آلاتِ موسیقی کا استعمال

آج ساری دنیا میں موسیقی اور میوزک کی دھوم ہے، ہر بچہ، بوڑھا، جوان، ادھیڑ اور ہر عمر کی عورتیں اس کی دلدادہ ہیں، ہر ایک کی یہ خواہش ہے کہ وہ تیز دھنوں میں طرح طرح کی موسیقی اور گانے سنے، فحش گانوں کی اس قدر بھر مار ہوگئی ہے کہ اکثر لڑکے او ر لڑکیاں عشقیہ گانے گانا اپنا پیدائشی حق سمجھ رہے ہیں، ٹی وی اور ڈش کی بدولت ساری دنیا کی فحاشی سمٹ کر گھر کے آنگن میں چلی آئی ہے، باقی رہی سہی کسر انٹر نیٹ نے پوری کردی ہے، اس میں کوئی شک نہیں کہ ٹی وی اور کیمرے کا استعمال کئی طرح کی انسانی ضروریات کے لئے جا ئز ہے بلکہ ضروری ہے، لیکن محدود فوائد کی طلب نے لا محدود برائیوں کو جنم دیا ہے، ہمارے ممالک میں لگے ہوئے چینلوں سے فحاشت اور عریانیت چھن چھن کر برس رہی ہے،بے پردگی اور عریانیت بلکہ بد کاری اور فحاشی کی گویا تعلیم دی جارہی ہے، جو مسلم نوجوانوں اور بچوں کے لئے زہر ہلاہل ہے۔ اس لئے کہ اسلامی شریعت کے پانچ مقاصد ہیں :

1) دین کی حفاظت۔2) عقل کی حفاظت۔ 3) نسب کی حفاظت۔ 4) جان کی حفاظت۔ 5) مال کی حفاظت۔

نوخیز نسل میں بڑھتی ہوئی بے حیائی اور فحاشی سے نسب کی حفاظت کا مقصد مشکل سے مشکل تر ہوتا جارہا ہے، اسی نسب کی حفاظت کے لئے اسلام نے زنا کاری کی، سنگساری جیسی سخت ترین سزا مقرر کی ہے، اور ہر اس ذریعے کا سدّ باب کردیا جو زنا کاری تک پہنچاتا ہے، جب کہ اکثر ٹی وی پروگرام فحش، جذبات بھڑکانے والے بے حیائی اور زنا کاری کی ترغیب دینے والے ہوتے ہیں اور ان وسائل کا ناجائز استعمال اس حد تک ہورہا ہے کہ چینلوں کی دنیا میں بیٹھ کر کوئی شخص شرم حیا اور عفّت وعصمت کی بات کرتا ہو تو دنیا اسے ایک دیوانے کی بڑ سمجھے گی، اس لئے والدین کے لئے ضروری ہے کہ وہ اپنے گھروں سے ٹی وی، ڈش، انٹر نیٹ کی لعنت کو دور کریں تاکہ ان کے ذریعے اپنی اولاد کو بگاڑ سے محفوظ رکھ سکیں اور والدین اپنے بچوں کے دل ودماغ میں رسول اﷲ صلی اللہ علیہ وسلم کے یہ فرامین نقش کرادیں جوآپ صلی اللہ علیہ وسلم نے موسیقی اور آلاتِ طرب وغناء کی برائی میں بیان فرمایا ہے :

1۔  وعن حارث بن أبی أسامۃ رضی اللّٰہ عنہ قال قال رسول اللّٰہ صلی اللّٰہ علیہ وسلم :

” إِنَّ اللّٰہَ بَعَثَنِیْ رَحْمَۃً وَّہُدًی لِلْعَالَمِیْنَ وَأَمَرَنِیْ أَنْ أَمْحَقَ الْمَزَامِیْرَ وَالْمَعَازِفَ وَالْخُمُوْرَ وَالْأَوْثَانَ الَّتِیْ تُعْبَدُ فِی الْجَاہِلِیَۃِ”( أحمد22272:)

