Hazrat Salmah Bin deenar (رحمہ اللہ)

(Urf Abu Haazim Al Ala’raj)

Main ne Hikmat-o-Danish me Abu Haazim say badh kar koi naa dekha. (Abdul Rehman Bin Zaid)

 

97 Hijri ko Khalifat ul muslimeen Suleiman Bin Abdul Malik Hazrat Ibrahim علیہ السلام ki awaaz par labbaik kehte huye Diyaar-e-Muqaddasah ki ziyarat kay liye kamarbastah huye aur shaahi qaafilah ki sawariyaan daarul hukumat say tez qadam uthaati hui Madinah munawwarah ki taraf rawaan dawaan huin, Unkay dil Masjid-e-Nabwi me namaz padhne aur Rozah-e-Rasool علیہ السلام par Darood-o-Salaam ka hadiyah pesh karnay ka shoq mauzan tha. Is shaahi qaafiley me Qurraa’, Muhaddiseen, Fuqahaa, Ulamaa, Governor  aur General shaamil thay. Jab Khalifat ul muslimeen ka Wurood-e-Mas’ood Madinah munawarrah main hua, Amaaideen-e-Madina unhein khush aamdeed kehnay kay liye mushtaqaana andaaz main unkay paas aaye, Lekin Faqih-e-Madina un khush aamdeed kehnay walon me shaamil na tha.

Khalifat ul muslimeen Suleiman Bin Abdul Malik jab khush aamdeed kehnay walon kay istaqbaal say farigh hua to apnay chand hamnasheenon say mukhaatib hua. Farmaaya: Meri baat ghaur say suno.

Ma’dniaat ki tarah insaani dil bhi zang aalood ho jate hain. Dilon ka zang utaarnay kay liye zaroori hai keh gaahe bagaahe koi saahib dilsoz andaaz main Waa’z-o-Nasihat karta rahe. Haashiah nasheeno ne bayak zubaan ho kar kaha: Ameer ul Momineen darust farmaaya aapne.

Khalifat ul muslimeen ne pucha: kya Madinah munawwarah main koi aisa khush naseeb shakhs hai jis ne Ashaab-e-Rasool علیہ السلام ko dekha ho takeh ham us kay Waa’z-o-Nasihat se apnay dilon ki ujdi bastian aabaad kar sakain, Aur apnay khizaan rasidah dilon ko Bahaar-e-Aashna kar sakain.

Hazireen ne bataaya Ameer ul Momineen yahan Abu Hazim Al’raaj rehte hain farmaaya: Abu Hazim Ala’raaj kaun hai?

Hazreen ne kaha: Woh Madinay kay Faqeeh Qazi, Mufti aur aisaa Taba’ee hai jisay aksar Sahaba karaam رضي اللہ عنهم say mulaqaat ka sharf hasil hua hai, Khalifa ne kaha: Us Azeem ul martabaat shakhsiyat ko Adab-o-Ahtraam say hamaary paas laao. Chand ahbaab unki taraf gaye aur unhein Khalifa kay paas bulaa laye. Khalifat ul muslimeen ne unhein khush aamdeed kaha aur mohabbat say apne paas bithaya, Aur pucha Abu Hazim yeh bewafaai kaisi hai?

Farmaaya: Ameer ul Momineen Khudaa khair kare aap ne meri taraf say kaun si bewafaai dekhi hai?

Khalifa ne kaha: Madinah kay tamaam baasi mulaqaat kay liye aaye magar aap na aaye. Farmaaya: Ameer ul Momineen bewafai, Dosti, Mohabbat aur aashnayi kay baad hua karti hai, Lekin aap aaj say pehle mujhe jaante na thay aur na hi main ne kabhi aap ko dekha tha. To phir bewafaai mujh say kesay sarzard ho gayi?

Khalifa ne apnay hamnasheenon say kaha: Dekha Abu Hazim ka istadlaal? Isay kehte hain ilmi ista’daad, Hazir dimaghi, Aur bedaar maghzi.

Phir Abu Hazim ki taraf mutawajjah huye aur farmaaya:

Abu Hazim meray dil me bohat say aham sawalaat gardish kar rahe hain aap say unka tasalli bakhash jawaab chahtaa hoon, Farmaaya: Ameer ul Momineen sawaal kijye durust jawaab sujhaane ki Allah Ta’ala  taufeeq dega.

Khalifa ne pucha: Abu Hazim ham maut say kyun ghabraate hain?

Farmaaya: Ham ne apni duniya ko aabaad kar liya aur apni aakhirat barbaad kar li lehazah ham aabaadi say wiraane ki taraf jaate huye ghabraate hain.

