181. Fatwa dene mein tawaqquf karna

Fatwa dene mein tawaqquf karna

[Sawaal]

Ek ‘aalim ke liye fatwa se tawaqquf ke Kia asbaab ho sakte hain?

[Jawab]

Ek ‘aalim fatwa dene ka Ahl ho aur us ke paas ‘ilm bhi ho to woh fatwa dene se tawaqquf ya to dalaail ke ta’arruz ki wajah se kare ga ya is wajah se ke us ke nazdeek mustafti (Fatwa talab karne waala) ghair sanjeeda ho ga kyunke ba’az mustafti haqq ma’loom karne ke liye fatwa talab nahi karte balkeh un ka maqsad khel tamasha aur yeh dekhna hota hai ke yeh ‘aalim iska Kia jawaab deta hai? Doosra Kia aur teesra iska Kia jawaab deta hai? Lehaaza aisi soorat-e-haal mein ek ‘aalim tawaqquf karta ya jawaab dene se e’iraaz karta hai, Jab ke us se yeh ‘ilm ya zan-e-ghaalib ho ke yeh shakhs khel tamaasha kar raha hai, Yeh mehez logon ka jaaiza lena chaahta hai ya yeh chaahta hai ke ba’az aqwaal ka sahaara le kar ba’az ko rad kar de aur yeh soorat pehli se bhi ziyaada sangeen hai kyunke us soorat mein woh yeh kehta hai ke falaan ‘aalim yeh kehta hai aur falaan yeh (Hum kis ki baat maanen aur kis ki na maanen lehaaza nateeja yeh hota hai ke wo koi baat bhi nahi maanta) Yeh soorat bhi un asbaab mein se hai jin ki wajah se ek mufti fatwa dene mein tawaqquf se kaam leta hai.

__Shaikh Ibn-e-‘Usaymeen__