تر جمہ : حارث بن ابی اسامۃ رضی اللہ عنہ سے مروی ہے کہ رسول اﷲ صلی اللہ علیہ وسلم نے ارشاد فرمایا :’’ اﷲ تعالی نے مجھے سارے جہانوں کے لئے رحمت اور ہدایت بنا کر بھیجا ہے، اور مجھے گانے بجانے کے آلات،موسیقی کا سامان، شراب اور ان بتوں کو جو زمانہء جاہلیت میں پوجے جاتے تھے،ختم کرنے کا حکم دیا ہے۔

2۔ عن النبی صلی اللّٰہ علیہ وسلم أنہ قال :” لَیَکُوْنَنَّ مِنْ أُمَّتِیْ أَقْوَامٌ یَسْتَحِلُّوْنَ الْحِرَ، وَالْحَرِیْرَ، وَالْخَمْرَ، وَالْمَعَازِفَ،وَلَیَنْزِلُنَّ أَقْوَامٌ إِلٰی جَنْبِ عَلَمٍ، یَرُوْحُ عَلَیْہِمْ بِسَارِحَۃٌ لَّہُمْ لِحَاجَۃٍ فَیَقُوْلُوْا : إِرْجِعْ إِلَیْنَا غَدًا، فَیُبَتِّہُمُ اللّٰہُ،وَ یَضَعَ الْعَلَمَ، وَیَمْسَخُ آخَرِیْنَ قِرَدَۃً وَخَنَازِیْرَ إِلٰی یَوْمِ الْقِیَامَۃِ” ( بخاری رضی اللہ عنہ 590:)

تر جمہ : میری امت میں کچھ قومیں ایسی ہونگی جو زنا، ریشم، شراب اور آلاتِ موسیقی کو حلال کرلیں گی۔ اور کچھ قومیں (عیاشیوں کے لئے ) ایک پہاڑ کے دامن میں قیام کریں گی، ان کے پاس ایک فقیر اپنی ضرورت کے لئے کچھ مانگنے کے لئے آئے گا، (اور وہ اپنی موج ومستی میں اس قدر غرق ہوں گے کہ) اس سے کہیں کہ تو کل آجانا۔ راتوں رات اﷲ تعالیٰ کا عذاب ان پر آجائے گا، اور وہ پہاڑ اٹھا کر ان پر رکھ دیا جائے گا اور ان میں سے جو بچے ہیں انہیں قیامت تک کے لئے بندر اور سُوربنادیا جائے گا.

3۔ عن أنس بن مالک رضی اللّٰہ عنہ قَالَ قَالَ رَسُوْلُ اللّٰہِ صلی اللّٰہ علیہ وسلم :

” لَیَکُو ْنَنَّ فِیْ ہٰذِہِ الْأُمَّۃِ خَسَفٌ وَ قَذَفٌ وَمَسَخٌ وَذٰلِکَ إِذَا شَرِبُوْا الْخُمُوْرَ وَاتَّخَذُوْا الْقَیْنَاتَ وَضَرَبُوْاَالْمَعَازِفَ “۔( ترمذي، صحیح )

تر جمہ : رسول اﷲ صلی اللہ علیہ وسلم نے فرمایا : اس امت کے لوگوں کو زمین میں دھنسادیا جائے گا، اور ان پر پتھروں کی بارش برسائی جائے گی، اور ان کے چہروں کو( بندر اور سوّر کی شکل میں ) بدل دیا جائے گا، اور یہ اس وقت ہوگا جبکہ شراب نوشی عام ہو جائے گی اور لوگ گانے والیوں کو مجرا سنانے کیلئے رکھیں گے، اور آلات موسیقی کا استعمال کریں گے.

4۔عن النبی صلی اللّٰہ علیہ وسلم أَنَّہُ قَالَ :

” صَوْتَانِ مَلْعُوْنَانِ فِی الدُّنْیَا وَالْآخِرَۃِ مِزْمَارٌ عِنْدَ نِعْمَۃٍ وَرَنَّۃٌ عِنْدَ مُصِیْبَۃٍ “۔[ رواہ البزار7513.حسن ]

ترجمہ : دو طرح کی آوازیں دنیا اور آخرت میں ملعون ہیں، نعمت کے وقت گانا بجانا اور مصیبت کے وقت چیخنا اور چلّانا۔

حواله جات : 

كتاب :  “اولاد كى اسلامى تربيت”

محمد انور محمدقاسم السّلفی