Khalifa ne kaha bohat khoob. Aap ne bilkul durust jawaab farmaaya.

Khalifa ne pucha Abu Hazim kaash mujhe ilm ho jaye keh Allah Ta’ala  ne meray liye aakhirat me kya rakha hai?

Farmaaya apnaa amal Allah ki kitaab par pesh karo us ka jawaab paa lo gay.

Pucha kitaabullah mein is ka jawaab kahan milega?

Farmaaya: Is ka jawaab darjzail Aayat-e-Kareema me maujood hai:

اِنَّ الْاَبْرَارَ لَفِيْ نَعِيْمٍ  13۝ۚ وَاِنَّ الْفُجَّارَ لَفِيْ جَحِيْمٍ  14۝ښ

“Bilashubah naik janat me honge aur faajir jahannum me”

Khalifa ne pucha Allah ki rehmat kahan paai jaati hai?

Abu Hazim ne kaha: Allah ki rehmat mohsinon kay qareeb hai.

Khalifa ne kaha: Kaash mujhe maloom ho jaay keh qiyamat kay roz Allah Ta’ala kay haan haaziri kaisi rahegi?

Abu Hazim ne kaha: Naik insaan us shakhs ki tarah Darbaar-e-Ilaahi me haazir hoga jo chand din apne ghar say ghair haazir raha ho aur phir woh raazi khushi apne ghar lout aata hai, Aur gunehgaar us bhagode ghulaam ki tarah hoga jisay haank kar us kay aaqa ki taraf laaya jata hai. Khalifa yeh baat sunkar zaar-o-qataar rone laga yahan tak keh us ki hichki bandh gayi.

Phir kaha: Abu Hazim hamaari islaah kaise hogi?

Farmaaya: takabbur chod do aur aazji aur inksaari ko apna lo.

Khalifa ne pucha: Maal-o-Doulat me taqwa kesay ikhtiyaar  kya jay?

Abu Hazim ne kaha: Maal-o-Doulat me taqwa ikhtiyaar karnay ki surat yeh hai:

• Apna haq wasool karo.
• Haqdaaron par maal kharch karo.
• Ri’aaya par Adl-o-Insaaf se kharch karo
• Aur masaawat ko apnaao.

Khalifa ne kaha: Abu Hazim mujhe yeh batayen logon me sab say afzal kaun hai? 

Farmaaya: Baa zameer, Khuddaar aur parhaizgaar shakhs.

Khalifa ne kaha: Abu Hazim sab say zyada insaaf par mabni kaun si baat hai?

Farmaaya: Woh Haq-o-Sadaaqat ki baat jo aik shakhs us kay samnay bhi barmala keh deta hai jis say woh dartaa hai aur us kay samnay bhi jiss say woh mohabbat karta hai.

Khalifa ne pucha kaun si du’aa jald qabool hoti hai? Farmaaya nek ki du’aa neekon kay haq me.

Khalifa ne pucha kaun sa sadqah afzal hai?

Farmaaya: Aik ghareeb muflis aur kangaal aadmi mehnat say kamaa kar kisi haajatmand ki zaroorat ko puraa kare aur phir usay na kabhi koi takleef de aur na hi ahsaan jatlaay yeh us ghareeb ki taraf say sab say afzal sadqah hoga.

Khalifa ne pucha: Abu Hazim logon me aqalmand insaan kaun hai?

Farmaaya: Jo shakhs Allah Ta’ala ki ita’at Kary Allah kay ahkamaat par amal kary aur doosre logon ki is taraf rehnumaai kare.

Khalifa ne pucha: Abu Hazim logon me sab say zyadah ahmaq kaun hai?

Farmaaya: Apne dost ki khwahish kay mutabiq zindagi basar kare goya us ne apni aakhirat ko doosre ki duniya ki khaatir barbaad kar diya.

Mere nazdeek aisaa shakhs sab say bada ahmaq hai.

Khalifa ne daryafat kya: Abu Hazim kya aap hamary sath rehna pasand kareinge? Aap ham say faida uthayen aur ham aap say faidah uthayenge.

Farmaaya: Ameer ul Momineen hargiz nahi. Main apne haal me hi rehna pasand karunga baadshahoon ki Musaahbat-o-Rifaaqat mujhe pasand nahi

Khalifa ne pucha aakhir kyun?

Farmaaya: Mujhe andeshah hai agar main ne aap par thora saa bhi aitemaad kar liya to Allah Ta’ala apni hifaazat ka haath mujh say peeche hata lenge aur is tarah main duniya ki mushaqqat aur aakhirat kay azaab ka Tahkhta-e-Mashq ban jaaonga.

