595. Cigrette nosh Imaam ki Imaamat

Cigrette nosh Imaam ki Imaamat

[Sawaal]

Kia aise Imaam ki iqtida mein Namaz jaaiz hai jo cigrette noshi karta ho?

[Jawab]

Cigrette noshi Haraam hai kyunke ab yeh baat paaya-e-saboot ko pohanch chuki hai ke yeh muzar-e-sehat hai, Yeh khabees cheez hai, Is mein israaf aur fazool kharchi bhi hai aur Allah Ta’ala ne farmaaya hai:

وَيُحَرِّمُ عَلَيۡهِمُ الۡخَبٰۤئِثَ

(Al-E’iraaf 7157)

“Aur napaak cheezon ko un par Haraam thehraatein hain.”

Jahan tak cigrette noshi karne waale Imaam ki iqtida mein Namaz adaa karne ka ta’aluq hai to agar us ki iqtida mein Namaz tark karne se Namaz-e-Jumm’a ya Namaz-e-ba jama’at Faut hoti ho ya koi fitna runuma hota ho to akhaf-ul-zarareen (Badi kharaabi ki nisbat choti kharaabi ko ikhtiyaar karna) ke usool par ‘amal karte hue us Imaam ke peeche Namaz adaa karna waajib ho ga aur agar ba’az log us ke peeche Namaz chod dein aur is se tark-e-Jumm’a ya tark-e-jama’at laazim na aae Koi aur bhi nuqsaan na ho aur Imaam ke peeche Namaz na padhne se us se tanbeeh bhi ho aur woh is tarah cigrette noshi se ba’az aa jaae to is soorat mein us ke peeche Namaz chod dena jaaiz ho ga taake us se sarzanish ho aur woh us Haraam ‘amal ke irtikaab se ba’az aa jaae aur yeh ‘amal inkaar-e-munkir ke qabeel se ho ga aur agar us Imaam ke peeche Namaz tark karne se koi nuqsaan bhi na ho, Tark-e-Jumm’a-o-jama’at bhi laazim na aae aur na Imaam hi us se koi sabaq seekhe to phir koshish ki jaae ke kisi aise Imaam ki iqtida mein Namaz padhi jaae jo us ki tarah fasaq-o-ma’asiyat mein mubtala na ho, Is se Namaz ziyaada mukammal bhi ho gi aur Deen ki ziyaada hifaazat bhi. Wa billahu Al-Toufeeq

__Fatwa-e-committee__