684

[188] راجع: 406

[189] راجع: 680

[190] Hujjatullahil Baaligha: V2 P4

[191] Dekhiye: 793, 6251, 6252, 6667

[192] راجع: 755

[193] Dekhiye: 762, 776, 778, 779

[194] T: (جُن٘بِش) Harkat, halchal, hilna-julna [Rekhta]

[195] راجع: 746

[196] راجع: 736

[197] راجع: 759

[198] Fath-ul-Baari: V2 P319

[199] Dekhiye: 4429

[200] Dekhiye: 3050, 4023, 4854

[201][201] Dekhiye: 768, 174, 1078

[202][202] Dekhiye: 769, 4952, 7546

[203] راجع: 766

[204] راجع: 767

[205] راجع: 755

[206] T: (تَغَیُّر پَذِیر) Tabdeel hone waala, tabdeeli qubool karne waala [Rekhta]

[207] راجع: 541

[208] Fath-ul-Baari: V2 P327

[209] Dekhiye: 4921

[210] T: (جِہْر) Ooonchi aawaaz se padhna ya dohraana, buland aawaaz [Rekhta]

[211] Surah Maryam: 64

[212] Surah Ahzaab: 21

[213] T: (مثانی) Surah Baqara se Surah Tauba tak pehli saat (7) surah, in he’n saba-masaani bhi kehte hain [RSB]

[214] T: (مُفَصَّلات) Mufassal ka itlaaq Surah Qaaf se Surah Naas tak hota hai. Inki teen (3) qisme’n hain:

Tawaal Mufassal: Surah Qaaf se Surah Mursalaat tak

Ausaat Mufassal: Surah Naba se Surah Lail tak

Qisaar Mufassa: Surah Duhaa se Surah Naas tak [RSB]

[215] T: Urdu pdf mein Arabi aur Urdu matan dono jagah lafz-e-م hai. Isi liye maine yahan bhi aise hi likha hai [RSB]

[216] Dekhiye: 4996, 543

[217] راجع: 759

[218] راجع: 746

[219] راجع: 759

[220] راجع: 759

[221] Dekhiye: 6402

[222] Saheeh Ibne Khuzaima: V1 P286

[223] T: (سُمَيِّ) Inka poora naam Sumai Maula Abi Bakr bin Abdur Rahman al Haaris hai [RSB]

[224][224] Dekhiye: 4475

[225] Saheeh Ibne Khuzaima: V2 P287 H572

[226] Sunan Kubra lil Bayhaqi: V2 P59

[227] Al Musannaf Abdur Razzaaq: V2 P96-97

[228] Al Musannaf Ibne Abi Shaiba: V2 P189

[229] Sunan Abu Dawood: As Salah: H572

[230] Dekhiye: 786, 826

[231] T: Namaz mein ek rukn se doosre rukn mein jaate waqt ki takbeer [RSB]

[232] T: (دانِسْتَہ) Jaan-boojh kar, qasdan [Rekhta]

[233][233] Fath-ul-Baari: V2 P349

[234] T: (طَبْعی) Fitri, qudrati [Rekhta]

[235] Dekhiye: 789, 795, 803

[236] راجع: 748

[237] راجع: 787

[238] راجع: 785

[239] راجع: 389

[240] T: (طَمانِیَت) Itmenaan, tasalli [Rekhta]

[241] Dekhiye: 801, 820

[242] راجع: 757

[243] T: (تَعْدِیلِ اَرْکان) Arkaan-e-namaz ka sukoon aur itmenaan se adaa karna [RSB]

[244] Dekhiye: 817, 4293, 4967, 4968

[245] راجع: 785

[246] Dekhiye: 3228

[247] Dekhiey: 804, 1006, 2932, 4560, 4598, 6200, 6393, 6940

[248] Dekhiye: 821

[249] T: (دَورانِیَہ) Muqarrara waqt, arsa [Rekhta]

[250] راجع: 792

[251] راجع: 677

[252] راجع: 785

[253] راجع: 797

[254] راجع: 378                                                                    

[255] T: (سوخْتَہ) Jala hua, jali hui ashyaa, raakh [Rekhta]

[256] T: (نُمو) Badhne ki kaifiyat, badhne ka amal, afzaaish [Rekhta]

[257] T: (عَرْض پَرْداز) Darkhwaast guzaar, arz karne waala [Rekhta]

[258] Dekhiye: 6573, 7437

[259] Saheeh Bukhari: Kitab ul Azaan: H828

[260] راجع: 389

[261] Dekhiye: 810, 812, 815, 816

[262] راجع: 809

[263] راجع: 690

[264] راجع: 809

[265] T: (تَعَیُّن) Muaiyyan karna, mahdood karna, makhsoos karna [Rekhta]

[266] T: 21, 23, 25, 27, 29 [RSB]

[267] T: (مَطْلَع) Fiza, aasmaan (baadal hone ya na hone kaifiyat) [Rekhta]

[268] راجع: 669

[269] راجع: 669

[270] Fath-ul-Baari: V2 P386

[271] راجع: 809

[272] راجع: 809

[273]  راجع: 794

[274] راجع: 677

[275] راجع: 628

[276] راجع: 792

[277] راجع: 800

[278] راجع: 241

[279] راجع: 677

[280] Ghareeb ul Hadees li Abi Ishaq al Harbi: Baab A’ajn (عجن): V2 P525

[281] Silsila Ahadees uz Zaeefa: V2 P392

[282] راجع: 784

[283] T: (چار زانُو) Aalti-paalti maare hue [Rekhta]