Khalifa ne kaha: Abu Hazim koi apni zaroorat hamain batayen. Aap khaamosh rahe aur koi jawaab na diyaa.

Khalifa ne dubara kaha: Abu Hazim kuch to irshaad farmayen ham aap kay kaam aana chahte hain aur aap ki khidmat bajaa laana apne liye sa’adat gardaante hain. Khalifa ne bohot zyada israar kiya to irshaad farmaaya: Meri zaroorat yeh keh aap mujhe jahannum say bachaa lein aur jannat me daakhil kar dein.

Khalifa ne kaha: Abu Hazim yeh to meray bas me nahi.

Abu Hazim ne kaha: Ameer ul Momineen is kay ilaawah meri koi zaroorat nahi.

Khalifa ne kaha: Abu Hazim meray liye du’aa karein.

Abu Hazim ne du’aa kay liye haath uthaaye aur kaha:

Ilaahi tera banda Suleiman agar teray doston me say hai to isay Duniya-o-Aakhirat me bhalaai atta kar. Agar yeh teray dushmanon say hai to is ki islaah kar isay us raaste par chalaa jo tera pasandeeda raasta hai. Hazireen me say aik ne kaha: Jab say Ameer ul Momineen kay paas baithe baatain kar rahe ho yeh baat tum ne sab say buri kahi hai tum ne Ameer ul Momineen ko Allah ka dushman keh kar unhein takleef di hai.

Abu Hazim boly: Aqal kay andhe! Kaisi buri baat apni zubaan par laa rahe ho. Allah ne Ulamaa say yeh Ahad-o-Paimaan liya hai keh woh haq baat barmala kehte rahein. Allah Ta’ala ne apne Nabi علیہ السلام ko hukm diya:

لَتُبَيِّنُنَّهٗ لِلنَّاسِ وَلَاتَكْتُمُوْنَهٗ

“Yaad rakho Ulamaa Anbiya kay waaris hain”

Phir Khalifa ki taraf dekha aur farmaaya:

Ameer ul Momineen woh log jo ham say pehle guzre hain woh us waqt tak sahi raaste par gaamzan rahe jab tak hukmaraan Ulamaa kay paas ilm, Amal aur taqwa hasil karnay kay liye dili Shoq-o-Raghbat kay sath haazir hote rahe. Phir aise kameene aur laalchi log aay jinhonne ilm haasil kiya. Phir hukmaraanon kay darbaar me duniyaawi fawaaid hasil karne kay liye Jabeen-e-Niyaaz ragarne lage.

Is tarah hukmaraan Ulamaa say Bezaar-o-Beniyaaz ho gaye. Aise Ulamaa Zaleel-o-Khuwaar huye. Woh bayak waqt hukmaraanon aur Allah ki nigah say girr gaye. Agar Ulamaa hukmaraanon say beniyaaz rehte to yaqeenan hukmaraan Ulamaa ki taraf raghbat karte. Lekin Ulamaa ne hukmaraanon ki taraf lalchaai hui nazron say dekha jis se woh unki nigaahon me Zaleel-o-Khuwaar ho gaye.

Khalifa ne kaha: Abu Hazim aap bilkul sach kehte hain.

Abu Hazim mujhe aur Wa’az-o-Nasihat kijye main ne aaj tak koi aisa Shakhs nahi dekha jo aap say badh kar Haq-o-Sadaaqat ki baat barmala kehnay wala ho.

Farmaaya: Agar aap unlogon me se hain jin kay dilon par achi baat asar karti hai to jo ab tak keh chuka hoon woh kaafi hai, Aur agar aap ka shumaar unme say nahi to phir main khaali teer chalane kay haq me nahi.

Khalifa ne kaha: Abu Hazim main qasam de kar kehta hoon aap mujhe zaroor koi wasiyat karein.

Farmaaya: suniye! main aik mukhtasir wasiyat karta hoon.

Apnay Rab ki taazeem karo aur yeh koshish karo keh Allah tujhe wahan dekhe jahan rehne ka hukm diya hai aur wahan kabhi na dekhe jahan say us ne mana kya hai.

Phir alwidaa’i salaam kaha aur chale gaye.

Khalifa ne kaha: Aye khair khaah aalim! Allah aap ko Jazaa-e-Khair ataa kare.

Abu Hazim abhi ghar pohnchay hi thay keh Ameer ul Momineen ne dinaaron say bhari thaili bheji aur saath hi yeh tehreeri paighaam bhi irsaal kiya. Abu Hazim yeh raqam aap kay kharche kay liye hai aur is jaisa maal meray paas bohat hai aap ne woh thaili wapis bhej di aur saath hi yeh tehreer likh bheji.

