483. Jab Namazi ko raka’at ki tadaad ke baare mein shak ho

Jab Namazi ko raka’at ki tadaad ke baare mein shak ho

[Sawaal]

Main ne ba’az Deeni kitaabon mein yeh padha hai ke jab Namaz khadi ho aur Namazi ko raka’at ki ta’daad mein shak ho to us ki yeh Namaz baatil ho gi aur ba’az kitaabon mein yeh likha hai ke jab Namazi ko shak ho to woh Namaz khatam hone ke ba’d do sajde kare. Un mein se sahih baat kon si hai?

[Jawab]

(Sahih baat yeh hai ke Namaz baatil na ho gi kyunke is qism ka shak aksar-o-beshtar soorton mein ghair ikhtiyaari taur par hota hai aur jis se Namaz mein shak ho, Us ke baare mein Nabi Kareem (ﷺ) ne hukm bayaan farmaaya hai. Aur shak ki do qismein hain:)

(1) Insaan ko raka’at ki tadaad mein shak ho aur un mein se ek pehlu ko woh tarjeeh de sakta ho to is haalat mein woh qabil-e-tarjeeh soorat par e’itmaad kare ga aur usi ke mutaabiq Namaz mukammal kar ke salaam ke ba’d sajdah-e-Sahav kare ga.

(2) Insaan ko raka’at ki tadaad mein shak ho aur un mein se koi bhi pehlu qaabil-e-tarjeeh na ho, To woh kam tadaad par bana kare ga kyunke kam tadaad yaqeeni aur zaaid mashkook hai lehaaza kam ko buniyaad banaate hue Namaz ko mukammal kar ke salaam se pehle Sahav ke do sajde kare ga aur is se us ki Namaz baatil na ho gi Yeh to hai raka’at ki tadaad ke baare mein shak ka hukm. Isi tarah agar us se yeh shak ho ke us ne doosra sajdah kiya hai ya nahi, Ruko’ kiya hai ya nahi? To is soorat mein bhi jo pehlu us ke qareeb qaabil-e-tarjeeh ho, Us ke mutaabiq ‘amal kare, Namaz ko mukammal kar le aur salaam ke ba’d sajdah-e-Sahav kar le. Aur agar koi pehlu qaabil-e-tarjeeh na ho to us ke mutaabiq ‘amal kare, Jis mein ziyaada ehtiyaat ho Yaane us Ruko’ ya sajdah ko kare, Jis ke baare mein shak ho aur phir baaqi Namaz ko poora kar ke salaam se pehle sajdah-e-Sahav kare haan albatta jab woh us rukan ki jagah tak pohanch jaae jis ke tark mein shak ho, To doosri raka’at us raka’at ke qaaim maqaam ho jaae gi jis ke kisi rukan ko us ne tark kiya hai.

__Shaikh Ibn-e-‘Usaymeen__