04. MUSALMAAN AURAT KA MUSHRIK AUR KAFIR AURAT SE PARDAH

مسلمان عورت کا مشرک اور کافر عورت سے پردہ

ارشاد باری تعالیٰ (أَوْ نِسَآئِہِنَّ ) کی تفسیر میں مفسرین کافر اور مشرکہ عورت کو شامل نہیں کرتے یعنی مسلمان عورت کی دایہ مشرکہ عورت نہیں بن سکتی اور نہ مشرک عورت مومن عورت کے ساتھ حمام میں داخل ہو سکتی ہے۔ 

علامہ البانی رحمته اللّٰه فرماتے ہیں کہ (نِسَآئِہِنَّ) کی یہی تفسیر صحیح ہے جو سلف صالحین سے بغیر کسی اختلاف کے مروی ہے کہ اس میں سے مراد صرف مسلمان عورتیں ہیں نہ کہ کافر عورتیں۔ دیکھیے زادالمسیر ۱۳۲/۶

بعض ہم عصر فضلاء کی یہ تفسیر کہ اس سے نیک سیرت و نیک خصلت عورتیں مراد ہیں چاہے وہ مسلمان ہوں یا کافر، ایک نئ تفسیر ہونے کے ساتھ ساتھ تفسیر سلف کے خلاف ہے اور عربی اسلوب کلام سے بھی مطابقت نہیں رکھتی۔ کیونکہ اللّٰه تبارک و تعالیٰ نے(نِسَآئِہِنَّ) میں اضافت مسلمان عورتوں کی طرف کی ہے۔ یہی وجہ ہے کہ عورت اپنے قرابت داروں کے سامنے اپنی باطنی زینت کا اظہار کر سکتی ہے اور بلخصوص شوہر کے سامنے تو ہر ایسی زینت کا اظہار کرے گی جس کا اظہار اپنے محرم اور قریبی رشتے داروں کے سامنے بھی نہیں کر سکتی۔ نیز اللّٰہ تعالیٰ کا فرمان ہے:
وَ لْيَضْرِبٰنَ بِخُمُرِهِنّ عَلَى جُىُوبِهِنَّ
یعنی “ اپنے دوپٹوں کو اپنے گریبان پر ڈال لیں۔” اس بات کی دلیل ہے کہ عورت اپنی گردن چھپا کر رکھے گی۔ چنانچہ گردن ظاہری زینت کے بجائے باطنی زینت میں شمار ہو گی اور یہی حکم ہار اور دوسرے زیورات کا بھی ہے۔
( حجاب المرأۃالمسلمۃ)

یہودی عورتیں حضرت عائشہ رضى الله عنہا کے پاس آیا کرتی تھیں اور ان کے چہرے اور ہاتھوں وغیرہ کو دیکھا کرتی تھیں، البتہ مردوں کو اس کی اجازت نہ تھی۔ چنانچہ چہرہ اور ہاتھ اہل کتاب ذمی عورتوں کے حق میں زینت ظاہرہ شمار ہوں گی، البتہ اہل کتاب ذمی عورت کے لیے یہ جائز نہیں کہ مسلمان عورت کی باطنی پوشیدہ زینت کو دیکھے۔ زینت کو ظاہر کرنے اور چھپانے کا معیار یہی ہے کہ عورت کسی کے لیے بھی صرف وہی زینت ظاہر کر سکتی ہے جس کا اظہار کرنا اس کے لیے جائز ہے۔

یعنی عام حالات میں بھی عورت اپنی ظاہری زینت کے علاوہ اپنا باقی جسم دوسری عورت سے چھپائے گی، لیکن اگر کسی شرعی عارضہ جیسے علاج، ولادت اور دیگر ضروریات کی بنا پر اپنا خفیہ ستر کھولنا پڑ جائے تو اس میں بھی مسلمان عورت کا انتخاب کرنا چاہیے۔