223. Peshaab ki nijaasat se bachiye

Peshaab ki nijaasat se bachiye

[Sawaal]

Kabhi kabhi Namaz se faraaghat ke ba’d ma’loom hota hai ke mere kapdon par peshaab ke cheente ya koi nijaasat lagi hoi hai. Us nijaasat ka inkishaaf kabhi doosre din bhi hota hai, To kia meri saabqa Namaz durust ho gi? Kia nujh par ioi cheez laazim ho gi?

[Jawab]

Peshaab waghaira ki nijaasat se bachne ke liye ehtiyat se kaam lijiye. Jab peshaab karne ka ‘amal mukammal ho jaae to phir istanja aur Wuzu ko shur’u kijiye. Agar qatre girne ya musalsal al-bol ki shikaayat hai to Namaz se qareeban ek ghanta pehle peshaab kijiye. Qatron ke band hone ka intezaar kijiye aur jab band ho jaaein to phir Wuzu kijiye. Agar yeh soorat waswasa ki wajah se ho to phir apne kapde aur shalwaar waghaira par paani ke cheente maar lijiye taa ke ke shaitaan yeh na keh sake ke yeh tari peshaab ki hai. Aur agar musalsal al-bol ki shikaayat mustaqil ho to usi haalat mein Namaz jaaiz hai lekin Wuzu azaan ke ba’d kijiye. Agar peshaab ke qatre band ho gae hon aur tum tari ko dekho aur yeh yaqeen ho jaae ke yeh tari Namaz se pehle ki hai to phir ehtiyaat yeh hai ke us Namaz ko dohra liya jaae aur agar mehez shak ho to phir Namaz dohraane ki zaroorat nahi (In sha Allah Ta’ala).

__Shaikh Ibn-e-Jibreen__