Ameer ul Momineen: Main Allah kay Huzoor panah maangta hoon is baat say keh teray sawalaat mazaaq ban jayen aur mera jawaab dena baatil thehre.

Aye Ameer ul Momineen! Bakhudaa main yeh apne liye pasand nahi kartaa aap kay liye kaise pasand kar saktaa hoon? Ameer ul Momineen agar yeh deenaar meri us deeni guftagu kay sabab diye gaye hain jo main ne aap say ki hai to main iztaraari haalat me murdaar aur khanzeer ka gosht is say kahin zyada behter samjhtaa hoon, Agar musalmaanon kay bait ul maal say aap ne meraa haq diya hai to kya aap ne tamaam musalmaanon me yeh haq barabar taqseem kiya hai?

Abu Hazim Salmah Bin deenaar ke ghar ilm haasil karne waalon aur tarbiyat ki dili raghbat rakhne waalon kay liye Chashma-e-Rahmat bana hua thaa wahan apno aur paraon se yaksaan sulook rawa rakhaa jaata thaa. Aik din Abdul Rehmaan Bin Jareer ne apne Farzand-e-Arjumand kay hamrah Abu Hazim kay paas aaye. Adab-o-Ahtraam say baithay salaam arz kya aur Duniya-o-Aakhirat ki behtari kay liye du’aa go huye, Aap ne salaam ka jawaab bade hi ahsan andaaz me diya dono ko khush aamdeed kaha: Phir Silsilah-e-Guftagu shuru hua. Abdul Rehmaan Bin Jareer ne unse kaha: Abu Hazim dil ko bedaar rakhne ka kya tariqa hai?

Farmaaya: Insaani zameer agar zinda ho to Gunah-e-Kabira se ijtenaab ka jazba dil me maujzan hota hai.

Jab insaan gunah tark karne ka pukhtah iraadah kar leta hai to us ka dil Khuwaab-e-Ghaflat se bedaar ho jata hai.

Phir farmaaya: Abdul Rehmaan meri yeh baat kabhi na bhoolna duniya ka qaleel Maal-o-Mataa ne aakhirat ki kaseer naimton se hamain ghaafil kar rakha hai. Har woh naimat jo tujhe Allah Ta’ala kay qareeb na kar de woh bilashubah aik azaab hai. Bete ne sawaal kiya: Hamaare mashayekh bohat hain ham in me se kis ki iqtada karein?

Farmaaya: Beta aap us Sheikh ki iqtada karein jo dili taur par Allah se darta ho aur kisi aib me mulawwis hone se bachta ho jisne Unfawaan-e-Shabaab me apni islaah kar li ho aur budhaape tak bure kaamon se bachne ka musammam iraadah kar rakha ho.

Betaa yeh baat khoob achhi tarah jaan lain har din jiss me aftaab tuloo hota hai Talib-e-Ilm kay seene me do jhagarne walon ki tarah khwahishaat aur ilm ki kashmakash hoti hai. Jis din us ka ilm khwahishaat par ghaalib aa jata hai woh din aur lamhe us kay liye ghanimat hote hain.

Aur jis din us ki khwahishaat ilm par ghaalib aa jayen to woh din us kay liye nahoosat aur nuqsaandeh hota hai. Abdul Rehmaan Bin Jareer ne pucha: Abu Hazim aap ne hamain Aksar-o-Beshtar Allah ka shukr bajaa laane ki talqeen ki mujhe yeh batayen shukr ki haqiqat kya hai?

Farmaaya: Hamaare jism kay tamaam a’azaa Allah Ta’ala  ki naimat hain lehazah har Naimat-e-Uzuu ka shukr karna ham par waajib hai.

Abdul Rehmaan ne puchaa: Naimat-e-Chasham shukr kya hai?

Farmaaya: Agar apni aankhon se Khair-o-Bhalaai dekho to us ka izhaar karo aur agar buraai dekho to us ko chupaao yehi aankhon ki naimat ka shukr hai.

Abdul Rehmaan ne puchaa: Naimat-e-Kaan ka shukr kya hai?

Farmaaya: Apne kaan se koi Kalmah-e-Khair suno to use yaad rakho aur agar buri baat suno to use bhulaa do.

Abdul Rehmaan ne puchaa: Haathon ki naimat ka shukr kya hai?

Farmaaya: Haathon se woh cheez na pakdo jo teri nahi aur na hi inkay zariye kisi ka haq maaro.

