374. Jahaalat ki wajah se Surah Fatiha ka na padhna

Jahaalat ki wajah se Surah Fatiha ka na padhna

[Sawaal]

Hum chaar ashkhaas jungle mein the ke Namaz-e-Maghrib ka waqt ho gaya. Hum mein se ek ne azaan kahi aur Namaz padhaai lekin doosri raka’at mein us neu Surah Fatiha na padhi. Jab hum mein se ek shakhs ne us se Subhaan Allah keh kar mutanabba kiya to phir bhi Imaam ne Surah Fatiha na padhi balkeh Surah Al-Kafiroon padh di aur phir Namaz khatam karte hue sajdah-e-Sahav bhi na kiya, To is mauz’o par hamare darmiyaan behs hoi. lehaaza baraaye Karaam rehnumaai farmaaiye Kia is soorat mein sajdah-e-Sahav karna chaahiye tha ya nahi? Allah Ta’ala aap ko jaza-e-khair se nawaaze!

[Jawab]

Yeh mazkoora Namaz baatil hai aur iss se dobaraah padhna laazim hai kyunke doosri raka’at mein Surah Al-Fatiha nahi padhi gai. Muqtadiyon par waajib tha ke Imaam ko Surah Fatiha yaad dila dete Maslan un mein se ek Surah Fatiha ki ibtidaai Aayat padh deta to us se Imaam ko yaad aa jaata aur agar woh haalat-e-qayaam mein Surah Fatiha padh leta to Namaz mukammal ho jaati aur agar woh Namaz se faraaghat ke ba’d us raka’at ko jis mein us ne Surah Fatiha nahi padhi dobaraah padh leta aur sajdah-e-Sahav kar leta to phir bhi Namaz ho jaati.

Ab chun ke us ne doosri raka’at mein Surah Fatiha nahi padhi aur Surah Fatiha padhna Namaz ka rukan hai to us ke na padhne ki wajah se yeh raka’at baatil ho gai. Imaam ne chun ke salaam pher diya tha aur ab is par taweel zamaana guzar chuka hai lehaaza yeh Namaz hi baatil hoi. Fatiha ke tark karne ka nuqsaan sajdah-e-Sahav se poora nahi ho sakta kyunke Surah Fatiha ka padhna Namaz ka rukan hai lehaaza us Namaz ko dobaraah padhna ho ga. Wallah Al-Mawafiq

____Shaikh Ibn-e-Jibreen