183. Aimmah-e-Arb’a ne apni taqleed ko laazim qaraar nahi diya

Aimmah-e-Arb’a ne apni taqleed ko laazim qaraar nahi diya

[Sawaal]

Bohat se Fiqhi masaail mein ‘Ulama-e-Islam mein ikhtilaaf hai. ‘Ulama-e-Islam se meri muraad Aimmah-e-Arb’a hain. To sawaal yeh hai ke Kia kisi ek mazhab se waabasta shakhs ke liye yeh jaaiz hai ke woh kisi masla mein kisi doosre mazhab ke qawl ko jo us ke munaasib haal ho ikhtiyaar kare maslan mera ta’lluq ek aise mazhab se hai jis mein Zeenat ke liye iste’maal hone waale zewaraat mein Zakaat nahi hai jab ke main ne bohat se doosre ‘Ulama se yeh suna hai ke un mein bhi Zakaat hai, Khulaasa yeh ke Kia ek musalmaan ke liye yeh jaaiz hai ke woh ek mazhab se waabasta hote hue kisi masla mein kisi doosre mazhab ki raae ko ikhtiyaar kar le jab ke us se Fiqhi masaail ka Khaatir khawaah ‘ilm ho?

[Jawab]

Beshak ek musalmaan ka maqsad-o-matloob-e-haqq hai. Woh jab bhi haqq ko paata hai us ke mutaabiq ‘amal karta hai. Aimmah-e-Arb’a ne kisi ko bhi is baat ka paaband nahi kiya ke woh har cheez mein un ki taqleed kare, Unhon ne sirf yeh bataaya hai ke un ke nazdeek pasandeedah aur qaabil-e-tarjeeh qawl kon sa hai aur doosron ko unhon ne hukm yeh diya hai ke agar doosron ke qawl mein unhein haqq mil jaae to us se le lein Allah ke nazdeek koi shakhs bhi kisi ek Imaam ke qawl ka paaband nahi hai ke woh har cheez mein us ki taqleed kare, Isi tarah kisi ke liye yeh bhi jaaiz nahi ke woh takhfeef ya khuwaaish-e-nafs ki pairwi mein rukhsaton ya ‘Ulama ki laghzishon ya un ki ghaltiyon ko dhoondta phirey aksar Aimmah jo zewaraat mein Zakaat ke qaail nahi hain, Unhon ne us se iste’maal ki ashyaa par qiyaas kiya ya ba’az Sahaaba Karaam رضي الله عنهم se manqool aasaar se istadlaal kiya hai jab ke sahih aur marf’oo Ahadees se yeh saabit hai ke zewaraat mein bhi Zakaat farz hai, Jo Zakaat adaa na kare us ke liye sakht wa’eed aai hai lehaaza yeh daleel qiyaas aur aasaar ki nisbat qaabil-e-tarjeeh hai yehi wajah hai ke ‘Ulama-e-muhaqqiqeen ne iss se ikhtiyaar kiya hai.

__Shaikh Ibn-e-Jibreen__