[284] T: (خَمِیدَہ) Jhuka hua, kham khaaya hua, muda hua [Rekhta]

[285] T: (اِفْتِراش) Tasshahud mein baae’n paao’n ko phailaa kar us par baithne aur daae’n paao’n ko khada karne ka amal [Rekhta]

[286] T: (سُرِین) chootad [Rekhta]

[287] Sunan Abu Dawood: As Salah: H731

[288] Saheeh Muslim: As Salah: H1307 (579)

[289] Dekhiye: 830, 1224, 1225, 1230, 6670

[290] راجع: 829

[291] Dekhiye: 835, 1202, 6230, 6265, 6328, 7381

[292] Dekhiye: 833, 2397, 6368, 6375, 6376, 6377, 7129

[293] راجع: 833

[294] Dekhiye: 6326, 7388

[295] راجع: 831

[296] T: (اِسْتِعاذے) Allah Ta’ala ki panaah maangne ka amal, panaah maangna [Rekhta]

[297] Saheeh Muslim: Al Masaajid: H1324(588)

[298] T: Sabab se, wajah se, hukum se, mutaabiq [Rekhta]

[299] T: (اِسْتِعاذَہ) Panaah maangna [RSB]

[300] راجع: 669

[301] Dekhiye: 849, 850

[302] Sunan Abu Dawood: As Salah: H618

[303] راجع: 618

[304] راجع: 77

[305] T: (مَعِیَّت) Saath hone ki haalat ya kaifiyat, saath hona [Rekhta]

[306] راجع: 424

[307] Fath-ul-Baari: V2 P418

[308] Dekhiye: 842

[309] راجع: 841

[310] T: (دائِمی عَیش) Hamesha ki zindagi, aaraam, hayaat, lazzat, aasoodgi [RSB]

[311] Dekhiye: 6329

[312] T: (تَوَن٘گَری) Tawanaai, maaldaari, daulat-mandi, be-niyaazi [Rekhta]

[313] Dekhiye: 1477, 248, 5975, 6330, 6473, 6615, 7292

[314] Dekhiye: 1143, 1386, 2085, 2891, 3236, 3354, 4674, 6096, 7047

[315] Dekhiye: 1038, 4147, 7503

[316] T: (جوار بھاٹا) Muraad chaand-o-sooraj ki siqli (se mansoob) quwwato’n aur zameen ki gardish ke majmooi asaraat ki wajah se samandari satah ka utaar-chadhaao [Rekhta]

[317] T: (مَدّ و جَزْر) Samandar ke paani ka chadhaao-utaar [Rekhta]

[318] T: (مَوقُوف) Munhasir [Rekhta]

[319] T: (مُؤَخَّر) Alag, alaaheda, judaa [Rekhta]

[320] راجع: 572

[321] راجع: 837

[322] T: (قَبْل اَزِیں) Isse qabl, pehle se, pehle hi [Rekhta]

[323] راجع: 837

[324] T: (سُرْعَت) Jaldi, tezi, phurti, tez-raftaari [Rekhta]

[325] T: (مَبَادا) Khuda na kare, khuda-na-khwaasta, aisa na ho ke [Rekhta]

[326] Dekhiye: 1221, 143, 6275

[327] T: (دانِسْتَہ) Jaan-boojh kar, qasdan [Rekhta]

[328] T: (گندنے) Ise english mein Leek aur urdu mein Kurraas (کُرّاث) kehte hain, ye ek qism ka saagh hai jiske khaane se mu’n mein ek bad-boo rehti hai [RSB]

[329][329] Dekhiye: 4215, 4217, 4217, 5521, 5522

[330] T: (تَقَدُّس) Azmat, buzurgi [Urduinc]

[331] T: (مَرجُوح) Kamzor [Rekhta]

[332] Dekhiye: 855, 5452, 7359

[333] راجع: 854

[334] Dekhiye: 4541

[335] T: (مَعِیَّت) Kisi ki maujoodgi mein, hamraahi mein, saath-saath [Rekhta]

[336] Dekhiye: 1247, 1319, 1321, 1322, 1326, 1336, 1340

[337] Dekhiye: 879, 880, 895, 2665

[338] T: Urdu pdf mein khada hi likha hai. [RSB]

[339] T: (شُنِید) Sunaai, sunwaai, suna hua [Rekhta]

[340] T: (تائِید) Madad, taqwiyat, himaayat [Rekhta]

[341]  Surah as Saaffaat: 102

راجع: 117

[342] T: (قَرِیبُ الْبُلُوغ) Baaligh hone ke qareeb, baaligh hone waala [Rekhta]

 [343] راجع: 117

 [344] راجع: 566

 [345] راجع: 98

[346] T: (صِغَر سِنی) Bachpan [Rekhta]

 [347] راجع: 566

[348] Dekhiye: 873, 899, 900, 5238

[349] راجع: 372

[350] T: (مَبَادا) Khuda na kare, khuda-na-khwaasta, aisa na ho ke [Rekhta]

[351] راجع: 707

[352] راجع: 837

[353] راجع: 380

[354] راجع: 372

[355] راجع: 865

[356] T: (مُبَاح) Shariyat ke muwaafiq, jaaez, rawaa, halaal [Rekhta]

[357] Umdatul Qaari: V4 P653

✯✯✯✯✯✯✯✯✯✯✯✯✯