Abdul Rehmaan meri yeh baat yaad rakho jo sirf zubaan se shukr adaa kartaa hai aur is kay saath apne dil aur jismaani a’zaa ko shareek nahi kartaa us ki misaal us shakhs ki si hai jo libaas pakad kar khada hai aur use zebtan na kare bilashubah yeh libaas baghair pehne use garmi ya sardi se nahi bacha saktaa.

Aik dafa Abu Hazim Salmah Bin deenaar Raah-e-Khudaa me Jazbah-e-Jihad se sarshaar sar Zameen-e-Rome ki taraf jaane waale lashkar-e-Islam kay hamrah chale. Jab yeh lashkar safar ki aakhri manzil par pahuncha to dushman se nabard aazma hone se pehle kuch deir sustaane aur aaram karne kay liye aik jagah padao kiya. Lashkar ka General Banu Umaiyya  me se thaa. Us ne Abu Hazim ko bulaane kay liye aik qaasid ko bheja. Usne aa kar paighaam diya keh Ameer-e-Lashkar aap ko bulaate hain taake aap unse aham masaail par guftagu karein aur baaz pechida masaail unhein samjhayen. Aap ne Ameer-e-Lashkar ko tehreeri jawaab diya: Likhte hain Ameer-e-lashkar main ne Ahl-e-Ilm ko duniya ki taraf apnaa deen aur ilm uthaa kar le jate huye nahi dekha kya aap chahte hain keh main pehlaa aisa badnaseeb kehlaoon?

Agar aap ko zaroorat hai to mujhe bulaane ki bajaye khud chal kar meray paas tashreef laayen.

Jab Ameer-e-lashkar ne khat padhaa to khud chal kar unkay paas aaye. Salaam kaha aur buland darjaat ki du’aa di aur kaha: Abu Hazim! Aap ki tehreer ne hamaare dilon me halchal machaa di, Is ne aap ki Izzat-o-Ahtraam ko dobalaa kar diya, Aur hamaare dilon par aap kay Rob-o-Dabdaba ki dhaak baith gayi. Aur ham baa adab aap kay hazoor chale aaye. Allah aap ka bhala kare hamain Waa’z-o-Nasihat kijye.

Aap ne jee bhar kar unhein Waa’z-o-Nasihat se nawaza.

Pand-o-Nasaaih me aik jumlah yeh bhi thaa: Aakhirat me jis cheez ki distyaabi aur waabastagi chaahte ho usey khoob zehen nasheen kar lo. Phir duniya me harees ban kar us kay liye koshan raho. Ameer-e-Lashkar is baat ko khoob achi tarah jaan lo. Agar aap par baatil, Jhoot aur naahaq ghaalib aa gaya to jhoote aur munafiq log aap kay ird gird jamaa ho jayenge aur agar Haq-o-Sadaaqat aap kay haan marghoob ho to naik dil aur Ahl-e-Khair aap kay ird gird jamaa hon gay aur woh Sidaq-o-Dil se aap kay muaawin banenge ab aap kay liye jo pasand ho woh ikhtiyaar  kar lijiye.

Jab Abu Hazim Salmah Bin deenaar ki mout ka waqt qareeb aaya aap kay qaribi saathion ne pocha: Abu Hazim! In naazuk lamhaat main kya mehsoos karte ho?

Farmaaya: Agar ham us sharr se bach jayen jis ka irtikaab duniya main kiya to woh sharr hamain koi nuksaan nahi dega jo ham se lapet liya gaya, Phir yeh Aayat-e-Kareema tilaawat ki:

اِنَّ الَّذِيْنَ اٰمَنُوْا وَعَمِلُوا الصّٰلِحٰتِ سَيَجْعَلُ لَهُمُ الرَّحْمٰنُ وُدًّا 96؀

“Yaqeenan jo log Imaan le aaye hain aur Amaal-e-Saleh kar rahe hain, Anqareeb Rehmaan unkay liye dilon me mohabbat paida kar dega“

Yeh aayat baar baar padhte rahe yahan tak keh rooh Qafas-e-Unsari sy parwaaz kar gayi.

Hazart Abu Hazim Salmah Bin deenaar kay mufassal Halaat-e-Zindagi maloom karne kay liye darjzail kitaabon ka mutal’a karein:

1: Tabaqat-e-Khalifah                                                                     264 2: Tarikh-e-Tabari                                                                              2/78 3: Al Tarikh ul Sageer                                                                        2/47 4: Al Jarh wal Tadeel                                                                         4/159 5: Hilyat ul Awliya                                                                              3/229 6: Tahzeeb ul Tahzeeb                                                                       4/143 7: Tahzeeb Ibn-e-Asakir                                                                  6/216-228 8: Khulasah Tahzeeb ul Kamal                                               147

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer