508. Mein Fajr ki Sunnatein adaa kar raha tha ke mu’azzin ne azaan shur’u kar di

Mein Fajr ki Sunnatein adaa kar raha tha ke mu’azzin ne azaan shur’u kar di

[Sawaal]

Mein subah ki Namaz ke liye Masjid mein daakhil hoa aur main ne do raka’at padhna shur’u kar din’ Jab mein doosri raka’at ke liye uth raha tha to mu’azzin ne subah ki azaan kehni shur’u kar di. Main ne jo do raka’at shur’u kin to woh subah ki Sunnaton ki niyyat se shur’u ki thi kyunke mein jab ghar se nikla to ba’az Masjidon mein azaan ho rahi thi. Jab mein Namaz se faarigh hoa to main ne Qur’an-e-Majeed padhna shur’u kar diya, To mere paas bethe hue ek shakhs ne mujh se kaha ke utho subah ki Sunnatein padh lo Main ne kaha ke main ne unhein padh liya hai, To us ne kaha aap ne chunki us waqt padhi thin, Jab mu’azzin azaan keh raha tha aur yeh jaaiz nahi lehaaza zaroori hai ke aap unhein dobaraah padhein. Umeed hai aap is silsila mein mustafeed farmaaein ge?

[Jawab]

Agar mu’azzin ne azaan der se di hai aur aap ne Sunnatein tul’u-e-Fajr ke ba’d padhi hain to aap ki taraf se Sunnat par ‘amal ho gaya aur yeh Sunnatein jo aap ne padhi hain kaafi hon gi aur un ke dohraane ki zaroorat nahi hai aur agar aap ko shak ho aur yeh ‘ilm na ho ke us mu’azzin ki azaan jis se sun kar aap ne Namaz shur’u ki thi, Us ki azaan subah ke ba’d hai ya tul’u-e-Fajr ke waqt hai to phir afzal yeh hai aur ziyaada ehtiyaat bhi Isi mein hai ke aap un do raka’at ko dobaraah padh lein taa ke yaqeen ho jaae ke aap ne unhein tul’u-e-Fajr ke ba’d adaa kiya hai.

__Shaikh Ibn-e-Baaz__