530. Witr ko dobaraah padhna jaaiz nahi

Witr ko dobaraah padhna jaaiz nahi

[Sawaal]

Ba’az Aimmah Ramzan ke aakhri ‘ishra mein raat ke pehle hissa mein bhi Witr padhte hain aur phir raat ke aakhri hissa mein bhi. Is ke baare mein aap ki Kia raae hai?

[Jawab]

Witr ko dobaraah padhna jaaiz nahi. Hadees mein aaya hai ke:

لا وِتْرَانِ فِي لَيْلَةٍ

(Sunan Abi Dawood, Kitaab Al-Witr, Baab fi Naqaz Al-Witr, 1439,-O- Sunan Tirmizi, Abwaab Al-Witr, Maa jaa laa Witraan fi Lailat, 470).)

“Ek raat mein do baar Witr nahi.”

Is liye ke raat ki Namaz ke liye hukm yeh hai ke woh Witr ho is liye ke Allah Ta’ala ki Zaat-e-Giraami taaq hai aur woh taaq ko pasand farmaata hai. lehaaza raat ko teen ya paanch ya saat ya nau waghaira ki tadaad mein Witr ko padha jaae. Agar koi shakhs Haram mein Imaam ke saath taraweeh padhe to us se ijaazat hai ke Imaam ke saath padhe hue Witr ko is tarah Shaf’a (Juft) bana le ke Imaam ke saath salaam pherne ke ba’d khada ho kar ek raka’at aur padh le aur phir raat ke aakhri hissa mein Namaz-e-Tahajjud ke ba’d Witr padhe to yeh afzal hai taake aakhri Namaz Witr ho aur agar Taraweeh ke ba’d Imaam-e-Awwal ke saath us ne Witr padh liye hon to phir aakhri Namaz Shaf’a (Juft) honi chaahiye taake ek raat mein do daf’a Witr na hon.Wallahu A’lam

__Shakh Ibn-e-Jibreen__